ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮಂಗಳವಾರ ಇರಾನ್‌ಗೆ ಮತ್ತೊಂದು ಬೆದರಿಕೆ ಹಾಕಿದ್ದಾರೆ. ‘ಅಂತಿಮ ಗಡುವು ಮುಗಿಯುವ ಮೊದಲು ಅಮೆರಿಕದ ಯುದ್ಧ ಬೇಡಿಕೆಗಳನ್ನು ಒಪ್ಪಿಕೊಳ್ಳದಿದ್ದರೆ, ಇರಾನ್‌ನ ಇಡೀ ನಾಗರಿಕತೆಯೇ ನಾಶವಾಗಲಿದೆ’ ಎಂದು ಹೇಳಿದ್ದಾರೆ.
ತಮ್ಮ ‘ಟ್ರುತ್ ಸೋಶಿಯಲ್’ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಟ್ರಂಪ್, “ಇಂದು ರಾತ್ರಿ, ಇಡೀ ನಾಗರಿಕತೆಯೊಂದು ಅಂತ್ಯವಾಗಲಿದೆ. ಅದು ಮತ್ತೆ ಎಂದಿಗೂ ಮರಳಿ ಬರುವುದಿಲ್ಲ. ಅಂತಹ ಘಟನೆ ನಡೆಯುವುದು ನನಗೆ ಇಷ್ಟವಿಲ್ಲ. ಆದರೆ, ಅದು ಸಂಭವಿಸುವ ಸಾಧ್ಯತೆಯಿದೆ” ಎಂದಿದ್ದಾರೆ.
ಈ ಹಿಂದೆ, ಮತ್ತೊಂದು ಪೋಸ್ಟ್ ಹಂಚಿಕೊಂಡಿದ್ದ ಟ್ರಂಪ್, “ಅಮೆರಿಕದ ಮಿಲಿಟರಿಯು ಇರಾನ್‌ನ ಸೇತುವೆಗಳು, ವಿದ್ಯುತ್ ಸ್ಥಾವರಗಳು ಹಾಗೂ ಇತರ ನಾಗರಿಕ ಮೂಲಸೌಕರ್ಯಗಳ ಮೇಲೆ ಬಾಂಬ್ ದಾಳಿ ನಡೆಸುವ ಮೂಲಕ ದೇಶವನ್ನು ‘ಶಿಲಾಯುಗ’ಕ್ಕೆ ತಳ್ಳಬಹುದು” ಎಂದು ಹೇಳಿದ್ದರು. ತೈಲ ಮತ್ತು ಇತರ ವಸ್ತುಗಳ ಸಾಗಣೆಗೆ ಬಳಸಲಾಗುವ ಆಯಕಟ್ಟಿನ ಜಲಮಾರ್ಗವಾದ ‘ಹಾರ್ಮುಜ್ ಜಲಸಂಧಿ’ ಮೇಲೆ ಇರಾನ್ ನಿರ್ಬಂಧ ಹೇರಿರುವುದನ್ನು ತೆರವುಗೊಳಿಸಲು ಬುಧವಾರ ಬೆಳಗ್ಗೆ 5:30ರವರೆಗೆ (ಭಾರತೀಯ ಕಾಲಮಾನ) ಸಮಯವಿದೆ ಎಂದು ಗಡುವು ನೀಡಿದ್ದರು.
