ಭಾರತ ಮತ್ತು ಅಮೆರಿಕ ನಡುವಿನ ವ್ಯಾಪಾರ ಮಾತುಕತೆಗಳ ಸಮಯದಲ್ಲಿ ಭಾರತವು ರಾಷ್ಯಾದ ಕಚ್ಚಾ ತೈಲ ಖರೀದಿಯ ಕುರಿತು ಉಲ್ಲೇಖಿಸಿದೆ. ಕಳೆದ ಕೆಲ ವಾರಗಳಲ್ಲಿ ರಷ್ಯಾದಿಂದ ಭಾರತವು ಖರೀದಿ ಮಾಡುತ್ತಿದ್ದ ಕಚ್ಚಾ ತೈಲದ ಪ್ರಮಾಣ ತೀವ್ರವಾಗಿ ಕುಸಿದಿದೆ ಎಂದು ಹೇಳಿಕೊಂಡಿದೆ ಎನ್ನಲಾಗಿದೆ. ಈ ಬೆನ್ನಲ್ಲೇ, ಟ್ರಂಪ್ ಆಡಳಿತವು ಭಾರತದ ಮೇಲೆ ಹೇರಿರುವ 25% ದಂಡದ ಸುಂಕವನ್ನು ಹಿಂಪಡೆಯುವ ಕುರಿತು ಪರಿಶೀಲಿಸಲಿದೆ ಎಂದು ಸೂಚಿಸಿದೆ.
ಟ್ರಂಪ್ ಆಡಳಿತಕ್ಕೆ ಮಣಿದು ಭಾರತವು ರಷ್ಯಾದ ತೈಲ ಖರೀದಿಯನ್ನು ಕಡಿತಗೊಳಿಸಿದೆ. ಹೆಚ್ಚುವರಿ ಸುಂಕ ಹೇರಿ ಒತ್ತಡ ಹಾಕುವ ಟ್ರಂಪ್ ತಂತ್ರವು ಫಲಿಸಿದೆ ಎಂದು ಅಮೆರಿಕ ಹಣಕಾಸು ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಹೇಳಿದ್ದಾರೆ. ತೈಲ ಖರೀದಿಯ ಕಡಿತಕ್ಕೆ ಅಮೆರಿಕದ ಒತ್ತಡ ತಂತ್ರವೇ ಕಾರಣವೆಂದು ವಿಶ್ಲೇಷಕರೂ ಹೇಳುತ್ತಿದ್ದಾರೆ.
ಸಂದರ್ಶನವೊಂದರಲ್ಲಿ ಮಾತನಾಡಿರುವ ಬೆಸೆಂಟ್, “ರಷ್ಯಾದೊಂದಿಗಿನ ತೈಲ ವ್ಯಾಪಾರಕ್ಕಾಗಿ ಭಾರತದ ಮೇಲೆ ಅಮೆರಿಕ 25% ಸುಂಕವನ್ನು ವಿಧಿಸಿದೆ. ಈ ಕ್ರಮವು ಫಲಿತಾಂಶಗಳನ್ನು ನೀಡಿದೆ” ಎಂದು ಹೇಳಿದೆ.
“ರಷ್ಯಾದ ತೈಲವನ್ನು ಖರೀದಿಸಿದ್ದಕ್ಕಾಗಿ ನಾವು ಭಾರತದ ಮೇಲೆ 25% ಸುಂಕಗಳನ್ನು ವಿಧಿಸಿದ್ದೆವು. ಈಗ ಭಾರತೀಯ ಸಂಸ್ಕರಣಾಗಾರಗಳು ರಷ್ಯಾದ ತೈಲವನ್ನು ಖರೀದಿಸುವಲ್ಲಿ ಕುಸಿತ ತೋರಿಸಿವೆ. ನಮ್ಮ ತಂತ್ರ ಯಶಸ್ವಿಯಾಗಿದೆ. ಅಮೆರಿಕ ಆಡಳಿತವು ಹೆಚ್ಚುವರಿ ಸುಂಕವನ್ನು ಅಡಿಲಿಸಲು ಮುಕ್ತವಾಗಿದೆ” ಎಂದು ಬೆಸೆಂಟ್ ಹೇಳಿದ್ದಾರೆ.
“ಭಾರತದ ಮೇಲೆ ಹೇರಲಾಗಿರುವ 25%+25%=50% ಸುಂಕಗಳು ಇನ್ನೂ ಜಾರಿಯಲ್ಲಿವೆ. ಈ ಪೈಕಿ, ದಂಡಾತ್ಮಕವಾಗಿ ಹೇರಲಾಗಿದ್ದ 25% ಸುಂಕವನ್ನು ತೆಗೆದುಹಾಕಲು ಅವಕಾಶವಿದೆ ಎಂಬುದಾಗಿ ನಾನು ಭಾವಿಸಿದ್ದೇನೆ” ಎಂದು ಹೇಳಿದ್ದಾರೆ.
ಕಳೆದ ವರ್ಷ (2025) ಆಗಸ್ಟ್‌ನಲ್ಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ರಷ್ಯಾ ಜೊತೆಗಿನ ತೈಲ ವ್ಯಾಪಾರವನ್ನು ಸ್ಥಗಿತಗೊಳಿಸುವಂತೆ ಭಾರತದ ಮೇಲೆ ನಿರಂತರ ಒತ್ತಡ ಹೇರಿದ್ದರು. ಆದಾಗ್ಯೂ, ಭಾರತವು ತೈಲ ಖರೀದಿಯನ್ನು ಮುಂದುವರೆಸಿತ್ತು. ಪರಿಣಾಮವಾಗಿ, ಭಾರತದ ಮೇಲಿನ ಸುಂಕವನ್ನು 50%ಗೆ ಹೆಚ್ಚಿಸಿದ್ದರು.
