ಅಮೆರಿಕದ ಪಡೆಗಳು ‘ಕೆಂಪು ರೇಖೆ’ ದಾಟಿದರೆ, ನಮ್ಮ ಪ್ರಾದೇಶಿಕ ವ್ಯಾಪ್ತಿಯನ್ನೂ ಮೀರಿ ತಿರುಗೇಟು ನೀಡುತ್ತೇವೆ ಎಂದು ಇರಾನ್‌ನ ರೆವಲ್ಯೂಷನರಿ ಗಾರ್ಡ್ಸ್ ಎಚ್ಚರಿಕೆ ನೀಡಿದೆ.
ಗಡುವು ಮುಗಿಯುವುದರೊಳಗೆ ಅಮೆರಿಕದ ಯುದ್ಧ ಬೇಡಿಕೆಗಳಿಗೆ ಇರಾನ್ ಒಪ್ಪಿಕೊಳ್ಳಬೇಕು. ಇಲ್ಲವೇ, ಇಂದು ರಾತ್ರಿ ಇರಾನ್‌ನ ನಾಗರಿಕತೆ ನಾಶವಾಗುತ್ತದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಬೆದರಿಕೆ ಹಾಕಿದ್ದಾರೆ. ಇಂತಹ ಬೆದರಿಕೆಗಳಿಗೆ ಪ್ರತಿಕ್ರಿಯಿಸಿರುವ ಇರಾನ್ ಸೇನೆ, “ಅಮೆರಿಕದ ಭಯೋತ್ಪಾದಕ ಸೈನ್ಯವು ಒಂದು ವೇಳೆ ಕೆಂಪು ಗೆರೆಯನ್ನು ದಾಟಿದರೆ, ನಮ್ಮ ಪ್ರತಿಕ್ರಿಯೆಯು ಕೇವಲ ಈ ಪ್ರದೇಶವನ್ನೂ ದಾಟಿ ಹೊರಗಿನವರೆಗೂ ವ್ಯಾಪಿಸಲಿದೆ. ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳು ಮುಂಬರುವ ಹಲವು ವರ್ಷಗಳ ಕಾಲ ಈ ಭಾಗದ ತೈಲ ಮತ್ತು ಅನಿಲದಿಂದ ವಂಚಿತವಾಗುವಂತೆ ಮಾಡುತ್ತೇವೆ” ಎಂದು ಎಚ್ಚರಿಸಿದೆ.
“ಅಮೆರಿಕದ ಪ್ರಾದೇಶಿಕ ಪಾಲುದಾರ ರಾಷ್ಟ್ರಗಳು ಸಹ ಒಂದು ವಿಷಯವನ್ನು ತಿಳಿದಿರಬೇಕು; ನಾವು ಈವರೆಗೆ ನೆರೆಹೊರೆಯ ಸಂಬಂಧದ ದೃಷ್ಟಿಯಿಂದ ಸಾಕಷ್ಟು ಸಂಯಮ ಪ್ರದರ್ಶಿಸಿದ್ದೇವೆ. ಪ್ರತಿಕ್ರಿಯೆ ನೀಡುವಾಗ ಗುರಿಗಳನ್ನು ಆಯ್ಕೆ ಮಾಡುವಲ್ಲಿ ಕೆಲವು ಮಿತಿಗಳನ್ನು ಹಾಕಿಕೊಂಡಿದ್ದೇವೆ. ಆದರೆ, ಈಗ ಅಂತಹ ಎಲ್ಲ ಮಿತಿಗಳನ್ನು ನಾವು ಮೀರಲಿದ್ದೇವೆ” ಎಂದು ಇರಾನ್ ಸ್ಪಷ್ಟಪಡಿಸಿದೆ.
ಯುದ್ಧದ ಕುರಿತು ಪ್ರಕ್ರಿಯಿಸಿರುವ ಕತಾರ್, “ನಿಯಂತ್ರಣವಿಲ್ಲದ ಉದ್ವಿಗ್ನತೆಯು ನಮ್ಮನ್ನು ನಿಭಾಯಿಸಲಾಗದ ಪರಿಸ್ಥಿತಿಗೆ ತಳ್ಳಲಿದೆ ಎಂದು ನಾವು 2023 ರಿಂದಲೂ ಎಚ್ಚರಿಸುತ್ತಿದ್ದೇವೆ. ನಾವು ಈಗ ಅಂತಹ ಹಂತಕ್ಕೆ ಬಹಳ ಹತ್ತಿರದಲ್ಲಿದ್ದೇವೆ. ಪರಿಸ್ಥಿತಿ ಕೈಮೀರುವ ಮೊದಲೇ ಎಲ್ಲ ಪಕ್ಷಗಳು ಈ ಯುದ್ಧವನ್ನು ಕೊನೆಗೊಳಿಸಲು ದಾರಿಯನ್ನು ಕಂಡುಕೊಳ್ಳಬೇಕು” ಎಂದು ಹೇಳಿದೆ.
