ಗುಂಪೊಂದು ಭಾರತೀಯರೊಬ್ಬರ ಬಟ್ಟೆ ಬಿಚ್ಚಿಸಿ ಗುಂಪು ದಾಳಿ ನಡೆಸಿರುವ ಘಟನೆ ಐರ್ಲೆಂಡ್‌ನ ಡಬ್ಲೀನ್‌ನಲ್ಲಿ ನಡೆದಿದೆ. ಮಕ್ಕಳ ಜೊತೆಗೆ ಅಸಭ್ಯವಾಗಿ ವರ್ತಿಸಿದ ಆರೋಪದ ಮೇಲೆ ಹಲ್ಲೆ ನಡೆದಿದೆ ಎನ್ನಲಾಗಿದೆ. ಆದರೆ, ವರ್ಣದ್ವೇಷದಿಂದ ದಾಳಿ ನಡೆದಿರಬಹುದು ಎಂದು ಶಂಕಿಸಲಾಗಿದೆ.
ಘಟನೆಯು ನಾಲ್ಕು ದಿನಗಳ ಹಿಂದೆ ನಡೆದಿದೆ. ಗುಂಪೊಂದು ಭಾರತೀಯನ ಪ್ಯಾಂಟ್‌ ಬಿಚ್ಚಿಸಿ, ಹಲ್ಲೆ ನಡೆಸಿದೆ. ಸ್ಥಳೀಯರು ಮಧ್ಯಪ್ರವೇಶಿಸಿ ಆತನನ್ನು ರಕ್ಷಿಸಿದ್ದಾರೆ. ಆತನಿಗೆ ಗಂಭೀರ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ
ಹಲ್ಲೆಗೀಡಾದ ಭಾರತೀಯ ವ್ಯಕ್ತಿಯು 40 ವರ್ಷದವರು ಎಂದು ಹೇಳಾಗಿದೆ. ಆದಾಗ್ಯೂ, ಅವರ ಸಂಪೂರ್ಣ ಗುರುತುಗಳನ್ನು ಅಲ್ಲಿನ ಸರ್ಕಾರ ಬಹಿರಂಗಪಡಿಸಿಲ್ಲ. ಆತ ಮಕ್ಕಳೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದಾರೆ ಎಂಬ ಆರೋಪವನ್ನು ಡಬ್ಲೀನ್‌ನ ಪೊಲೀಸರು ನಿರಾಕರಿಸಿದ್ದಾರೆ ಎಂದು ವರದಿಯಾಗಿದೆ.
“ಸಂತ್ರಸ್ತ ಭಾರತೀಯನು ಮಕ್ಕಳ ಜೊತೆ ಅಸಭ್ಯವಾಗಿ ವರ್ತಿಸಿದ್ದಾರೆಂಬ ಸುಳ್ಳು ಆರೋಪ ಮಾಡಲಾಗಿದೆ. ಸುಳ್ಳು ಆರೋಪದ ಮೇಲೆಯೇ ಹಲ್ಲೆ ನಡೆಸಿದ್ದಾರೆ. ಹಲ್ಲೆಗೈದ ಆರೋಪಿಗಳು ಬಲಪಂಥೀಯ ಸಂಘಟನೆಗಳು ಮತ್ತು ವಲಸೆ ವಿರೋಧಿ ಮನೋಭಾವ ಹೊಂದಿರುವವರಾಗಿದ್ದಾರೆ” ಎಂದು ಐರ್ಲೆಂಡ್‌ನ ರಾಷ್ಟ್ರೀಯ ಪೊಲೀಸರು ತಿಳಿಸಿದ್ದಾರೆ.
