ತನ್ನ ಸಂಬಂಧಿ 7 ವರ್ಷದ ಬಾಲಕನನ್ನು ಕಚ್ಚಿದ ಕಾರಣಕ್ಕೆ ಕೋಪಗೊಂಡ ವ್ಯಕ್ತಿ ತಾನು ಸಾಕಿದ್ದ ನಾಯಿಯನ್ನೇ ಕೊಂದು, ತಿಂದಿರುವ ಘಟನೆ ಥೈಲ್ಯಾಂಡ್‌ನ ಚಿಯಾಂಗ್ ಮಾಯ್‌ನಲ್ಲಿ ನಡೆದಿದೆ. ಘಟನೆಯ ದೃಶ್ಯಗಳು ಸಿಟಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಅತನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ಮೇ 1 ರಂದು ವಾಚ್‌ಡಾಗ್ ಥೈಲ್ಯಾಂಡ್ ಫೌಂಡೇಶನ್ (ಡಬ್ಲ್ಯುಡಿಟಿ) ನೀಡಿದ ದೂರಿನ ಆಧಾರದ ಮೇಲೆ ಸಾಂಗ್‌ವುಟ್ ಚುಥಾಂಗ್ ಎಂಬಾತನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಆತನ ತಾನು ಸಾಕಿದ್ದ 10 ವರ್ಷದ ನಾಯಿಯನ್ನು ಏಪ್ರಿಲ್ 29ರಂದು ಕೊಂದಿದ್ದಾನೆ ಎಂದು ಹೇಳಲಾಗಿದೆ.
ಸಿಸಿಟಿವಿ ವೀಡಿಯೋದಲ್ಲಿ, ಆರೋಪಿ ಸಾಂಗ್‌ವುಟ್, ತನ್ನ ನಾಯಿಯ ಕುತ್ತಿಗೆಗೆ ಹಗ್ಗವನ್ನು ಕಟ್ಟಿ ಎಳೆದೊಯ್ದು, ಮರಕ್ಕೆ ನೇತುಹಾಕಿದ್ದಾನೆ. ನಾಯಿ ಸತ್ತ ಬಳಿಕ, ಅದನ್ನು ಗೋಣಿಚೀಲದಲ್ಲಿ ಹಾಕಿಕೊಂಡು ಸ್ಥಳದಿಂದ ತೆರಳಿದ್ದಾರೆ.
“ಸಾಂಗ್‌ವುಟ್‌ನನ್ನು ಬುಧವಾರ ಮಧ್ಯಾಹ್ನ ಬಂಧಿಸಲಾಗಿದೆ. ವಿಚಾರಣೆ ವೇಳೆ, ನಾಯಿಯನ್ನು ಕೊಂದಿರುವುದಾಗಿ ಆತ ಒಪ್ಪಿಕೊಂಡಿದ್ದಾನೆ. ಆದರೆ, ನಾಯಿಯ ಮೃತದೇಹವನ್ನು ಆತ ಏನು ಮಾಡಿದನೆಂದು ಹೇಳಲು ಆತ ನಿರಾಕರಿಸಿದ್ದ” ಎಂದು ಡಬ್ಲ್ಯುಡಿಟಿ ಸಂಕಂಪೇಂಗ್ ಪೊಲೀಸರು ತಿಳಿಸಿದ್ದಾರೆ.
“ಆತನನ್ನು ಹೆಚ್ಚಿನ ವಿಚಾರಣೆ ಒಳಪಡಿಸಲಾಗಿದ್ದು, ಆತನ ನಾಯಿಯ ಮಾಂಸವನ್ನು ತಿಂದಿದ್ದಾನೆ. ಅಲ್ಲದೆ, ತನ್ನ ಸ್ನೇಹಿತನಿಗೂ ಕೊಟ್ಟಿದ್ದಾನೆ. ಆತನ ಮನೆಯಲ್ಲಿ ಶೋಧ ನಡೆಸಿದಾಗ ಫ್ರಿಡ್ಜ್‌ನಲ್ಲಿ ಉಳಿದಿದ್ದ ನಾಯಿಯ ಮಾಂಸ ಪತ್ತೆಯಾಗಿದೆ” ಎಂದು ವರದಿಯಾಗಿದೆ.
ತಾನೇ ಸಾಕಿದ್ದ ನಾಯಿಯನ್ನು ಕೊಂದಿದ್ದಕ್ಕಾಗಿ ತನ್ನ ವಿರುದ್ಧ ಪ್ರಾಣಿಹಿಂಸೆ ಆರೋಪ ಅಥವಾ ಪ್ರಕರಣ ದಾಖಲಾಗುವುದಿಲ್ಲ ಎಂದು ಆತ ಭಾವಿಸಿದ್ದಾಗಿ ವರದಿಯಾಗಿದೆ.
ಥಾಯ್ಲೆಂಡ್ ಪೊಲೀಸರು ಸಾಂಗ್‌ವುಟ್‌ನ ಸ್ನೇಹಿತ ರೋಜ್‌ನನ್ನು ಕೂಡ ಬಂಧಿಸಿದ್ದಾರೆ. ಅವರಿಬ್ಬರ ವಿರುದ್ಧ ಥಾಯ್ಲೆಂಡ್‌ನ ಕ್ರಿಮಿನಲ್ ಕಾನೂನಿನ ಸೆಕ್ಷನ್ 340 (ಅಪರಾಧಕ್ಕೆ ಸಹಾಯ ಮಾಡಲು ವಾಹನ ಬಳಕೆ) ಮತ್ತು ಸೆಕ್ಷನ್ 296 (ಸಾರ್ವಜನಿಕ ಸ್ಥಳದಲ್ಲಿ ಪ್ರಾಣಿಗಳ ಶವ ವಿಲೇವಾರಿ) ಜೊತೆಗೆ, ಪ್ರಾಣಿ ಹಿಂಸೆ ತಡೆಗಟ್ಟುವಿಕೆ ಮತ್ತು ಪ್ರಾಣಿ ಕಲ್ಯಾಣ ಕಾಯಿದೆಯ ಸೆಕ್ಷನ್ 20 (ಪ್ರಾಣಿಗಳ ಮೇಲೆ ಕ್ರೌರ್ಯ ಅಥವಾ ಅವುಗಳನ್ನು ಕೊಲ್ಲುವುದು) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.
