ಅಬುಧಾಬಿಯಲ್ಲಿ ಉದ್ಯೋಗದಲ್ಲಿರುವ 29 ವರ್ಷದ ಭಾರತೀಯ ಯುವಕ ಅನಿಲ್ ಕುಮಾರ್ ಬೊಲ್ಲ ಮೊದಲ ಬಾರಿ 240 ಕೋಟಿ ಮೌಲ್ಯದ 100 ಮಿಲಿಯನ್ ಯುಎಇ ಲಾಟರಿ ಜಾಕ್ಪಾಟ್ ಗೆದ್ದಿದ್ದಾನೆ.
ಲಾಟರಿಯೊಂದರಲ್ಲಿ ಇಷ್ಟು ದೊಡ್ಡ ಪ್ರಮಾಣದ ಮೊತ್ತ ಗೆದ್ದ ಮೊದಲಿಗ ಇವನಾಗಿದ್ದಾನೆ.
ಮೂಲತಃ ಕೇರಳ ರಾಜ್ಯದ ಯುವಕನಾಗಿರುವ ಅನಿಲ್ ಕುಮಾರ್, ತನ್ನ ತಾಯಿಯ ಹುಟ್ಟಿದ ದಿನಾಂಕವನ್ನೂ ಅದೃಷ್ಟದ ಸಂಖ್ಯೆಯಾಗಿ ಆರಿಸಿಕೊಂಡು ಸುಮಾರು 12 ಟಿಕೆಟ್ಗಳನ್ನು ಖರೀದಿಸಿದ್ದ. ಸದ್ಯ ಆತ ಡ್ರಾದಲ್ಲಿ ವಿಜಯಿಯಾಗಿದ್ದಾನೆ.
ಬೃಹತ್ ಮೊತ್ತದ ಲಾಟರಿ ಗೆದ್ದ ಬಳಿಕ ಮಾತನಾಡಿರುವ ಅನಿಲ್ ಕುಮಾರ್, ಇದು ನನ್ನ ಪಾಲಿಗೆ ಅತಿ ದೊಡ್ಡ ಆಶೀರ್ವಾದ ಎಂದಿದ್ದಾನೆ.
ಆರು ಹಾಗೂ ಒಂದು ಅಂಕೆಗಳ ಗೇಮ್ ಇದಾಗಿದ್ದು ಒಂದು ಟಿಕೆಟ್ ಬೆಲೆ 50 ದಿರ್ಹಂ ನಿಗದಿಪಡಿಸಲಾಗಿದೆ. ಪ್ರತಿ ಹದಿನೈದು ದಿನಗಳಿಗೊಮ್ಮೆ ಡ್ರಾ ನಡೆಯಲಿದೆ.
ಕಳೆದ ಒಂದೂವರೆ ವರ್ಷದಿಂದ ಉದ್ಯೋಗದಲ್ಲಿರುವ ಅನಿಲ್ ಕುಮಾರ್ ಬೊಲ್ಲ ಮುಂದಿನ ದಿನಗಳಲ್ಲಿ ತನ್ನ ಮನೆಯವರನ್ನೂ ಯುಎಇಯಲ್ಲಿ ನೆಲೆಸುವ ಇರಾದೆಯನ್ನು ವ್ಯಕ್ತಪಡಿಸಿದ್ದಾನೆ.
ಯುಎಇ ಲಾಟರಿ ಆಯೋಜಕರ ಜೊತೆಗೆ ಮಾತನಾಡಿರುವ ವೀಡಿಯೋವನ್ನು ಸೋಷಿಯಲ್ ಮೀಡಿಯಾದಲ್ಲಿ ಪ್ರಕಟಿಸಲಾಗಿದ್ದು, ಲಾಟರಿ ಗೆದ್ದ ಹಣದಿಂದ ಸಮಾಜ ಸೇವೆಯ ಜೊತೆಗೆ ತನ್ನ ಕನಸಿನ ಉದ್ಯಮವನ್ನು ಕೂಡ ಆರಂಭಿಸುವುದಾಗಿ ಅನಿಲ್ ಕುಮಾರ್ ಬೊಲ್ಲ ತಿಳಿಸಿದ್ದಾನೆ.
