ಕರ್ನಾಟಕದ ಕರಾವಳಿ ಪ್ರದೇಶದ ಸಮಗ್ರ ಅಭಿವೃದ್ಧಿಗಾಗಿ ಉನ್ನತ ಮಟ್ಟದ ‘ಕರ್ನಾಟಕ ಕರಾವಳಿ ಪ್ರವಾಸೋದ್ಯಮ ಮತ್ತು ವಾಣಿಜ್ಯ ಅಭಿವೃದ್ಧಿ ಕಾರ್ಯಪಡೆ’ ರಚಿಸುವಂತೆ ಅನಿವಾಸಿ ಭಾರತೀಯ (NRI) ಉದ್ಯಮಿ ಡಾ. ರೊನಾಲ್ಡ್ ಕೊಲಾಸೊ ಅವರು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಪ್ರಸ್ತಾವನೆ ಸಲ್ಲಿಸಿದ್ದಾರೆ.
ಶಾಸನ ಪರಿಷತ್ ಸದಸ್ಯೆ ಹಾಗೂ ಕರ್ನಾಟಕ ಸರ್ಕಾರದ ಅನಿವಾಸಿ ಭಾರತೀಯರ ವೇದಿಕೆಯ ಉಪಾಧ್ಯಕ್ಷೆ ಡಾ. ಆರತಿ ಕೃಷ್ಣ ಅವರೊಂದಿಗೆ ಮುಖ್ಯಮಂತ್ರಿಯನ್ನು ಭೇಟಿಯಾದ ಕೊಲಾಸೊ, ದಕ್ಷಿಣ ಕನ್ನಡ, ಉಡುಪಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳನ್ನು ಪ್ರವಾಸೋದ್ಯಮ, ಆತಿಥ್ಯ, ವ್ಯಾಪಾರ, ವಾಣಿಜ್ಯ ಮತ್ತು ಹೂಡಿಕೆಯ ಪ್ರಮುಖ ಕೇಂದ್ರಗಳನ್ನಾಗಿ ಅಭಿವೃದ್ಧಿಪಡಿಸುವ ಉದ್ದೇಶದಿಂದ ಪ್ರಸ್ತಾವನೆ ಸಲ್ಲಿಸಿದರು.
ಸುಮಾರು 12ರಿಂದ 15 ಸದಸ್ಯರನ್ನು ಒಳಗೊಂಡ ಸಣ್ಣ, ಸಶಕ್ತ ಕಾರ್ಯಪಡೆ ರಚಿಸುವಂತೆ ಅವರು ಸಲಹೆ ನೀಡಿದ್ದಾರೆ. ಹಣಕಾಸು, ಪರಿಸರ, ಮಾಲಿನ್ಯ ನಿಯಂತ್ರಣ, ನಗರ ಯೋಜನೆ, ವಾಸ್ತುಶಿಲ್ಪ, ಪ್ರವಾಸೋದ್ಯಮ, ಆತಿಥ್ಯ, ಬಂದರು, ಜಲಸಾರಿಗೆ, ರಸ್ತೆ ಮತ್ತು ರೈಲ್ವೆ ಕ್ಷೇತ್ರಗಳ ತಜ್ಞರು, ಉದ್ಯಮ ಪ್ರತಿನಿಧಿಗಳು ಹಾಗೂ ಎನ್‌ಆರ್‌ಐ/ಎನ್‌ಆರ್‌ಕೆ ಪ್ರತಿನಿಧಿಗಳನ್ನು ಕಾರ್ಯಪಡೆಗೆ ಸೇರಿಸುವಂತೆ ಪ್ರಸ್ತಾವಿಸಲಾಗಿದೆ.
ಕರಾವಳಿ ಅಭಿವೃದ್ಧಿಗೆ 20ರಿಂದ 25 ವರ್ಷಗಳ ಸಮಗ್ರ ಪ್ರವಾಸೋದ್ಯಮ ಮತ್ತು ವಾಣಿಜ್ಯ ಅಭಿವೃದ್ಧಿ ಮಾಸ್ಟರ್ಪ್ಲಾನ್ ರೂಪಿಸುವುದು ಪ್ರಸ್ತಾವನೆಯ ಪ್ರಮುಖ ಶಿಫಾರಸು. ಬೀಚ್‌ ಪ್ರವಾಸೋದ್ಯಮ, ರೆಸಾರ್ಟ್‌ಗಳು, ಹೋಟೆಲ್‌ಗಳು, ಸಮಾವೇಶ ಮತ್ತು ವಿವಾಹ ತಾಣಗಳು, ಆರೋಗ್ಯ ಮತ್ತು ವೈದ್ಯಕೀಯ ಪ್ರವಾಸೋದ್ಯಮ, ಮರೀನಾ, ಜಲಕ್ರೀಡೆ, ಪ್ರವಾಸಿ ಗ್ರಾಮಗಳು, ಕ್ರೂಸ್‌ ಸೌಲಭ್ಯಗಳು, ಸಾಂಸ್ಕೃತಿಕ ಮತ್ತು ಪರಿಸರ ಪ್ರವಾಸೋದ್ಯಮ ಹಾಗೂ ವಾಣಿಜ್ಯ ಕೇಂದ್ರಗಳಿಗೆ ಸೂಕ್ತ ಪ್ರದೇಶಗಳನ್ನು ವೈಜ್ಞಾನಿಕವಾಗಿ ಗುರುತಿಸುವಂತೆ ಸಲಹೆ ನೀಡಲಾಗಿದೆ. ಮನರಂಜನಾ ದೋಣಿ ವಿಹಾರ, ಜಲಾಭಿಮುಖ ವಾಯುವಿಹಾರ (ವಾಟರ್‌ಫ್ರಂಟ್‌ ಪ್ರೊಮೆನೇಡ್‌) ಮತ್ತು ಕರಾವಳಿ ಮನರಂಜನಾ ಜಿಲ್ಲೆಗಳ ಸಾಧ್ಯತೆಗಳನ್ನು ಪರಿಶೀಲಿಸಿ, ಪ್ರವಾಸಿಗರ ವಾಸ್ತವ್ಯ ಅವಧಿಯನ್ನು ಹೆಚ್ಚಿಸುವ ಉದ್ದೇಶವೂ ಪ್ರಸ್ತಾವನೆಯಲ್ಲಿದೆ.
ಅಭಿವೃದ್ಧಿ ಯೋಜನೆ ಪ್ರವಾಸೋದ್ಯಮಕ್ಕೆ ಮಾತ್ರ ಸೀಮಿತವಾಗದೆ, ಲಾಜಿಸ್ಟಿಕ್ಸ್‌, ಬಂದರು ಆಧಾರಿತ ಚಟುವಟಿಕೆಗಳು, ಸಮುದ್ರ ಆಹಾರ ಮತ್ತು ಸಾಗರ ಕೈಗಾರಿಕೆಗಳು, ಆರೋಗ್ಯ, ಶಿಕ್ಷಣ, ತಂತ್ರಜ್ಞಾನ ಸೇರಿದಂತೆ ಉದ್ಯೋಗ ಸೃಷ್ಟಿಸುವ ಕ್ಷೇತ್ರಗಳಿಗೂ ವಿಸ್ತರಿಸಬೇಕು. ಹೆದ್ದಾರಿ, ಪ್ರಮುಖ ರಸ್ತೆಗಳು, ವಿಮಾನ ನಿಲ್ದಾಣ ಮತ್ತು ರೈಲು ಸಂಪರ್ಕ, ಬಂದರುಗಳು, ಸಾರ್ವಜನಿಕ ಸಾರಿಗೆ ಹಾಗೂ ಸಾಧ್ಯವಾದಲ್ಲಿ ಕರಾವಳಿ ಮತ್ತು ಒಳನಾಡು ಜಲಸಾರಿಗೆ ಸುಧಾರಣೆಗೆ ಆದ್ಯತೆ ನೀಡಬೇಕು. ದುಬೈ, ಸಿಂಗಾಪುರ, ಮಲೇಷ್ಯಾ, ಹಾಂಗ್‌ಕಾಂಗ್‌, ಸ್ಪೇನ್‌ ಮತ್ತು ಇಟಲಿಯ ಅಭಿವೃದ್ಧಿ ಮಾದರಿಗಳನ್ನು ಅಧ್ಯಯನ ಮಾಡಿ, ಕರ್ನಾಟಕದ ಭೌಗೋಳಿಕತೆ, ಕಾನೂನುಗಳು ಮತ್ತು ಪರಿಸರ ಪರಿಸ್ಥಿತಿಗಳಿಗೆ ಅನುಗುಣವಾಗಿ ಅಳವಡಿಸಿಕೊಳ್ಳಬೇಕು ಎಂದು ಎಂದು ಕೊಲಾಸೊ ಹೇಳಿದ್ದಾರೆ.
ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ (PPP), ಖಾಸಗಿ ಮತ್ತು ಸಾಂಸ್ಥಿಕ ಹೂಡಿಕೆಗಳನ್ನು ಆಕರ್ಷಿಸಲು ಸೂಕ್ತ ರಿಯಾಯಿತಿ ಹಾಗೂ ಕಾರ್ಯಸಾಧ್ಯತಾ ವ್ಯವಸ್ಥೆ ರೂಪಿಸುವಂತೆ ಸಲಹೆ ನೀಡಲಾಗಿದೆ. ಪ್ರವಾಸೋದ್ಯಮ, ಕಂದಾಯ, ನಗರಾಭಿವೃದ್ಧಿ, ಪರಿಸರ, ಕೈಗಾರಿಕೆ, ಬಂದರು, ಮೀನುಗಾರಿಕೆ ಸೇರಿದಂತೆ ವಿವಿಧ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ಏಕಗವಾಕ್ಷಿ ವ್ಯವಸ್ಥೆ ಜಾರಿಗೆ ತರಬೇಕು ಎಂದು ಪ್ರಸ್ತಾವಿಸಲಾಗಿದೆ.
ಸರ್ಕಾರದ ಸ್ವಾಮ್ಯದ ಭೂಮಿ ಮತ್ತು ಇತರ ಸಾರ್ವಜನಿಕ ಆಸ್ತಿಗಳನ್ನು ಪಾರದರ್ಶಕ ದೀರ್ಘಾವಧಿ ಗುತ್ತಿಗೆ, ರಿಯಾಯಿತಿ ಅಥವಾ ಪಿಪಿಪಿ ವ್ಯವಸ್ಥೆಯಡಿ ಬಳಸಿಕೊಳ್ಳುವ ಸಾಧ್ಯತೆಗಳನ್ನು ಪರಿಶೀಲಿಸಬೇಕು. ಪ್ರಮುಖ ಯೋಜನೆಗಳನ್ನು ಕೇವಲ ಹೂಡಿಕೆಯ ಮೊತ್ತದ ಆಧಾರದ ಮೇಲೆ ಅಳೆಯದೆ, ಸೃಷ್ಟಿಯಾಗುವ ಉದ್ಯೋಗ, ಸ್ಥಳೀಯ ಯುವಕರಿಗೆ ದೊರೆಯುವ ಅವಕಾಶಗಳು, ಸ್ಥಳೀಯ ಖರೀದಿ ಮತ್ತು ಪೂರಕ ಉದ್ಯಮಗಳ ಬೆಳವಣಿಗೆಯ ಆಧಾರದ ಮೇಲೂ ಮೌಲ್ಯಮಾಪನ ಮಾಡಬೇಕು ಎಂದು ಅವರು ಹೇಳಿದ್ದಾರೆ.
ಆತಿಥ್ಯ, ಪ್ರವಾಸೋದ್ಯಮ ನಿರ್ವಹಣೆ, ಪಾಕಶಾಸ್ತ್ರ, ಸಾಗರ ಚಟುವಟಿಕೆಗಳು, ಲಾಜಿಸ್ಟಿಕ್ಸ್‌, ಆರೋಗ್ಯ ಸೇವೆ ಮತ್ತು ವಿದೇಶಿ ಭಾಷೆಗಳಲ್ಲಿ ವಿಶೇಷ ಕೌಶಲಾಭಿವೃದ್ಧಿಗೆ ಒತ್ತು ನೀಡುವಂತೆ ಸಲಹೆ ನೀಡಲಾಗಿದೆ. ಮೀನುಗಾರರು, ರೈತರು, ಕುಶಲಕರ್ಮಿಗಳು, ಟ್ಯಾಕ್ಸಿ ಚಾಲಕರು, ಸಣ್ಣ ವ್ಯಾಪಾರಿಗಳು, ಮಹಿಳಾ ಉದ್ಯಮಿಗಳು ಮತ್ತು ಸ್ಥಳೀಯ ಯುವಕರನ್ನು ಪ್ರವಾಸೋದ್ಯಮ ಆರ್ಥಿಕತೆಯ ಭಾಗವಾಗಿಸಬೇಕು. ಕರಾವಳಿ ಅಭಿವೃದ್ಧಿಯು ಪರಿಸರ ಮತ್ತು ಕರಾವಳಿ ನಿಯಂತ್ರಣ ವಲಯ (CRZ) ನಿಯಮಗಳ ವ್ಯಾಪ್ತಿಯಲ್ಲಿಯೇ ನಡೆಯಬೇಕು ಎಂದು ಕೊಲಾಸೊ ಒತ್ತಿ ಹೇಳಿದ್ದಾರೆ. ಮ್ಯಾಂಗ್ರೂವ್‌ಗಳು, ಜೌಗು ಪ್ರದೇಶಗಳು, ನದಿಗಳು, ಕಡಲತೀರಗಳು ಮತ್ತು ಇತರ ಸೂಕ್ಷ್ಮ ನೈಸರ್ಗಿಕ ಪ್ರದೇಶಗಳನ್ನು ವೈಜ್ಞಾನಿಕವಾಗಿ ಗುರುತಿಸಿ ಸಂರಕ್ಷಿಸಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.
ಪ್ರಸ್ತುತ ಪರಿಸರ ವಿಜ್ಞಾನ, ಹವಾಮಾನ ಸ್ಥಿತಿಸ್ಥಾಪಕತೆ ಮತ್ತು ಆಧುನಿಕ ನಗರ ಯೋಜನಾ ಪದ್ಧತಿಗಳ ಆಧಾರದ ಮೇಲೆ ಕರಾವಳಿ ಪರಿಸರ ನಿರ್ಬಂಧಗಳನ್ನು ಪರಿಶೀಲಿಸುವಂತೆ ಪ್ರಸ್ತಾವಿಸಲಾಗಿದೆ. ಸಂಪೂರ್ಣ ನಿರ್ಬಂಧದ ಬದಲು, ಸೂಕ್ಷ್ಮ ಪ್ರದೇಶಗಳ ರಕ್ಷಣೆಯೊಂದಿಗೆ ಜವಾಬ್ದಾರಿಯುತ ಅಭಿವೃದ್ಧಿಗೆ ಅವಕಾಶ ಕಲ್ಪಿಸುವ ‘Responsible Development’ ಮಾದರಿಯನ್ನು ಅಳವಡಿಸಿಕೊಳ್ಳುವಂತೆ ಸಲಹೆ ನೀಡಲಾಗಿದೆ. ಕರಾವಳಿ ಪ್ರದೇಶಗಳನ್ನು ಸಂರಕ್ಷಣಾ ವಲಯ, ಪರಿಸರ ಪ್ರವಾಸೋದ್ಯಮ ವಲಯ, ಪ್ರವಾಸೋದ್ಯಮ ಅಭಿವೃದ್ಧಿ ವಲಯ ಮತ್ತು ಜಲಾಭಿಮುಖ/ವಾಣಿಜ್ಯ ಅಭಿವೃದ್ಧಿ ವಲಯಗಳಾಗಿ ವಿಂಗಡಿಸಿ, ಪ್ರತಿಯೊಂದಕ್ಕೂ ವಿಭಿನ್ನ ಅನುಮತಿಗಳು ಮತ್ತು ಸುರಕ್ಷತಾ ಕ್ರಮಗಳನ್ನು ನಿಗದಿಪಡಿಸುವಂತೆ ಪ್ರಸ್ತಾವಿಸಲಾಗಿದೆ.
ಪ್ರಮುಖ ಯೋಜನೆಗಳು ಮ್ಯಾಂಗ್ರೂವ್‌ ಪುನಃಸ್ಥಾಪನೆ, ಕರಾವಳಿ ಅರಣ್ಯ, ಉದ್ಯಾನಗಳು, ಹಸಿರು ಪಟ್ಟಿಗಳು, ಜೌಗು ಪ್ರದೇಶಗಳ ಪುನರುಜ್ಜೀವನ, ಕಡಲತೀರ ಸುಧಾರಣೆ, ಕೊಳಚೆನೀರು ಸಂಸ್ಕರಣೆ ಮತ್ತು ಜೀವವೈವಿಧ್ಯ ಸಂರಕ್ಷಣೆಗೆ ಕೊಡುಗೆ ನೀಡಬೇಕು ಎಂದು ಸಲಹೆ ನೀಡಲಾಗಿದೆ. ಕಡಲತೀರಗಳು ಸಾರ್ವಜನಿಕರಿಗೆ ಮುಕ್ತವಾಗಿಯೇ ಉಳಿಯಬೇಕು. ವಾಯುವಿಹಾರ, ಉದ್ಯಾನಗಳು ಮತ್ತು ಮನರಂಜನಾ ಸೌಲಭ್ಯಗಳ ಮೂಲಕ ಸಾರ್ವಜನಿಕ ಪ್ರವೇಶವನ್ನು ಖಚಿತಪಡಿಸಬೇಕು. ಕರಾವಳಿ ಆರ್ಥಿಕ ಮತ್ತು ಪ್ರವಾಸೋದ್ಯಮ ವಲಯಗಳ ಪೈಲಟ್‌ ಯೋಜನೆಗಳನ್ನು ರೂಪಿಸಿ, ಪ್ರವಾಸೋದ್ಯಮ, ವಾಣಿಜ್ಯ ಅಭಿವೃದ್ಧಿ ಮತ್ತು ಪರಿಸರ ಪುನಃಸ್ಥಾಪನೆಯನ್ನು ಸಮನ್ವಯಗೊಳಿಸುವ ಮಾದರಿಗಳನ್ನು ಅಭಿವೃದ್ಧಿಪಡಿಸುವಂತೆ ಪ್ರಸ್ತಾವಿಸಲಾಗಿದೆ.
ತಾಂತ್ರಿಕವಾಗಿ ಸೂಕ್ತ ಸ್ಥಳಗಳಲ್ಲಿ ನಿಯಂತ್ರಿತ ಸಮುದ್ರನೀರು ಒಳಹರಿವು, ಕಾಲುವೆಗಳು, ಕೆರೆಸಮಾನ ಜಲಮೂಲಗಳು ಮತ್ತು ಮರೀನಾ ಬೇಸಿನ್‌ಗಳ ಸಾಧ್ಯತೆಗಳನ್ನು ಪರಿಶೀಲಿಸಬಹುದು ಎಂದು ಸಲಹೆ ನೀಡಲಾಗಿದೆ. ಆದರೆ ಇಂತಹ ಯೋಜನೆಗಳಿಗೆ ಜಲಚಲನೆ, ಜಲವಿಜ್ಞಾನ, ಹೂಳು ಸಂಗ್ರಹ, ಕರಾವಳಿ ಸವೆತ ಮತ್ತು ಪ್ರವಾಹದ ಕುರಿತು ಸಮಗ್ರ ಅಧ್ಯಯನ ಅಗತ್ಯ . ಹೊಸ ಕೃತಕ ಜಲಮಾರ್ಗಗಳನ್ನು ನಿರ್ಮಿಸುವ ಬದಲು, ಅಸ್ತಿತ್ವದಲ್ಲಿರುವ ಹಿನ್ನೀರು ಪ್ರದೇಶಗಳು, ನದಿಮುಖಗಳು, ತೊರೆಗಳು ಮತ್ತು ಜಲಮಾರ್ಗಗಳನ್ನು ಪುನರುಜ್ಜೀವನಗೊಳಿಸುವುದಕ್ಕೆ ಆದ್ಯತೆ ನೀಡುವಂತೆ ಪ್ರಸ್ತಾವಿಸಲಾಗಿದೆ. ಮರೀನಾ, ದೋಣಿ ವಿಹಾರ, ಜಲಟ್ಯಾಕ್ಸಿ, ರೆಸ್ಟೋರೆಂಟ್‌ಗಳು, ವಾಯುವಿಹಾರ ಮತ್ತು ರೆಸಾರ್ಟ್‌ಗಳಂತಹ ಚಟುವಟಿಕೆಗಳನ್ನು ಪರಿಸರ ಹಾಗೂ ತಾಂತ್ರಿಕವಾಗಿ ಸಾಧ್ಯವಿರುವ ಸ್ಥಳಗಳಲ್ಲಿ ಮಾತ್ರ ಕೈಗೊಳ್ಳಬೇಕು ಎಂದು ಸಲಹೆ ನೀಡಲಾಗಿದೆ.
ಪ್ರಮುಖ ಕರಾವಳಿ ಪ್ರವಾಸೋದ್ಯಮ ಅಥವಾ ವಾಣಿಜ್ಯ ಯೋಜನೆಗಳಿಂದ ಕಡಲತೀರ, ನದಿ, ಕಾಲುವೆ, ಹಿನ್ನೀರು ಪ್ರದೇಶ ಅಥವಾ ಅರಬ್ಬಿ ಸಮುದ್ರಕ್ಕೆ ಸಂಸ್ಕರಿಸದ ಕೊಳಚೆನೀರು ಹರಿಯದಂತೆ ಕಟ್ಟುನಿಟ್ಟಿನ ನಿಯಮ ಜಾರಿಗೆ ತರಬೇಕು. ಪ್ರವಾಸೋದ್ಯಮ ಮತ್ತು ವಾಣಿಜ್ಯ ವಲಯಗಳಲ್ಲಿ ಭವಿಷ್ಯದ ವಿಸ್ತರಣೆಯನ್ನೂ ಗಮನದಲ್ಲಿಟ್ಟುಕೊಂಡು ಆಧುನಿಕ ಕೊಳಚೆನೀರು ಸಂಸ್ಕರಣಾ ಘಟಕಗಳನ್ನು ಸ್ಥಾಪಿಸಬೇಕು. ಸಂಸ್ಕರಿಸಿದ ನೀರನ್ನು ಉದ್ಯಾನ, ಹಸಿರು ಪ್ರದೇಶ ಮತ್ತು ಶೌಚಾಲಯಗಳ ಬಳಕೆಗೆ ಮರುಬಳಕೆ ಮಾಡಬಹುದು. ನೀರಿನ ಗುಣಮಟ್ಟದ ನಿರಂತರ ಮೇಲ್ವಿಚಾರಣೆಯನ್ನೂ ಕೈಗೊಳ್ಳಬೇಕು ಎಂದು ಸಲಹೆ ನೀಡಲಾಗಿದೆ.
ಹೊಸ ಪ್ರವಾಸಿ ತಾಣಗಳನ್ನು ಅಭಿವೃದ್ಧಿಪಡಿಸುವ ಮೊದಲು ಅಸ್ತಿತ್ವದಲ್ಲಿರುವ ಕರಾವಳಿ ಪಟ್ಟಣಗಳ ಒಳಚರಂಡಿ ಜಾಲ, ಕೊಳಚೆನೀರು ಸಂಸ್ಕರಣಾ ಘಟಕಗಳು, ಮಳೆನೀರು ಚರಂಡಿ ಮತ್ತು ಘನತ್ಯಾಜ್ಯ ವ್ಯವಸ್ಥೆಗಳನ್ನು ಸುಧಾರಿಸುವಂತೆ ಪ್ರಸ್ತಾವಿಸಲಾಗಿದೆ. ಸಮುದ್ರ, ಹಿನ್ನೀರು, ನದಿಗಳು ಮತ್ತು ನದಿಮುಖಗಳ ಸಮೀಪದ ದೊಡ್ಡ, ಸತತ ಭೂಪ್ರದೇಶಗಳನ್ನು ಕಾನೂನುಬದ್ಧವಾಗಿ ಸಾಧ್ಯವಿರುವಲ್ಲಿ ಕೆಐಎಡಿಬಿ ಅಥವಾ ಇತರ ಸೂಕ್ತ ಸಂಸ್ಥೆಗಳ ಮೂಲಕ ಗುರುತಿಸಿ ಒಗ್ಗೂಡಿಸುವಂತೆ ಸಲಹೆ ನೀಡಲಾಗಿದೆ.
ಈ ಭೂಮಿಯನ್ನು ಮೊದಲು ಮಾಸ್ಟರ್ಪ್ಲಾನ್ ಅಡಿಯಲ್ಲಿ ಅಭಿವೃದ್ಧಿಪಡಿಸಿ, ಬಳಿಕ ಪಾರದರ್ಶಕ ಹರಾಜು ಅಥವಾ ಪಿಪಿಪಿ ವ್ಯವಸ್ಥೆಯ ಮೂಲಕ ಹೂಡಿಕೆದಾರರಿಗೆ ನೀಡಬೇಕು ಎಂದು ಪ್ರಸ್ತಾವಿಸಲಾಗಿದೆ. ಇಂತಹ ಸಮಗ್ರ ತಾಣಗಳಲ್ಲಿ ಮರೀನಾ, ಜಲಮಾರ್ಗಗಳು, ದೋಣಿ ವಿಹಾರ, ಕ್ರೂಸ್‌, ಜಲಕ್ರೀಡೆ, ಹೋಟೆಲ್‌ಗಳು, ರೆಸಾರ್ಟ್‌ಗಳು, ಸಮಾವೇಶ ಕೇಂದ್ರಗಳು, ರೆಸ್ಟೋರೆಂಟ್‌ಗಳು, ಮನರಂಜನಾ ಸೌಲಭ್ಯಗಳು, ವಾಣಿಜ್ಯ ಕೇಂದ್ರಗಳು, ಆರೋಗ್ಯ ಸೇವೆಗಳು, ವಾಯುವಿಹಾರ ಮತ್ತು ಸಾರ್ವಜನಿಕ ಸ್ಥಳಗಳನ್ನು ಒಗ್ಗೂಡಿಸಬಹುದು ಎಂದು ಹೇಳಲಾಗಿದೆ.
ಇದನ್ನೂ ಓದಿ: ಅಲ್ಪಸಂಖ್ಯಾತರ ಒಳಿತಿಗೆ ಒಗ್ಗಟ್ಟು ಅಗತ್ಯ: KRMO – ಕ್ರೈಸ್ತ ಮುಖಂಡರ ಜಂಟಿ ಸಭೆಯಲ್ಲಿ ನಿರ್ಣಯ
ಆದರೆ ದ್ವೀಪಗಳು, ಮ್ಯಾಂಗ್ರೂವ್‌ಗಳು, ಜೌಗು ಪ್ರದೇಶಗಳು, ಅರಣ್ಯಗಳು ಮತ್ತು ಇತರ ಸೂಕ್ಷ್ಮ ಪ್ರದೇಶಗಳನ್ನು ಗುರುತಿಸಿ ಸಂರಕ್ಷಿಸಬೇಕು ಅಥವಾ ಪುನಃಸ್ಥಾಪಿಸಬೇಕು. ವಾಣಿಜ್ಯ ಅಭಿವೃದ್ಧಿಗೆ ಮುನ್ನ ಕೊಳಚೆನೀರು ಸಂಸ್ಕರಣೆ, ಮರುಬಳಕೆ ನೀರಿನ ವ್ಯವಸ್ಥೆ, ಮಳೆನೀರು ನಿರ್ವಹಣೆ, ತ್ಯಾಜ್ಯ ನಿರ್ವಹಣೆ, ನೀರಿನ ಗುಣಮಟ್ಟದ ಮೇಲ್ವಿಚಾರಣೆ ಹಾಗೂ ಪ್ರವಾಹ ಮತ್ತು ಕರಾವಳಿ ರಕ್ಷಣಾ ಮೂಲಸೌಕರ್ಯಗಳನ್ನು ಸ್ಥಾಪಿಸಬೇಕು. ಕಾರ್ಯಪಡೆಯು ಆರು ತಿಂಗಳೊಳಗೆ ಪ್ರಾಥಮಿಕ ಕಾರ್ಯತಂತ್ರ ವರದಿ ಹಾಗೂ 12 ತಿಂಗಳೊಳಗೆ ಹೂಡಿಕೆ ಅಗತ್ಯ, ಉದ್ಯೋಗ ಸಾಮರ್ಥ್ಯ, ಮೂಲಸೌಕರ್ಯ ಅವಶ್ಯಕತೆ ಮತ್ತು ಅನುಷ್ಠಾನ ಸಂಸ್ಥೆಗಳನ್ನು ಒಳಗೊಂಡ ಆದ್ಯತಾ ಯೋಜನೆಗಳ ಶಿಫಾರಸುಗಳನ್ನು ಸಲ್ಲಿಸುವಂತೆ ಕೊಲಾಸೊ ಸಲಹೆ ನೀಡಿದ್ದಾರೆ.
ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ, ಪ್ರವಾಸೋದ್ಯಮ ಸಚಿವರು ಹಾಗೂ ಸಂಬಂಧಿತ ಸಚಿವರ ಒಟ್ಟಾರೆ ಮಾರ್ಗದರ್ಶನದಲ್ಲಿ ಕಾರ್ಯಪಡೆ ಕಾರ್ಯನಿರ್ವಹಿಸಬೇಕು. ವಿವಿಧ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ನೋಡಲ್‌ ಇಲಾಖೆಯನ್ನು ನೇಮಿಸುವಂತೆ ಪ್ರಸ್ತಾವಿಸಲಾಗಿದೆ. ಯೋಜನೆಗಳು ಮತ್ತು ಕಾರ್ಯಸಾಧ್ಯತಾ ಅಧ್ಯಯನಗಳು ಸಿದ್ಧವಾದ ಬಳಿಕ, ನಿರ್ದಿಷ್ಟ ಯೋಜನೆಗಳು, ಭೂಮಿ, ಮೂಲಸೌಕರ್ಯ, ಅನುಮತಿಗಳು, ಹಣಕಾಸು ಮಾದರಿಗಳು ಮತ್ತು ಅನುಷ್ಠಾನ ಕಾಲಮಿತಿಗಳನ್ನು ಹೂಡಿಕೆದಾರರಿಗೆ ಪರಿಚಯಿಸಲು ‘ಕರಾವಳಿ ಕರ್ನಾಟಕ ಹೂಡಿಕೆ ಸಮಾವೇಶ’ ಅಥವಾ ರೋಡ್‌ಶೋ ಆಯೋಜಿಸುವಂತೆ ಸಲಹೆ ನೀಡಲಾಗಿದೆ.
ಕರಾವಳಿ ಪ್ರದೇಶದಲ್ಲಿ ಚದುರಿದ, ಪ್ರತ್ಯೇಕ ಯೋಜನೆಗಳಿಗೆ ಬದಲಾಗಿ ಸರ್ಕಾರವೇ ಮೊದಲು ಸಮಗ್ರ ಯೋಜನೆ ರೂಪಿಸಿ, ಭೂಮಿ ಮತ್ತು ಮೂಲಸೌಕರ್ಯ ಸಿದ್ಧಪಡಿಸಬೇಕು. ಬಳಿಕ ಖಾಸಗಿ ಹೂಡಿಕೆದಾರರು ಆ ಮಾಸ್ಟರ್ಪ್ಲಾನ್ ವ್ಯಾಪ್ತಿಯಲ್ಲಿ ಪ್ರತ್ಯೇಕ ಯೋಜನೆಗಳನ್ನು ಅಭಿವೃದ್ಧಿಪಡಿಸುವಂತಾಗಬೇಕು ಎಂಬುದು ಪ್ರಸ್ತಾವನೆಯ ಪ್ರಮುಖ ಉದ್ದೇಶವಾಗಿದೆ.
