ಉದ್ಯಾನ ನಗರಿ ಎಂದೇ ಖ್ಯಾತಿ ಪಡೆದಿರುವ ಬೆಂಗಳೂರನ್ನು ಕಸದ ಸಮಸ್ಯೆ ನಿರಂತರವಾಗಿ ಬಾಧಿಸುತ್ತಲೇ ಇದೆ. ನಗರ ನಿವಾಸಿಗಳು ಬ್ಲಾಕ್‌ಸ್ಪಾಟ್‌ಗಳು ಮತ್ತು ಎಲ್ಲೆಂದರಲ್ಲಿ ಕಸ ಎಸೆಯುವ ಖಯಾಲಿ ರೂಢಿಸಿಕೊಂಡಿದ್ದಾರೆ. ಈ ಬೇಜವಾಬ್ದಾರಿತನದಿಂದಾಗಿ, ಬೀದಿ-ಬೀದಿಗಳಲ್ಲಿ ಕಸದ ರಾಶಿಗಳು ಎದ್ದು ಕಾಣುತ್ತಿವೆ. ಗಬ್ಬು ನಾರುತ್ತಿವೆ.
ಮುಂಜಾನೆ ವಾಯುವಿಹಾರಕ್ಕೆ ಹೊರಡುವವರಿಂದ ಹಿಡಿದು ತಡರಾತ್ರಿ ಮನೆಗೆ ಮರಳುವವರವರೆಗೆ ಪ್ರತಿಯೊಬ್ಬರೂ ರಸ್ತೆ ಬದಿಯ ಕಸದ ರಾಶಿಗಳು ಮತ್ತು ಅದರಿಂದ ಸೂಸುವ ದುರ್ವಾಸನೆಯಿಂದ ರೂಸಿಹೋಗಿದ್ದಾರೆ. ಈ ಸಮಸ್ಯೆಯ ವಿರುದ್ಧ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ.
ಬೆಂಗಳೂರಿನಲ್ಲಿ ಕಸದ ಸಮಸ್ಯೆ ಇತ್ತೀಚಿನದೇನಲ್ಲ. ಸಾರ್ವಜನಿಕ ಸ್ಥಳಗಳು ಕಸದ ‘ಬ್ಲಾಕ್‌ ಸ್ಪಾಟ್‌’ಗಳಾಗಿ ಮಾರ್ಪಡುತ್ತಿವೆ. ಹಿಂದಿನ ಬಿಬಿಎಂಪಿ ಮತ್ತು ಹಾಲಿ ಜಿಬಿಎ ಮನೆ ಮನೆಗೆ ಬಂದು ಕಸ ಸಂಗ್ರಹಿಸುವ ವ್ಯವಸ್ಥೆಯನ್ನು ಜಾರಿಗೆ ತಂದಿದ್ದರೂ ಸಹ, ಅನೇಕರು ಮುಂಜಾನೆ ಅಥವಾ ತಡರಾತ್ರಿ ಯಾರಿಗೂ ಕಾಣದಂತೆ ರಸ್ತೆ ಬದಿ, ಖಾಲಿ ಸೈಟುಗಳು ಹಾಗೂ ಕೆರೆಗಳ ಪಕ್ಕದಲ್ಲಿ ಕಸ ತುಂಬಿದ ಪ್ಲಾಸ್ಟಿಕ್ ಚೀಲಗಳನ್ನು ಎಸೆದು ಹೋಗುತ್ತಿದ್ದಾರೆ.
ಈ ರೀತಿ ರಸ್ತೆ ಬದಿ ಕೆಸ ಎಸೆಯುವುದನ್ನು ತಡೆಯಲು ಬಿಬಿಎಂಪಿ/ಜಿಬಿಎ ನಾನಾ ರೀತಿಯಲ್ಲಿ ಪತ್ನಿಸುತ್ತಲೇ ಇದೆ. ಕಸ ಎಸೆವವರಿಗೆ ದಂಡವನ್ನೂ ವಿಧಿಸುತ್ತಿವೆ. ಅಷ್ಟು ಮಾತ್ರವಲ್ಲ, ಇತ್ತೀಚಿಗೆ, ರಸ್ತೆ ಬದಿ ಕಸ ಎಸೆಯುವವರ ಮನೆ ಮುಂದೆಯೇ ರಾಶಿ ಕಸ ಸುರಿದು ಪಾಠ ಕಲಿಸಲೂ ಅಧಿಕಾರಿಗಳು ಪ್ರಯತ್ನಿಸಿದ್ದರು. ಆದರೂ, ರಸ್ತೆ ಬದಿ ಕಸ ಎಸೆವ ಖಯಾಲಿಗೆ ಕಡಿವಾಣ ಹಾಕಲಾಗಿಲ್ಲ.
ಇದರಲ್ಲಿ, ವ್ಯವಸ್ಥೆಯ ಲೋಪಗಳೂ ಇವೆ. ಕೆಲವು ವಾರ್ಡ್‌ಗಳಲ್ಲಿ ಕಸದ ಗಾಡಿಗಳು ಸಮಯಕ್ಕೆ ಸರಿಯಾಗಿ ಬಾರದಿರುವುದು, ಹಸಿ ಮತ್ತು ಒಣ ಕಸದ ವಿಂಗಡಣೆಯ ಗೊಂದಲದಿಂದ ಜನರು ರಸ್ತೆಗೆ ಕಸ ಎಸೆಯುವ ತಪ್ಪು ದಾರಿ ಹಿಡಿಯುತ್ತಿದ್ದಾರೆ.
Roads of Bengaluru have become a garbage dumping zones. Despite multiple complaints no action by BBMP @GBAChiefComm @GBA_office @ICCCBengaluru #Bengaluru https://t.co/hbWXLTvC2p pic.twitter.com/bMoXVio4S6
— YaGunnersYa (@piyushnathani1) June 7, 2026
ಜೊತೆಗೆ, ಹೋಟೆಲ್‌ಗಳು, ಜ್ಯೂಸ್ ಸೆಂಟರ್‌ಗಳು ಹಾಗೂ ಬೀದಿ ಬದಿಯ ವ್ಯಾಪಾರಿಗಳು ತಡರಾತ್ರಿ ತಮ್ಮ ವ್ಯಾಪಾರ ಮುಗಿದ ನಂತರ ಇಡೀ ದಿನದ ತ್ಯಾಜ್ಯವನ್ನು ರಸ್ತೆ ಬದಿಯೇ ಸುರಿದು ಹೋಗುವುದು ಈ ಸಮಸ್ಯೆಯನ್ನು ಮತ್ತಷ್ಟು ಉಲ್ಬಣಗೊಳಿಸಿದೆ.
ಈ ಲೇಖನ ಓದಿದ್ದೀರಾ?: ನೆಹರೂ ನಿಂದನೆ ಎಂಬುದು ಸೆರಗಿಗೆ ಕಟ್ಟಿಕೊಂಡ ಕೆಂಡ! ಪರಮವಿಕೃತಿಯ ಈ ಪ್ರಾಜೆಕ್ಟು ಫಲಿಸುವುದಿಲ್ಲ
ಈ ದುಸ್ಥಿತಿಯ ವಿರುದ್ಧ ಬೆಂಗಳೂರಿಗರು ಸಾಮಾಜಿಕ ಜಾಲತಾಣಗಳಲ್ಲಿ, ಬಿಬಿಎಂಪಿ ಮತ್ತು ಜನಪ್ರತಿನಿಧಿಗಳ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕುತ್ತಿದ್ದಾರೆ. ನಾಗರಿಕರು ತಮ್ಮ ತಮ್ಮ ಏರಿಯಾಗಳಲ್ಲಿ ಕಸದ ರಾಶಿ ಬಿದ್ದಿರುವ ಫೋಟೋ ಮತ್ತು ವಿಡಿಯೋಗಳನ್ನು ಅಪ್‌ಲೋಡ್ ಮಾಡಿ, ಅಧಿಕಾರಿಗಳನ್ನು ಟ್ಯಾಗ್ ಮಾಡುವ ಮೂಲಕ ತರಾಟೆಗೆ ತೆಗೆದುಕೊಳ್ಳುತ್ತಿದ್ದಾರೆ.
ನಾವು ತೆರಿಗೆ ಪಾವತಿಸಿದರೂ ನಮಗೆ ಸಿಗುತ್ತಿರುವುದು ಕಸದ ರಸ್ತೆಗಳು ಮತ್ತು ರೋಗರುಜಿನಗಳು ಮಾತ್ರವೇ ಎಂದು ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ರಸ್ತೆ ಬದಿಯ ಕಸದ ರಾಶಿಗಳು ಸೊಳ್ಳೆಗಳು, ನೊಣಗಳು ಮತ್ತು ಇಲಿಗಳ ಸಂತಾನೋತ್ಪತ್ತಿ ಕೇಂದ್ರಗಳಾಗಿ ಮಾರ್ಪಡುತ್ತಿದ್ದು, ಆಯಾ ಪ್ರದೇಶಗಳಲ್ಲಿ ಡೆಂಗ್ಯೂ, ಮಲೇರಿಯಾ ಹಾಗೂ ಕಾಲರಾದಂತಹ ಸಾಂಕ್ರಾಮಿಕ ರೋಗಗಳ ಭೀತಿ ಎದುರಾಗಿದೆ.
