ಬೆಂಗಳೂರಿನ ಎಚ್‌ಎಎಲ್ ಕ್ಯಾಂಪಸ್‌ನಲ್ಲಿರುವ ಪ್ರತಿಷ್ಠಿತ ‘ಕ್ಯಾಪ್‌ಜೆಮಿನಿ’ (Capgemini) ಐಟಿ ಕಂಪನಿಯ ಆವರಣದಲ್ಲಿರುವ ಶಿಶುಪಾಲನಾ ಕೇಂದ್ರದಲ್ಲಿ (ಡೇ-ಕೇರ್ ಸೆಂಟರ್) ಪುಟ್ಟ ಮಕ್ಕಳಿಗೆ ಅಮಾನುಷವಾಗಿ ಚಿತ್ರಹಿಂಸೆ ನೀಡಿರುವ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಐವರು ಮಹಿಳಾ ಮೇಲ್ವಿಚಾರಕಿಯರ ವಿರುದ್ಧ ಪೊಲೀಸರು ಎಫ್‌ಐಆರ್ ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ.
ಐಟಿ ಕಂಪನಿಯ ಉದ್ಯೋಗಿಗಳು ತಾವು ಕಚೇರಿಯಲ್ಲಿ ಕೆಲಸ ಮಾಡುವ ಸಮಯದಲ್ಲಿ ತಮ್ಮ ಮಕ್ಕಳನ್ನು ನೋಡಿಕೊಳ್ಳಲು ಈ ಡೇ-ಕೇರ್ ಕೇಂದ್ರದಲ್ಲಿ ಬಿಡುತ್ತಿದ್ದರು. ಆದರೆ, ಅಲ್ಲಿ ಮಕ್ಕಳ ಮೇಲೆ ನಡೆದಿರುವ ಕ್ರೌರ್ಯದ ವಿಡಿಯೊಗಳು ವಾಟ್ಸ್‌ಆ್ಯಪ್‌ನಲ್ಲಿ ಹರಿದಾಡಿದ ನಂತರ ಸೋಮವಾರ ಈ ಪ್ರಕರಣ ಬಹಿರಂಗವಾಗಿದೆ. ದೂರಿನಲ್ಲಿ ಉಲ್ಲೇಖವಾಗಿರುವ ನೈಜ ಸಂಗತಿಗಳ ಪ್ರಕಾರ, 2 ರಿಂದ 3 ವರ್ಷ ವಯಸ್ಸಿನ ಪುಟ್ಟ ಮಕ್ಕಳು ಅತ್ತಾಗ ಅಥವಾ ತುಂಟಾಟ ಮಾಡಿದಾಗ, ಆಯಾಗಳು ಅವರಿಗೆ ದೈಹಿಕ ಹಿಂಸೆ ನೀಡಿ, ಬೆದರಿಕೆ ಹಾಕುತ್ತಿದ್ದರು.
ಇದನ್ನು ಓದಿದ್ದೀರಾ? FCRA ಅಸ್ತ್ರ ಬಳಸಿ NGOಗಳ ಕತ್ತು ಹಿಸುಕಿದ ಮೋದಿ ಆಡಳಿತ; ಆರೆಸ್ಸೆಸ್‌ ಸಂಸ್ಥೆಗಳಿಗೆ ಏಕಿಲ್ಲ ..
ಅಳುವ ಮಕ್ಕಳನ್ನು ಹೆದರಿಸಲು ಸಿಬ್ಬಂದಿಯು ಅವರನ್ನು ‘ಫ್ರಂಟ್-ಲೋಡಿಂಗ್ ವಾಷಿಂಗ್ ಮೆಷಿನ್’ ಒಳಗಡೆ ಕೂರಿಸಿದ್ದಾರೆ. ಅಷ್ಟೇ ಅಲ್ಲದೆ, ಮಕ್ಕಳನ್ನು ವೆಸ್ಟರ್ನ್ ಶೈಲಿಯ ಶೌಚಾಲಯದ (ಕಮೋಡ್) ಮೇಲೆ ಕೂರಿಸಿ, ಟಾಯ್ಲೆಟ್ ಜೆಟ್ ಸ್ಪ್ರೇ ಮೂಲಕ ಮಕ್ಕಳ ಬಾಯಿಗೆ ನೀರು ಹೊಡೆದು ಹಿಂಸಿಸಿದ್ದಾರೆ. ಮಕ್ಕಳನ್ನು ಶೌಚಾಲಯದ ಒಳಗೆ ಕೂಡಿಹಾಕಿ, ಸದ್ದಿಲ್ಲದೆ ಸುಮ್ಮನಿರುವಂತೆ ಬೆದರಿಸಿರುವುದು ದೂರಿನಿಂದ ಸ್ಪಷ್ಟವಾಗಿದೆ.
ಈ ವಿಡಿಯೊಗಳು ಮಕ್ಕಳ ಸಹಾಯವಾಣಿಯ ಗಮನಕ್ಕೆ ಬಂದ ಕೂಡಲೇ, ಅವರು ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ಕಾರ್ಯಾಚರಣೆಕ್ಕಿಳಿದಿದ್ದಾರೆ. ದೌರ್ಜನ್ಯ ಎಸಗಿದ ಐವರು ಮಹಿಳಾ ಸಿಬ್ಬಂದಿಯ ವಿರುದ್ಧ ‘ಬಾಲ ನ್ಯಾಯ (ಮಕ್ಕಳ ಪಾಲನೆ ಮತ್ತು ರಕ್ಷಣೆ) ಕಾಯ್ದೆ’ಯಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಆರೋಪಿಗಳನ್ನು ಶೀಘ್ರದಲ್ಲೇ ವಿಚಾರಣೆಗೆ ಕರೆಯಲಾಗುವುದು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
