ಜಾರ್ಖಂಡ್‌ನ ಜಮ್‌ಶೆದ್‌ಪುರದಲ್ಲಿ ಪರ್ವತಗಳು ಮತ್ತು ನದಿಗಳ ರಕ್ಷಣೆಗಾಗಿ ‘ಪರ್ವತಗಳು ಮತ್ತು ನದಿಗಳ ರಾಷ್ಟ್ರೀಯ ಸಮಾವೇಶ’ (National Convention on Mountains and Rivers) ಮೇ 22 ಮತ್ತು 23ರಂದು ಯಶಸ್ವಿಯಾಗಿ ಜರುಗಿದೆ.
ದೇಶದ ಪ್ರಮುಖ ಪರಿಸರ ಸಂಸ್ಥೆಗಳು, ತಜ್ಞರು ಮತ್ತು ನಾಗರಿಕರು ಒಟ್ಟಾಗಿ ದೇಶದ ನದಿಗಳು ಮತ್ತು ಪರ್ವತ ಪರಿಸರ ವ್ಯವಸ್ಥೆಗಳ ಸುಸ್ಥಿರ ನಿರ್ವಹಣೆ ಹಾಗೂ ರಕ್ಷಣೆಗಾಗಿ ಕೈಜೋಡಿಸಲು ಈ ಸಮಾವೇಶದಲ್ಲಿ ನಿರ್ಧರಿಸಿದ್ದಾರೆ. ಈ ಬಗ್ಗೆ ಸಂಘಟಕರು ಬೆಂಗಳೂರಿನ ಪ್ರೆಸ್‌ ಕ್ಲಬ್‌ನಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಮಾಹಿತಿ ನೀಡಿದ್ದಾರೆ.
ಇದನ್ನು ಓದಿದ್ದೀರಾ? ಭಾರತದ ಅರ್ಥ ವ್ಯವಸ್ಥೆಯ 7.4% ಬೆಳವಣಿಗೆ ಅಂದಾಜು: ವಾಸ್ತವಕ್ಕೆ ಎಷ್ಟು ಹತ್ತಿರ?
ಈ ಸಮಾವೇಶದಲ್ಲಿ ತರುಣ್ ಭಾರತ ಸಂಘ (Tarun Bharat Sangh), ಐಐಟಿ (ಐಎಸ್‌ಎಂ) ಧನಬಾದ್, ಜಲ ಬಿರಾದರಿ, ಯುಗಾಂತರ ಭಾರತಿ, ನೇಚರ್ ಫೌಂಡೇಶನ್, ಸ್ವರ್ಣರೇಖಾ ಕ್ಷೇತ್ರ ವಿಕಾಸ ಟ್ರಸ್ಟ್ ಮತ್ತು ಮಿಷನ್ ವೈ (MissionY) ಸಂಸ್ಥೆಗಳ ಪ್ರತಿನಿಧಿಗಳು ಭಾಗವಹಿಸಿ ಜಂಟಿ ಪ್ರಕಟಣೆಯನ್ನು ಹೊರಡಿಸಿದ್ದಾರೆ. ಪ್ರಕಟಣೆಯಲ್ಲಿ 9 ನಿರ್ಣಯಗಳ ಬಗ್ಗೆ ಮಾಹಿತಿ ನೀಡಿದ್ದಾರೆ.
- ಪರ್ವತ ಪರಿಸರ ವ್ಯವಸ್ಥೆಗಳು ದೇಶದ ನೀರಿನ ಭದ್ರತೆ, ನದಿಗಳ ಪುನಶ್ಚೇತನ, ಜೀವವೈವಿಧ್ಯತೆ ಮತ್ತು ಲಕ್ಷಾಂತರ ಜನರ ಜೀವನೋಪಾಯಕ್ಕೆ ಅತ್ಯಗತ್ಯ.
- ಕೆಳಹಂತದ ಪ್ರದೇಶಗಳಿಗೆ ನೀರು ಮತ್ತು ಅಂತರ್ಜಲವನ್ನು ಪೂರೈಸುವ ಪರ್ವತ ಜಲಾನಯನ ಪ್ರದೇಶಗಳನ್ನು ರಕ್ಷಿಸಲು ಬದ್ಧತೆ
- ಪರ್ವತ ಪ್ರದೇಶದ ಮೂಲ ನಿವಾಸಿಗಳು ಮತ್ತು ಸ್ಥಳೀಯ ಸಮುದಾಯಗಳನ್ನು ಪರಿಸರದ ಪ್ರಾಥಮಿಕ ರಕ್ಷಕರು ಎಂದು ಗುರುತಿಸಲಾಗಿದ್ದು, ಅವರ ಸಾಂಪ್ರದಾಯಿಕ ಜ್ಞಾನವನ್ನು ಗೌರವಿಸಲು ನಿರ್ಧರಿಸಲಾಗಿದೆ.
- ಪರ್ವತ ಪ್ರದೇಶಗಳ ಮೇಲೆ ಪರಿಣಾಮ ಬೀರುವ ಚಟುವಟಿಕೆಗಳನ್ನು ದೀರ್ಘಾವಧಿಯಲ್ಲಿ ನಿಯಂತ್ರಿಸಲು ಪರಿಸರ-ಆಧಾರಿತ ಮತ್ತು ಹಕ್ಕುಗಳನ್ನು ಗೌರವಿಸುವ ಸಮಗ್ರ ಕಾನೂನು ಚೌಕಟ್ಟನ್ನು ಅಭಿವೃದ್ಧಿಪಡಿಸುವುದು.
- ನದಿಗಳು ಮತ್ತು ಪರ್ವತಗಳ ಹಕ್ಕುಗಳನ್ನು ಖಚಿತಪಡಿಸುವುದು ಹಾಗೂ ಅವುಗಳ ಆಡಳಿತಕ್ಕಾಗಿ ಸಾಂಸ್ಥಿಕ ಕಾರ್ಯವಿಧಾನಗಳನ್ನು ಸ್ಥಾಪಿಸುವುದು.
- ದೇಶದ ಪರ್ವತ ಪರಿಸರ ವ್ಯವಸ್ಥೆಗಳ ಕಾನೂನು ಚೌಕಟ್ಟನ್ನು ರೂಪಿಸಲು ಅಖಿಲ ಭಾರತ ಮಟ್ಟದ ಸಮಾಲೋಚನಾ ಸಭೆಗಳನ್ನು ಆಯೋಜಿಸುವುದು.
- ಈ ಪ್ರಕಟಣೆ ಹೊರಬಂದ ಒಂದು ವರ್ಷದ ಅವಧಿಯೊಳಗೆ ಕಾನೂನು ಚೌಕಟ್ಟನ್ನು ಸಿದ್ಧಪಡಿಸುವ ಕೆಲಸವನ್ನು ಪೂರ್ಣಗೊಳಿಸಲು ಪ್ರತಿಜ್ಞೆ ಮಾಡಲಾಗಿದೆ.
- ಈ ಕಾನೂನು ಚೌಕಟ್ಟನ್ನು ಸಿದ್ಧಪಡಿಸಲು ನಾಗರಿಕ ಸಮಾಜ ಸಂಸ್ಥೆಗಳು, ಶಿಕ್ಷಣ ತಜ್ಞರು, ಪರಿಸರ ವಿಜ್ಞಾನಿಗಳು, ಸಮಾಜ ವಿಜ್ಞಾನಿಗಳು, ಕಾನೂನು ತಜ್ಞರು ಮತ್ತು ಸ್ಥಳೀಯ ಸಮುದಾಯದ ಮುಖ್ಯಸ್ಥರನ್ನು ಆಹ್ವಾನಿಸಬೇಕು.
- ಸಿದ್ಧಪಡಿಸಲಾದ ಕಾನೂನು ಚೌಕಟ್ಟನ್ನು ಪರಿಗಣಿಸಿ, ಅದನ್ನು ‘ಪರ್ವತ ಸಂರಕ್ಷಣಾ ಕಾಯ್ದೆ’ (Mountain Protection Act) ಮಸೂದೆಯ ರೂಪದಲ್ಲಿ ರಾಜ್ಯ ವಿಧಾನಸಭೆಗಳು ಹಾಗೂ ಸಂಸತ್ತಿನ ಉಭಯ ಸದನಗಳಲ್ಲಿ (ಲೋಕಸಭೆ ಮತ್ತು ರಾಜ್ಯಸಭೆ) ಅಂಗೀಕಾರಕ್ಕಾಗಿ ಮಂಡಿಸುವಂತೆ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳಿಗೆ ಒತ್ತಾಯಿಸಲಾಗುತ್ತದೆ.
ಈ ಅಭಿಯಾನದ ನೇತೃತ್ವವನ್ನು ಭಾರತದ ಪ್ರಸಿದ್ಧ ಪರಿಸರವಾದಿ, ‘ಭಾರತದ ಜಲಪುರುಷ’ (Waterman of India) ಎಂದೇ ಖ್ಯಾತರಾದ ತರುಣ್ ಭಾರತ ಸಂಘದ ಅಧ್ಯಕ್ಷರು ರಾಜೇಂದ್ರ ಸಿಂಗ್ ಮತ್ತು ದಾಮೋದರ್ ಬಚಾವೋ ಅಭಿಯಾನದ ಸಂಚಾಲಕರು ಸರಯೂ ರಾಯ್ ವಹಿಸಿದ್ದಾರೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
