ಕೆವೈಸಿ ಮಾಡಿಸಿಲ್ಲ ಎಂಬ ಕಾರಣದಿಂದಾಗಿ ಸುಮಾರು ನಾಲ್ಕು ತಿಂಗಳಿಂದ ಜಮೆಯಾಗದ ಪಿಂಚಣಿ ಹಣವನ್ನು ಪಡೆಯಲೆಂದು ತನ್ನ 90 ವರ್ಷದ ಅತ್ತೆಯನ್ನು ಬೆನ್ನ ಮೇಲೆ ಹೊತ್ತುಕೊಂಡು ಬುಡಕಟ್ಟು ಮಹಿಳೆಯೊಬ್ಬರು ಬ್ಯಾಂಕ್‌ಗೆ ಸುಮಾರು 3 ಕಿ.ಮೀ ನಡೆದುಕೊಂಡು ಹೋದ ಘಟನೆ ಛತ್ತೀಸ್‌ಗಢದ ಸುರ್ಗುಜಾ ಜಿಲ್ಲೆಯ ಸುರ್ಗುಜಾ ಜಿಲ್ಲೆಯಲ್ಲಿ ನಡೆದಿದೆ. ವೃದ್ಧ ಮಹಿಳೆಗೆ ನಾಲ್ಕು ತಿಂಗಳಿನಿಂದ ಮಾಸಿಕ 500 ರೂಪಾಯಿ ಪಿಂಚಣಿ ಬಂದಿರಲಿಲ್ಲ.
ಈ ಘಟನೆ ಶುಕ್ರವಾರ ಮೈನ್‌ಪತ್ ಅಭಿವೃದ್ಧಿ ಬ್ಲಾಕ್‌ನಲ್ಲಿ ನಡೆದಿದೆ. ಸದ್ಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ವಿಡಿಯೋದಲ್ಲಿ 50ರ ಮಹಿಳೆ ಸುಖ್‌ಮಾನಿಯಾ ಎಂದು ಗುರುತಿಸಲಾದ ಮಹಿಳೆ ತನ್ನ ವೃದ್ಧ ಅತ್ತೆಯನ್ನು ಬೆನ್ನ ಮೇಲೆ ಹೊತ್ತುಕೊಂಡು ರಸ್ತೆಯ ಉದ್ದಕ್ಕೂ ನಡೆದುಕೊಂಡು ಹೋಗುತ್ತಿರುವುದನ್ನು ಕಾಣಬಹುದು.
ಇದನ್ನು ಓದಿದ್ದೀರಾ? ರಾಯಚೂರು | ದೇವದಾಸಿ ಮಹಿಳೆಯರ ಪಿಂಚಣಿ ಹೆಚ್ಚಳಕ್ಕೆ ಆಗ್ರಹ
ಈ ಹಿಂದೆ ‘ಬ್ಯಾಂಕ್ ಮಿತ್ರ’ ತನ್ನ ಮನೆಯಲ್ಲಿ ಮಾಸಿಕ 500 ರೂ. ಪಿಂಚಣಿಯನ್ನು ತಲುಪಿಸುತ್ತಿದ್ದರು. ಆದರೆ ಕೆವೈಸಿ ಪ್ರಕ್ರಿಯೆ ಪೂರ್ಣಗೊಳ್ಳದ ಕಾರಣ ಕಳೆದ ಮೂರರಿಂದ ನಾಲ್ಕು ತಿಂಗಳಿನಿಂದ ತನಗೆ ಪಿಂಚಣಿ ಬಂದಿಲ್ಲ ಎಂದು ವಿಡಿಯೋದಲ್ಲಿ ಮಹಿಳೆ ಹೇಳಿದ್ದಾರೆ.
ಕುನಿಯಾ ಪ್ರದೇಶದ ಜಂಗಲ್‌ಪಾರ ಗ್ರಾಮದ ನಿವಾಸಿ ಸುಖ್‌ಮಾನಿಯಾ, ಮೈನ್‌ಪತ್ ಪಟ್ಟಣದ ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ ಶಾಖೆಗೆ ಸುಮಾರು 3 ಕಿ.ಮೀ ನಡೆದು ತಲುಪಿದ್ದಾರೆ.
ಮೇ 22ರಂದು ಸುಖ್‌ಮಾನಿಯಾ ಯಾರಿಗೂ ತಿಳಿಸದೆ ತನ್ನ ಅತ್ತೆಯನ್ನು ಬೆನ್ನಿನ ಮೇಲೆ ಹೊತ್ತುಕೊಂಡು ಬ್ಯಾಂಕ್ ಶಾಖೆಗೆ ಬಂದಿದ್ದಾರೆ. ಶಾಖೆಯಲ್ಲಿ ಕೆವೈಸಿ ಪೂರ್ಣಗೊಂಡ ನಂತರ, ಬ್ಯಾಂಕ್ ತಕ್ಷಣವೇ ನಾಲ್ಕು ತಿಂಗಳವರೆಗೆ ಬಾಕಿ ಇದ್ದ 2,000 ರೂ. ಪಿಂಚಣಿ ಮೊತ್ತವನ್ನು ಬಿಡುಗಡೆ ಮಾಡಿದೆ ಎಂದು ಮೈನ್‌ಪತ್ ಜನಪತ್ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಖುಷ್ಬೂ ಶಾಸ್ತ್ರಿ ಭಾನುವಾರ ಹೇಳಿದ್ದಾರೆ.
