ಎಲ್ಲರಿಗೂ ಬಾಲ್ಯ ಅಮೂಲ್ಯ. 'ಚಟುವಕಾಲಿ' ಎನ್ನುವ ಹುಲ್ಲಿನ ಮನೆಯ ರಾಜಕುಮಾರಿಯ ಬದುಕಿನ ಘಟನೆಗಳು ಕೂಡ ಅಂಥವೇ. ಆಕೆಯ ಸುಂದರ ಬಾಲ್ಯ ಮತ್ತು ನೆರೆಮನೆಯವರು, ದಾಯಾದಿಗಳು ಮಾಡಿದ ಅವಮಾನವೇ ಅವಳಲ್ಲಿ ಚಂದ ಬದುಕುವ ಕಿಚ್ಚು ಹಚ್ಚಿದ ಕತೆ ಈ ಲೇಖನದ ಹೂರಣ
ಚಟುವಕಾಲಿ ಕುಶಿಕೋ, ಕೆಲವುರಿಕೋ ಬೆಚ್ಚ ಅಡ್ಡ ಪೆದ… ಅದೆಂತೇ ಇರಡ್ ಚಟುವಕಾಲಿ ಅಂದ್ ಆ ಪಿಲ್ಲ್ ಮನೆರ ರಾಜಕುಮಾರಿ, ಕೀತಿ ಪೋನ ಸಿಮಿಸ್, ಕೀತ್ನ ಚಡ್ಡಿ ಇದೇ ಅಂದೆತ್ರ ಮನೆರ ಪೊರಪಾಡ್.
ತಾಂಡ ಬಯ್ಯ ಪುಟ್ಟ್ನವು 2 ಪಿಲ್ಲ್ ಮನೆರ ವಾರಸ್ದಾರಂಗ, ಅಪ್ಪಂಡ ಕೈಲಿಂಜ ಎತ್ತ್ ಗಾಡಿ ಪಿಲ್ಲ್ ಮನೆಂಜ ಹಂಚಿ ಮನೆಕ್ ಕಾಕಿಯಂಡ್ ಬಂತ್ ಬುಟ್ಟತ್. ಕೇಜಿ ಅಕ್ಕಿ, ಕುಮ್ಮಿ ಸೀಮಣೆ ಎಡ್ತಂಡಿಂಜ ಅಪ್ಪ ಬೇಲ್ ವಾರ ಮಾಡಿತ್ ಮೂಟೆ ನೆಲ್ಲ್ನ ಕಟ್ಟಿ ಬೆಪ್ಪನೆಕಾಚಿ.
ಅಪ್ಪಂಡ ಕೂಡ ಅವ್ವನೂ ಕೋವುರ ಮೂಲೆಲುಳ್ಳ ಬೇಲ್ಕ್ ಕೂಪತಿ ಕೂಳಾಯಿ ಪೋಯಿತ್ ನಯಿಚಿತ್ ಹಂಚಿ ಮನೆನ ಕೆಟ್ಟುವಕ ಅಪ್ಪ ಪಟ್ಟ ಕಷ್ಟ ಒಂದಾ ದಂಡಾ! ನೀ ಮನೆ ಕೆಟ್ಟ್ನಕ ನಾ ಮೂಕ್ಲ್ ಕೂಳುಂಬಿಂದ್ ಎಣ್ಣಿತ್, ಬೈಟ್ ಶೇಖರ ಕಟ್ಟಿ ಬೆಚ್ಚ ಗೋಡೆನ ನಡು ಬೈಟ್ ದೂಕಿತ್ ಇಡುವ ಜನಡ ಮಧ್ಯ ಅಚ್ಚ-ಚುಚ್ಚ ದಂಡಾಳೂ ಅಪ್ಪಂಗ್ ನೊಗ ಕೊಡ್ತಿತ್ ಬೈಟ್ ಬೈಟೇ ಕೆಟ್ಟಿತ್ ಒಪ್ಪುನ ಮನೆ ಅಪ್ಪವಂಡ ಪಾಲ್ರ ಅರಮನೆಲ್ ಮೂಕ್ಲ್ ಕೂಳುಂಬಿಂದೂ ಎಣ್ಣವನೂ ಬಾಯಿಲೆಉಂಡಿತ್ ಪೋಚಿ.
ಈ ಲೇಖನ ಓದಿದ್ದೀರಾ?: ಬಹು ಕರ್ನಾಟಕ – ಬುಡಕಟ್ಟು ಮರಾಟಿ | ಗೋಂದೊಲು ಪುಜಂತ್ ಶಕ್ತಿಲೆ ಬೊಸುವುಂಚೆ
ಆ ಪಿಲ್ಲ್ ಮನೆ ಚೋರಿಯಂಡಿಪ್ಪಕ ಅವ್ವೋ ಮನೆಲುಳ್ಳ ಗಂಜಿ, ತಪ್ಪಲೆ, ಚೊಂಬುನೆಲ್ಲ ಬೆಚ್ಚಿತ್ ಮನೆನ ಬೂವತನ್ನಕೆ ನೋಟಿಯಂಡಿಯಂಡತ್… ಇಂದೂ ನಾಡವ್ವೋ ಆ ಮನೆನ, ಮನೆರ ಜನಡ ಸಂಭತ್ನ ಉಳಿಚಿಡುವಕ್, ಜನಡ ಬಾಯಿಕ್ ತಕ್ಕಾಪಕಾಗಾಂದ್ ಇಂದೂ ತೂತತ್ನ ಮುಚ್ಚಿಯಂಡೇ ಉಂಡ್.
ಗೂರ್ಲ ಕ್ಣ್ಣ ತಾಂಡ ಕೂಡೆ ಪುಟ್ಟ್ವವೋ, ದಮ್ಮು ಕಾಯಲತ್ ಕೊಯಂಗಿಯಂಡಿಂಜವಂಗ್ ಗೂರ್ಲಂದ್ ಕೊದಿ ಬೆಚ್ಚಿತಿಂತ್.
ಗೂರ್ಲ ಕ್ಣ್ಣಂಗೂ ಚಟುವಕಾಲಿಕ್ ಬೋರೆ ಎಂತ ಪಣಿ, ಸ್ಲೂಲ್ ಬುಟ್ಟಿತ್ ಬಂದ ಪಿಂಞ ಆ ಮನೆ, ಈ ಮನೆ ಪೋಪೋ ಟೀವಿ ನೋಟೋಕ್, ಚೆನಿಯಾಚಿ ಬಾತೆಂಗಿ ಮದಿ ಬೇಲ್ ಮಧ್ಯ ಬೋಸು ಮಾಮಂಡ ಮನೆಕ್ ಬೇಲ್ ಮಧ್ಯ ತೋಡ್ ದಾಟಿಯಂಡ್ ಪೋರುಟುರುವ ಇಂಜತ್, ಇಂಞ ವಾಪಾಸ್ ಬಪ್ಪೋ ನಾರಾಚೆ ಇರ್ಟಾಪಕಲೇ…
ಇಂಞೋರ್ ಬರಿ, ನಂಗಡಯಿಂಳೇ ನಂಗಳ ತಕ್ಕ್ ಕೇಪಕ ಒಡಿ ಪೋಯಿತ್ ಮೈನ್ ಸ್ವಿಚ್ ಆಫ್ ಮಾಡಿತ್ ಅಯ್ಯೋ ಕರೆಂಟ್ ಪೋಚಿ ಮಕ್ಕಳೇ ಬಯ್ಯ ಬಾರಿಂದ್ ಎಣ್ಣಿತ್ ನಂಗಳ ತಿರಿತ್ ಅಯಿಚಿರುವ ಇಂಜತ್. ಎಚ್ಚಕೋ ಕುರಿ ಟಿವಿ ನೋಡಿಯಂಡಿಪ್ಪಕಲೇ ಟೀವಿ ಹೀಟ್ ಆಯಿ ಪೋಪ ನಿಂಗ ಪೋಯಿಂದ್ ಮೂಡ್ಕೇ ಎಣ್ಣಿತ್ ಅಯಿಚನಾಲೆಯೋ ಎನ್ನೋ ಇಂದ್ ಇಂದ್ ಇಲ್ಲಿ ನಿಪ್ಪಕಾಚಿ. ಪಿಲ್ಲ್ ಮನೆಲೇ ಬೃಪುಟ್ಟಿ ಬೋಳ್ಂದ ಪೆತ್ತಯಿಂಗಳ ತಾಜ್ ಹೋಟೆಲ್ಲ್ ಇಪ್ಪ್ಚಿಡುವನ್ನೆ ಆಚಿ, ಎತ್ತ್ರ ಗಾಡಿಲೇ ಪೋಯಂಡಿಂಜ ನಾಡ ಅಪ್ಪೋ ಆಕಾಶತ್ ಫ್ಲಯಿಟ್ಲ್ ಪಾರುವನ್ನನೆ ಆಚಿ.
ಒರ್ ದಿನ ಗೂರ್ಲ ಕ್ಣ್ಣನ ಕಾಕಿಯಂಡ್ ಕಾಕಿಯಂಡ್ ಸ್ಕೂಲ್ಂಜ ಬೈಟಾಪಕ ಮನೆಕ್ ಬಂತ್ ಕೀತ್ನ ಸಿಮಿಸ್ ಇಟ್ಟಂಡ್ ಆಮನೆ ಈ ಮನೆ ಪೋಯಿತಿಪ್ಪಕ ಕೋಲ್ ಕಡ್ಡಿಲ್ ಸಿಮೀಸ್ನ ನೇತಿತ್ ಚಡ್ಡಿ ಇಟ್ಟಿತಾಂದ್ ಚೆಕ್ ಮಾಡನ ಆಂಟಿ ಕೇಲ್ ಇಂಜ ಬ್ರೆಡ್ ಚೂರ್ನ ಕಾಟಿತ್ ಇದರಾಂದ್ ಕಾಟಣೆ ಗೂರ್ಲ ಕ್ಣ್ಣಂಡ ಕೈನ ಪಡ್ಚಿ ನುರುಕೋಕ ಬೋಂಡಾಂದ್ ಕಷ್ಟತ್ ಎಣ್ಣ್ನ ಗೂರ್ಲ ಕ್ಣ್ಣಂಗ್ ಮಿಂಞ ನೀ ಇದೆಲ್ಲ ತಿಂಬಕಯ್ಯುವೋ ಎನ್ನೋ ತಿನ್ನ್ಂದ್ ಕೈಕ್ ತುರ್ಕ್ನ ಬ್ರೇಡ್ ಚೂರ್ ನಾಡ ಮನಸ್ಸ್ಂಜ ಇಂಞೂ ಮಾಜಿತ್ಲೆ.
ಈ ಲೇಖನ ಓದಿದ್ದೀರಾ?: ಬಹು ಕರ್ನಾಟಕ – ಬ್ಯಾರಿ | ಸಬೇ ಬರಾತೆ; ಕಿರ್ಫ ಕಾಣದಾಯ್ನಿ
ಅವ ಎಣ್ಣನಕೆ ನಲ್ಲೋರ್ ಪರಿಸ್ಥಿತಿಕ್ ನಂಗ ಬಕ್ಕಣೆ ಗೂರ್ಲ ಕ್ಣ್ಣನೂ ವಿಧಿರ ಕಳಿಕ್ ಚಿಕ್ಕ್ನದ್ ನಂಗಡ ಪಾಲ್ರ ದುರ್ವಿಧಿ. ಕಷ್ಟ ಕಾಲತ್ ಕೊಯಂಗಿಯಡಿಂಜ ಗೂರ್ಲ ಕ್ಣ್ಣಕ್ ಅರಿಯತೆ ಪುಳಿ, ಪಚ್ಚೆ ನೀರ್ನ ಕೊಡ್ತಿತ್ ಬೈಟ್ ಇಡೀ ದಮ್ಮು ಜಾಸ್ತಿ ಆನ ಪಿಂಞ ಪೊಲೋಕ್ ಮಿಂಞಲೇ ಗೂರ್ಲನ ನೇತಿಯಂಡ್ ಪೊನ್ನಂಪೇಟೆಕೆತ್ತಣೆ ನಡ್ಂದ್ ಪೋಯಿತ್ ಪಾಲಿಬೆಟ್ಟ ಆಸ್ಪತ್ರೆಕ್ ಎಡ್ತಪೋಯಿತ್ ಅಂದ್ ಅವನ ಉಳಿಚಿಟ್ಟ ನಾಡಪ್ಪ ತಾಂಡ ಕಟ್ಟ್ ಮಿಂಞತ್ ಮದ್ದ್ ಕುಡ್ಚಿತ್ ಬುದ್ದಿತಿಪ್ಪಕ ಅವನ ಉಳಿಚಿಡುವ ಕಯಿಂಜಿತ್ಲೆ ಅಲ್ಲಾಂದೆಣ್ಣುವ ಕೊರಗ್ ನಾಡಪ್ಪಂಡ ಮನಸ್ರಾಳತ್ಲ್ ಇಕ್ಕಲೂ ಉಂಡ್.
ಒಂದಾ ದಂಡಾ ಉಂಡ್ ಕೂತ್ಟ್ಟ್ ಬೊಳ್ಂದ ಆ ಮನೆಲ್ ಅಂದ್ ಇಂಜ ಪ್ರೀತಿ, ನೆಮ್ಮದಿ ಇಂದಿಲ್ಲ, ಮನೆ ಮನೆಯಾಯಿತೇ ಇಲ್ಲೆ… ಅನುಭವಿಚಿಟ್ಟ ನೊಂಬಲ, ತಿರಸ್ಕಾರ, ಮಾಡ್ನ ಅವಮಾನ ಬದುಕುವಕ್ ಬಟ್ಟೆ ಕಾಟ್ಚಿ. ಇಚ್ಚಿಕೇ ಬದ್ಕ್, ತಿರಸ್ಕಾರತ್ನ ಮರ್ಂದಕಲೂ ಆರತ ಪುಣ್ಣ್ರ ಗಾಯ ಮಾತ್ರ ಮನಸ್ಲ್ ಇಂಜಿತೇ ಇಪ್ಪ. ಬದ್ಕ್ ಪಡಿಪುಚಿಟ್ಟ ಪಾಠ, ಚೋರೇಲೆ ಬಂದ ಸ್ವಾಭಿಮಾನ, ನಂಬಿಕೆ, ನೈಪು, ಬದ್ಕ್ನ ಗಟ್ಟಿಯಾಯಿತ್ ನಿಪ್ಪುಚಿಡುವನ್ನನೆ ಮಾಡಿತ್. ಕೂಡೆ ಪುಟ್ಟ್ನ ದಂಡ್ ಕ್ಣ್ಣ ಮಕ್ಕ ಆಚೆಂಗೂ ದಂಡೂ ಪರಿಸ್ಥಿತಿರ ಕೈಗೊಂಬೆ ಆಯಿಪೋಚಿ, ಮನೆ ಮನಸ್ಸ್ ದಂಡಾನ ಆ ಮನೆ ಇಂಞಾಚೆಂಗೂ ಪುಟ್ಟ್ನ ಮಹಾಲಕ್ಷಿರ ಕಾಲ್ ಗುಣತ್ ಆ ಮನೆಲ್ ಮರೆಯಾನ ತೆಳಿ-ಕಳಿ, ಮರ್ಚಿ ಬರಡ್ಂದೊಣ್ಣೋದ್ ನಾಡ ಮನತ್ರಾಳತ್ರ ಪ್ರಾರ್ಥನೆ.