ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯಲ್ಲಿ ಕಾಂಗ್ರೆಸ್ ಹಣಬಲ ಮತ್ತು ರಾಜ್ಯ ಅಧಿಕಾರ ಯಂತ್ರದ ಬಹಿರಂಗ ದುರುಪಯೋಗದಿಂದ ಗೆಲುವು ಪಡೆದಿದೆ. ಹಿಂಬಾಗಿಲಿನ ಚುನಾವಣಾ ಅಕ್ರಮಗಳು ಹಾಗೂ ಅಪಾರ ಹಣಬಲದ ಮೂಲಕ ಕಾಂಗ್ರೆಸ್ ಗೆದ್ದಿದೆ” ಎಂದು ಎಸ್‌ಡಿಪಿಐ ರಾಜ್ಯ ಪ್ರಧಾನ ಕಾರ್ಯದರ್ಶಿ ಹಾಗೂ ದಾವಣಗೆರೆ ದಕ್ಷಿಣ ಪರಾಜಿತ ಅಭ್ಯರ್ಥಿ ಅಫ್ಸರ್ ಕೊಡ್ಲಿಪೇಟೆ ಆರೋಪಿಸಿದರು.
ದಾವಣಗೆರೆಯ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, “ಪ್ರತಿಯೊಂದು ವಾರ್ಡ್‌ನಲ್ಲೂ ನೇರ ಹಸ್ತಕ್ಷೇಪ ನಡೆದಿದ್ದು, ಅಧಿಕಾರದಲ್ಲಿರುವ ಮಂತ್ರಿಗಳು, ಶಾಸಕರು ಮತ್ತು ವಿವಿಧ ನಿಗಮಗಳ ಅಧ್ಯಕ್ಷರನ್ನು ಚುನಾವಣಾ ಪ್ರಕ್ರಿಯೆಯನ್ನು ಸೂಕ್ಷ್ಮವಾಗಿ ನಿಯಂತ್ರಿಸಲು ನಿಯೋಜಿಸಲಾಗಿತ್ತು. ಮತದಾರರಿಗೆ ಹಣ ಹಂಚಿಕೆ ಮಾಡಿ ಪ್ರಭಾವ ಬೀರಿರುವುದು ಸಂಘಟಿತವಾಗಿ ನಡೆದಿರುವುದನ್ನು ಸ್ಪಷ್ಟವಾಗಿದೆ. ಇದು ಸ್ವತಂತ್ರ ಮತ್ತು ನ್ಯಾಯಸಮ್ಮತ ಚುನಾವಣೆಯ ಆತ್ಮವನ್ನೇ ಹಾಳುಮಾಡುವಂತಹ ಗಂಭೀರ ವಿಚಾರ” ಎಂದು ಆತಂಕ ವ್ಯಕ್ತಪಡಿಸಿದರು.
“ಈ ಫಲಿತಾಂಶವು ಕಾಂಗ್ರೆಸ್ ಮತ್ತು ಬಿಜೆಪಿ ನಡುವೆ ಒಳಒಪ್ಪಂದ ನಡೆದಿರುವ ಬಗ್ಗೆ ಗಂಭೀರ ಅನುಮಾನಗಳನ್ನು ಹುಟ್ಟಿಸುತ್ತದೆ. ಇಂತಹ ರಾಜಕೀಯ ಹೊಂದಾಣಿಕೆಗಳು ನಿಜವಾದ ಪರ್ಯಾಯ ಶಕ್ತಿಗಳಾದ ಎಸ್‌ಡಿಪಿಐಯನ್ನು ಹಿನ್ನಡೆಗೊಳಿಸುವ ಮೂಲಕ ಪ್ರಮುಖ ಪಕ್ಷಗಳು ಒಂದನ್ನೊಂದು ರಕ್ಷಿಸಿಕೊಳ್ಳುತ್ತಿರುವುದು ಬಹಿರಂಗವಾಗುತ್ತಿವೆ” ಎಂದು ಆರೋಪಿಸಿದರು.
“ಮತಗಳ ಸಂಖ್ಯೆಯಲ್ಲಿ ಅವರು ಗೆದ್ದಿರಬಹುದು, ಆದರೆ ನಾನು ವಿಶ್ವಾಸದಲ್ಲಿ ಗೆದ್ದಿದ್ದೇನೆ ಎಂಬ ಧನ್ಯತಾಭಾವ ನನ್ನಲ್ಲಿದೆ. ಹಣಬಲ ಮತ್ತು ಅಧಿಕಾರದ ಒತ್ತಡಗಳ ನಡುವೆಯೂ ದಾವಣಗೆರೆ ದಕ್ಷಿಣ ಮತದಾರರು ನೀಡಿದ 18,975 ಸ್ವಾಭಿಮಾನದ ಮತಗಳು ನನಗೆ ದೊಡ್ಡ ಪ್ರೇರಣೆಯಾಗಿವೆ. ಪರ್ಯಾಯ ರಾಜಕಾರಣವನ್ನು ಬಯಸುವ ಸ್ವಾಭಿಮಾನಿ ಮತದಾರರಿಗೆ ನಾನು ಹೃತ್ಪೂರ್ವಕ ಧನ್ಯವಾದಗಳನ್ನು ಅರ್ಪಿಸುತ್ತೇನೆ ಎಂದು ಹೇಳಿದರು.
“ಸ್ಟ್ರಾಂಗ್ ರೂಮ್‌ನ ಎರಡು ಕೀಲಿಗಳು ನಾಪತ್ತೆಯಾಗಿರುವ ಪ್ರಕರಣ ಅತ್ಯಂತ ಗಂಭೀರವಾಗಿದ್ದು, ಇದರ ಬಗ್ಗೆ ಉನ್ನತ ಮಟ್ಟದ ತನಿಖೆ ನಡೆಯಬೇಕು. ಇದು ಚುನಾವಣಾ ಅಕ್ರಮ ನಡೆದಿದೆ ಎಂಬುದಕ್ಕೆ ಗಂಭೀರ ಸೂಚನೆ” ಎಂದು ಆಗ್ರಹಿಸಿದರು.
“ಸವಾಲುಗಳ ಮದ್ಯೆ ದಾವಣಗೆರೆಯಲ್ಲಿ ಎಸ್‌ಡಿಪಿಐ ಪಕ್ಷದ ಪ್ರದರ್ಶನವು ಜನಬೆಂಬಲ ಹೆಚ್ಚುತ್ತಿರುವುದರ ಸಂಕೇತ. ನಾವು ಈ ಚುನಾವಣೆಯ ಭ್ರಷ್ಟಾಚಾರ ಅಥವಾ ಅನೈತಿಕ ವಿಧಾನಗಳಿಗೆ ತಲೆಬಾಗದೆ, ಪ್ರಾಮಾಣಿಕತೆ, ನಿಷ್ಠೆ ಮತ್ತು ಜನರ ಸಮಸ್ಯೆಗಳತ್ತ ಬದ್ಧತೆಯೊಂದಿಗೆ ಹೋರಾಡಿದ್ದೇವೆ” ಎಂದು ಸ್ಪಷ್ಟಪಡಿಸಿದರು.
ಈ ಸುದ್ದಿ ಓದಿದ್ದೀರಾ? ದಾವಣಗೆರೆ | ಕೃಷಿ ಸಮಸ್ಯೆಗಳ ಪರಿಹಾರಕ್ಕೆ ರೈತ ಸಂಘದ ಒತ್ತಾಯ
“ನಮ್ಮೊಂದಿಗೆ ನಿಂತ ಎಲ್ಲಾ ಮತದಾರರಿಗೆ ಹೃತ್ಪೂರ್ವಕ ಧನ್ಯವಾದಗಳನ್ನು ಅರ್ಪಿಸುತ್ತೇವೆ. ಎಸ್‌ಡಿಪಿಐ ದಾವಣಗೆರೆಯ ಜನತೆಗೆ ಸದಾ ಧ್ವನಿಯಾಗಿರುತ್ತದೆ, ಜವಾಬ್ದಾರಿಯುತ ಆಡಳಿತ ಹಾಗೂ ನ್ಯಾಯ, ಪಾರದರ್ಶಕತೆ ಮತ್ತು ನಿಜವಾದ ಪ್ರಜಾಪ್ರಭುತ್ವಕ್ಕಾಗಿ ಹೋರಾಟವನ್ನು ಮುಂದುವರಿಸುತ್ತದೆ” ಎಂದು ಹೇಳಿದರು.
