ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್‌ನ ಮಾತೃ ಸಂಸ್ಥೆ ʼಮೆಟಾʼ (Meta), ತನ್ನ ಕಂಪನಿಯಲ್ಲಿ ಮತ್ತೊಂದು ಸುತ್ತಿನ ಭಾರೀ ಉದ್ಯೋಗ ಕಡಿತ ಹಾಗೂ ಸಾಂಸ್ಥಿಕ ಬದಲಾವಣೆಗೆ ಮುಂದಾಗಿದೆ. ಕಂಪನಿಯ ಕೃತಕ ಬುದ್ಧಿಮತ್ತೆ (AI) ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಸಲುವಾಗಿ, ಜಾಗತಿಕವಾಗಿ ಶೇ.10ರಷ್ಟು ಉದ್ಯೋಗಿಗಳನ್ನು ವಜಾಗೊಳಿಸಲು ನಿರ್ಧರಿಸಿದೆ. ಜೊತೆಗೆ, ಸುಮಾರು 7,000ಕ್ಕೂ ಹೆಚ್ಚು ಸಿಬ್ಬಂದಿಯನ್ನು AI ಸಂಬಂಧಿತ ಹೊಸ ಯೋಜನೆಗಳಿಗೆ ವರ್ಗಾಯಿಸಲು ಕಂಪನಿ ಸಜ್ಜಾಗಿದೆ.
ಸೋಮವಾರ ಉದ್ಯೋಗಿಗಳೊಂದಿಗೆ ಹಂಚಿಕೊಳ್ಳಲಾದ ಆಂತರಿಕ ಮೆಮೊದಲ್ಲಿ ಮೆಟಾ ಸಂಸ್ಥೆಯ ಮುಖ್ಯ ಮಾನವ ಸಂಪನ್ಮೂಲ ಅಧಿಕಾರಿ (Chief People Officer) ಜಾನೆಲ್ ಗೇಲ್ ಈ ವಿಷಯವನ್ನು ಖಚಿತಪಡಿಸಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.
AI ತಂತ್ರಜ್ಞಾನಕ್ಕೆ ಹೆಚ್ಚಿನ ಆದ್ಯತೆ
ಕಂಪನಿಯ ಆಂತರಿಕ ರಚನೆಯನ್ನು ಸರಳಗೊಳಿಸಲು ಮತ್ತು AI ತಂತ್ರಜ್ಞಾನಕ್ಕೆ ಹೆಚ್ಚಿನ ವೇಗ ನೀಡಲು ಈ ನಿರ್ಧಾರ ಕೈಗೊಳ್ಳಲಾಗಿದೆ. “ಹಲವು ವಿಭಾಗಗಳ ಮುಖ್ಯಸ್ಥರು ತಮ್ಮ ಹೊಸ ಸಾಂಸ್ಥಿಕ ರಚನೆಯಲ್ಲಿ ‘ AI ಆಧಾರಿತ ವಿನ್ಯಾಸ’ಗಳನ್ನು ಅಳವಡಿಸಿಕೊಂಡಿದ್ದಾರೆ. ಇದರಿಂದಾಗಿ ಸಣ್ಣ ತಂಡಗಳು ಹೆಚ್ಚು ಸ್ವತಂತ್ರವಾಗಿ ಮತ್ತು ವೇಗವಾಗಿ ಕೆಲಸ ಮಾಡಲು ಸಾಧ್ಯವಾಗುತ್ತದೆ. ಹೀಗಾಗಿ ಮಧ್ಯಂತರ ಮ್ಯಾನೇಜರ್ ಹುದ್ದೆಗಳನ್ನು ಕಡಿತಗೊಳಿಸಲಾಗುತ್ತಿದೆ” ಎಂದು ಜಾನೆಲ್ ಗೇಲ್ ತಿಳಿಸಿದ್ದಾರೆ.
ಈ ಉದ್ಯೋಗ ವಜಾ ಮತ್ತು ವರ್ಗಾವಣೆ ಪ್ರಕ್ರಿಯೆಯು ಕಂಪನಿಯ ಒಟ್ಟು ಉದ್ಯೋಗಿಗಳ ಶೇಕಡಾ 20 ರಷ್ಟು ಭಾಗದ ಮೇಲೆ ಪರಿಣಾಮ ಬೀರಲಿದೆ. ಮಾರ್ಚ್ ಅಂತ್ಯದ ವೇಳೆಗೆ ಮೆಟಾ ಸಂಸ್ಥೆಯು ಒಟ್ಟು 77,986 ಉದ್ಯೋಗಿಗಳನ್ನು ಹೊಂದಿತ್ತು. ಈ ನಡುವೆ, ಕಂಪನಿಯು ಈಗಾಗಲೇ ಭರ್ತಿ ಮಾಡಬೇಕಾಗಿದ್ದ ಸುಮಾರು 6,000 ಪ್ರಮುಖ ಹುದ್ದೆಗಳ ನೇಮಕಾತಿಯನ್ನು ರದ್ದುಗೊಳಿಸಿದೆ.
ಮಾನವ ಉದ್ಯೋಗಿಗಳ ಸ್ಥಾನ ತುಂಬಲಿವೆಯೇ AI ಏಜೆಂಟ್‌ಗಳು?
ವರ್ಗಾವಣೆಗೊಳ್ಳುತ್ತಿರುವ 7,000 ಉದ್ಯೋಗಿಗಳನ್ನು ಪ್ರಮುಖವಾಗಿ ‘ಅಪ್ಲೈಡ್ AI ಇಂಜಿನಿಯರಿಂಗ್’ (AAI) ಮತ್ತು ‘ಏಜೆಂಟ್ ಟ್ರಾನ್ಸ್‌ಫಾರ್ಮೇಶನ್ ಆಕ್ಸಿಲರೇಟರ್’ (ATA) ನಂತಹ ಹೊಸ ವಿಭಾಗಗಳಿಗೆ ನಿಯೋಜಿಸಲಾಗುತ್ತಿದೆ. ಈ ವಿಭಾಗಗಳು ಪ್ರಸ್ತುತ ಮನುಷ್ಯರು ಮಾಡುವ ಕೆಲಸಗಳನ್ನು ಸ್ವತಂತ್ರವಾಗಿ ಮಾಡಬಲ್ಲ ‘AI ಏಜೆಂಟ್‌ಗಳನ್ನು’ (AI Agents) ಅಭಿವೃದ್ಧಿಪಡಿಸುವ ಗುರಿ ಹೊಂದಿವೆ.
ಉದ್ಯೋಗಿಗಳಿಂದ ತೀವ್ರ ಆಕ್ರೋಶ, ಪ್ರತಿಭಟನೆ
ಮೆಟಾ ಸಂಸ್ಥೆಯ ಈ ದಿಢೀರ್ ನಿರ್ಧಾರಗಳು ಕಂಪನಿಯ ಒಳಗೆ ತೀವ್ರ ಅಸಮಾಧಾನಕ್ಕೆ ಕಾರಣವಾಗಿವೆ. ಕಂಪನಿಯ ಆಂತರಿಕ ಸಂವಹನ ವೇದಿಕೆಯಾದ ‘ವರ್ಕ್‌ಪ್ಲೇಸ್’ (Workplace) ನಲ್ಲಿ ಉದ್ಯೋಗಿಗಳು ಆಡಳಿತ ಮಂಡಳಿಯ ವಿರುದ್ಧ ಬಹಿರಂಗವಾಗಿಯೇ ಆಕ್ರೋಶ ಹೊರಹಾಕುತ್ತಿದ್ದಾರೆ.
ಇದನ್ನೂ ಓದಿ: ಯುಪಿ: ಸಾರ್ವಜನಿಕ ನಳದಲ್ಲಿ ನೀರು ಕುಡಿದ ದಲಿತ ಬಾಲಕನ ಬೆತ್ತಲೆಗೊಳಿಸಿ, ಶೂ ನೆಕ್ಕಿಸಿದ ದುಷ್ಕರ್ಮಿಗಳು!
ಮನುಷ್ಯರು ಕಂಪ್ಯೂಟರ್ ಬಳಸುವ ಶೈಲಿಯನ್ನು AI ಮಾದರಿಗಳಿಗೆ ಕಲಿಸಲು (Training) ಉದ್ಯೋಗಿಗಳ ಮೌಸ್ ಚಲನೆಯನ್ನು ಟ್ರ್ಯಾಕ್ ಮಾಡುವ ‘ಮೌಸ್-ಟ್ರಾಕಿಂಗ್ ಸಾಫ್ಟ್‌ವೇರ್’ ಅನ್ನು ಮೆಟಾ ಅಳವಡಿಸಿದೆ. ಇದರ ವಿರುದ್ಧ 1,000ಕ್ಕೂ ಹೆಚ್ಚು ಉದ್ಯೋಗಿಗಳು ಸಹಿ ಸಂಗ್ರಹಿಸಿ ಪ್ರತಿಭಟನೆ ನಡೆಸಿದ್ದಾರೆ. ಇದು ಉದ್ಯೋಗಿಗಳ ಖಾಸಗಿತನದ ಉಲ್ಲಂಘನೆ ಎಂದು ಆರೋಪಿಸಿದ್ದಾರೆ.
ಉದ್ಯೋಗ ಕಡಿತದ ಭೀತಿ ಮತ್ತು ಆಡಳಿತ ಮಂಡಳಿಯ ಮೌನದಿಂದ ಬೇಸತ್ತಿದ್ದ ನೌಕರರು, ಕಚೇರಿಗಳಲ್ಲಿ ಫ್ಲೈಯರ್‌ಗಳನ್ನು ಹಂಚುವ ಮೂಲಕ ಹಾಗೂ ಆಂತರಿಕ ಗ್ರೂಪ್‌ಗಳಲ್ಲಿ ಆನೆಗಳ (Elephant- ಸಮಸ್ಯೆಯನ್ನು ಮೌನವಾಗಿ ಮುಚ್ಚಿಡುವ ಸಂಕೇತ) ಚಿತ್ರಗಳನ್ನು ಪೋಸ್ಟ್ ಮಾಡುವ ಮೂಲಕ ತಮ್ಮ ಪ್ರತಿರೋಧ ದಾಖಲಿಸುತ್ತಿದ್ದಾರೆ. ಉದ್ಯೋಗ ಕಡಿತದ ಪ್ರಕ್ರಿಯೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಉತ್ತರ ಅಮೆರಿಕದ ಪ್ರಮುಖ ಕಚೇರಿಗಳ ಸಿಬ್ಬಂದಿಗೆ ಮನೆಯಿಂದಲೇ ಕೆಲಸ ಮಾಡಲು (Work from home) ಸೂಚಿಸಲಾಗಿದೆ.
