ಅಪರಿಚಿತರು ಫೋನ್ ಮಾಡಿ ಒಟಿಪಿ (OTP) ಕೇಳಿದರೆ ಕೊಡಬೇಡಿ ಎಂದು ಬ್ಯಾಂಕ್‌ಗಳು ಪದೇ ಪದೇ ಎಚ್ಚರಿಸುತ್ತವೆ. ಆದರೆ, ಈಗ ಸೈಬರ್ ವಂಚಕರು ಒಂದು ಹೆಜ್ಜೆ ಮುಂದೆ ಹೋಗಿದ್ದು, ನಿಮ್ಮ ಮೊಬೈಲ್‌ಗೆ ಒಟಿಪಿ ಬರದಿದ್ದರೂ ನಿಮ್ಮ ಖಾತೆಯಿಂದ ಹಣ ದೋಚುವ ಹೊಸ ಹಾಗೂ ಆತಂಕಕಾರಿ ತಂತ್ರವೊಂದನ್ನು ಕಂಡುಕೊಂಡಿದ್ದಾರೆ. ಗುಜರಾತ್‌ನ ಅಹಮದಾಬಾದ್‌ನಲ್ಲಿ ನಡೆದ ಇಂತಹದ್ದೊಂದು ಘಟನೆ ಎಲ್ಲರೂ ಬೆಚ್ಚಿಬೀಳುವಂತೆ ಮಾಡಿದೆ.
ಅಹಮದಾಬಾದ್‌ನ ಉದ್ಯಮಿಯೊಬ್ಬರಿಗೆ ಸತತ ಎರಡು ದಿನಗಳ ಕಾಲ ಬ್ಯಾಂಕ್‌ನಿಂದ ಬರಬೇಕಿದ್ದ ಯಾವುದೇ ಮೆಸೇಜ್ ಅಥವಾ ಒಟಿಪಿಗಳು ಬಂದಿರಲಿಲ್ಲ. ಅನುಮಾನಗೊಂಡು ಪರಿಶೀಲಿಸಿದಾಗ, ಅವರ ಆಧಾರ್ ಕಾರ್ಡ್‌ಗೆ ಲಿಂಕ್ ಆಗಿದ್ದ ಮೊಬೈಲ್ ನಂಬರ್ ಬದಲಾಗಿರುವುದು ಗೊತ್ತಾಗಿದೆ. ಈ ಬಗ್ಗೆ ಅವರು ಪೊಲೀಸರಿಗೆ ದೂರು ನೀಡಿದಾಗ ಒಂದು ದೊಡ್ಡ ವಂಚನೆ ಜಾಲವೇ ಬಯಲಾಗಿದೆ.
ವಂಚಕರು ಗೂಗಲ್ ಜೆಮಿನಿಯ ‘ಕೃತಕ ಬುದ್ಧಿಮತ್ತೆ’ (AI) ತಂತ್ರಜ್ಞಾನವನ್ನು ಬಳಸಿ ಉದ್ಯಮಿಯ ನಕಲಿ ವಿಡಿಯೊ (ಡೀಪ್‌ಫೇಕ್) ಸೃಷ್ಟಿಸಿದ್ದಾರೆ. ಅಂದರೆ, ನೋಡಲು ಅಚ್ಚುಮೆಚ್ಚು ಉದ್ಯಮಿಯಂತೆಯೇ ಕಾಣುವ ನಕಲಿ ಮುಖವನ್ನು ಕಂಪ್ಯೂಟರ್ ಮೂಲಕ ತಯಾರಿಸಿದ್ದಾರೆ. ಇದನ್ನು ಬಳಸಿ ಆಧಾರ್ ಭದ್ರತಾ ವ್ಯವಸ್ಥೆಯನ್ನು ಯಾಮಾರಿಸಿ, ಉದ್ಯಮಿಯ ಆಧಾರ್‌ಗೆ ವಂಚಕರು ತಮ್ಮ ಮೊಬೈಲ್ ನಂಬರ್ ಲಿಂಕ್ ಮಾಡಿದ್ದಾರೆ. ಹೀಗೆ ನಂಬರ್ ಬದಲಾಯಿಸುವಾಗ ಉದ್ಯಮಿಯ ಅಸಲಿ ಮೊಬೈಲ್‌ಗೆ ಯಾವುದೇ ಒಟಿಪಿ ಅಥವಾ ಮೆಸೇಜ್ ಬಂದಿರಲಿಲ್ಲ ಎನ್ನುವುದು ಅಚ್ಚರಿಯ ಸಂಗತಿ.
ಇದನ್ನು ಓದಿದ್ದೀರಾ? ತಮಿಳುನಾಡಿನ ಮೊದಲ ಲಿಂಗತ್ವ ಅಲ್ಪಸಂಖ್ಯಾತ ಕ್ರಿಕೆಟ್ ಅಂಪೈರ್ ರಿತಿಕಾ ಶ್ರೀ
ಆಧಾರ್‌ಗೆ ತಮ್ಮ ನಂಬರ್ ಲಿಂಕ್ ಆದ ತಕ್ಷಣ, ಉದ್ಯಮಿಯ ಒಟಿಪಿಗಳೆಲ್ಲವೂ ವಂಚಕರ ಮೊಬೈಲ್‌ಗೆ ಬರಲಾರಂಭಿಸಿದವು. ಉದ್ಯಮಿಯ ಆಧಾರ್ ಮಾಹಿತಿಯನ್ನು ಬಳಸಿ, ವಂಚಕರು ಜಿಯೋ ಪೇಮೆಂಟ್ಸ್ ಬ್ಯಾಂಕ್‌ನಲ್ಲಿ (Jio Payments Bank) ಹೊಸ ಖಾತೆಯನ್ನು ತೆರೆದಿದ್ದಾರೆ. ಅಷ್ಟೇ ಅಲ್ಲ, ಆ ಖಾತೆಯ ಮೂಲಕ 25,000 ರೂ. ಸಾಲವನ್ನೂ ಪಡೆದುಕೊಂಡಿದ್ದಾರೆ. ಜೊತೆಗೆ ಆನ್‌ಲೈನ್‌ನಲ್ಲಿ ದಾಖಲೆಗಳನ್ನು ಇಟ್ಟುಕೊಳ್ಳುವ ‘ಡಿಜಿಲಾಕರ್’ಗೂ (DigiLocker) ನುಗ್ಗಿ ಪ್ರಮುಖ ದಾಖಲೆಗಳನ್ನು ಕದ್ದಿದ್ದಾರೆ.
ಈ ವಂಚನೆಯ ಪ್ರಮುಖ ರೂವಾರಿ ಆಧಾರ್ ಸೇವಾ ಕೇಂದ್ರದಲ್ಲಿ (CSC) ಕೆಲಸ ಮಾಡುತ್ತಿದ್ದ ವ್ಯಕ್ತಿ. ತನ್ನ ಬಳಿ ಇದ್ದ ಯಂತ್ರಗಳು ಹಾಗೂ ಅಧಿಕಾರಿಗಳ ಲಾಗಿನ್ ಪಾಸ್‌ವರ್ಡ್ ದುರ್ಬಳಕೆ ಮಾಡಿಕೊಂಡು ಈತ, ಅತ್ಯಾಧುನಿಕ ತಂತ್ರಜ್ಞಾನದ ಸಹಾಯದಿಂದ ಆಧಾರ್ ನಂಬರ್ ಬದಲಾಯಿಸಿದ್ದಾನೆ.
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕನುಭಾಯ್ ಪರ್ಮಾರ್, ಆಶಿಶ್ ವಾನಂದ್, ಮೊಹಮ್ಮದ್ ಕೈಫ್ ಪಟೇಲ್ ಮತ್ತು ದೀಪ್ ಗುಪ್ತಾ ಎಂಬ ನಾಲ್ವರನ್ನು ಪೊಲೀಸರು ಬಂಧಿಸಿದ್ದಾರೆ. ನಮ್ಮ ಗುರುತಿನ ಚೀಟಿಯಾದ ಆಧಾರ್ ಭದ್ರತೆಯನ್ನೇ ಈ ರೀತಿ ಸುಲಭವಾಗಿ ಒಡೆದಿರುವುದು ಜನಸಾಮಾನ್ಯರಲ್ಲಿ ಆತಂಕ ಮೂಡಿಸಿದೆ.
