ನಾನೊಬ್ಬ ಸಾಮಾನ್ಯ ನಾಗರಿಕನಾಗಿ ಗಮನಿಸಿದಂತೆ, ಈ ಹಣಕಾಸಿನ ವ್ಯವಹಾರವು ಗಂಭೀರವಾದ ಆರ್ಥಿಕ ಅಪರಾಧ (Economic Offense) ಮತ್ತು ಹಣ ವರ್ಗಾವಣೆ (Money Laundering) ವ್ಯಾಪ್ತಿಗೆ ಬರುತ್ತದೆ. ಕಪ್ಪು ಹಣವನ್ನು (Unaccounted Cash) ಬೇರೆಯವರ ಮೂಲಕ ಬಿಳಿ ಹಣವಾಗಿ (Cheque) ಪರಿವರ್ತಿಸುವುದು ಶಿಕ್ಷಾರ್ಹ ಅಪರಾಧವಾಗುತ್ತದೆ
ಇಂದು ಬೀದಿ ಕಾಳಗಕ್ಕೆ ಇಳಿದ ಪಂಚಮಸಾಲಿ ಸಮಾಜದ ಹುಟ್ಟು ಹೋರಾಟಗಾರರ ‘ಬಿಟ್ಟಿ ಮನರಂಜನೆಯನ್ನು’ ಇಡೀ ಕನ್ನಡ ನಾಡು ನೋಡಿತು. ಒಂದು ಕಡೆ ಸಮಾಜದ ಮುಖಂಡರ ಬೀದಿ ಕಾಳಗ ನಡೆಯುತ್ತಿದ್ದರೆ, ಅದೇ ಮಠದ ಇನ್ನೊಂದು ಬದಿಯಲ್ಲಿ ಹಾಕಿದ್ದ ದೊಡ್ಡ ಪೆಂಡಾಲ್‌ನಲ್ಲಿ ನೆರೆದ ಜನರೆದುರು ಟ್ರಸ್ಟಿನ ಧರ್ಮದರ್ಶಿಗಳು ಹಾಗೂ ದಾವಣಗೆರೆಯ ಪ್ರಸಿದ್ಧ ಜವಳಿ ವ್ಯಾಪಾರಿಗಳು ಸತತ ಎರಡೂವರೆ ಗಂಟೆಗಳ ಕಾಲ ಮಠದ ಕಳೆದ ಹದಿನೆಂಟು ವರ್ಷಗಳ ₹27 ಕೋಟಿ ಹಣಕಾಸಿನ ವ್ಯವಹಾರವನ್ನು ಮಂಡಿಸುತ್ತಾ,ಪಂಚಮಸಾಲಿ ಪೀಠಕ್ಕೆ ದೇಣಿಗೆ ನೀಡಿದವರ ವಿವರವಾದ ಪಟ್ಟಿಯನ್ನು ಓದುತ್ತಾ, ಅದರಲ್ಲಿ ಮಾಜಿ ಮುಖ್ಯಮಂತ್ರಿಗಳ, ಮಾಜಿ ಮತ್ತು ಹಾಲಿ ಸಚಿವರ, ಸಂಸದರ ಹಾಗೂ ಶಾಸಕರ ಹೆಸರುಗಳನ್ನು ಬಹಿರಂಗಪಡಿಸಿದರು.
ಅವರಲ್ಲಿ ಪ್ರಮುಖವಾಗಿ ದಾವಣಗೆರೆಯ ಸಾಹುಕಾರರಾಗಿದ್ದ ದಿವಂಗತ ಶ್ರೀ ಶಾಮನೂರು ಶಿವಶಂಕರಪ್ಪನವರು ಒಂದು ಕೋಟಿ ರೂಪಾಯಿ ದೇಣಿಗೆ ನೀಡಿದ್ದನ್ನು ಸ್ಮರಿಸಿದರು. ಇದಲ್ಲದೆ, ಒಬ್ಬ ಸಂಸದರು ₹50 ಲಕ್ಷ ಹಾಗೂ ಇನ್ನೊಬ್ಬ ಸಂಸದರು ₹30 ಲಕ್ಷ ನಗದು ಹಣ ನೀಡಿದ್ದನ್ನು ಬಹಿರಂಗಪಡಿಸಿದರು. ನಾಡಿನಾದ್ಯಂತ ಇರುವ ಪಂಚಮಸಾಲಿಗಳು ₹10,೦೦೦ ದಿಂದ ಹಿಡಿದು ₹5 ಲಕ್ಷದವರೆಗೆ ನೀಡಿದ ದೇಣಿಗೆಯನ್ನು ಕೊಂಡಾಡುತ್ತಾ ದಾನಿಗಳ ಪಟ್ಟಿಯನ್ನು ವಾಚಿಸಿದರು.
ನಾನಿಂದು ಟ್ರಸ್ಟಿನ ಧರ್ಮದರ್ಶಿಗಳು ನೀಡಿದ ರಾಮ, ಕೃಷ್ಣರ ಲೆಕ್ಕಗಳ ಪರಿಶೀಲನೆಗೆ ಇಳಿಯದೆ, ಸಭೆಯಲ್ಲಿ ಅವರು ಅವರಾಗಿ ಎದುರಾಳಿಗಳಿಗೆ ಹಗ್ಗ ಕೊಟ್ಟು ಕೈ ಕಟ್ಟಿಸಿಕೊಂಡ ವಿಷಯವನ್ನು ತಮ್ಮೆದುರು ಮಂಡಿಸಲು ಬಯಸುವೆ.
ದಾವಣಗೆರೆಯ ಪ್ರಸಿದ್ಧ ವ್ಯಾಪಾರಿಗಳು ಭಾರತದ ಹಣ ವರ್ಗಾವಣೆ ತಡೆ ಕಾಯ್ದೆ 2002 (PMLA Act 2002), ಆದಾಯ ತೆರಿಗೆ ಕಾಯ್ದೆ 1961 (Income Tax Act1961), ಬೇನಾಮಿ ವಹಿವಾಟುಗಳ ನಿಷೇಧ (ತಿದ್ದುಪಡಿ) ಕಾಯ್ದೆ 2016, ಭ್ರಷ್ಟಾಚಾರ ತಡೆ ಕಾಯ್ದೆ 1988 ಮತ್ತು ಭಾರತೀಯ ನ್ಯಾಯ ಸಂಹಿತೆ (BNS) ಅಡಿಯಲ್ಲಿ ಬರುವ ‘ಕ್ರಿಮಿನಲ್ ಪಿತೂರಿ’ (Criminal Conspiracy) ಹಾಗೂ ‘ಲೆಕ್ಕಪತ್ರಗಳ ವಂಚನೆ’ (Falsification of Accounts) ಕಾನೂನುಗಳನ್ನು ಮರೆತಂತೆ ಕಾಣುವುದು.
ಮಾನ್ಯ ಸಂಸದರಿಂದ ಪಡೆದ ₹80 ಲಕ್ಷ ರೂಪಾಯಿಗಳನ್ನು ನಗದು ರೂಪದಲ್ಲಿ ಸ್ವೀಕರಿಸಿದ್ದಾಗಿ ಹೇಳುತ್ತಾ, ಆ ಕಪ್ಪು ಹಣವನ್ನು ಕಾನೂನುಬದ್ಧವಾಗಿ ಪರಿವರ್ತಿಸಿದ ಮಾರ್ಗವನ್ನು ಅವರೇ ಎಳೆಯೆಳೆಯಾಗಿ ಸಭೆಯಲ್ಲಿ ಬಿಚ್ಚಿಟ್ಟರು. ಕೃಷಿಕ ಪಂಚಮಸಾಲಿಗಳು ವ್ಯಾಪಾರಿಗಳಾಗಲು ಅಸಮರ್ಥರು ಎಂಬುದನ್ನು ದಾವಣಗೆರೆಯ ಪ್ರಸಿದ್ಧ ಸೀರೆ ವ್ಯಾಪಾರಿಗಳು ಹೇಗೆ ಮರೆತರು?ವರ್ಷಕ್ಕೆ ₹30 ಕೋಟಿ ತೆರಿಗೆ ಕಟ್ಟುವ ಉದ್ಯಮಿಗಳು ಭಾರತದ ಅನೇಕ ಕಾನೂನುಗಳನ್ನು ಮೀರಿ ಲೆಕ್ಕ ನೀಡಿದ್ದು ವಿಚಿತ್ರ ಮತ್ತು ಆಘಾತಕಾರಿ.
ಕಾನೂನುಬದ್ಧ ವಿಶ್ಲೇಷಣೆ
ನಾನೊಬ್ಬ ಸಾಮಾನ್ಯ ನಾಗರಿಕನಾಗಿ ಗಮನಿಸಿದಂತೆ, ಈ ಹಣಕಾಸಿನ ವ್ಯವಹಾರವು ಗಂಭೀರವಾದ ಆರ್ಥಿಕ ಅಪರಾಧ (Economic Offense) ಮತ್ತು ಹಣ ವರ್ಗಾವಣೆ (Money Laundering) ವ್ಯಾಪ್ತಿಗೆ ಬರುತ್ತದೆ. ಕಪ್ಪು ಹಣವನ್ನು (Unaccounted Cash) ಬೇರೆಯವರ ಮೂಲಕ ಬಿಳಿ ಹಣವಾಗಿ (Cheque) ಪರಿವರ್ತಿಸುವುದು ಶಿಕ್ಷಾರ್ಹ ಅಪರಾಧವಾಗುತ್ತದೆ.
ಈ ಘಟನೆಯಲ್ಲಿ ಈ ಕೆಳಗಿನ ಕಾನೂನುಗಳ ಅಡಿಯಲ್ಲಿ ಕೇಸ್ ದಾಖಲಿಸಲು ಅವಕಾಶವೂ ಇದೆ.
ಅ) ಹಣ ವರ್ಗಾವಣೆ ತಡೆ ಕಾಯ್ದೆ (PMLA) 2002: ಅಕ್ರಮವಾಗಿ ಗಳಿಸಿದ ಅಥವಾ ಲೆಕ್ಕವಿಲ್ಲದ ಹಣದ ಮೂಲವನ್ನು ಮರೆಮಾಚಿ, ಅದನ್ನು ಕಾನೂನುಬದ್ಧ ಹಣದಂತೆ ತೋರಿಸುವುದು ಇದರ ಅಡಿಯಲ್ಲಿ ಬರುತ್ತದೆ.
ಸೆಕ್ಷನ್ 3: ಮನಿ ಲಾಂಡರಿಂಗ್ ವ್ಯಾಖ್ಯಾನ.
ಸೆಕ್ಷನ್ 4: ಈ ಅಪರಾಧಕ್ಕೆ 3 ರಿಂದ 7 ವರ್ಷಗಳವರೆಗೆ ಕಠಿಣ ಜೈಲು ಶಿಕ್ಷೆ ಮತ್ತು ದಂಡ ವಿಧಿಸಬಹುದು.
ಬ) ಆದಾಯ ತೆರಿಗೆ ಕಾಯ್ದೆ 1961: ನಗದು ರೂಪದಲ್ಲಿ ಹಣ ಪಡೆಯುವುದು ಮತ್ತು ತೆರಿಗೆ ವಂಚಿಸುವುದು ಈ ಕಾಯ್ದೆಯಡಿ ಅಪರಾಧ.
ಸೆಕ್ಷನ್ 269SS: ಯಾವುದೇ ವ್ಯಕ್ತಿ ₹20,೦೦೦ ಕ್ಕಿಂತ ಹೆಚ್ಚಿನ ಮೊತ್ತವನ್ನು ನಗದು ರೂಪದಲ್ಲಿ ಸಾಲ ಅಥವಾ ಠೇವಣಿಯಾಗಿ ಪಡೆಯುವಂತಿಲ್ಲ. ಇಲ್ಲಿ ₹80 ಲಕ್ಷ ನಗದು ಪಡೆದಿರುವುದು ಸ್ಪಷ್ಟ ಉಲ್ಲಂಘನೆ.
ಸೆಕ್ಷನ್ 271D: ಈ ನಿಯಮ ಉಲ್ಲಂಘಿಸಿದರೆ, ಪಡೆದ ನಗದು ಮೊತ್ತಕ್ಕೆ ಸಮನಾದ (ಅಂದರೆ ₹80 ಲಕ್ಷ) ದಂಡವನ್ನು ವಿಧಿಸಬಹುದು.
ಕ) ತೆರಿಗೆ ವಂಚನೆ (Tax Evasion): ಆದಾಯ ಮರೆಮಾಚಿದ್ದಕ್ಕಾಗಿ ಸೆಕ್ಷನ್ 276 ಸಿ ಅಡಿಯಲ್ಲಿ ಕ್ರಮ ಜರುಗಿಸಬಹುದು.
ಡ) ಬೇನಾಮಿ ವಹಿವಾಟುಗಳ (ನಿಷೇಧ) ತಿದ್ದುಪಡಿ ಕಾಯ್ದೆ 2016: ಒಬ್ಬರ ಹಣವನ್ನು ಇನ್ನೊಬ್ಬರ ಹೆಸರಿನಲ್ಲಿ ಅಥವಾ ಇನ್ನೊಬ್ಬರ ಬ್ಯಾಂಕ್ ಖಾತೆಯ ಮೂಲಕ ವರ್ಗಾವಣೆ ಮಾಡುವುದು ‘ಬೇನಾಮಿ ವಹಿವಾಟು’ ಎನಿಸಿಕೊಳ್ಳುತ್ತದೆ. ಇದರ ಅಡಿಯಲ್ಲಿ ಹಣ ಮುಟ್ಟುಗೋಲು ಮತ್ತು ಜೈಲು ಶಿಕ್ಷೆಗೆ ಅವಕಾಶವಿದೆ.
ಸ) ಭ್ರಷ್ಟಾಚಾರ ತಡೆ ಕಾಯ್ದೆ 1988: ರಾಜಕಾರಣಿಗಳು ಅಕ್ರಮವಾಗಿ ಹಣ ನೀಡುವುದು ಅಥವಾ ಪಡೆಯುವುದು ಮತ್ತು ಅಧಿಕಾರ ದುರುಪಯೋಗಕ್ಕೆ ಸಂಬಂಧಿಸಿದಂತೆ ಸೆಕ್ಷನ್ 7, 11 ಮತ್ತು 13ರ ಅಡಿಯಲ್ಲಿ ಕೇಸ್ ದಾಖಲಿಸಬಹುದು.
ಸಾ) ಭಾರತೀಯ ನ್ಯಾಯ ಸಂಹಿತೆ (BNS) A:Criminal Conspiracy (ಸಂಚು): ಹಲವರು ಸೇರಿ ಹಣವನ್ನು ಕಾನೂನುಬಾಹಿರವಾಗಿ ವರ್ಗಾವಣೆ ಮಾಡಲು ಸಂಚು ರೂಪಿಸಿರುವುದು.
B: Falsification of Accounts (ಲೆಕ್ಕಪತ್ರ ವಂಚನೆ): ಸುಳ್ಳು ಲೆಕ್ಕಪತ್ರಗಳನ್ನು ಸೃಷ್ಟಿಸಿರುವುದಕ್ಕಾಗಿ ಕ್ರಮ ಜರುಗಿಸಬಹುದು. ಇಂತಹ ಘಟನೆಗಳ ಬಗ್ಗೆ ಈ ಕೆಳಗಿನ ಸಂಸ್ಥೆಗಳಿಗೆ ದೂರು ನೀಡಬಹುದು:
ಜಾರಿ ನಿರ್ದೇಶನಾಲಯ (ED): ಹಣ ವರ್ಗಾವಣೆ ಪ್ರಕರಣಗಳ ತನಿಖೆಗೆ.
ಆದಾಯ ತೆರಿಗೆ ಇಲಾಖೆ (Income Tax Department): ತೆರಿಗೆ ವಂಚನೆಯ ಬಗ್ಗೆ.
ಲೋಕಾಯುಕ್ತ: ರಾಜಕಾರಣಿಗಳ ಭ್ರಷ್ಟಾಚಾರಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸಲು ವಿನಂತಿಸಿಕೊಳ್ಳಬಹುದು.
ಇದೆಲ್ಲವನ್ನು ಅರಿತ ಕೇಂದ್ರ ಸಚಿವರಾದ ಶ್ರೀ ಸೋಮಣ್ಣನವರು ದಾವಣಗೇರೆಯ ತಮ್ಮ ಬೀಗರಿಗೆ ಸಭೆ ನಡೆಯುವ ಸಂದರ್ಭದಲ್ಲಿಯೇ ಶಾಂತವಾಗಿರಲು ವಿನಂತಿಸಿಕೊಳ್ಳುತ್ತಿದ್ದದನ್ನು ಇಲ್ಲಿ ಮರೆಯುವಂತಿಲ್ಲ.
ಪಿಕ್ಚರ್ ಬಾಕಿ ಹೈ; ಏ ಜಸ್ಟ್ ಟ್ರೇಲರ್ ಹೈ.
ಜಿ ಬಿ ಪಾಟೀಲ್‌
ಜಾಗತಿಕ ಲಿಂಗಾಯತ ಮಹಾಸಭಾದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ
