ರಾಜಧಾನಿ ಬೆಂಗಳೂರಿನ ಸಂಚಾರ ದಟ್ಟಣೆ (ಟ್ರಾಫಿಕ್) ಸಮಸ್ಯೆಗೆ ಪರಿಹಾರವಾಗಿ ರಾಜ್ಯ ಸರ್ಕಾರ ಹಮ್ಮಿಕೊಂಡಿರುವ ಬಹುಕೋಟಿ ವೆಚ್ಚದ ‘ಮೆಖ್ರಿ ಕಾರಿಡಾರ್ – ಸುರಂಗ ರಸ್ತೆ’ (ಬೆಂಗಳೂರು ಸುರಂಗ ರಸ್ತೆ) ಯೋಜನೆಯ ಪ್ರಕ್ರಿಯೆಗಳ ನಡುವೆಯೇ ಅದಾನಿ ಸಮೂಹದ ಅಧ್ಯಕ್ಷ ಗೌತಮ್ ಅದಾನಿ ಅವರು ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ಅವರನ್ನು ದಿಢೀರ್ ಭೇಟಿಯಾಗಿ ಚರ್ಚೆ ನಡೆಸಿರುವುದು ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.
ಬೆಂಗಳೂರಿನ ಸದಾಶಿವನಗರದಲ್ಲಿರುವ ಮುಖ್ಯಮಂತ್ರಿಗಳ ಖಾಸಗಿ ನಿವಾಸದಲ್ಲಿ ಈ ಮಹತ್ವದ ಸಭೆ ನಡೆದಿದೆ. ಗೌತಮ್ ಅದಾನಿ ಆರ್ಟ್ ಆಫ್ ಲಿವಿಂಗ್ ಆಶ್ರಮದ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ನಗರಕ್ಕೆ ಆಗಮಿಸಿದ್ದರು. ವಿಮಾನ ನಿಲ್ದಾಣಕ್ಕೆ ಹಿಂತಿರುಗುವ ಮಾರ್ಗಮಧ್ಯೆ ಸಿಎಂ ನಿವಾಸಕ್ಕೆ ಭೇಟಿ ನೀಡಿ ಸುಮಾರು ಒಂದು ಗಂಟೆಗಳ ಕಾಲ ಮಾತುಕತೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.
ಇದನ್ನೂ ಓದಿ: ಈ ದಿನ ಸಂಪಾದಕೀಯ | ಇಎಸಿಗೆ ಅದಾನಿ ಆಪ್ತನ ನೇಮಕ; ಪ್ರಧಾನಿ ಮೋದಿ ಯಾರ ಪ್ರಧಾನ ಸೇವಕ?
ಸುಮಾರು 16.75 ಕಿ.ಮೀ ಉದ್ದದ ಸುರಂಗ ರಸ್ತೆಯನ್ನು ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಹೆಬ್ಬಾಳದವರೆಗೆ ನಿರ್ಮಿಸಲು ಉದ್ದೇಶಿಸಲಾಗಿದೆ. ಈ ಯೋಜನೆಗೆ ‘ಅದಾನಿ ಎಂಟರ್‌ಪ್ರೈಸಸ್’ ಸಂಸ್ಥೆಯು ಅತ್ಯಂತ ಕಡಿಮೆ ಬಿಡ್ (L1) ಸಲ್ಲಿಸಿದ ಕಂಪನಿಯಾಗಿ ಹೊರಹೊಮ್ಮಿದೆ.
ರಾಜ್ಯ ಸರ್ಕಾರವು ಈ ಯೋಜನೆಯ ವೆಚ್ಚವನ್ನು ರೂ. 17,698 ಕೋಟಿ ಎಂದು ಅಂದಾಜಿಸಿತ್ತು. ಅದಾನಿ ಸಂಸ್ಥೆಯು ರೂ. 22,267 ಕೋಟಿಗಳ ಬಿಡ್ ಪ್ರಸ್ತಾವನೆ ಸಲ್ಲಿಸಿತ್ತು. ಸರ್ಕಾರ ಅಂದಾಜಿಸಿದ್ದಕ್ಕಿಂತ ಸುಮಾರು ರೂ. 4,600 ಕೋಟಿ ಅಧಿಕ ಮೊತ್ತದ ಪ್ರಸ್ತಾವನೆ ಇದಾಗಿದೆ. ಅಂತಿಮ ಟೆಂಡರ್ ಹಂಚಿಕೆ ಪ್ರಕ್ರಿಯೆಯನ್ನು ಸಂಪುಟ ಮಟ್ಟದಲ್ಲಿ ಪರಿಶೀಲಿಸುವ ನಿರ್ಧಾರ ಇನ್ನಷ್ಟೇ ಕೈಗೊಳ್ಳಬೇಕಿದೆ.
ಈ ಸಭೆಯನ್ನು ಮುಖ್ಯಮಂತ್ರಿಗಳ ಕಚೇರಿ (CMO) ‘ಸೌಹಾರ್ದಯುತ ಭೇಟಿ’ ಎಂದು ಬಣ್ಣಿಸಿದೆ. ಆದರೆ, ಟೆಂಡರ್ ಪ್ರಕ್ರಿಯೆ ಅಂತಿಮಗೊಳ್ಳದ ಈ ಹಂತದಲ್ಲಿ ಉದ್ಯಮಿಯ ಭೇಟಿ ರಾಜ್ಯ ರಾಜಕೀಯದಲ್ಲೂ ವಾಕ್ಸಮರಕ್ಕೆ ಕಾರಣವಾಗಿದೆ.
ಇದನ್ನೂ ಓದಿ: ಮೋದಿ ಸರ್ಕಾರದ ಅದಾನಿ ಪರ ನೀತಿಗಳು: ಪ್ರಜಾಪ್ರಭುತ್ವಕ್ಕೆ ಧಕ್ಕೆಯಾಗುತ್ತಿರುವ ಕಪ್ಪು ಚುಕ್ಕೆಗಳು
ಬೆಂಗಳೂರಿನ ರೂ. 22,267 ಕೋಟಿ ಅಂದಾಜಿನ ಸುರಂಗ ರಸ್ತೆ ಯೋಜನೆಗೆ ಗೌತಮ್ ಅದಾನಿ ಮತ್ತು ಸಿಎಂ ಡಿ.ಕೆ. ಶಿವಕುಮಾರ್ ಭೇಟಿ ಹೊಸ ಆಯಾಮ ನೀಡಿದೆ. ಆದರೆ ಪರಿಸರವಾದಿಗಳು, ಹಸಿರು ಹೋರಾಟಗಾರರು ಮತ್ತು ಸಾರ್ವಜನಿಕ ಸಾರಿಗೆ ತಜ್ಞರು ಈ ಸಂಪೂರ್ಣ ಯೋಜನೆಯನ್ನು ನಗರಕ್ಕೆ ಆಹ್ವಾನಿಸುವ ಬೃಹತ್ ಪರಿಸರ ಮತ್ತು ಆರ್ಥಿಕ ವಿಕೋಪ ಎಂದು ವಿಶ್ಲೇಷಿಸುತ್ತಿದ್ದಾರೆ.
ಅದಾನಿ ಮತ್ತು ಸಿಎಂ ಡಿಕೆಶಿ ಅವರ ಭೇಟಿಯನ್ನು, ಪರಿಸರ ಸಂಘಟನೆಗಳು ಹಾಗೂ ಹಸಿರು ಹೋರಾಟಗಾರರು ಕೇವಲ ಒಂದು ಯೋಜನೆಯ ಆಯಾಮದಲ್ಲಿ ನೋಡದೆ “ಅದಾನಿ ಸಂಸ್ಥೆಯ ಹಿಂದಿನ ಪರಿಸರ ದಾಖಲೆಗಳು (Environmental Track Record)” ಮತ್ತು ಕಾರ್ಪೊರೇಟ್ ಹಿತಾಸಕ್ತಿಗಳ ಹಿನ್ನೆಲೆಯಲ್ಲಿ ತೀವ್ರವಾಗಿ ಟೀಕಿಸುತ್ತಿದ್ದಾರೆ.
ಉಡುಪಿಯಲ್ಲಿರುವ ‘ಉಡುಪಿ ಪವರ್ ಕಾರ್ಪೊರೇಷನ್ ಲಿಮಿಟೆಡ್’ (UPCL – ಅದಾನಿ ಸ್ವಾಮ್ಯದಲ್ಲಿದೆ) ಸ್ಥಾವರವು ಪರಿಸರ ನಿಯಮಗಳನ್ನು ಗಾಳಿಗೆ ತೂರಿ ಮಾಲಿನ್ಯ ಉಂಟುಮಾಡಿದೆ ಎಂದು ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣ (NGT) ರೂ. 52 ಕೋಟಿಗೂ ಹೆಚ್ಚು ಭಾರಿ ದಂಡವನ್ನು ವಿಧಿಸಿತ್ತು. ಈ ಹಿಂದೆ ಪರಿಸರ ಮಂಜೂರಾತಿಗಳಿಲ್ಲದೆ ಕಾರ್ಯಾಚರಣೆ ನಡೆಸಿದ ಮತ್ತು ಸ್ಥಳೀಯ ಜಲಮೂಲ ಹಾಗೂ ಕೃಷಿ ಭೂಮಿಯನ್ನು ನಾಶಪಡಿಸಿದ ಆರೋಪಗಳು ಅದಾನಿ ಸಂಸ್ಥೆಯ ಮೇಲಿವೆ.
ರಾಜ್ಯದಲ್ಲಿ ಈಗಾಗಲೇ ನಿಯಮ ಉಲ್ಲಂಘನೆಗಾಗಿ ದಂಡಕ್ಕೊಳಗಾಗಿರುವ ಅದಾನಿ ಸಂಸ್ಥೆಗೆ, ಬೆಂಗಳೂರಿನಂತಹ ಸೂಕ್ಷ್ಮ ನಗರಾಭಿವೃದ್ಧಿ ವ್ಯವಸ್ಥೆಯ ಅಡಿಯಲ್ಲಿ ಬೃಹತ್ ಸುರಂಗ ತೋಡುವ ಯೋಜನೆಯನ್ನು ನೀಡುವುದು ಭಾರೀ ಅಪಾಯಕಾರಿ ಎಂಬುದು ಹೋರಾಟಗಾರರ ವಾದ.
