ಸಾರ್ವಜನಿಕರಿಗೆ ಸರ್ಕಾರದಿಂದ ಸಾಲ ಹಾಗೂ ಉದ್ಯೋಗ ಒದಗಿಸುವುದಾಗಿ ನಂಬಿಸಿ ಬ್ಯಾಂಕ್ ಖಾತೆಗಳನ್ನು ತೆರೆಯಿಸಿ, ಅವುಗಳನ್ನು ದುಬೈನಲ್ಲಿದ್ದ ಸೈಬ‌ರ್ ವಂಚಕರಿಗೆ ನೀಡುತ್ತಿದ್ದ ಅಂತಾರಾಷ್ಟ್ರೀಯ ಜಾಲ ಆರೋಪಿಗಳನ್ನು ಬೆಳಗಾವಿ ನಗರ ಸೈಬ‌ರ್ ಅಪರಾಧ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಈ ಸಂಬಂಧ ಬೆಳಗಾವಿ ನಗರದ ಮೇಘಾ ಮಾರಡೋಳಕರ ಹಾಗೂ ಮುಂಬೈ ಮೂಲದ ಹೈದರ್ ಅಲಿ ಗುಲಾಮ್ ಅಲಿ ಉನವಾಲಾ ಅವರನ್ನು ಬಂಧಿಸಲಾಗಿದೆ.
ಪೊಲೀಸರ ಪ್ರಕಾರ, ಮೇಘಾ ಸಾರ್ವಜನಿಕರಿಗೆ ಮನೆಯಲ್ಲಿ ಮಾಡುವ ಕೆಲಸ ಹಾಗೂ ಸರ್ಕಾರದಿಂದ ಸಾಲ ಸಿಗುತ್ತದೆ ಎಂದು ನಂಬಿಸಿ ನಗರದ ವಿವಿಧ ಬ್ಯಾಂಕುಗಳಲ್ಲಿ ಖಾತೆಗಳನ್ನು ತೆರೆಯಿಸುತ್ತಿದ್ದಳು. ಬಳಿಕ ಆ ಖಾತೆಗಳ ಪಾಸ್‌ಬುಕ್‌ ಹಾಗೂ ಇತರ ದಾಖಲೆಗಳನ್ನು ಹೈದರ್ ಅಲಿಗೆ ಕಳುಹಿಸುತ್ತಿದ್ದಳು.
ಹೈದರ್ ಅಲಿ ಈ ಮಾಹಿತಿಯನ್ನು ದುಬೈನಲ್ಲಿದ್ದ ತನ್ನ ಪುತ್ರ ಇದ್ರಿಸ್ ಅಲಿ, ಅಜಿಜ್ ಬೋರಾ ಹಾಗೂ ಮೇಘಾಳ ಪುತ್ರಿ ಶಿವಾನಿ ಮಾರಡೋಳಕರ ಅವರಿಗೆ ರವಾನಿಸುತ್ತಿದ್ದನು. ಇವರು ದುಬೈನಿಂದಲೇ ಜನರನ್ನು ವಂಚಿಸಿ, ಈ ಖಾತೆಗಳಿಗೆ ಹಣ ಜಮೆ ಮಾಡಿಸಿ ಬಳಿಕ ವರ್ಗಾಯಿಸಿಕೊಳ್ಳುತ್ತಿದ್ದರು.
ಮಾನಸಿ ಚವಾಣ ನೀಡಿದ ದೂರಿನ ಮೇರೆಗೆ ಪೊಲೀಸರು ತನಿಖೆ ಕೈಗೊಂಡಾಗ ಈ ವಂಚನೆ ಜಾಲ ಬೆಳಕಿಗೆ ಬಂದಿದೆ. ತನಿಖೆಯಲ್ಲಿ ಆರೋಪಿಗಳ ಮಕ್ಕಳು ದುಬೈನಿಂದಲೇ ಜಾಲವನ್ನು ನಿರ್ವಹಿಸುತ್ತಿರುವುದು ಪತ್ತೆಯಾಗಿದೆ.
ಆರೋಪಿ ಮೇಘಾಳ ಮೂಲಕ ಒಟ್ಟು 72 ಬ್ಯಾಂಕ್ ಖಾತೆಗಳು ವಂಚಕರಿಗೆ ಸಿಕ್ಕಿದ್ದು, ಅವುಗಳಲ್ಲಿ 47 ಖಾತೆಗಳ ವಿರುದ್ಧ ವಿವಿಧ ರಾಜ್ಯಗಳಲ್ಲಿ 144 ಪ್ರಕರಣಗಳು ದಾಖಲಾಗಿವೆ. ಈ ಖಾತೆಗಳಲ್ಲಿ ₹1,27,04,678 ಹಣ ಜಮೆಯಾಗಿರುವುದು ಪತ್ತೆಯಾಗಿದೆ.
ಮಾರ್ಚ್ 22ರಂದು ಮುಂಬೈನಲ್ಲಿ ಹೈದರ್ ಅಲಿಯನ್ನು ಹಾಗೂ ಮಾರ್ಚ್ 26ರಂದು ಗೋವಾದ ಪೊರ್ವರಿಮ್‌ನಲ್ಲಿ ಮೇಘಾಳನ್ನು ಬಂಧಿಸಲಾಗಿದೆ. ವಿಚಾರಣೆ ಬಳಿಕ ಇಬ್ಬರನ್ನೂ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
