ಬಳ್ಳಾರಿ ಜಿಲ್ಲೆಯ ಸಿರುಗುಪ್ಪ ಕ್ಷೇತ್ರದ ಬಿಜೆಪಿ ಮಾಜಿ ಶಾಸಕ ಎಂ.ಎಸ್. ಸೋಮಲಿಂಗಪ್ಪ ಹಾಗೂ ಅವರ ಮಕ್ಕಳ ವಿರುದ್ಧ ಅಕ್ರಮ ಜಮೀನು ಒತ್ತುವರಿ ಆರೋಪ ಕೇಳಿಬಂದಿದೆ. ಜಮೀನಿನ ಮಾಲೀಕರ ಮೇಲೆಯೇ ದೌರ್ಜನ್ಯ ಎಸಗಿದ್ದಾರೆ ಎಂದು ಮಂಜುಳಾ ಎಂಬುವರು ಆರೋಪಿಸಿದ್ದಾರೆ.
ಸಿರುಗುಪ್ಪ ನಿವಾಸಿ ಮಂಜುಳಾ ಅವರ ತಂದೆ ತಿಪ್ಪಯ್ಯ ಶೆಟ್ಟಿ ಅವರು ತೆಕ್ಕಲಕೋಟೆ ಹೋಬಳಿಯ ದೇವಲಾಪುರ ಗ್ರಾಮದ ಸರ್ವೆ ನಂ. 8/3ರಲ್ಲಿ 3 ಎಕರೆ ಜಮೀನು ಹೊಂದಿದ್ದು, ಅವರ ಹೆಸರಿನಲ್ಲೇ ಪಟ್ಟಾ ದಾಖಲಾಗಿದೆ. ಮಾಜಿ ಶಾಸಕ ಎಂ.ಎಸ್. ಸೋಮಲಿಂಗಪ್ಪ, ಅವರ ಮೂವರು ಮಕ್ಕಳು ಹಾಗೂ ಸುಮಾರು ಹತ್ತು ಜನ ಗೂಂಡೆಗಳು ಹಲ್ಲೆ ಮಾಡಲು ಯತ್ನಿಸಿದ್ದು, ಸೂಕ್ತ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಮಂಜುಳಾ ಅವರು ಸಿರುಗುಪ್ಪ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಮಾಜಿ ಶಾಸಕರ ದೌರ್ಜನ್ಯವನ್ನು ಖಂಡಿಸಿ ಅವರು ಪ್ರತಿಭಟನೆಯನ್ನೂ ನಡೆಸಿದ್ದಾರೆ.
ದೂರಿನಲ್ಲಿ ಮಂಜುಳಾ ಅವರು ಹೀಗೆ ಆರೋಪಿಸಿದ್ದಾರೆ:
ಆಗಸ್ಟ್ 4ರಂದು ಬೆಳಗ್ಗೆ ಸುಮಾರು 7 ಗಂಟೆಗೆ ನಾನು ನನ್ನ ಜಮೀನಿನಲ್ಲಿ ಮೂರು ಜೆಸಿಬಿಗಳನ್ನು ಇಟ್ಟು ಸ್ವಚ್ಛಗೊಳಿಸುವ ಕೆಲಸ ನಡೆಸುತ್ತಿದ್ದೆ. ಆ ಸಮಯದಲ್ಲಿ ಮಾಜಿ ಶಾಸಕ ಎಂ.ಎಸ್. ಸೋಮಲಿಂಗಪ್ಪ ಹಾಗೂ ಅವರ ಮಕ್ಕಳಾದ ಎಂ.ಎಸ್. ವೆಂಕಟಪ್ಪ ನಾಯಕ ಮತ್ತು ಸಿದ್ದಪ್ಪ ಅವರು ಕೆಎ-34-ಎನ್-6309 ಸಂಖ್ಯೆಯ ಇನ್ನೋವಾ ಕಾರಿನಲ್ಲಿ ಬಂದರು. ಅವರ ಜೊತೆಗೆ ಹತ್ತು ಜನ ಸಹಚರರು ಮತ್ತು ಹತ್ತು ಜನ ಗೂಂಡೆಗಳು ಸೇರಿಕೊಂಡು ನಮ್ಮ ಜೆಸಿಬಿಯನ್ನು ನಿಲ್ಲಿಸಿದರು. ನಂತರ ಅವರ ಜೆಸಿಬಿಯನ್ನು ಬಳಸಿ ನನ್ನ ಜಮೀನಿಗೆ ಅಕ್ರಮವಾಗಿ ನುಗ್ಗಿ ದೌರ್ಜನ್ಯ ಮಾಡಿದರು. “ನೀನು ಈಗಲೇ ಸ್ಥಳದಿಂದ ಹೊರಗೆ ಹೋಗದಿದ್ದರೆ ನಿನ್ನನ್ನು ಇಲ್ಲಿಯೇ ಕೊಂದು ಹಾಕುತ್ತೇವೆ” ಎಂದು ಧಮಕಿ ಹಾಕಿದರು. ಅವರು ನನ್ನನ್ನು ಕೈಹಿಡಿದು ಎಳೆದು ಜಮೀನಿನಿಂದ ದೂರಕ್ಕೆ ತಳ್ಳಿದರು. ನಾನು ಕಿರುಚಿದಾಗ ಮಾರುತಿ ಶೆಟ್ಟಿ (ತಂದೆ: ತಿಪ್ಪಯ್ಯ ಶೆಟ್ಟಿ) ಸ್ಥಳಕ್ಕೆ ಬಂದು ನನ್ನನ್ನು ಅವರಿಂದ ಬಿಡಿಸಿದರು. ಆದರೂ ನನಗೆ ಅವಾಚ್ಯ ಶಬ್ದಗಳಿಂದ ಬೈದು, ನನ್ನ ಜಮೀನಿನಲ್ಲಿ ಹತ್ತು ಜನ ಗೂಂಡಗಳನ್ನು ನಿಲ್ಲಿಸಿದ್ದಾರೆ.
ಮಾಜಿ ಶಾಸಕ ಎಂ.ಎಸ್. ಸೋಮಲಿಂಗಪ್ಪ, ಅವರ ಸಹಚರರು ಹಾಗೂ ಗೂಂಡೆಗಳು ನನ್ನನ್ನು ನಿಂದಿಸಿ, ಧಮಕಿ ಹಾಕಿ ಸಾರ್ವಜನಿಕ ಸ್ಥಳದಲ್ಲಿ ನನ್ನ ಮಾನಹಾನಿ ಮಾಡಿದ್ದಾರೆ. ನನ್ನ ಸ್ವತ್ತಿನ ಸ್ವಾಧೀನಕ್ಕೆ ಅಡ್ಡಿಪಡಿಸುತ್ತಿರುವ ಇವರ ವಿರುದ್ಧ ಸೂಕ್ತ ಕಾನೂನು ಕ್ರಮ ತೆಗೆದುಕೊಂಡು ನನಗೆ ನ್ಯಾಯ ಒದಗಿಸಬೇಕೆಂದು ಮಂಜುಳಾ ಅವರು ಪೊಲೀಸರಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಪೊಲೀಸರು ಯಾವ ಕ್ರಮ ಕೈಗೊಳ್ಳುತ್ತಾರೆ ಎಂಬುದು ಇನ್ನೂ ಕಾದು ನೋಡಬೇಕಿದೆ.
