“ಗುರು ನೀಡಿದ ಶಿಕ್ಷಣವೆಂಬ ಮೂರಕ್ಷರವು ಇಂದು ನನ್ನನ್ನು ವಿಶ್ವಸಂಸ್ಥೆ ನೀಡುವ ಜೀವ ವೈವಿಧ್ಯದ ನೊಬೆಲ್ ಎಂದೇ ಪರಿಗಣಿಸಲಾಗಿರುವ ‘ಇಕ್ವಿಡಿಟಿ ಇನಿಷಿಯೇಟಿವ್’ ಎಂಬ ಪ್ರಶಸ್ತಿ ಪುರಸ್ಕಾರದ ಮಟ್ಟಕ್ಕೆ ಕರೆದುಕೊಂಡು ಹೋಗಿದೆ” ಎಂದು ಶ್ರೀಮತಿ ಬೀಬಿಜಾನ್ ಹಳೆಮನೆ ಅವರು ಹೇಳಿದರು.
ಧಾರವಾಡ ಜಿಲ್ಲೆಯ ಕುಂದಗೋಳ ತಾಲೂಕಜನ ಗುಡಗೇರಿಯ ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಐಕ್ಯೂಎಸಿ ಮತ್ತು ಮಹಿಳಾ ವೇದಿಕೆಯ ಸಹಯೋಗದಲ್ಲಿ ಜರುಗಿದ ಅಂತರರಾಷ್ಟ್ರೀಯ ಮಹಿಳಾ ದಿನಾಚರಣೆಯ ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಮಾತನಾಡಿದರು.
ಬೀಬಿಜಾನ್ ಹಳೆಮನೆಯವರು ಕುಂದಗೋಳದ ತೀರ್ಥ ಗ್ರಾಮದಲ್ಲಿ ನಾಟಿ ಬೀಜಗಳ ಸಂರಕ್ಷಣೆ ಮತ್ತು ಸಿರಿಧಾನ್ಯಗಳ ಉತ್ಪನ್ನಗಳ ತಯಾರಿಕೆಗಾಗಿ ಬೀಬಿಫಾತಿಮಾ ಮಹಿಳಾ ಸಂಘವನ್ನು ಸ್ಥಾಪಿಸಿದ್ದು, ಇದರ ರೂವಾರಿಗಳಾದ ಇವರು ಈ ಸಂಘದ ಸಾಧನೆಗಾಗಿ 2025 ನೇ ಸಾಲಿನ ವಿಶ್ವಸಂಸ್ಥೆಯ ಈಕ್ವಿಡಿಟಿ ಇನಿಶಿಯೇಟಿವ್ ಪ್ರಶಸ್ತಿಗೆ ಪುರಸ್ಕೃತರಾಗಿದ್ದಾರೆ.
“ಈ ಪ್ರಶಸ್ತಿಗಾಗಿ 103 ದೇಶಗಳಿಂದ 700ಕ್ಕೂ ಹೆಚ್ಚು ಸಂಘ ಸಂಸ್ಥೆಗಳು ಸ್ಪರ್ಧಿಸಿದ್ದು ಅಂತಿಮವಾಗಿ ಬೀಬಿಫಾತಿಮಾ ಮಹಿಳಾ ಸಂಘಕ್ಕೆ ಜೀವವೈವಿಧ್ಯತೆಯ ನೋಬೆಲ್ ಪುರಸ್ಕಾರ ಲಭಿಸಿರುವುದು ಕರ್ನಾಟಕ ಮತ್ತು ಭಾರತಕ್ಕೆ ಹೆಮ್ಮೆಯ ಸಂಗತಿಯಾಗಿದೆ.
ಕಾರ್ಯಕ್ರಮದ ಪ್ರಸ್ತಾವಿಕ ನುಡಿಗಳನ್ನಾಡಿದ ಡಾ. ಭೀಮೇಶ ಯರಡೋಣಿ ಅವರು, “ಮಹಿಳಾ ದಿನಾಚರಣೆಯ ಚಾರಿತ್ರಿಕ ಸನ್ನಿವೇಶಗಳನ್ನು ಸಾಂದರ್ಭಿಕವಾಗಿ ವಿವರಿಸುವುದರ ಜೊತೆಗೆ ಇಂದಿನ ಸ್ತ್ರೀವಾದಿ ಚಿಂತನೆಯ ಮುಖ್ಯ ಕೇಂದ್ರ ಪುರುಷನಾಗಿದ್ದು, ಗಂಡು ಮತ್ತು ಹೆಣ್ಣು ಎಂಬ ಭೇದಗಳನ್ನು ತೊಡೆದುಹಾಕಿ ನಾವೆಲ್ಲರೂ ಮನುಷ್ಯರಾಗಬೇಕಾದ ಜರೂರಿದೆ” ಎಂದು ಅಭಿಪ್ರಾಯಪಟ್ಟರು.
ಅರ್ಥಶಾಸ್ತ್ರದ ಸಹಾಯಕ ಪ್ರಾಧ್ಯಾಪಕರಾದ ಅಪೂರ್ವ ಕೆ.ಎಚ್ ಇವರು ಮಾತನಾಡಿ, “ಭೂಮಿಯ ಮಾಲೀಕತ್ವ ಪುರುಷರಿಗಿದ್ದಾಗ ಅವರು ವಾಣಿಜ್ಯ ಬೆಳೆಗಳನ್ನು ಮತ್ತು ಸ್ತ್ರೀಯರಿಗಿದ್ದಾಗ ಸ್ತ್ರೀಯರು ಆಹಾರ ಬೆಳೆಗಳನ್ನು ಬೆಳೆಯಲು ಬಹುತೇಕ ಗಮನ ನೀಡುತ್ತಾರೆ. ಬಂಡವಾಳಶಾಹಿ ವ್ಯವಸ್ಥೆಯಲ್ಲಿ ಅತ್ಯಂತ ಶೋಷಿತ ಜೀವಿ ಮಹಿಳೆ ಎಂಬುದನ್ನು ವಿವರಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಕಾಲೇಜಿನ ಪ್ರಾಂಶುಪಾಲರು ಶ್ರೀ ಗಂಗಾಧರ ಗುಮ್ಮಗೋಳಮಠ ಅವರು ಮಾತನಾಡಿ, “ಪ್ರತಿಯೊಬ್ಬರ ಜೀವನದಲ್ಲಿ ಶಿಕ್ಷಣ, ಸ್ವಾವಲಂಬನೆ ಮತ್ತು ಜೀವನ ಸಂಗಾತಿಯ ಆಯ್ಕೆ ಬಹು ಮುಖ್ಯವಾದ ಘಟ್ಟಗಳಾಗಿವೆ. ಇವುಗಳನ್ನು ಪ್ರಜ್ಞಾ ಪೂರ್ವಕವಾಗಿ ಆಯ್ದುಕೊಳ್ಳುವ ಮೂಲಕ ಜೀವನವನ್ನು ಅತ್ಯುತ್ತಮವಾದ ಮಟ್ಟಕ್ಕೆ ಕೊಂಡೊಯ್ಯಬಹುದು” ಎಂದು ತಿಳಿಸಿದರು.
ವಿದ್ಯಾರ್ಥಿನಿಯರು ಪವಿತ್ರ ಗೌಡನಾಯ್ಕರ್ ಮತ್ತು ರಂಜಿತಾ ಹಿರೇಗೌಡ್ರು ಸ್ತ್ರೀ ಸಂವೇದನೆಯ ಕವಿತೆಗಳನ್ನು ವಾಚಿಸಿದರು. ವೇದಿಕೆಯ ಮೇಲೆ ಐಕ್ಯೂಎಸಿ ಮತ್ತು ಮಹಿಳಾ ವೇದಿಕೆ ಸಂಚಾಲಕರು ಶ್ರೀಮತಿ ಚೇತನ ಸಿಎನ್ ಹಾಗೂ ಸದಸ್ಯರು ಶ್ರೀಮತಿ ಸುನಂದಾ ಶರೇವಾಡ, ಡಾ. ಓಜರಬಿ ನದಾಫ್ ಇದ್ದರು. ಕಾರ್ಯಕ್ರಮವನ್ನು ವಿಜಯಲಕ್ಷ್ಮಿ ಅಂಗಡಿ ನಿರೂಪಿಸಿದರು. ಕವನ ಬೇವಿನಮರದ ಸ್ವಾಗತಸಿದರು. ನಿಂಗಪ್ಪ ಕಡೆಮನಿ ವಂದಿಸಿದರು.
