“ಸುಪ್ರಸಿದ್ಧ ಕವಿಗಳಾದ ಚಾಮರಸ, ಕುಮಾರವ್ಯಾಸ ಮುಂತಾದವರು ಕನ್ನಡ ಸಾಹಿತ್ಯಕ್ಕೆ ಸಲ್ಲಿಸಿದ ಸೇವೆ ಅನನ್ಯ. ಕನ್ನಡ ಸಾಹಿತ್ಯ, ಕಲೆ, ಸಂಗೀತ, ನಾಟಕ, ಸಂಸ್ಕೃತಿಗೆ ಗದಗ ಜಿಲ್ಲೆಯ ಕೊಡುಗೆ ಅಪಾರ’ ಎಂದು ತೋಂಟದ ಸಿದ್ಧರಾಮ ಸ್ವಾಮೀಜಿ ಹೇಳಿದರು.
ಗದಗ ನಗರದ ತೋಂಟದಾರ್ಯ ಮಠದಲ್ಲಿ ಲಿಂಗಾಯತ ಪ್ರಗತಿಶೀಲ ಸಂಘದಿಂದ ಈಚೆಗೆ ನಡೆದ 2,822ನೇ ಶಿವಾನುಭದಲ್ಲಿ ಸಾನ್ನಿಧ್ಯ ವಹಿಸಿ ಮಾತನಾಡಿದರು.
‘ಕರ್ನಾಟಕದ ಏಕೀಕರಣಕ್ಕಾಗಿ ಅಂದಾನಪ್ಪ ದೊಡ್ಡಮೇಟಿ, ಹುಯಿಲಗೋಳ ನಾರಾಯಣರಾವ, ಆಲೂರು ವೆಂಕಟರಾಯರು ಮುಂತಾದವರ ತ್ಯಾಗ, ಹೋರಾಟ ಅಪಾರ. ತೋಂಟದ ಸಿದ್ದಲಿಂಗ ಸ್ವಾಮೀಜಿ, ಗೋಕಾಕ ಚಳವಳಿಯ ನೇತೃತ್ವ ವಹಿಸಿದ್ದು ಐತಿಹಾಸಿಕವಾದುದು. ಹೆಸರಾಯಿತು ಕರ್ನಾಟಕ ಉಸಿರಾಗಲಿ ಕನ್ನಡ ಘೋಷಣೆ ಅನುಕರಣೆ ಇಂದಿನ ಅಗತ್ಯವಾಗಿದೆ” ಎಂದರು.
ವೀಣಾ ಪಾಟೀಲ, ಇತಿಹಾಸ ಪ್ರಾಧ್ಯಾಪಕ ಇಬ್ರಾಹಿಂ ಸೌದಾಗರ ಮಾತನಾಡಿದರು. ಅಣ್ಣಿಗೇರಿಯ ಪತ್ರೇಶ್ವರ ಸಿ. ನವಲಗುಂದ ಅವರನ್ನು ಸನ್ಮಾನಿಸಲಾಯಿತು. ‘ಕಲ್ಯಾಣದ ಕ್ರಾಂತಿಯ ಕಿಡಿ’ ರೂಪಕ ಜರುಗಿತು. ಪ್ರಣವಿ ಅಣ್ಣಿಗೇರಿ- ಧರ್ಮಗ್ರಂಥ ಪಠಣ, ಛಾಯಾ ಜಂಗಮನಿ-ವಚನಚಿಂತನ, ಅಣ್ಣಿಗೇರಿಯ ಬಸಪ್ಪ ಪಲ್ಲೆದ-ದಾಸೋಹ ಸೇವೆ ನೆರವೇರಿಸಿದರು. ಮೃತ್ಯುಂಜಯ ಮತ್ತು ಸುತಾರ ಅವರಿಂದ ಕನ್ನಡ ಗೀತೆಗಳು ಗಾಯನ, ಮಲ್ಲಿಕಾರ್ಜುನ ಭಜಂತ್ರಿ ಅವರಿಂದ ಶಹನಾಯಿ ವಾದನ ಜರುಗಿತು.
ಲಿಂಗಾಯತ ಪ್ರಗತಿಶೀಲ ಸಂಘದ ಅಧ್ಯಕ್ಷ ಉಮೇಶ ಪುರದ, ಎಸ್‌.ಎಸ್‌. ಹರ್ಲಾಪುರ, ರೇವಣಸಿದ್ದಯ್ಯ ಮರಿದೇವರಮಠ, ಗಂಗಾಧರ ಹಿರೇಮಠ, ದಾನಯ್ಯ ಗಣಾಚಾರಿ, ರಮೇಶ ಕಲ್ಲನಗೌಡರ,ಆದೇಶ ಅಂಗಡಿ, ಸೋಮು ಪುರಾಣಿಕ, ಸುನಂದಾ ಪಿಳ್ಳೆ, ಕೆ.ಎಸ್‌. ಕೋರಿಮಠ, ಎಸ್‌. ಐ. ಪಟ್ಟೇದ, ಪ್ರಭು ಗಂಜಿಹಾಳ ಇದ್ದರು.
