ಕ್ಷೇತ್ರದ ಜನತೆಯ ಬಹುದಿನಗಳ ಬೇಡಿಕೆಯಾಗಿದ್ದ ರಾಮಸಾಗರ ಕೆರೆ ಕೋಡಿ ಹೋಗುವ ಪಾಲಾರ್ ನದಿಗೆ ತಾತಿರೆಡ್ಡಿಹಳ್ಳಿ ಗ್ರಾಮದ ಬಳಿ ನೂತನ ಸೇತುವೆ ನಿರ್ಮಾಣ ಕಾಮಗಾರಿಗೆ ಶಾಸಕಿ ರೂಪಕಲಾ ಅಧಿಕೃತವಾಗಿ ಭೂಮಿ ಪೂಜೆ ನೆರವೇರಿಸಿದರು.
ಲೋಕೋಪಯೋಗಿ ಇಲಾಖೆಯ ಮುಖಾಂತರ ಅನುಷ್ಠಾನಗೊಳ್ಳುತ್ತಿರುವ ಈ ಬೃಹತ್ ಯೋಜನೆಗೆ ಒಟ್ಟು ರೂ. 9.50 ಕೋಟಿ ವೆಚ್ಚ ಮಾಡಲಾಗುತ್ತಿದ್ದು, ನೂತನ ಸೇತುವೆಯು 12.00 ಮೀಟರ್ ಅಗಲದಲ್ಲಿ ಸೇತುವೆ ನಿರ್ಮಾಣ ಮಾಡಲಾಗುತ್ತದೆ.
ಭೂಮಿ ಪೂಜೆ ನೆರವೇರಿಸಿ ಶಾಸಕಿ ರೂಪಕಲಾ ಶಶಿಧರ್ ಮಾತನಾಡಿ, ಇಡೀ ಜಿಲ್ಲೆಯಲ್ಲಿಯೇ ಅತ್ಯಂತ ಉದ್ದದ ಸೇತುವೆ ಇದಾಗಿದ್ದು, ಹಲವು ವರ್ಷಗಳ ಹಿಂದೆ ಕೇವಲ ಒಂದು ಎತ್ತಿನ ಗಾಡಿ ಹೋಗುವಷ್ಟು ಕಿರಿದಾದ ಅಗಲದಲ್ಲಿ ಇದನ್ನು ನಿರ್ಮಿಸಲಾಗಿತ್ತು. ಪ್ರಸ್ತುತ ರೈತರು ತಮ್ಮ ಬೆಳೆಗಳನ್ನು ಸಾಗಿಸುವ ವಾಹನಗಳು, ಶಾಲಾ ಬಸ್‌ಗಳು ಹಾಗೂ ಇತರೆ ಭಾರೀ ವಾಹನಗಳು ಎರಡೂ ಕಡೆಯಿಂದ ಏಕಕಾಲದಲ್ಲಿ ಸಂಚರಿಸಲು ಇಲ್ಲಿ ಸಾಧ್ಯವಾಗುತ್ತಿಲ್ಲ. ಜೊತೆಗೆ ಹಾಲಿ ಇರುವ ಹಳೆಯ ಸೇತುವೆಯು ಶಿಥಿಲಾವಸ್ಥೆ ತಲುಪಿದೆ.
ಎರಡೂ ಕಡೆ ನದಿ ಹರಿಯುತ್ತಿರುವುದರಿಂದ ಹಳೆಯ ಸೇತುವೆಯನ್ನು ತಕ್ಷಣ ಕೆಡವಿದರೆ ಮಳೆಗಾಲದಲ್ಲಿ ಸಾರ್ವಜನಿಕರಿಗೆ ಪರ್ಯಾಯ ರಸ್ತೆ ನಿರ್ಮಿಸುವುದು ಅಸಾಧ್ಯ. ಆದ್ದರಿಂದ, ಮೊದಲು ಹಳೆಯ ಸೇತುವೆಯ ಪಕ್ಕದಲ್ಲೇ ನೂತನ ಸುಸಜ್ಜಿತ ಸೇತುವೆಯನ್ನು ನಿರ್ಮಿಸಿ, ಸಂಚಾರ ಮುಕ್ತಗೊಳಿಸಿದ ಬಳಿಕವಷ್ಟೇ ಹಳೆಯ ಸೇತುವೆಯನ್ನು ಕೆಡವಲಾಗುವುದು ಎಂದರು.
ರೈತರಲ್ಲಿ ಶಾಸಕರ ಮನವಿ:
ಸಾರ್ವಜನಿಕರ ಮತ್ತು ರೈತರ ಅನುಕೂಲಕ್ಕಾಗಿ ಹಳೆ ಸೇತುವೆ ಪಕ್ಕದಲ್ಲೇ ಹೊಸ ಸೇತುವೆ ನಿರ್ಮಿಸುತ್ತಿರುವುದರಿಂದ, ಕಾಮಗಾರಿ ಸುಗಮವಾಗಿ ನಡೆಯಲು ಎರಡೂ ಬದಿಯ ರೈತರು ಹಾಗೂ ಸಾರ್ವಜನಿಕರು ಇಲಾಖೆಯೊಂದಿಗೆ ಸಂಪೂರ್ಣವಾಗಿ ಸಹಕರಿಸಬೇಕು ಎಂದು ಶಾಸಕಿ ರೂಪಕಲಾ ಎಂ ಶಶಿಧರ್ ಮನವಿ ಮಾಡಿಕೊಂಡರು.
ಕಾಮಗಾರಿಯಲ್ಲಿ ಯಾವುದೇ ಕಾರಣಕ್ಕೂ ಗುಣಮಟ್ಟದ ಕೊರತೆಯಾಗಬಾರದು. ನಿಗದಿತ ಸಮಯಕ್ಕಿಂತ 6 ತಿಂಗಳ ಒಳಗಾಗಿ ಇಡೀ ಯೋಜನೆಯನ್ನು ಪೂರ್ಣಗೊಳಿಸಿ ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸಬೇಕು ಎಂದು ಶಾಸಕರು ಸ್ಥಳದಲ್ಲಿದ್ದ ಗುತ್ತಿಗೆದಾರರಿಗೆ ಹಾಗೂ ಲೋಕೋಪಯೋಗಿ ಇಲಾಖೆಯ ಇಂಜಿನಿಯರ್‌ಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದರು.
ಇದನ್ನು ಓದಿದ್ದೀರಾ..?ಕೋಲಾರ | ಸಂಸದರಿಗೆ ಶುಭ ಕೋರಿದ ಹೂಡಿ ವಿಜಯ್ ಕುಮಾರ್
ಈ ಸಂಧರ್ಭದಲ್ಲಿ ಲೋಕೋಪಯೋಗಿ ಇಲಾಖೆ ಅಧಿಕಾರಿ ರಾಮ್ ಮೂರ್ತಿ, ಎಇಇ ರಾಜಶೇಖರ್, ಗುತ್ತಿಗೆದಾರ ರಾಮಚಂದ್ರ ಗೌಡ, ನಾರಾಯಣ ಗೌಡ, ಯುವ ಗುತ್ತಿಗೆದಾರ ರಾಮ್ ಮೂರ್ತಿ, ಜಿಪಂ ಮಾಜಿ ಸದಸ್ಯ ಅ. ಮು. ಲಕ್ಷ್ಮೀ ನಾರಾಯಣ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಕಮ್ಮಸಂದ್ರ ನಾಗರಾಜ್, ಗ್ಯಾರಂಟಿ ಸಮಿತಿ ಅಧ್ಯಕ್ಷ ರಾಧಕೃಷ್ಣ ರೆಡ್ಡಿ, ಗ್ರಾಪಂ ಮಾಜಿ ಅಧ್ಯಕ್ಷರಾದ ಚಂದ್ರಪ್ಪ, ರಾಮಾದೇವಿ ಮುರಳಿ, ವಿನು ಕಾರ್ತಿಕ್, ಸುವರ್ಣ ವೆಂಕಟರಾಮ್, ಸ್ಕೂಲ್ ವೆಂಕಟೇಶ್, ಕೆ. ಎಂ. ಕೃಷ್ಣ ಮೂರ್ತಿ, ಎಪಿಎಂಸಿ ನಿರ್ದೇಶಕರಾದ ಯುವರಾಣಿ ವೆಂಕಟಾಚಲಪತಿ, ಶ್ರೀದೇವಿ ಸಂಪತ್, ಸುರೇಂದ್ರ ಗೌಡ, ಮುರಳಿ, ಮುಖಂಡರಾದ ಚನ್ನಕೇಶವ ರೆಡ್ಡಿ, ಡೈರಿ ಮುಕುಂದಪ್ಪ, ಅಪ್ಪೋಜಿ ಗೌಡ, ಎಂಬಿಎ ಕೃಷ್ಣಪ್ಪ, ವೆಂಕಟರಾಮ್ ರಾಜಕುಮಾರ್, ಮುರಳಿ ನಾಯಕ್, ಆಂಜಪ್ಪ, ಮುನಿಸ್ವಾಮಿ ರೆಡ್ಡಿ ಮುನೇಗೌಡ ಮಂಜುನಾಥ್ ಪಟ್ಟಾಬಿ, ಶ್ರೀನಿವಾಸ್ ರೆಡ್ಡಿ, ಗಂಗಿರೆಡ್ಡಿ, ಮುನಿ ರೆಡ್ಡಿ, ಪುರುಷೋತ್ತಮ್ ನಾಯ್ಡು, ಕೋದಂಡಪ್ಪ, ಶ್ರೀರಾಮರೆಡ್ಡಿ, ದಶರಥ ರೆಡ್ಡಿ, ಭೀಮೇಶ್, ಎತೂರು ಚಂದ್ರು, ಚಂದ್ರಪ್ಪ, ದೇವರಾಜ್ ರೆಡ್ಡಿ ಸೇರಿದಂತೆ ಸ್ಥಳೀಯ ಮುಖಂಡರು ಹಾಗೂ ಸಾರ್ವಜನಿಕರು ಉಪಸ್ಥಿತರಿದ್ದರು.
