ರೋಗಿಗಳ ಪಾಲಿಗೆ ವೈದ್ಯರು ದೇವರಾದರೆ, ಅವರ ಸೂಚನೆಯಂತೆ ನಿರಂತರವಾಗಿ ರೋಗಿಗಳ ಆರೈಕೆ ಮಾಡುವ ದಾದಿಯರ ಪಾತ್ರ ಅತ್ಯಂತ ಪವಿತ್ರವಾದದ್ದು. ಸಮಾಜದ ಪ್ರತಿಯೊಬ್ಬರೂ ದಾದಿಯರ ಸೇವೆಯನ್ನು ಗೌರವಿಸಬೇಕು ಎಂದು ಅಚ್ಚಪ್ಪನ ಕೊಪ್ಪಲು ಆರೋಗ್ಯ ಉಪ ಕೇಂದ್ರದ ಸಮುದಾಯ ಆರೋಗ್ಯಾಧಿಕಾರಿ ಎನ್ ಮಹೇಶ್ ಹೇಳಿದರು.
ಶ್ರೀರಂಗಪಟ್ಟಣದ ತಾಲೂಕಿನ ಕಡತನಾಳು ಗ್ರಾಮದ ಅಂಗನವಾಡಿ ಕೇಂದ್ರದಲ್ಲಿ ‘ಸಮರ್ಪಣ ಟ್ರಸ್ಟ್’ ವತಿಯಿಂದ ಹಮ್ಮಿಕೊಂಡಿದ್ದ ʼವಿಶ್ವ ದಾದಿಯರ ದಿನʼವನ್ನು ಅತ್ಯಂತ ಸಡಗರ ಹಾಗೂ ಅರ್ಥಪೂರ್ಣವಾಗಿ ಆಚರಿಸುವ ವೇಳೆ ಮಾತನಾಡಿದರು.
ದಾದಿಯರ ಸೇವೆಯ ಮಹತ್ವವನ್ನು ಒತ್ತಿ ಹೇಳಿದ ಅವರು, “ಮೇ 12 ಇದೊಂದು ಸಾಮಾನ್ಯ ದಿನಾಂಕ ಅಲ್ಲ. ಇದು ವಿಶ್ವ ದಾದಿಯರ ದಿನ. ಮಾನವೀಯತೆಯ ಬಿಳಿ ದೇವತೆಗಳಿಗೆ ನಾವು ಕೃತಜ್ಞತೆ ಸಲ್ಲಿಸುವ ಪವಿತ್ರ ದಿನ” ಎಂದು ಸ್ಮರಿಸಿದರು.
ದಾದಿಯರು ಗ್ರಾಮೀಣ ಮಟ್ಟದಲ್ಲಿ ಜನರ ಆರೋಗ್ಯ ರಕ್ಷಣೆಗಾಗಿ ಹಗಲಿರುಳು ಶ್ರಮಿಸುತ್ತಿರುವ ಅವರ ನಿಸ್ವಾರ್ಥ ಸೇವೆಯನ್ನು ಸ್ಮರಿಸುವ ಉದ್ದೇಶದಿಂದ ಆಯೋಜಿಸಲಾಗಿದ್ದ ಈ ಕಾರ್ಯಕ್ರಮದಲ್ಲಿ ಪ್ರಾಥಮಿಕ ಆರೋಗ್ಯ ಸುರಕ್ಷಿತ ಅಧಿಕಾರಿ ಶ್ರೀಮತಿ ಪದ್ಮ ಅವರನ್ನು ಸಮರ್ಪಣ ಟ್ರಸ್ಟ್ ವತಿಯಿಂದ ವಿಶೇಷವಾಗಿ ಸನ್ಮಾನಿಸಿ ಗೌರವಿಸಲಾಯಿತು.
ಸಮರ್ಪಣ ಟ್ರಸ್ಟ್ ಅಧ್ಯಕ್ಷ ಕೆ ಎಸ್ ಜಯಶಂಕರ್ ಮಾತನಾಡಿ, “ಗ್ರಾಮೀಣ ಭಾಗದಲ್ಲಿ ಗರ್ಭಿಣಿಯರು, ಬಾಣಂತಿಯರು ಹಾಗೂ ಮಕ್ಕಳ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುವಲ್ಲಿ ದಾದಿಯರು ಮತ್ತು ಆಶಾ ಕಾರ್ಯಕರ್ತೆಯರ ಪಾತ್ರ ದೊಡ್ಡದು. ಇಂತಹ ಕೋವಿಡ್‌ನಂತಹ ದುಗುಡದ ಹೊತ್ತಿನಲ್ಲೂ ಜೀವದ ಹಂಗು ತೊರೆದು ದುಡಿದ ಈ ಆರೋಗ್ಯ ಕಾವಲುಗಾರರನ್ನು ಗುರುತಿಸಿ ಸನ್ಮಾನಿಸುತ್ತಿರುವುದು ಟ್ರಸ್ಟ್‌ಗೆ ಹೆಮ್ಮೆಯ ವಿಷಯವಾಗಿದೆ” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಈ ಸುದ್ದಿ ಓದಿದ್ದೀರಾ? ನೀಟ್‌ ಪರೀಕ್ಷೆ ರದ್ದು : ಕೇಂದ್ರ ಸರ್ಕಾರದ ವಿರುದ್ಧ ರಾಜ್ಯ ಸಚಿವರ ವಾಗ್ದಾಳಿ
ಈ ಅರ್ಥಪೂರ್ಣ ಕಾರ್ಯಕ್ರಮದಲ್ಲಿ ಅಂಗನವಾಡಿ ಸಹಾಯಕಿ ಕವಿತಾ, ಆಶಾ ಕಾರ್ಯಕರ್ತೆ ಕೆ ಲೀಲಾ ಮಣಿ, ಸಮಾಜ ಸೇವಕರಾದ ಕೆ ಎನ್ ಸುನಿಲ್ ಕುಮಾರ್, ಕೆ ಎಂ ಮಂಜುನಾಥ್, ಮಧುಕರ್, ಅನುಶ್ರೀ, ಶಿವಮ್ಮ ಚಂದನ್ ಕುಮಾರ್, ಲಕ್ಷ್ಮಿ ಅರುಣ ಕುಮಾರ್, ಶೀಲಾ ಎಚ್ ಜೆ ಸೇರಿದಂತೆ ಗ್ರಾಮಸ್ಥರು ಹಾಗೂ ಗಣ್ಯರು ಇದ್ದರು.
