ಸಾರ್ವಜನಿಕ ಸ್ಥಳಗಳಲ್ಲಿ ಮೂತ್ರವಿಸರ್ಜನೆ ಮಾಡುವುದನ್ನು ತಡೆಯಲು ಮೈಸೂರು ಮಹಾನಗರ ಪಾಲಿಕೆ ವಿನೂತನ ಯೋಜನೆಯೊಂದನ್ನು ಕಾರ್ಯರೂಪಕ್ಕೆ ತಂದಿದ್ದು, ಗ್ರಾಮಾಂತರ ಬಸ್‌ ನಿಲ್ದಾಣದ ತಡೆಗೋಡೆಗಳಿಗೆ ಸ್ಟೀಲ್ ಮಿರರ್ ಅಳವಡಿಸಿವ ಮೂಲಕ ವಿನೂತನ ಪ್ರಯೋಗಕ್ಕೆ ಪಾಲಿಕೆ ನಾಂದಿ ಹಾಡಿದೆ.
“ಪ್ರಾಯೋಗಿಕ ಯೋಜನೆಯ ಮೊದಲ ಹಂತವಾಗಿ ಬಸ್‌ ನಿಲ್ದಾಣ ಹಾಗೂ ಸರ್ಕಾರಿ ಅಥಿತಿ ಗೃಹಕ್ಕೆ ಹೊಂದಿಕೊಂಡ ಮೋರಿಯ ಗೋಡೆಗೆ ಈಗಾಗಲೇ ಕನ್ನಡಿಯನ್ನು ಅಳವಡಿಸಲಾಗಿದ್ದು, ಸಾರ್ವಜನಿಕ ಸ್ಥಳಗಳಲ್ಲಿ ಕಸ ಎಸೆಯುವುದು ಹಾಗೂ ಮೂತ್ರ ವಿಸರ್ಜನೆ ಮಾಡುವುದನ್ನು ಈ ಮೂಲಕ ಮಾನಿಟರಿಂಗ್‌ ಮಾಡಲಾಗುತ್ತದೆ” ಎಂದು ಮೈಸೂರು ಮಹಾನಗರ ಪಾಲಿಕೆ ತಿಳಿಸಿದೆ.
“ಈ ಯೋಜನೆಯ ಹಿಂದೆ ಮನೋವೈಜ್ಞಾನಿಕ ತಂತ್ರವಿದ್ದು, ರಸ್ತೆ ಬದಿಯಲ್ಲಿ ಮೂತ್ರ ವಿಸರ್ಜನೆ ಮಾಡುವವರು ಕನ್ನಡಿಗಳಲ್ಲಿ ತಮ್ಮ ಬೇಜವಬ್ದಾರಿ ಕೃತ್ಯದ ಪ್ರತಿಬಿಂಬವನ್ನು ನೋಡಿ ಲಜ್ಜೆಗೆ ಒಳಗಾಗುತ್ತಾರೆ. ಜತೆಗೆ ದಾರಿಹೋಕರ ಕಣ್ಣಿಗೂ ಗುರಿಯಾಗುವುದರಿಂದ ಕೃತ್ಯಕ್ಕೆ ಕಡಿವಾಣ ಬೀಳಬಹುದು” ಎಂಬುದು ಪಾಲಿಕೆಯ ಯೋಚನೆ.
ಇದನ್ನೂ ಓದಿ> ಮೈಸೂರು | ಬಿಸಿಗಾಳಿ ಭೀತಿ; ಆಸ್ಪತ್ರೆಗಳಲ್ಲಿ ಪ್ರತ್ಯೇಕ ಬೆಡ್‌ ಮೀಸಲು
ರಾತ್ರಿ ವೇಳೆ ಕನ್ನಡಿಯ ಕೆಳಗೆ ಎಲ್‌ಇಡಿ ಬಲ್ಬ್‌ ಅಳವಡಿಸಿವುದರಿಂದ ಕತ್ತಲಿನಲ್ಲಿ ಸಿಕ್ಕ ಸಿಕ್ಕ ಗೋಡೆಗಳ ಮೇಲೆ ಮೂತ್ರ ವಿಸರ್ಜನೆ ಮಾಡುವುದನ್ನು ತಪ್ಪಿಸಬಹುದು. ಪ್ರಾಯೋಗಿಕ ಯೋಜನೆ ಯಶಸ್ವಿಯಾದರೆ ನಗರದ ಉಳಿದ ಭಾಗಗಳಿಗೂ ವಿಸ್ತರಿಸುವ ಜತೆಗೆ ಉಳಿದ ನಗರಗಳಿಗೂ ಈ ಯೋಜನೆ ಮಾದರಿಯಾಗಲಿದೆ.
“ಸುಮಾರು 85 ಮೀಟರ್ ಉದ್ದದ ಗೋಡೆಗೆ ಸ್ಟೀಲ್ ಶೀಟ್‌ಗಳನ್ನು ಅಳವಡಿಸಲಾಗಿದ್ದು, ಈ ಯೋಜನೆಗೆ ಸುಮಾರು 9 ಲಕ್ಷ ರೂ. ವೆಚ್ಚ ಮಾಡಲಾಗಿದೆ. ಈ ಪ್ರಯೋಗಾತ್ಮಕ ಕ್ರಮದಿಂದ 24 ಗಂಟೆಗಳಲ್ಲಿ ಶೇ.90ಕ್ಕಿಂತ ಹೆಚ್ಚು ಸಕಾರಾತ್ಮಕ ಫಲಿತಾಂಶ ದೊರಕಿದೆ” ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ವಿಭಿನ್ನ ಸಲಹೆ ನೀಡಿದವರಿಗೆ ಮೈಸೂರು ಜನತೆಯಿಂದ ಮೆಚ್ಚುಗೆ ವ್ಯಕ್ತವಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಕನ್ನಡಿಯ ವಿಡಿಯೊ ವೈರಲ್‌ ಆಗಿದೆ.
“ಈ ಸ್ಥಳವನ್ನು ಸ್ವಚ್ಛವಾಗಿಡಲು ಹಿಂದಿನ ಪ್ರಯತ್ನಗಳು ವಿಫಲವಾದ ನಂತರ ಪ್ರಾಯೋಗಿಕ ಆಧಾರದ ಮೇಲೆ ಈ ಕಲ್ಪನೆಯನ್ನು ಪರಿಚಯಿಸಲಾಗಿದೆ. ಪ್ರತಿಫಲಿತ ಮೇಲ್ಮೈ ‘ಮಾನಸಿಕ ನಿರೋಧಕ’ವನ್ನು ಸೃಷ್ಟಿಸಿದೆ. ಇದು ಕನ್ನಡಿಯಂತೆ ಕಾಣುವುದರಿಂದ ಇದರ ಮುಂದೆ ಮೂತ್ರ ವಿಸರ್ಜಿಸಲು ಜನರಿಗೆ ಅನಾನುಕೂಲವನ್ನುಂಟುಮಾಡುತ್ತದೆ. ಈ ಬಗ್ಗೆ ಇಲ್ಲಿಯವರೆಗೆ ಪ್ರತಿಕ್ರಿಯೆ ಸಕಾರಾತ್ಮಕವಾಗಿದೆ. ಅಲ್ಲದೆ ಒಂದು ಕಾಲದಲ್ಲಿ ಕೊಳಕಿಗೆ ಕುಖ್ಯಾತವಾಗಿದ್ದ ಈ ಸ್ಥಳವು ಈಗ ಹೆಚ್ಚು ಉತ್ತಮ ನೋಟವನ್ನು ನೀಡುತ್ತಿದೆ” ಎಂದು ಎಂಸಿಸಿಯ ಯುಜಿಡಿ ವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಮೊಹಮ್ಮದ್ ಮುಸ್ತಫಾ ತಿಳಿಸಿದ್ದಾರೆ.
