ಕರ್ನಾಟಕ ಟೈಲರ್ಸ್ ಮತ್ತು ನೀಟಿಂಗ್ ಸೊಸೈಟಿ (ಕೆಟಿಎನ್ಎಸ್) ವತಿಯಿಂದ ನಿಧನರಾದ ಇಬ್ಬರು ಟೈಲರ್ ವೃತ್ತಿಬಾಂಧವರ ಕುಟುಂಬಗಳಿಗೆ ತಲಾ ₹50,000 ಧನಸಹಾಯವನ್ನು ವಿತರಿಸಲಾಯಿತು.
ಸರಗೂರು ತಾಲೂಕು ಸಮಿತಿಯ ಸದಸ್ಯ ಟೈಲರ್ ಸೋಮಣ್ಣ ಚಾರ್ ಅವರು ಜುಲೈ 18ರಂದು ಹಾಗೂ ಮೈಸೂರು ತಾಲೂಕು ಬೋಗಾದಿ ವಲಯ ಸಮಿತಿಯ ಸದಸ್ಯ ಟೈಲರ್ ಮಂಜುನಾಥ್ ಅವರು ಜುಲೈ 23ರಂದು ನಿಧನರಾಗಿದ್ದರು. ಅವರ ಕುಟುಂಬಗಳಿಗೆ ಜುಲೈ 28ರಂದು ತಲಾ ₹50,000 ನೆರವು ನೀಡಿ ಸಾಂತ್ವನ ಹೇಳಲಾಯಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಕೆಟಿಎನ್ಎಸ್ ರಾಜ್ಯಾಧ್ಯಕ್ಷ ಚನ್ನನಾಯಕ, ಕಳೆದ ನಾಲ್ಕು ವರ್ಷಗಳಿಂದ ಸಮಿತಿಯು ಸಮಾಜಮುಖಿ ಸೇವೆಗಳ ಜೊತೆಗೆ ಸದಸ್ಯರ ಸಂಕಷ್ಟದ ಸಂದರ್ಭಗಳಲ್ಲಿ ನೆರವಾಗುವ ಕಾರ್ಯವನ್ನು ನಿರಂತರವಾಗಿ ನಡೆಸಿಕೊಂಡು ಬರುತ್ತಿದೆ ಎಂದು ತಿಳಿಸಿದರು.
ಟೈಲರ್ ವೃತ್ತಿಬಾಂಧವರು ನಿಧನರಾದ ಸಂದರ್ಭದಲ್ಲಿ ಅವರ ಕುಟುಂಬಗಳಿಗೆ ಆರ್ಥಿಕ ನೆರವು ನೀಡುವ ಪರಂಪರೆಯನ್ನು ಸಮಿತಿ ಬೆಳೆಸಿಕೊಂಡಿದ್ದು, ಇದುವರೆಗೆ 27 ಕುಟುಂಬಗಳಿಗೆ ಧನಸಹಾಯ ನೀಡಲಾಗಿದೆ ಎಂದು ಹೇಳಿದರು. ಮುಂದಿನ ದಿನಗಳಲ್ಲಿ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿರುವ ಟೈಲರ್ ವೃತ್ತಿಬಾಂಧವರನ್ನು ಸಮಿತಿಯ ಸದಸ್ಯರನ್ನಾಗಿ ಸೇರ್ಪಡೆಗೊಳಿಸಿ, ಇನ್ನಷ್ಟು ಕುಟುಂಬಗಳಿಗೆ ನೆರವಾಗುವ ಉದ್ದೇಶ ಹೊಂದಿದ್ದೇವೆ ಎಂದು ತಿಳಿಸಿದರು.
ಇದುವರೆಗೆ ಸಮಿತಿಯ ಸೇವಾ ಕಾರ್ಯಗಳಿಗೆ ಕೈಜೋಡಿಸಿದ ಎಲ್ಲಾ ಸದಸ್ಯರು, ಪದಾಧಿಕಾರಿಗಳು ಹಾಗೂ ದಾನಿಗಳ ಸಹಕಾರವನ್ನು ಸ್ಮರಿಸಿದ ಅವರು, ಸಮಿತಿಯ ಪರವಾಗಿ ಹಾಗೂ ವೈಯಕ್ತಿಕವಾಗಿ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸಿದರು.
ಈ ವಿಶೇಷ ಸುದ್ದಿ ಓದಿದ್ದೀರಾ?ಮತದಾರರ ಪಟ್ಟಿ ಪರಿಷ್ಕರಣೆನಾ, ದಾಖಲೆಗಳ ಪರೀಕ್ಷೆಯಾ? -SIR ಮೇಲೇಳಿಸಿರುವ ಪ್ರಶ್ನೆಗಳು
ಕಾರ್ಯಕ್ರಮದಲ್ಲಿ ರಾಜ್ಯ ಉಪಾಧ್ಯಕ್ಷ ಕುಮಾರ್, ಪ್ರಧಾನ ಕಾರ್ಯದರ್ಶಿ ಗೋವಿಂದ ನಾಯಕ್, ಸಹ ಕಾರ್ಯದರ್ಶಿ ಪ್ರಸನ್ನ ಕುಮಾರ್, ಖಜಾಂಚಿ ಕಮಲ, ಪಲ್ಲವಿ, ಸಂಘಟನಾ ಕಾರ್ಯದರ್ಶಿ ರವಿ ಗೌಡ, ವೆಂಕಟೇಶ್, ಜಿಲ್ಲಾಧ್ಯಕ್ಷ ಪ್ರಕಾಶ್, ಸರಗೂರು ತಾಲೂಕು ಅಧ್ಯಕ್ಷ ಜನಾರ್ಧನ್, ಸೋಮಶೇಖರ್, ಬಾಬು ಎಸ್.ಪಿ., ಬಸವರಾಜು, ರಂಗಸ್ವಾಮಿ, ಪುಟ್ಟಮ್ಮದು, ಮಂಜು, ಈರಾಜನಾಯಕ, ರಮೇಶ್, ಸುರೇಶ್, ನಾಗರಾಜು ಸೇರಿದಂತೆ ಸಮಿತಿಯ ಹಲವಾರು ಪದಾಧಿಕಾರಿಗಳು ಹಾಗೂ ಸದಸ್ಯರು ಇದ್ದರು.
