ಗುಬ್ಬಿ ವೀರಣ್ಣನವರ ಮೊಮ್ಮಗಳು ಹಾಗೂ ಮಾಜಿ ಸಂಸದೆ ಬಿ.ಜಯಶ್ರೀ ಅವರನ್ನು ಅಲೆದಾಡಿಸಿದ ಭೂಮಾಪನ ಇಲಾಖೆಯ ಸರ್ವೇಯರ್ ಶಿವಾನಂದ್ ವಿರುದ್ಧ ಸಿಡಿದ ರೈತ ಸಂಘದ ಕಾರ್ಯಕರ್ತರು ತಾಲ್ಲೂಕು ಕಚೇರಿ ಮುಂದೆ ದಿಢೀರ್ ಪ್ರತಿಭಟನೆ ನಡೆಸಿ ಭೂ ಮಾಪಕ ಶಿವಾನಂದ್ ಅಮಾನತುಗೊಳಿಸಿ ಬ್ಲಾಕ್ ಲಿಸ್ಟ್ ಗೆ ಸೇರಿಸಬೇಕು ಎಂದು ಆಗ್ರಹಿಸಿದರು.
ಪಟ್ಟಣದ ತಾಲ್ಲೂಕು ಕಚೇರಿ ಮುಂದೆ ಜಮಾಯಿಸಿದ ರೈತ ಸಂಘದ ಕಾರ್ಯಕರ್ತರು ದೇಶದಲ್ಲೇ ಖ್ಯಾತ ರಂಗಭೂಮಿ ಕಲಾವಿದರಾಗಿ ರಾಜ್ಯಸಭಾ ಸದಸ್ಯರಾಗಿದ್ದ ಜಯಶ್ರೀ ಅವರನ್ನು ಬೇಕಾಬಿಟ್ಟಿ ನಡೆಸಿಕೊಂಡು ಸರ್ವೇ ಕೆಲಸ ಮಾಡಿಕೊಡಲು ಒಂದು ತಿಂಗಳಲ್ಲಿ ಮೂರು ಬಾರಿ ಹಣ ಕಟ್ಟಿಸಿ ಅಲೆದಾಡಿಸಿದ್ದು ಇಡೀ ತಾಲ್ಲೂಕಿನ ಮರ್ಯಾದೆ ಪ್ರಶ್ನೆಯಾಗಿದೆ. ಇಂತಹ ವರ್ತನೆ ತೋರಿದ ಪರವಾನಗಿ ಸರ್ವೇಯರ್ ಶಿವಾನಂದ್ ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.
ರೈತ ಸಂಘದ ತಾಲ್ಲೂಕು ಪ್ರಧಾನ ಕಾರ್ಯದರ್ಶಿ ಸಿ.ಜಿ.ಲೋಕೇಶ್ ಮಾತನಾಡಿ ಭೂ ಮಾಪನ ಇಲಾಖೆಗೆ ನಿತ್ಯ ನೂರಾರು ಮಂದಿ ರೈತರು ಭೇಟಿ ನೀಡುತ್ತಾರೆ. ಕಿಷ್ಕಿಂದೆ ರೀತಿಯ ಕಚೇರಿಯಲ್ಲಿ ರೈತರಿಗೆ ಕುಳಿತುಕೊಳ್ಳಲು ಆಸನಗಳ ವ್ಯವಸ್ಥೆ ಮಾಡಿಲ್ಲ. ತಾಲ್ಲೂಕು ಕಚೇರಿಯ ಹಲವು ಶಾಖೆಯಲ್ಲಿ ಹಿರಿಯರಿಗೆ ಕುಳಿತುಕೊಳ್ಳಲು ಆಸನಗಳ ವ್ಯವಸ್ಥೆ ಮಾಡಿಲ್ಲ. ಈ ಬಗ್ಗೆ ಮನವಿ ಮಾಡಿದ್ದರೂ ಇನ್ನೂ ಆಸನಗಳು, ಕುಡಿಯುವ ನೀರಿನ ವ್ಯವಸ್ಥೆ ಮಾಡಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಸರ್ವೇಯರ್ ಶಿವಾನಂದ್ ನಡೆ ತೀರಾ ಬೇಸರ ತಂದಿದೆ. ಮಾಜಿ ಸಂಸದೆ ಜಯಶ್ರೀ ಅವರನ್ನು ಈ ರೀತಿ ನಡೆಸಿಕೊಂಡ ಇಲಾಖೆ ಸಾಮಾನ್ಯ ರೈತರನ್ನು ಇನ್ಯಾವ ರೀತಿ ನಡೆಸಿಕೊಳ್ಳುತ್ತದೆ ಎಂಬುದು ಯೋಚಿಸಬೇಕಿದೆ. ಮುದ್ದನಹಳ್ಳಿ ಗ್ರಾಮದ ರೈತರೊಬ್ಬರ ಅರ್ಜಿಗೆ ಮಧ್ಯವರ್ತಿ ಐದು ಸಾವಿರ ನೀಡಿದರೆ ತಕ್ಷಣ ಕೆಲಸ ಆಗುತ್ತೆ ಎಂಬ ಮಾತು ಕೇಳಿಬಂದಿದೆ. ಈ ಜೊತೆಯಲ್ಲಿ ಕಚೇರಿಯ ಸಿಬ್ಬಂದಿ ಮಾಡುವ ತಪ್ಪಿಗೆ ನಾವು ಮತ್ತೊಮ್ಮೆ ಹಣ ಕಟ್ಟಿ ಸರ್ವೇ ಮಾಡಿಸಿಕೊಳ್ಳಬೇಕಿದೆ. ಈ ರೀತಿಯಲ್ಲಿ ತಿಂಗಳುಗಟ್ಟಲೆ ಅಲೆದಾಡಿಸುತ್ತಾರೆ. ಈ ಬಗ್ಗೆ ನೂರಾರು ರೈತರು ದೂರುತ್ತಾರೆ. ಈ ಜೊತೆಗೆ ತಾಲ್ಲೂಕು ಕಚೇರಿಯಲ್ಲಿ ಸಾರ್ವಜನಿಕರಿಗೆ ಕುಳಿತುಕೊಳ್ಳಲು ಆಸನಗಳ ವ್ಯವಸ್ಥೆ ಮಾಡಿಲ್ಲ. ಹಿರಿಯರು, ವಿಕಲಚೇತನರು ನಿಂತುಕೊಂಡೇ ಕೆಲಸ ಮಾಡಿಸಿಕೊಳ್ಳುವ ದುಸ್ಥಿತಿ ಎದುರಾಗಿದೆ. ಕೆಲ ಶಾಖೆಯಲ್ಲಿ ರೈತರ ಅರ್ಜಿಗೆ ಸ್ವೀಕೃತಿ ಪತ್ರ ನೀಡುತ್ತಿಲ್ಲ. ಕೊಟ್ಟರೆ ಬಿಳಿ ಚೀಟಿ ನೀಡುತ್ತಾರೆ ಎಂದು ದೂರಿದರು.
ಮಧ್ಯವರ್ತಿಗಳ ಹಾವಳಿ ಹೆಚ್ಚಾಗಿದ್ದು ಕೆಲ ಶಾಖೆಯಲ್ಲಿ ಅವರದ್ದೇ ಮೇಲುಗೈ ಆಗುತ್ತದೆ. ಸಾಮಾನ್ಯ ರೈತ ಇಂದಿಗೂ ಅಲೆದಾಡುತ್ತಿದ್ದಾನೆ. ನಾಲ್ಕೈದು ಅರ್ಜಿ ಹಿಡಿದು ಒಳ ಹೋಗುವ ಮಧ್ಯವರ್ತಿ ದಿನದಲ್ಲಿ ಕೆಲಸ ಮಾಡಿಸುತ್ತಾನೆ. ರೈತರ ಕೆಲಸ ಯಾಕೆ ಆಗುವುದಿಲ್ಲ ಎಂದು ಕಿಡಿಕಾರಿದರು.
ನಂತರ ಸ್ಥಳಕ್ಕೆ ಆಗಮಿಸಿದ ಗ್ರೇಡ್ 2 ತಹಶೀಲ್ದಾರ್ ಶಶಿಕಲಾ ಹಾಗೂ ಭೂ ಮಾಪನ ಇಲಾಖೆಯ ಸಹಾಯಕ ನಿರ್ದೇಶಕ ತಿಮ್ಮಯ್ಯ ಅವರನ್ನು ಪ್ರಶ್ನಿಸಿದ ರೈತರು ರೈತರ ಅರ್ಜಿಗಳಿಗೆ ಕೂಡಲೇ ಉತ್ತರ ನೀಡಬೇಕು. ಮೂಲಭೂತ ವ್ಯವಸ್ಥೆ ಮಾಡಬೇಕು. ಶಿವಾನಂದ್ ವಿರುದ್ಧ ಕ್ರಮ ಕೈಗೊಳ್ಳಬೇಕು. ಕಂಪ್ಯೂಟರ್ ಆಪರೇಟರ್ ಆಗಾಗ್ಗೆ ಬದಲಿಸಬೇಕು ಎಂದು ಒತ್ತಾಯಿಸಿ ಬೇಡಿಕೆಪತ್ರ ಸಲ್ಲಿಸಿದರು.
ಪ್ರತಿಭಟನೆಯಲ್ಲಿ ಮಾಜಿ ಸೈನಿಕರ ಸಂಘದ ಅಧ್ಯಕ್ಷ ಬಿದರೆ ಲೋಕೇಶ್, ರೈತಸಂಘದ ಸಿ.ಟಿ.ಕುಮಾರ್, ಯತೀಶ್, ರವೀಶ್, ಸಿದ್ದೇಶ್, ದೇವರಾಜ್, ಜಗದೀಶ್, ಗಂಗರೇವಣ್ಣ, ಕನ್ನಿಗಪ್ಪ, ಪ್ರಕಾಶ್, ಈಶ್ವರಪ್ಪ, ಬಸವರಾಜ್, ಸುರೇಶ್, ಶಿವಕುಮಾರ್ ಇತರರು ಇದ್ದರು.
