ಯಾರಿಗೆ ಪ್ರೀತಿಯ ಅಗತ್ಯವಿದೆಯೋ, ಅವರಿಗೆ ಪ್ರೀತಿಯನ್ನು ನೀಡುವ ತುರ್ತಿದೆ. ಜ್ಞಾನದ ಪ್ರಮಾಣ ಎಷ್ಟಿದ್ದರೂ ಮನುಷ್ಯರ ಒಡನಾಟ ಇರದಿದ್ದರೆ ಅದು ವ್ಯರ್ಥ ಎಂದು ಡಾ. ಡಿವಿಜಿ ಕನ್ನಡ ಆಧ್ಯಯನ ಕೇಂದ್ರದ ಅಧ್ಯಾಪಕರಾದ ಡಾ. ಗೀತ ವಸಂತ ಅಭಿಪ್ರಾಯಪಟ್ಟರು.
ದೇವರಾಯಪಟ್ಟಣದ ಶ್ರೀಶಾರದಾಂಬ ಟ್ರಸ್ಟ್ ನ ವೃದ್ಧಾಶ್ರಮ ಮತ್ತು ಅನಥಾಶ್ರಮ ಧಾಮದಲ್ಲಿ, ಅಂಗಳ ಕಮ್ಯುನಿಟಿ ಟ್ರಸ್ಟ್ ಮತ್ತು ದಾರಿಬುತ್ತಿ ಬಳಗ ಇವರ ಸಹಯೋಗದಲ್ಲಿ ಆಯೋಜಿಸಲಾಗಿದ್ದ, ಮಹಿಳಾ ದಿನಾಚರಣೆಯ ಕಾರ್ಯಕ್ರಮದಲ್ಲಿ ಮಾತನಾಡಿದ ಇವರು, ನಮ್ಮ ಜ್ಞಾನ ಯಾರನ್ನೂ ಸಂತೈಸದಿದ್ದರೆ ಅದು ಕೇವಲ ಕನ್ನಡಿಯೊಳಗಿನ ಗಂಟು. ಎಲ್ಲ ಜ್ಞಾನಕ್ಕೂ ಅಂತಃಕರಣದ ಸ್ಪರ್ಶ ಬೇಕು, ಸಂತತನ ಬೇಕು. ಪುಸ್ತಕಗಳಿಂದ ಕಲಿಯುವಷ್ಟೇ, ಮನುಷ್ಯರ ಜೊತೆ ಕಲಿಯುವುದೂ ಇದೆ. ಇಂಥಹ ಕಲಿಕೆಗೆ, ಮತ್ತು ಪ್ರೀತಿ ಹಂಚುವ ಕಾರ್ಯಕ್ಕೆ ಈ ಸ್ಥಳ ಅತ್ಯಂತ ಸೂಕ್ತವಾಗಿದೆ ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ಕ.ಲೇ.ಸಂ. ಜಿಲ್ಲಾಧ್ಯಕ್ಷರಾದ ಆಶಾರಾಣಿ ಬಗ್ಗನಡು ಅವರು, ಈ ಸ್ಥಳ ಮತ್ತು ಈ ಹೊತ್ತು ನಾವು ಮಾತನಾಡುವುದಕ್ಕಿಂತ, ಪ್ರೀತಿಯೇ ಮಾತನಾಡುವಂತಹದ್ದು. ನಮಗೆ ಅನುವಾದಾಗಲೆಲ್ಲ ಇಲ್ಲಿನ ಮನಸ್ಸುಗಳೊಂದಿಗೆ ಸೇರುವುದು ನಮ್ಮ ಜವಾಬ್ದಾರಿ ಮತ್ತು ಇದರಲ್ಲಿಯೇ ನಿಜವಾದ ಮಹಿಳಾ ದಿನಾಚರಣೆಯ ಸಾರ್ಥಕ್ಯವಿದೆ. ಜಗತ್ತು ‘ರೊಟ್ಟಿಗಿಂತ, ಪ್ರೀತಿಗಾಗಿ ಹಸಿದಿರುವ’ ಈ ಹೊತ್ತು ಪ್ರೀತಿಯ ಹುಡುಕಾಟ ಮತ್ತು ಹಂಚುವಿಕೆ ಹೀಗೇ ನಿರಂತರವಾಗಿರಲಿ ಎಂದರು.
ಸಾಹಿತಿ ಹಾಗೂ ಕಲಾವಿದರಾದ ಜ್ಯೋತಿ ಶಾಂತರಾಜು ಅವರು ಮಾತನಾಡುತ್ತಾ, ಮನುಷ್ಯತ್ವದ ಕಡೆಗಿನ ಈ ನಡೆಗಳು ನಿರಂತರವಾಗಿರಬೇಕು. ಈ ವೃದ್ಧರ ಒಡನಾಟದ ಮೂಲಕ ನಾವು ನಮ್ಮೊಳಗಿನ ಆರ್ದ್ರತೆಯನ್ನು ಜೀವಂತವಾಗಿಸಿಕೊಳ್ಳಲು ಸಾಧ್ಯ ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಬಾ. ಹ. ರಮಾಕುಮಾರಿಯವರು, ಮಾನವೀಯತೆಯನ್ನು ಕಳೆದುಕೊಂಡರೆ ಏನಾಗುತ್ತದೆ ಎಂಬುದಕ್ಕೆ ಅನಾಥಾಶ್ರಮಗಳೇ ಸಾಕ್ಷಿ. ಮಕ್ಕಳಿಗೆ ಶಿಕ್ಷಣದ ಜೊತೆಗೆ ಮಾನವೀಯತೆಯ ಪಾಠಗಳನ್ನೂ ಕಲಿಸಬೇಕು. ಇಂದು ಜಗತ್ತು ಯುದ್ಧ, ಅಧಿಕಾರ ದಾಹದಿಂದ ತುಂಬಿ ನೂರಾರು ಮುಗ್ಧ ಮನಸ್ಸುಗಳ ಸಾವಿಗೆ ಸಾಕ್ಷಿಯಾಗುತ್ತಿದೆ. ಅಲ್ಲದೇ, ಸಾವಿರಾರು ಮಕ್ಕಳು, ವೃದ್ಧರು ಅನಾಥರಾಗುತ್ತಿದ್ದಾರೆ. ಇದಕ್ಕೆಲ್ಲ ಪ್ರೀತಿ ಮತ್ತು ಮಾನವೀಯತೆಯೇ ಪರಿಹಾರ ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಶಾರದಾಂಬ ಟ್ರಸ್ಟಿನ ಯಶೋಧ, ಸಾಹಿತಿ ರಂಗಮ್ಮ ಹೊದೇಕಲ್ ಸೇರಿದಂತೆ ಜಿಲ್ಲೆಯ ಕವಿಗಳು, ಶಿಕ್ಷಕರು, ಸಮಾಜ ಸೇವಕರು ಹಾಗೂ ಸಾರ್ವಜನಿಕರು ಹಾಜರಿದ್ದರು.
