ಸಿಲಿಕಾನ್‌ ಸಿಟಿ ಬೆಂಗಳೂರಿನ ವಾಹನ ದಟ್ಟಣೆ ಸಮಸ್ಯೆ ಸದಾ ಚರ್ಚೆಯಲ್ಲಿರುವ ವಿಷಯ. ಇಲ್ಲಿನ ಜನರ ದೈನಂದಿನ ಬದುಕಿನಲ್ಲಿ ವಾಹನ ದಟ್ಟಣೆ ಹಾಸುಹೊಕ್ಕಾಗಿ ಬಿಟ್ಟಿದೆ ಎಂದರೆ ಅತಿಶಯೋಕ್ತಿ ಅನಿಸದು. ಬೆಂಗಳೂರಿನ ಸಂಚಾರ ದಟ್ಟಣೆ ಸಮಸ್ಯೆ ಬಗ್ಗೆ ಹಲವು ಹಾಸ್ಯಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುತ್ತವೆ.
ಬೆಂಗಳೂರಿನ ನಿವಾಸಿಯೊಬ್ಬರು ಉಬರ್ ಆಟೊ ಬುಕ್‌ ಮಾಡಿ ಅದರ ಸ್ಕ್ರೀನ್ ಶಾಟ್‌ವೊಂದನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಹಲವು ಚರ್ಚೆಗೆ ಎಡೆಮಾಡಿಕೊಟ್ಟಿದೆ.
ಅನುಶಾಂಕ್‌ ಎಂಬವರು ಉಬರ್ ಆಟೋ ಬುಕ್‌ ಮಾಡಿದ್ದು, 24 ಕಿ.ಮಿ ದೂರದಿಂದ ಆಟೋ ಬರುವುದಾಗಿಯೂ, 71 ನಿಮಿಷ ನಿರೀಕ್ಷಣಾ ಸಮಯ ಎಂದು ತೋರಿಸಿದೆ. ಇದರ ಫೋಟೊವನ್ನು ಅವರು ಹಂಚಿಕೊಂಡಿದ್ದು, ‘ಅವರು ಬಂದರೆ ಅವರಿಗೆ ಅಪಾರ ಗೌರವ‘ ಎಂದು ಬರೆದುಕೊಂಡಿದ್ದಾರೆ.
ಅವರ ಈ ಪೋಸ್ಟ್‌ಗೆ ಟ್ವೀಟ್‌ನಲ್ಲಿ ಹಲವು ರೀತಿಯ ಪ್ರತಿಕ್ರಿಯೆಗಳು ಬಂದಿದ್ದು, ಚರ್ಚೆಗಳಿಗೆ ಎಡೆಮಾಡಿಕೊಟ್ಟಿದೆ.
“ಕಚೇರಿಯಿಂದ ಕೆಲಸ ಮಾಡುವ ಎಲ್ಲ ಎಚ್‌.ಆರ್‌ಗಳಿಗೂ ಈ ಚಿತ್ರವನ್ನು ಕಳಿಸಬೇಕು” ಎಂದು ಟ್ವಿಟರ್‌ ಬಳಕೆದಾರರೊಬ್ಬರು ಕಮೆಂಟ್ ಮಾಡಿದ್ದಾರೆ.
“ಎರಡು ಮತ್ತು ಮೂರನೇ ಹಂತದ ನಗರಗಳಿಗೆ ಹೋಗಲು ಇದು ಸರಿಯಾದ ಸಮಯ ಎಂದು ನನಗೆ ಅನಿಸುತ್ತಿದೆ. ಹೆಚ್ಚಿನ ಉತ್ಪಾದಕತೆ, ಜೀವನ ನಿರ್ವಹಣಾ ವೆಚ್ಚ ಕಡಿಮೆ ಇರುವ ಹಾಗೂ ಜೀವನ ಸರಳಗೊಳಿಸುವ ನಗರಗಳಿಗೆ ಬದಲಿಸಲು ಎಂಎನ್‌ಸಿ ಕಂಪನಿಗಳು ಯೋಚನೆ ಮಾಡಬೇಕಿದೆ” ಎಂದು ಇನ್ನೊಬ್ಬರು ಟ್ವೀಟ್‌ ಮಾಡಿದ್ದಾರೆ.
