ಹಿಂದಿನ ನಾಯಕರ ಹೆಸರಿನ ನೆರಳಿನಲ್ಲಿ ರಾಜಕೀಯ ಮಾಡುವುದು ಮುಖ್ಯವಲ್ಲ, ಜನಪ್ರತಿನಿಧಿಯಾಗಿ ಸ್ವಂತ ಸಾಧನೆಯ ಮೂಲಕ ಗುರುತಿಸಿಕೊಳ್ಳುವುದು ಮುಖ್ಯ ಎಂದು ಕಾಂಗ್ರೆಸ್ ಉಡುಪಿ ಜಿಲ್ಲಾ ಹಿಂದುಳಿದ ವರ್ಗಗಳ ಉಪಾಧ್ಯಕ್ಷ ಕೋಟ ನಾಗೇಂದ್ರ ಪುತ್ರನ್ ಅವರು ಶಾಸಕ ಯಶ್ಪಾಲ್ ಸುವರ್ಣ ಅವರನ್ನು ಪ್ರಶ್ನಿಸಿದ್ದಾರೆ.
ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ಅವರು, “ಯಾರ ಹೆಸರಿನ ನೆರಳಿನಲ್ಲಿ ನಿಂತಿದ್ದೇವೆ ಎನ್ನುವುದಕ್ಕಿಂತ, ಆ ಸ್ಥಾನದಲ್ಲಿ ನಿಂತು ನಾವು ಏನು ಮಾಡಿದ್ದೇವೆ ಎನ್ನುವುದೇ ಮುಖ್ಯ” ಎಂದು ಹೇಳಿದ್ದಾರೆ.
ವಿ.ಎಸ್. ಆಚಾರ್ಯರಂತಹ ಹಿರಿಯ ನಾಯಕರನ್ನು ಗೌರವದಿಂದ ನೆನಪಿಸಿಕೊಳ್ಳುವುದರಲ್ಲಿ ತಪ್ಪಿಲ್ಲ. ಆದರೆ ಅವರ ಹೆಸರನ್ನು ಇಂದಿನ ಪ್ರಶ್ನೆಗಳಿಗೆ ಉತ್ತರವಾಗಿ ಬಳಸಿಕೊಳ್ಳಲು ಸಾಧ್ಯವಿಲ್ಲ. ಹಿಂದಿನ ನಾಯಕರ ಸಾಧನೆ ಅವರದ್ದು. ಇಂದಿನ ಜನಪ್ರತಿನಿಧಿಯ ಸಾಧನೆ ಅವರದೇ ಆಗಿರಬೇಕು ಎಂದು ತಿಳಿಸಿದ್ದಾರೆ.
ಶಾಸಕರಾಗಿ ಯಶ್ಪಾಲ್ ಸುವರ್ಣ ಅವರ ಅವಧಿಯಲ್ಲಿ ಉಡುಪಿಗೆ ತಂದ ಪ್ರಮುಖ ಅಭಿವೃದ್ಧಿ ಯೋಜನೆಗಳು ಯಾವುವು? ಎಷ್ಟು ಅನುದಾನ ಬಂದಿದೆ? ಎಷ್ಟು ಯೋಜನೆಗಳು ಪೂರ್ಣಗೊಂಡಿವೆ? ಅವುಗಳಿಂದ ಜನರಿಗೆ ನೇರವಾಗಿ ದೊರೆತ ಪ್ರಯೋಜನವೇನು? ಈ ಪ್ರಶ್ನೆಗಳಿಗೆ ದಾಖಲೆಗಳ ಸಹಿತ ಉತ್ತರ ನೀಡುವುದು ನಿಜವಾದ ನಾಯಕತ್ವದ ಮಾನದಂಡವಾಗಿದೆ ಎಂದು ಕೋಟ ನಾಗೇಂದ್ರ ಪುತ್ರನ್ ಹೇಳಿದ್ದಾರೆ.
This video cannot be played in your browser. Open the video directly
ಕಾಂಗ್ರೆಸ್ ಸರ್ಕಾರದ ವಿರುದ್ಧ ಆಕ್ಷೇಪಗಳಿದ್ದರೆ ಪ್ರಶ್ನಿಸುವ ಹಕ್ಕು ಶಾಸಕರಿಗಿದೆ. ಆದರೆ ಕೇಂದ್ರದಲ್ಲಿ ತಮ್ಮದೇ ಸರ್ಕಾರವಿದ್ದು, ತಮ್ಮದೇ ಪಕ್ಷದ ಸಂಸದರು ಇರುವಾಗ ಉಡುಪಿ ಅಭಿವೃದ್ಧಿಗಾಗಿ ಕೇಂದ್ರದಿಂದ ಎಷ್ಟು ಅನುದಾನ ತರಲಾಗಿದೆ? ಸಂಸದರ ಬಳಿ ಈ ಕುರಿತು ಎಷ್ಟು ಬಾರಿ ಪ್ರಶ್ನೆ ಕೇಳಲಾಗಿದೆ? ಮೀನುಗಾರರು, ಸಹಕಾರಿ ಕ್ಷೇತ್ರ ಹಾಗೂ ಉಡುಪಿ ಜನರಿಗಾಗಿ ಏನು ಸಾಧಿಸಲಾಗಿದೆ ಎಂಬುದಕ್ಕೂ ಉತ್ತರ ನೀಡಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ಮಹಾಲಕ್ಷ್ಮಿ ಕೋ-ಆಪರೇಟಿವ್ ಬ್ಯಾಂಕ್ ವಿಚಾರದಲ್ಲಿ ಆರೋಪ–ಪ್ರತ್ಯಾರೋಪಗಳಿಗಿಂತ ತನಿಖೆಯೇ ಮುಖ್ಯ. ಎಸ್‌ಐಟಿ ತನಿಖೆ ನಡೆಯಲಿ, ಸಂಬಂಧಿಸಿದ ದಾಖಲೆಗಳು ಹೊರಬರಲಿ ಹಾಗೂ ಸತ್ಯಾಂಶ ಜನರಿಗೆ ತಿಳಿಯಲಿ. “ನಾನು ತನಿಖೆಗೆ ಸಿದ್ಧ” ಎನ್ನುವುದು ಕೇವಲ ಮಾತಾಗದೆ, ತನಿಖೆಗೆ ಸಂಪೂರ್ಣ ಸಹಕಾರ ನೀಡುವುದು ಮತ್ತು ಅಗತ್ಯ ದಾಖಲೆಗಳನ್ನು ಪಾರದರ್ಶಕವಾಗಿ ಒದಗಿಸುವುದು ಜವಾಬ್ದಾರಿಯುತ ನಾಯಕತ್ವದ ಲಕ್ಷಣ ಎಂದು ಅವರು ಹೇಳಿದ್ದಾರೆ.
ಒಬ್ಬ ಶಾಲೆಯ ಮುಖ್ಯೋಪಾಧ್ಯಾಯರು ಪ್ರತಿದಿನ ತಮ್ಮ ಹಿಂದಿನ ಮುಖ್ಯೋಪಾಧ್ಯಾಯರು ಉತ್ತಮವಾಗಿ ಕೆಲಸ ಮಾಡಿದ್ದರು ಎಂದು ಹೇಳುವುದರಿಂದ ಮಾತ್ರ ಶಾಲೆಯ ಫಲಿತಾಂಶ ಸುಧಾರಿಸುವುದಿಲ್ಲ. ವಿದ್ಯಾರ್ಥಿಗಳ ಫಲಿತಾಂಶ, ಶಿಕ್ಷಕರ ಕಾರ್ಯಕ್ಷಮತೆ ಹಾಗೂ ಶಾಲೆಯ ಅಭಿವೃದ್ಧಿಯೇ ಅವರ ಕೆಲಸದ ಅಳತೆಯಾಗುತ್ತದೆ. ರಾಜಕೀಯದಲ್ಲಿಯೂ ಇದೇ ಮಾನದಂಡ ಅನ್ವಯಿಸುತ್ತದೆ ಎಂದು ಕೋಟ ನಾಗೇಂದ್ರ ಪುತ್ರನ್ ತಿಳಿಸಿದ್ದಾರೆ.
ಇಂದಿನ ಯುವ ಪೀಳಿಗೆಗೆ ಗದ್ದಲ, ಆವೇಶ ಅಥವಾ ವೈಯಕ್ತಿಕ ಟೀಕೆಗಳಿಗಿಂತ ದತ್ತಾಂಶ, ಅಭಿವೃದ್ಧಿಯ ಲೆಕ್ಕ, ಪಾರದರ್ಶಕತೆ ಹಾಗೂ ಜವಾಬ್ದಾರಿಯುತ ನಾಯಕತ್ವ ಅಗತ್ಯವಾಗಿದೆ. ಹಿಂದೂ ಧರ್ಮದ ಬಗ್ಗೆ ಮಾತನಾಡುವವರು ಸತ್ಯ, ಧರ್ಮ, ಶಿಸ್ತು, ಸೇವೆ ಮತ್ತು ಆತ್ಮಸಂಯಮದಂತಹ ಮೂಲ ಮೌಲ್ಯಗಳನ್ನು ಜೀವನದಲ್ಲೂ ಅಳವಡಿಸಿಕೊಳ್ಳಬೇಕು. ಕೇವಲ ಕೇಸರಿ ಬಟ್ಟೆ ಧರಿಸುವುದು ಅಥವಾ ಘೋಷಣೆ ಕೂಗುವುದರಿಂದ ಧರ್ಮದ ಪ್ರತಿನಿಧಿತ್ವ ಸಾಧ್ಯವಿಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ತಮ್ಮ ಹೇಳಿಕೆ ಯಾರ ಮೇಲಿನ ದ್ವೇಷದಿಂದ ಕೂಡಿಲ್ಲ. ಜನಪ್ರತಿನಿಧಿಯನ್ನು ಪ್ರಶ್ನಿಸುವುದು ಪ್ರಜಾಪ್ರಭುತ್ವದ ಹಕ್ಕು. ಉಡುಪಿಯ ಜನರು ಇನ್ನು ಮುಂದೆ “ಯಾರ ಜೊತೆ ನಿಂತಿದ್ದೀರಿ?” ಎನ್ನುವುದಕ್ಕಿಂತ “ನಮ್ಮ ಜೊತೆ ನಿಂತು ನಮ್ಮಿಗಾಗಿ ಏನು ಮಾಡಿದ್ದೀರಿ?” ಎಂದು ಪ್ರಶ್ನಿಸಲಿದ್ದಾರೆ ಎಂದು ಕೋಟ ನಾಗೇಂದ್ರ ಪುತ್ರನ್ ಹೇಳಿದ್ದಾರೆ.
ಆಶ್ರಯದ ಹೆಸರು ಹೇಳುವುದು ನಾಯಕತ್ವವಲ್ಲ. ಸ್ವಂತ ಸಾಧನೆಯ ಮೂಲಕ ಹೆಸರು ಗಳಿಸುವುದೇ ನಿಜವಾದ ನಾಯಕತ್ವ. ಆದ್ದರಿಂದ ಶಾಸಕ ಯಶ್ಪಾಲ್ ಸುವರ್ಣ ಅವರು ತಮ್ಮ ಅವಧಿಯ ಅಭಿವೃದ್ಧಿ ಕಾರ್ಯಗಳ ಸಮಗ್ರ ಲೆಕ್ಕವನ್ನು ಜನರ ಮುಂದಿಡಬೇಕು ಎಂದು ಅವರು ಆಗ್ರಹಿಸಿದ್ದಾರೆ.
