ಸಾಹಿತ್ಯ, ವಿಜ್ಞಾನ ಮತ್ತು ಪರಿಸರದ ಬಗ್ಗೆ ಡಾ. ಕೋಟ ಶಿವರಾಮ ಕಾರಂತರಿಗೆ ಅಪಾರ ಕಾಳಜಿ ಇತ್ತು. ನಮ್ಮ ನಾಡು, ಕಾಡು ಹಾಗೂ ಇಡೀ ಲೋಕದ ಬಗ್ಗೆ ಅವರಿಗಿದ್ದ ಬದ್ಧತೆಯ ಕಾರಣದಿಂದಲೇ ವಿಶ್ವ ಪರಿಸರ ಸಂಘಟನೆಯ ಎರಡು ಮಹತ್ವದ ವರದಿಗಳನ್ನು ಕನ್ನಡಕ್ಕೆ ಅನುವಾದಿಸಿದ್ದರು. ವಿಜ್ಞಾನ ಕುರಿತ ಬರಹಗಳು ಹೇಗೆ ಸರಳ, ಸ್ಪಷ್ಟ ಮತ್ತು ಓದುಗರಿಗೆ ಅರ್ಥವಾಗುವಂತೆ ಇರಬೇಕು ಎಂಬುದನ್ನು ಕಾರಂತರು ತಮ್ಮ ಕೃತಿಗಳ ಮೂಲಕ ತೋರಿಸಿಕೊಟ್ಟಿದ್ದಾರೆ ಎಂದು ಕವಿ, ನಾಟಕಕಾರ ಹಾಗೂ ನಿರ್ದೇಶಕ ರಘುನಂದನ ಹೇಳಿದರು.
ಡಾ. ಶಿವರಾಮ ಕಾರಂತ ಟ್ರಸ್ಟ್, ಉಡುಪಿ ಜಿಲ್ಲೆ ಹಾಗೂ ರಥಬೀದಿ ಗೆಳೆಯರು (ರಿ.), ಉಡುಪಿ ಇವರ ಸಂಯುಕ್ತ ಆಶ್ರಯದಲ್ಲಿ ನಗರದ ರೆಡ್ ಕ್ರಾಸ್ ಸಂಸ್ಥೆಯ ಸಭಾಂಗಣದಲ್ಲಿ ಶನಿವಾರ ನಡೆದ ತಮ್ಮ ಹೊಸ ಕೃತಿ **‘ಎಮ್ಮವರು ಬೆಸಗೊಂಡರೆ ಮದುವೆಯಾಗಲಿ ಹೀಗೆ’ ಪುಸ್ತಕ ವಾಚನ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ತಮ್ಮ ಕೃತಿಯ ಕುರಿತು ಮಾತನಾಡಿದ ರಘುನಂದನ, ‘ಎಮ್ಮವರು ಬೆಸಗೊಂಡರೆ ಮದುವೆಯಾಗಲಿ ಹೀಗೆ’ ಕೃತಿಯ ಆಕೃತಿ ಮತ್ತು ವಸ್ತು ಪರಸ್ಪರ ಪೂರಕವಾಗಿವೆ. ಪಂಚಭೂತಗಳಾದ ಮಣ್ಣು, ನೀರು, ಬೆಂಕಿ, ಗಾಳಿ ಮತ್ತು ಆಕಾಶದ ಕುರಿತ ಪ್ರಾಕೃತಿಕ ಕಾಳಜಿಯನ್ನು ಕೇಂದ್ರವಾಗಿಟ್ಟುಕೊಂಡು ಹೊಸ ತಲೆಮಾರಿನ ಯುವಜನರು ಮದುವೆ ಹಾಗೂ ಬದುಕಿನ ಕುರಿತು ಹೊಸ ದೃಷ್ಟಿಕೋನ ಹೊಂದುವಂತೆ ಈ ಕೃತಿಯನ್ನು ರೂಪಿಸಲಾಗಿದೆ ಎಂದು ತಿಳಿಸಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಡಾ. ಶಿವರಾಮ ಕಾರಂತ ಟ್ರಸ್ಟ್ ಅಧ್ಯಕ್ಷ ಡಾ. ಗಣನಾಥ ಎಕ್ಕಾರು ಆಶಯ ಭಾಷಣ ಮಾಡಿದರು.
ಟ್ರಸ್ಟ್‌ನ ಸದಸ್ಯ ಕಾರ್ಯದರ್ಶಿ ಪೂರ್ಣಿಮಾ ಸ್ವಾಗತಿಸಿದರು. ರಥಬೀದಿ ಗೆಳೆಯರು ಉಡುಪಿ ಅಧ್ಯಕ್ಷ ಉದ್ಯಾವರ ನಾಗೇಶ್ ಕುಮಾರ್, ಕಾರ್ಯದರ್ಶಿ ಸುಬ್ರಹ್ಮಣ್ಯ ಜೋಷಿ ಉಪಸ್ಥಿತರಿದ್ದರು. ಸಂತೋಷ್ ನಾಯಕ್ ಪಟ್ಲ ಕಾರ್ಯಕ್ರಮ ನಿರೂಪಿಸಿದರು.
ಇದಾದ ಬಳಿಕ ರಘುನಂದನ ಅವರು ತಮ್ಮ ‘ಎಮ್ಮವರು ಬೆಸಗೊಂಡರೆ ಮದುವೆಯಾಗಲಿ ಹೀಗೆ’ ಕೃತಿಯ ಆಯ್ದ ಭಾಗಗಳ ವಾಚನ ನಡೆಸಿದರು.
