ಪಶ್ಚಿಮ ಬಂಗಾಳದ ಫಾಲ್ಟಾ ವಿಧಾನಸಭಾ ಕ್ಷೇತ್ರದ ಮರುಮತದಾನದ ಮತ ಎಣಿಕೆ ಪ್ರಕ್ರಿಯೆ ಭಾನುವಾರ ನಡೆದಿದ್ದು ಬಿಜೆಪಿ ಭರ್ಜರಿ ಜಯ ಸಾಧಿಸಿದೆ. ದೇಬಾಂಗ್ಶು ಪಾಂಡಾ ಒಟ್ಟು 149,666 ಮತಗಳನ್ನು ಗಳಿಸಿದ್ದು, ಸಿಪಿಐ(ಎಂ) ಸಂಭು ನಾಥ್ ಕುರ್ಮಿ ವಿರುದ್ಧ 109,021 ಮತಗಳ ಅಂತರದಿಂದ ಜಯ ಗಳಿಸಿದ್ದಾರೆ. ಸಂಭು 40,645 ಮತಗಳನ್ನು ಪಡೆದಿದ್ದಾರೆ.
ಕಾಂಗ್ರೆಸ್ ಅಭ್ಯರ್ಥಿ ಅಬ್ದುರ್ ರಝಾಕ್ ಮೊಲ್ಲಾ 10,000ಕ್ಕೂ ಹೆಚ್ಚು ಮತಗಳನ್ನು ಗಳಿಸಿದ್ದಾರೆ. ಆದರೆ ಮತದಾನಕ್ಕೆ ಕೇವಲ ಎರಡು ದಿನಗಳ ಮೊದಲು ಮರುಮತದಾನ ಸ್ಪರ್ಧೆಯಿಂದ ಹಿಂದೆ ಸರಿದ ಟಿಎಂಸಿಯ ಜಹಾಂಗೀರ್ ಖಾನ್ ಕೇವಲ 7,783 ಮತಗಳನ್ನು ಪಡೆದು ನಾಲ್ಕನೇ ಸ್ಥಾನ ಪಡೆದಿದ್ದಾರೆ.
ಇದನ್ನು ಓದಿದ್ದೀರಾ? ಪಶ್ಚಿಮ ಬಂಗಾಳ | ಮುಸ್ಲಿಮರೇ ಅಧಿಕವಾಗಿರುವ ಬೂತ್‌ನ 97% ಮತಗಳು ಬಿಜೆಪಿ ಪಾಲು!
ಚುನಾವಣೆ ವೇಳೆ ಅಕ್ರಮ ನಡೆದಿದೆ ಎಂಬ ಬಿಜೆಪಿಯ ಆರೋಪದ ಹಿನ್ನೆಲೆ ಫಾಲ್ಟಾದಲ್ಲಿ ಮರುಚುನಾವಣೆ ನಡೆದಿತ್ತು. ಇದೀಗ ಫಲಿತಾಂಶ ಹೊರಬಿದ್ದಿದ್ದು ಬಿಜೆಪಿ ಗೆದ್ದಿದೆ. ಈ ಕ್ಷೇತ್ರವು ಟಿಎಂಸಿಯ ಭದ್ರಕೋಟೆಯಾಗಿತ್ತು.
ಇನ್ನು ಮರು ಮತದಾನಕ್ಕೆ ಕೆಲವು ದಿನಗಳ ಮೊದಲು ಟಿಎಂಸಿಯ ಜಹಾಂಗೀರ್ ಖಾನ್ ಚುನಾವಣೆಯಿಂದ ಹಿಂದೆ ಸರಿದಿದ್ದಾರೆ. ಮರು ಮತದಾನಕ್ಕೆ ಎರಡು ದಿನಗಳ ಮೊದಲು ಫಾಲ್ಟಾ ಜನರ ಹಿತಾಸಕ್ತಿಗಾಗಿ ಸ್ಪರ್ಧೆಯಿಂದ ಹಿಂದೆ ಸರಿಯುವುದಾಗಿ ಘೋಷಿಸಿದ್ದರು. ಟಿಎಂಸಿ ಇದು ಖಾನ್ ಅವರ ವೈಯಕ್ತಿಕ ನಿರ್ಧಾರವಾಗಿದ್ದು, ಪಕ್ಷದಲ್ಲ ಎಂದು ಸ್ಪಷ್ಟಪಡಿಸಿತ್ತು.
ಮರು ಮತದಾನದ ಸಮಯದಲ್ಲಿ ಕ್ಷೇತ್ರದಲ್ಲಿ ಟಿಎಂಸಿ ಪ್ರಚಾರವು ಸಕ್ರಿಯವಾಗಿ ಕಂಡುಬಂದಿಲ್ಲ. ಪಕ್ಷದ ಕಚೇರಿಗಳು ಹೆಚ್ಚಾಗಿ ನಿಷ್ಕ್ರಿಯವಾಗಿದ್ದವು ಮತ್ತು ಖಾನ್ ಕೂಡಾ ಕಂಡು ಬಂದಿರಲಿಲ್ಲ. ಮತದಾನದ ದಿನದಂದು, ಅವರ ಮನೆಯೂ ಬಂದ್ ಆಗಿತ್ತು. ಸ್ಥಳೀಯ ಪಕ್ಷದ ಕಾರ್ಯಕರ್ತರು ಕೂಡಾ ಕಡಿಮೆ ಇದ್ದರು. ಇದನ್ನೇ ಲಾಭಕ್ಕೆ ಬಳಸಿಕೊಂಡ ಬಿಜೆಪಿ ಪ್ರಚಾರ ಹೆಚ್ಚಿಸಿತ್ತು.
ಬಿಜೆಪಿ ಫಾಲ್ಟಾವನ್ನು ಗೆದ್ದ ಕಾರಣ ಬಿಜೆಪಿ ಒಟ್ಟಾಗಿ ಗೆದ್ದ ಕ್ಷೇತ್ರಗಳ ಸಂಖ್ಯೆ 207ರಿಂದ 208ಕ್ಕೆ ಏರುತ್ತದೆ. ಆದರೆ ಸುವೇಂದು ಅಧಿಕಾರಿ ಭಬಾನಿಪುರವನ್ನು ಉಳಿಸಿಕೊಂಡ ಕಾರಣ ಅವರು ಸ್ಪರ್ಧಿಸಿದ ನಂದಿಗ್ರಾಮದಲ್ಲಿ ಮತ್ತೆ ವಿಧಾನಸಭೆ ಚುನಾವಣೆ ನಡೆಯಲಿದೆ. ಆದ್ದರಿಂದ ಸದ್ಯ ಸದಸ್ಯ ಬಲ 207 ಆಗಿದೆ.
