ನವದೆಹಲಿಯಲ್ಲಿ ನಡೆಯಲಿರುವ ‘ಬ್ರಿಕ್ಸ್’ (BRICS) ಶೃಂಗಸಭೆಯ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ನ ಹಿರಿಯ ನಾಯಕರಾದ ಪಿ. ಚಿದಂಬರಂ ಮತ್ತು ಶಶಿ ತರೂರ್ ನಡುವೆ ಒಕ್ಕೂಟದ ಪ್ರಸ್ತುತತೆ ಹಾಗೂ ಪ್ರಯೋಜನಗಳ ಕುರಿತು ವಿಭಿನ್ನ ಅಭಿಪ್ರಾಯಗಳು ವ್ಯಕ್ತವಾಗಿವೆ.
ಮಾಜಿ ಸಚಿವ ಪಿ. ಚಿದಂಬರಂ ಅವರು ಇತ್ತೀಚೆಗೆ ಬ್ರಿಕ್ಸ್, ಕ್ವಾಡ್, ಜಿ-20 ಮತ್ತು ಎಸ್‌ಸಿಒ ನಂತಹ ಬಹುಪಕ್ಷೀಯ ವೇದಿಕೆಗಳಿಂದ ಭಾರತಕ್ಕೆ ಸಿಗುತ್ತಿರುವ ಪ್ರತ್ಯಕ್ಷ ಪ್ರಯೋಜನಗಳ ಕುರಿತು ಪ್ರಶ್ನಿಸಿದ್ದರು. ಕಳೆದ 2-3 ಶೃಂಗಸಭೆಗಳಿಂದ ಭಾರತಕ್ಕೆ ಯಾವುದೇ ನಿರ್ದಿಷ್ಟ ಅಥವಾ ದೊಡ್ಡ ಲಾಭಗಳು ದೊರೆತಿಲ್ಲ ಎಂಬುದು ಚಿದಂಬರಂ ಅವರ ವಾದವಾಗಿತ್ತು. ಆದರೆ, ಈ ಕುರಿತು ಶಶಿ ತರೂರ್ ಅವರು ತಮ್ಮದೇ ಪಕ್ಷದ ನಾಯಕನ ವಾದಕ್ಕೆ ಭಿನ್ನವಾಗಿ ಮಾತನಾಡಿ, ಬ್ರಿಕ್ಸ್ ಒಕ್ಕೂಟದ ಪ್ರಾಮುಖ್ಯತೆಯನ್ನು ಎತ್ತಿಹಿಡಿದಿದ್ದಾರೆ.
ಇದನ್ನೂ ಓದಿ: ‘ಬ್ರಿಕ್ಸ್’ ಜೊತೆ ಹೊಂದಾಣಿಕೆ ಮಾಡಿಕೊಳ್ಳುವ ದೇಶಗಳಿಗೆ ಶೇ.10 ಹೆಚ್ಚುವರಿ ಸುಂಕ: ಟ್ರಂಪ್ ಎಚ್ಚರಿಕೆ
ಹಲವು ದೇಶಗಳ ಮುಖ್ಯಸ್ಥರು ಮತ್ತು ಪ್ರಧಾನಿಗಳು ದೆಹಲಿಯ ಶೃಂಗಸಭೆಗೆ ಆಗಮಿಸುತ್ತಿರುವುದು ಭಾರತದ ‘ರಾಜತಾಂತ್ರಿಕ ಸಮಾವೇಶ ಸಾಮರ್ಥ್ಯಕ್ಕೆ’ ಸಾಕ್ಷಿಯಾಗಿದೆ ಎಂದು ಶಶಿ ತರೂರ್ ಹೇಳಿಕೊಂಡಿದ್ದಾರೆ.
ಕಾಂಗ್ರೆಸ್ ಸಂಸದ ಶಶಿ ತರೂರ್ ಅವರು ತಮ್ಮ ಪಕ್ಷದ ಅಧಿಕೃತ ನಿಲುವು ಅಥವಾ ಹಿರಿಯ ನಾಯಕರ ಹೇಳಿಕೆಗಳಿಗಿಂತ ಭಿನ್ನವಾದ ಸಾರ್ವಜನಿಕ ಅಭಿಪ್ರಾಯ ವ್ಯಕ್ತಪಡಿಸುತ್ತಿರುವುದು ಇದೇ ಮೊದಲೇನಲ್ಲ. ವಿದೇಶಾಂಗ ನೀತಿ, ರಾಷ್ಟ್ರೀಯ ಭದ್ರತೆ ಹಾಗೂ ಕೆಲವು ಪ್ರಮುಖ ಸರ್ಕಾರದ ನಿರ್ಧಾರಗಳ ವಿಷಯದಲ್ಲಿ ತರೂರ್ ಹಲವು ಬಾರಿ ಕಾಂಗ್ರೆಸ್ ಪಕ್ಷಕ್ಕಿಂತ ವಿಭಿನ್ನ ನಿಲುವು ತಳೆದು ಸುದ್ದಿಯಾಗಿದ್ದಾರೆ.
ಪಹಲ್ಗಾಮ್ ಭಯೋತ್ಪಾದನಾ ದಾಳಿಯ ನಂತರ ಭಾರತೀಯ ಸೇನೆ ಕೈಗೊಂಡ ‘ಆಪರೇಷನ್ ಸಿಂಧೂರ’ ಕಾರ್ಯಾಚರಣೆಯನ್ನು ಶಶಿ ತರೂರ್ ಮುಕ್ತವಾಗಿ ಬೆಂಬಲಿಸಿದ್ದರು. ಆದರೆ ಕಾಂಗ್ರೆಸ್ ನಾಯಕತ್ವವು ಸರ್ಕಾರದ ನಿರ್ಧಾರವನ್ನು ಟೀಕಿಸುತ್ತಿದ್ದಾಗ, ತರೂರ್ ದೇಶದ ಭದ್ರತೆಯ ವಿಷಯದಲ್ಲಿ ಸರ್ಕಾರದ ನಡೆಯನ್ನು ಶ್ಲಾಘಿಸಿದ್ದು ಪಕ್ಷಕ್ಕೆ ಅಸಮಾಧಾನ ತಂದಿತ್ತು.
ಪ್ರಧಾನಿ ನರೇಂದ್ರ ಮೋದಿ ಅವರ ಜಾಗತಿಕ ರಾಜತಾಂತ್ರಿಕ ನಡೆಗಳು ಹಾಗೂ ಪ್ರವಾಸಗಳನ್ನು ತರೂರ್ ಹಲವು ಬಾರಿ ಶ್ಲಾಘಿಸಿದ್ದಾರೆ. ಮೋದಿ ಅವರ ಜಾಗತಿಕ ಪ್ರಭಾವ ಮತ್ತು ‘ಗ್ಲೋಬಲ್ ಸೌತ್’ಗೆ ನೀಡಿದ ಆದ್ಯತೆಯನ್ನು ಅವರು ಸಾರ್ವಜನಿಕವಾಗಿ ಎತ್ತಿಹಿಡಿದಿದ್ದರು.
ಕೇಂದ್ರ ಸರ್ಕಾರವು ಭಾರತೀಯ ವಿದೇಶಾಂಗ ನಿಲುವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯಲು ಆಯೋಜಿಸಿದ್ದ ಜಂಟಿ ನಿಯೋಗದಲ್ಲಿ ತರೂರ್ ಭಾಗವಹಿಸಿದ್ದರು. ಇದನ್ನು ಕಾಂಗ್ರೆಸ್ ನಾಯಕರು ಟೀಕಿಸಿದ್ದರೂ, “ಪಕ್ಷಕ್ಕಿಂತ ದೇಶ ಮುಖ್ಯ” ಎಂದು ತರೂರ್ ತಮ್ಮ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದರು.
ಈ ಹಿಂದೆ ಇಂದಿರಾ ಗಾಂಧಿಯವರು ಹೇರಿದ್ದ ತುರ್ತು ಪರಿಸ್ಥಿತಿಯ ದಿನಗಳನ್ನು ಪ್ರಜಾಪ್ರಭುತ್ವದ “ಕತ್ತಲೆಯ ಕಾಲ” ಎಂದು ತರೂರ್ ಬರೆದಿದ್ದ ಲೇಖನವೂ ಕಾಂಗ್ರೆಸ್ ಒಳಗಡೆ ಭಾರಿ ಚರ್ಚೆಗೆ ಗ್ರಾಸವಾಗಿತ್ತು. ಶಶಿ ತರೂರ್ ಅವರು ರಾಜತಾಂತ್ರಿಕ ಹಾಗೂ ಅಂತಾರಾಷ್ಟ್ರೀಯ ವಿಚಾರಗಳಲ್ಲಿ ಪಕ್ಷದ ಕಟ್ಟುನಿಟ್ಟಾದ ಗಡಿಗಳನ್ನು ಮೀರಿದ ಸ್ವತಂತ್ರ ನಿಲುವುಗಳನ್ನು ತೆಗೆದುಕೊಳ್ಳುತ್ತಾ ಬಂದಿದ್ದು, ಸ್ವಪಕ್ಷದಲ್ಲೇ ವಿರೋಧ ಎದುರಿಸಿದ ಉದಾಹರಣೆಗಳು ಹೆಚ್ಚಿವೆ.
