ಕೇರಳದ ಎರ್ನಾಕುಲಂ ಜಿಲ್ಲೆಯ ಆಲಂಗಾಡ್ ಪ್ರದೇಶದಲ್ಲಿನ ದೇವಾಲಯದಲ್ಲಿ ಅರ್ಚಕನಾಗಿದ್ದ ದಲಿತ ಸಮುದಾಯದ ಯುವ ಅರ್ಚಕ ಪಿ.ಆರ್. ವಿಷ್ಣು ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಇದು ತೀವ್ರ ಜಾತಿ ದೌರ್ಜನ್ಯ ಮತ್ತು ನಿರಂತಕ ಜಾತಿ ತಾರತಮ್ಯಗಳಿಂದ ಬೇಸತ್ತು ರಾಜೀನಾಮೆ ನೀಡಿರುವುದಾಗಿ ಅವರು ಹೇಳಿಕೊಂಡಿದ್ದಾರೆ. ಅವರ ರಾಜೀನಾಮೆಯು ಕೇರಳದ ‘ದೇವಸ್ವಂ ಬೋರ್ಡ್’ನಲ್ಲಿ ದಲಿತ ಅರ್ಚಕರ ನೇಮಕಾತಿ ನಡೆದರೂ, ಅವರು ಎದುರಿಸುವ ಸಾಮಾಜಿಕ ಸಮಸ್ಯೆಗಳನ್ನು ಮತ್ತೊಮ್ಮೆ ಬೆಳಕಿಗೆ ತಂದಿದೆ.
ವಿಷ್ಣು ಅವರು ‘ತಿರುವಿತಾಂಕೂರ್ ದೇವಸ್ವಂ ಬೋರ್ಡ್’ ಅಡಿಯಲ್ಲಿ ನಡೆದ ಮುಕ್ತ ನೇಮಕಾತಿ ಪ್ರಕ್ರಿಯೆಯಲ್ಲಿ ಲಿಖಿತ ಪರೀಕ್ಷೆ ಮತ್ತು ಸಂದರ್ಶನವನ್ನು ಪಾಸು ಮಾಡಿ, ಅರ್ಚಕರಾಗಿ ಆಯ್ಕೆಯಾಗಿದ್ದರು. ನಾಲ್ಕು ತಿಂಗಳ ಹಿಂದೆ, (2025ರ ಅಕ್ಟೋಬರ್‌/ನವೆಂಬರ್‌) ಅವರನ್ನು ಪರವೂರ್ ಗ್ರೂಪ್‌ನತಿರುವಲ್ಲೂರ್ ವಿಭಾಗದ ವ್ಯಾಪ್ತಿಯಲ್ಲಿರುವ ‘ಮಾಳಿಕಂಪೀಡಿಕ ವಾತುರಕ್ಕಾವು ಭಗವತಿ’ ದೇವಸ್ಥಾನದಲ್ಲಿ ಪಾರ್ಟ್-ಟೈಮ್ ಅರ್ಚಕರಾಗಿ ನಿಯೋಜಿಸಲಾಗಿತ್ತು.
ಆದರೆ, ನೇಮಕಾತಿಯ ನಂತರ ವಿಷ್ಣು ಅವರ ಮೇಲೆ ತೀವ್ರ ಜಾತಿ ದಬ್ಬಾಳಿಕೆಗಳು ಆರಂಭವಾದವು. ’ದೇವಸ್ವಂ ಎಂಪ್ಲಾಯೀಸ್ ಕಾನ್ಫೆಡರೇಷನ್’ನ ಸದಸ್ಯರು ಮತ್ತು ಕೆಲವು ಅಧಿಕಾರಿಗಳು ತಮ್ಮ ಮೇಲೆ ಜಾತಿ ತಾರತಮ್ಯ, ಜಾತಿ ಆಧಾರಿತ ಶೋಷಣೆ ನಡೆಸಲಾರಂಭಿಸಿದರು ಎಂದು ವಿಷ್ಣು ಆರೋಪಿಸಿದ್ದಾರೆ. ಈ ಹಿಂದೆ, ತಾವು 2024ರ ನವೆಂಬರ್‌ನಲ್ಲಿ ತತ್ತಪ್ಪಿಳ್ಳಿ ಶ್ರೀದುರ್ಗಾ ದೇವಿ ದೇವಸ್ಥಾನದಲ್ಲಿ ಅರ್ಚಕರಾಗಿದ್ದಲೂ ಜಾತಿ ತಾರತಮ್ಯಗಳನ್ನು ಎದುರಿಸಿದ್ದೇನೆ ಎಂದು ಅವರು ಹೇಳಿಕೊಂಡಿದ್ದಾರೆ. ಆ ಸಂದರ್ಭದಲ್ಲಿ, ವಿಷ್ಣು ಅವರ ಮೇಲೆ ಜಾತಿ ದೌರ್ಜನ್ಯ ಎಸಗಿದ್ದ ಕೆ.ಎಸ್. ಜಯೇಶ್ ಎಂಬಾತನನ್ನು ಪೊಲೀಸರು ಬಂಧಿಸಿದ್ದರು.
ಈ ಲೇಖನ ಓದಿದ್ದೀರಾ?: ಚಾಲುಕ್ಯರ ಆಳ್ವಿಕೆಯ ಇತಿಹಾಸದ ಸುವರ್ಣ ಪುಟಗಳನ್ನು ಕಲ್ಲಿನಲ್ಲಿ ಕಾಣುವ ಅದ್ಭುತ ಸ್ಥಳ ಬಾದಾಮಿ
ಇದೀಗ, ವಾತುರಕ್ಕಾವು ಭಗವತಿ ದೇವಸ್ಥಾನದಲ್ಲಿಯೂ ವಿಷ್ಣು ಅವರು ಜಾತಿ ಆಧಾರಿತ ಶೋಷಣೆಗೆ ತುತ್ತಾಗಿದ್ದಾರೆ. ’ದೇವಸ್ವಂ ಎಂಪ್ಲಾಯೀಸ್ ಕಾನ್ಫೆಡರೇಷನ್’ನ ನಾಯಕರು ಮತ್ತು ಅಧಿಕಾರಿಗಳು ‘ಕಾನ್ಫೆಡರೇಷನ್ ಸೇರದಿದ್ದರೆ, ಶಾಂತಿಯಿಂದ ಕೆಲಸ ಮಾಡಲು ಬಿಡುವುದಿಲ್ಲ’ವೆಂದು ತಮಗೆ ಬೆದರಿಕೆ ಹಾಕಿದ್ದಾರೆ. ಈ ಆರೋಪಿಗಳನ್ನು ರಕ್ಷಿಸಲು ಪರವೂರ್ ಗ್ರೂಪ್ ಅಸಿಸ್ಟೆಂಟ್ ಕಮಿಷನರ್ ಕೂಡ ಪ್ರಯತ್ನಿಸಿದ್ದಾರೆ. ಇದರಿಂದ, ಕೆಲಸದ ಸ್ಥಳದಲ್ಲಿ ನಿರಂತರ ಭಯ ಮತ್ತು ಅಭದ್ರತೆ ಎದುರಿಸುವಂತಾಗಿದೆ ಎಂದು ವಿಷ್ಣು ಹೇಳಿಕೊಂಡಿದ್ದಾರೆ.
ಜಾತಿ ಶೋಷಣೆ ಮತ್ತು ಅಧಿಕಾರಿಗಳ ಬೆದರಿಕೆಯಿಂದಾಗಿ ಬೇರಾವುದೇ ದಾರಿ ಕಾಣದೆ ರಾಜೀನಾಮೆ ನೀಡಿರುವುದಾಗಿ ವಿಷ್ಣು ಹೇಳಿದ್ದಾರೆ. ಅಲ್ಲದೆ, ತಮಗೆ ಕಿರುಕುಳ ನೀಡಿದ ಅಧಿಕಾರಿಗಳ ವಿರುದ್ಧ ಆಲಂಗಾಡ್ ಪೊಲೀಸ್ ಠಾಣೆಯಲ್ಲಿ ದೂರನ್ನೂ ದಾಖಲಿಸಿದ್ದಾರೆ. ದಲಿತ ಅರ್ಚಕ ವಿಷ್ಣು ಪರವಾಗಿ ದಲಿತ ಸಂಘಟನೆಗಳು ಮತ್ತು ಸಾಮಾಜಿಕ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದ್ದಾರೆ.
ಸದ್ಯ, ಈ ಘಟನೆಯು ಕೇರಳದ ದೇವಾಲಯಗಳಲ್ಲಿ ದಲಿತ ಅರ್ಚಕರು ಎದುರಿಸುತ್ತಿರುವ ಜಾತಿ ತಾರತಮ್ಯದ ಸಮಸ್ಯೆಯನ್ನು ಎತ್ತಿ ತೋರಿಸಿದೆ. ದೇವಸ್ವಂ ಸಂಸ್ಥೆಗಳಲ್ಲಿ ಯೂನಿಯನ್ ರಾಜಕೀಯದ ಪ್ರಭಾವ, ಜಾತಿ ಅಸಮಾನತೆ ಸಮಸ್ಯೆಗಳು ಮತ್ತೆ ಮುನ್ನೆಲೆ ಬಂದಿವೆ.
