ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ 76ನೇ ಜನ್ಮದಿನಾಚರಣೆಯ ಸಂದರ್ಭದಲ್ಲಿ, ‘ಕಾಕ್ರೋಚ್ ಜನತಾ ಪಾರ್ಟಿ’ (ಸಿಜೆಪಿ) ಯ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಅವರು ವಿಶಿಷ್ಟ ಹಾಗೂ ವ್ಯಂಗ್ಯಾತ್ಮಕ ರೀತಿಯಲ್ಲಿ ಶುಭಾಶಯ ಕೋರಿದ್ದಾರೆ. ಮಹಾರಾಷ್ಟ್ರದ ಆದಿವಾಸಿ ಸರ್ಕಾರಿ ಶಾಲೆಯೊಂದರಲ್ಲಿ ದೀಪ ಬೆಳಗಿಸಿದ ಅವರು, “ಈ ಜೀರ್ಣಾವಸ್ಥೆಯಲ್ಲಿರುವ ಸರ್ಕಾರಿ ಶಾಲೆಯನ್ನು ನಾವು ಮೋದಿ ಅವರಿಗೆ ಜನ್ಮದಿನದ ಉಡುಗೊರೆಯಾಗಿ ನೀಡುತ್ತಿದ್ದೇವೆ” ಎಂದು ಹೇಳುವ ಮೂಲಕ ಸರ್ಕಾರದ ಮೂಲಸೌಕರ್ಯಗಳ ಕೊರತೆಯನ್ನು ಪ್ರಸ್ತಾಪಿಸಿದ್ದಾರೆ.
ಸಾರ್ವಜನಿಕವಾಗಿ ಮೋದಿ ಅವರ ಜನ್ಮದಿನದ ಅಂಗವಾಗಿ ದೀಪ ಬೆಳಗಿಸಲು ನೀಡಿದ್ದ ಕರೆಯ ಹಿನ್ನೆಲೆಯಲ್ಲಿ, ಸಿಜಿಪಿ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಆದಿವಾಸಿ ಮಕ್ಕಳಿರುವ ಸರ್ಕಾರಿ ಶಾಲೆಯ ಕಟ್ಟಡದಲ್ಲಿ ದೀಪ ಹಚ್ಚಿದರು.
ಇದನ್ನೂ ಓದಿ: ಸಿಜೆಪಿಯಿಂದ ‘ಆದಿವಾಸಿ ಸ್ಕೂಲ್ ಠೀಕ್ ಕರೋ’ ಅಭಿಯಾನ: ಸೆ.17ರಿಂದ ಶಾಲೆಗಳ ಪರಿಶೀಲನೆ
ಈ ಸಂದರ್ಭದಲ್ಲಿ ಕಟ್ಟಡದ ಸವೆದುಹೋದ ಗೋಡೆಗಳು ಮತ್ತು ಕೊರತೆಯಿರುವ ಮೂಲಸೌಕರ್ಯಗಳನ್ನು ತೋರಿಸಿದ ಅವರು, “ನಿಮ್ಮ ಕಳೆದ 12 ವರ್ಷಗಳ ಆಡಳಿತ ಹಾಗೂ ಸಾಧನೆಗೆ ಸಾಕ್ಷಿಯಾಗಿರುವ ಈ ಸರ್ಕಾರಿ ಶಾಲೆಯನ್ನೇ ನಿಮಗಾಗಿ ಗಿಫ್ಟ್ ಆಗಿ ನೀಡುತ್ತಿದ್ದೇವೆ” ಎಂದು ಟೀಕಿಸಿದರು. ನಂತರ ಸ್ಥಳದಲ್ಲಿದ್ದವರೊಂದಿಗೆ ಸೇರಿ ‘ಹ್ಯಾಪಿ ಬರ್ತ್‌ಡೇ ಮೋದಿಜಿ’ ಎಂದು ಹಾಡಿ ಶುಭ ಹಾರೈಸಿದರು.
CJP ಪ್ರಸ್ತುತ ‘ಶಾಲೆ ಸರಿ ಮಾಡಿ’ (School Thik Karo) ಎಂಬ ಸಾಮಾಜಿಕ ಅಭಿಯಾನವನ್ನು ನಡೆಸುತ್ತಿದ್ದು, ದೇಶದ ವಿವಿಧ ಭಾಗಗಳಲ್ಲಿರುವ ಸರ್ಕಾರಿ ಶಾಲೆಗಳ ಅವ್ಯವಸ್ಥೆ ಮತ್ತು ಶಿಥಿಲಾವಸ್ಥೆಯನ್ನು ಮೂಲಮಟ್ಟದಿಂದ ಎತ್ತಿ ತೋರಿಸುವ ಕೆಲಸ ಮಾಡುತ್ತಿದೆ. ಸಾರ್ವಜನಿಕ ವಲಯದಲ್ಲಿ ಈ ರೀತಿಯ ವಿಶಿಷ್ಟ ಮಾದರಿಯ ಪ್ರತಿಭಟನೆ ಹಾಗೂ ಶುಭಾಶಯ ಪ್ರದರ್ಶನವು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
