ಹಿಮಾಲಯವು ಕೇವಲ ಮಂಜಿನ ಬೆಟ್ಟಗಳ ಸಮೂಹವಲ್ಲ; ಅದು ಭಾರತದ ಆರ್ಥಿಕ ಸ್ಥಿರತೆ, ಆಹಾರ ಭದ್ರತೆ ಮತ್ತು ಶಕ್ತಿ ಭದ್ರತೆಯ ತಾಣ. ಇಂದಿನ ಜಾಗತಿಕ ತಾಪಮಾನ ಏರಿಕೆಯ ಸವಾಲನ್ನು ಭಾರತವು ಕೇವಲ ಪರಿಸರ ಸಮಸ್ಯೆಯಾಗಿ ನೋಡದೆ, ರಾಷ್ಟ್ರೀಯ ಭದ್ರತೆ ಮತ್ತು ಆರ್ಥಿಕ ಸುಸ್ಥಿರತೆಯ ಕೋನದಿಂದ ನೋಡಬೇಕಾಗಿದೆ.ಹಿಮಾಲಯದ ಉತ್ತುಂಗ ಶಿಖರಗಳು ಮತ್ತು ಹಿಮನದಿಗಳು ಇಡೀ ದಕ್ಷಿಣ ಏಷ್ಯಾದ ಜೀವನಾಡಿಗಳು. ಕೋಟ್ಯಂತರ ಜನರಿಗೆ ಕುಡಿಯುವ ನೀರು, ಕೃಷಿಗೆ ನೀರಾವರಿ ಮತ್ತು ವಿದ್ಯುತ್ ಉತ್ಪಾದನೆಗೆ ಆಧಾರ ಈ ಹಿಮಪವರ್ತಗಳು. ಆದರೆ ಈಗ ಈ ಹಿಮಪವರ್ತಗಳು ಹವಾಮಾನ ವೈಪರೀತ್ಯದ ಹೊಡತಕ್ಕೆ ಸಿಲುಕಿ ನಲುಗುತ್ತಿವೆ. ಇತ್ತೀಚಿನ ಜಾಗತಿಕ ಸಂಶೋಧನಾ ವರದಿಗಳ ಪ್ರಕಾರ, ಹಿಮಾಲಯ ವ್ಯಾಪ್ತಿಯಲ್ಲಿ ತಾಪಮಾನವು ಜಾಗತಿಕ ಸರಾಸರಿಗೂ ಅಧಿಕ ವೇಗವಾಗಿ ಏರಿಕೆಯಾಗುತ್ತಿದೆ. ಇದರಿಂದಾಗಿ ಹಿಮಪದರಗಳು ದಿನದಿಂದ ದಿನಕ್ಕೆ ತೆಳುವಾಗುತ್ತಿವೆ. ಈ ವಿದ್ಯಮಾನವು ಇಡೀ ಭಾರತದ ಪರಿಸರ ಹಾಗೂ ಆರ್ಥಿಕ ಭದ್ರತೆಗೆ ನೇರ ಸವಾಲಾಗಿ ಪರಿಣಮಿಸಿದೆ.
ಜಾಗತಿಕ ಕನ್ಸಲ್ಟೆನ್ಸಿ ಸಂಸ್ಥೆಯಾದ ‘ಸಿಸ್ಟಮಿಕ್’ (Systemiq) ನಡೆಸಿರುವ ಇತ್ತೀಚಿನ ಅಧ್ಯಯನವು ನೀಡಿರುವ ಅಂಕಿಅಂಶಗಳು ಅತ್ಯಂತ ಕಳವಳಕಾರಿಯಾಗಿವೆ. ಈ ವರದಿಯ ಪ್ರಕಾರ, ಕೇವಲ ಹತ್ತು ವರ್ಷಗಳ ಹಿಂದಿನ ಪರಿಸ್ಥಿತಿಗೆ ಹೋಲಿಸಿದರೆ ಪ್ರಸ್ತುತ ಹಿಮಾಲಯದ ನೀರ್ಗಲ್ಲುಗಳು ಶೇಕಡ 65ರಷ್ಟು ಹೆಚ್ಚು ವೇಗವಾಗಿ ಕರಗುತ್ತಿವೆ. ಉಷ್ಣಾಂಶ ಹೆಚ್ಚಾದಂತೆ ಹಿಮನದಿಗಳು ಹಿಂದೆ ಸರಿಯುತ್ತಿದ್ದು, ಹಿಮಕರಗಿದ ನೀರು ಸಣ್ಣ ಸಣ್ಣ ಪ್ರದೇಶಗಳಲ್ಲಿ ಸಂಗ್ರಹಗೊಂಡು ಹೊಸ ಹಿಮನದಿ ಸರೋವರಗಳನ್ನು (Glacial Lakes) ಸೃಷ್ಟಿಸುತ್ತಿವೆ. ಈ ಸರೋವರಗಳು ಪ್ರಾಕೃತಿಕ ಮಣ್ಣು ಮತ್ತು ಕಲ್ಲುಗಳ ತಾತ್ಕಾಲಿಕ ತಡೆಗೋಡೆಗಳಿಂದ ರೂಪುಗೊಂಡಿರುವುದರಿಂದ ಅತ್ಯಂತ ಅಸ್ಥಿರವಾಗಿದ್ದು, ಯಾವುದೇ ಕ್ಷಣದಲ್ಲಿ ಒಡೆದು ಭೀಕರ ಪ್ರವಾಹವನ್ನು ಸೃಷ್ಟಿಸುವ ಸಾಮರ್ಥ್ಯ ಹೊಂದಿವೆ.
ಇದನ್ನೂ ಓದಿ: ದಿ ಗ್ರೇಟ್ ಹಿಮಾಲಯನ್ ಚಾಲೆಂಜ್: ಹಿಮಪರ್ವತಗಳ ಎಚ್ಚರಿಕೆ ಗಂಟೆ—ಆಲಿಸಿದರೆ ಉಳಿವು, ಕಿವುಡರಾದರೆ ಅಳಿವು!
ನೇಪಾಳದ ಜಲಪ್ರಳಯವೇ ಪ್ರತ್ಯಕ್ಷ ಸಾಕ್ಷಿ
ಈ ಅಸ್ಥಿರ ಹಿಮನದಿ ಸರೋವರಗಳು ಎಷ್ಟು ಅಪಾಯಕಾರಿ ಎಂಬುದಕ್ಕೆ ಇತ್ತೀಚೆಗೆ ನೇಪಾಳದಲ್ಲಿ ಸಂಭವಿಸಿದ ಸರಣಿ ಜಲಪ್ರಳಯಗಳೇ ಪ್ರತ್ಯಕ್ಷ ಸಾಕ್ಷಿ. ಹಿಮನದಿ ಸರೋವರಗಳು ಉಕ್ಕಿ ಹರಿದಾಗ ಅಥವಾ ಅವುಗಳ ನೈಸರ್ಗಿಕ ಕಟ್ಟೆಗಳು ಒಡೆದಾಗ ‘ಹಿಮನದಿ ಸರೋವರ ಸ್ಫೋಟ ಪ್ರವಾಹ’ ಸಂಭವಿಸುತ್ತದೆ. ನೇಪಾಳದಲ್ಲಿ ಇಂತಹ ನೂರಾರು ಅಸ್ಥಿರ ಸರೋವರಗಳು ಗುರುತಿಸಲ್ಪಟ್ಟಿದ್ದು, ಅವುಗಳು ದಿಢೀರನೆ ಒಡೆದು ಹರಿದ ಪರಿಣಾಮ ಕೆಳಭಾಗದ ಹಳ್ಳಿಗಳು, ಸೇತುವೆಗಳು ಮತ್ತು ಜಲವಿದ್ಯುತ್ ಯೋಜನೆಗಳು ಜಲಸಮಾಧಿಯಾದವು. ಹಿಮಾಲಯದ ಪರಿಸರದಲ್ಲಿ ಸಂಭವಿಸುವ ಇಂತಹ ಪ್ರಕೃತಿ ವಿಕೋಪಗಳು ಕೇವಲ ಒಂದು ದೇಶಕ್ಕೆ ಸೀಮಿತವಾಗಿರದೆ, ಗಡಿದಾಟಿ ಭಾರತದ ನದಿ ಪಾತ್ರಗಳಿಗೂ ಅಪಾರ ಹಾನಿ ಉಂಟುಮಾಡುತ್ತಿವೆ.
ಭಾರತೀಯ ಆರ್ಥಿಕತೆ ಮೇಲೆ ಹಿಮ ಪ್ರಭಾವ!
ಹಿಮಾಲಯದ ಹಿಮಕರಗುವಿಕೆಯು ಭಾರತದ ಆರ್ಥಿಕತೆಯ ಪ್ರಮುಖ ವಲಯಗಳ ಮೇಲೆ ನೇರ ಹಾಗೂ ದೀರ್ಘಕಾಲದ ಮಾರಕ ಪರಿಣಾಮ ಬೀರಲಿ. ಸಿಂಧು, ಗಂಗಾ ಮತ್ತು ಬ್ರಹ್ಮಪುತ್ರ ನದಿ ಪಾತ್ರಗಳು ಭಾರತದ ಕೃಷಿ ಉತ್ಪಾದನೆಯ ಶೇಕಡ 50ಕ್ಕಿಂತಲೂ ಹೆಚ್ಚು ಪಾಲನ್ನು ಹೊಂದಿವೆ. ಆರಂಭದಲ್ಲಿ ಹಿಮ ವೇಗವಾಗಿ ಕರಗುವುದರಿಂದ ನದಿಗಳಲ್ಲಿ ಪ್ರವಾಹ ಹೆಚ್ಚಾಗಬಹುದು. ಆದರೆ ಸುದೀರ್ಘ ಅವಧಿಯಲ್ಲಿ ಹಿಮನದಿಗಳು ಬತ್ತಿಹೋದಂತೆ ಬೇಸಿಗೆಯಲ್ಲಿ ನೀರಿನ ಅಭಾವ ತೀವ್ರಗೊಳ್ಳಲಿದೆ. ಇದು ದೇಶದ ಆಹಾರ ಭದ್ರತೆಗೆ ದೊಡ್ಡ ಕುತ್ತು ತರಲಿದೆ.
ಇನ್ನೊಂದೆಡೆ ಹಿಮಾಲಯನ್ ರಾಜ್ಯಗಳಾದ ಉತ್ತರಾಖಂಡ, ಹಿಮಾಚಲ ಪ್ರದೇಶ ಮತ್ತು ಸಿಕ್ಕಿಂಗಳಲ್ಲಿ ಹತ್ತಾರು ಜಲವಿದ್ಯುತ್ ಯೋಜನೆಗಳು ಕಾರ್ಯಾಚರಿಸುತ್ತಿವೆ. ಹಠಾತ್ ಪ್ರವಾಹ ಮತ್ತು ಭೂಕುಸಿತಗಳು ಈ ವಿದ್ಯುತ್ ಸ್ಥಾವರಗಳನ್ನು, ಆಣೆಕಟ್ಟುಗಳನ್ನು ಹಾಗೂ ರಾಷ್ಟ್ರೀಯ ಹೆದ್ದಾರಿಗಳನ್ನು ಸಂಪೂರ್ಣವಾಗಿ ನಾಶಪಡಿಸುವ ಅಪಾಯವಿದೆ. ನದಿ ಪಾತ್ರದಲ್ಲಿ ವಾಸಿಸುವ ಲಕ್ಷಾಂತರ ಜನರು ಪದೇ ಪದೇ ಸಂಭವಿಸುವ ನೈಸರ್ಗಿಕ ವಿಕೋಪಗಳಿಂದಾಗಿ ತಮ್ಮ ಮನೆಮಠ ಹಾಗೂ ಜೀವನೋಪಾಯ ಕಳೆದುಕೊಳ್ಳುವ ಆತಂಕವಿದೆ. ಇದು ದೇಶದ ಒಳಗೆ ಭಾರಿ ಪ್ರಮಾಣದ ಪರಿಸರ ವಲಸೆಗೆ ದಾರಿ ಮಾಡಿಕೊಡಲಿದ್ದು, ನಗರಗಳ ಮೇಲೆ ತೀವ್ರ ಒತ್ತಡ ಹೇರಲಿದೆ.
ಪ್ರತಿ ವರ್ಷ ಸಂಭವಿಸುವ ಪ್ರವಾಹ ಹಾಗೂ ಮೂಲಸೌಕರ್ಯ ನಾಶವನ್ನು ಸರಿಪಡಿಸಲು ಸರ್ಕಾರಗಳು ಕೋಟ್ಯಂತರ ರೂಪಾಯಿ ಪುನರ್ನಿರ್ಮಾಣ ವೆಚ್ಚ ಭರಿಸಬೇಕಾಗುತ್ತದೆ. ಇದು ಮೂಲಸೌಕರ್ಯ ಅಭಿವೃದ್ಧಿಗೆ ಬಳಸಬೇಕಾದ ಬಂಡವಾಳವನ್ನು ಬೇರೆಡೆಗೆ ತಿರುಗಿಸುವಂತೆ ಮಾಡುತ್ತದೆ.
ಇದನ್ನೂ ಓದಿ: ಗಿಡ ನೆಡುವುದರಿಂದಲೂ ಹವಾಮಾನ ವೈಪರೀತ್ಯ ಉಂಟಾಗುತ್ತದೆ, ನಂಬುತ್ತೀರಾ?
ಹೀಗಿರುವಾಗ ಈ ಬಿಕ್ಕಟ್ಟನ್ನು ಎದುರಿಸಲು ತಕ್ಷಣದ ಸಾಂಸ್ಥಿಕ ಹಾಗೂ ತಾಂತ್ರಿಕ ಹೆಜ್ಜೆಗಳು ಅತ್ಯಗತ್ಯ. ಹಿಮಾಲಯ ಪ್ರದೇಶಗಳಲ್ಲಿ ಉನ್ನತ ಮಟ್ಟದ ಉಪಗ್ರಹ ಆಧಾರಿತ ಮುನ್ನೆಚ್ಚರಿಕೆ ವ್ಯವಸ್ಥೆಗಳನ್ನು ಈಗಲೇ ಅಳವಡಿಸಬೇಕಿದೆ. ಅಪಾಯಕಾರಿ ಸ್ಥಿತಿಯಲ್ಲಿರುವ ಹಿಮನದಿ ಸರೋವರಗಳ ನೀರನ್ನು ಯಾಂತ್ರಿಕವಾಗಿ ಹೊರಹಾಕಿ, ಸರೋವರಗಳ ಮೇಲಿನ ಒತ್ತಡ ಕಡಿಮೆ ಮಾಡುವ ತಂತ್ರಜ್ಞಾನ ಬಳಕೆಯಾಗಬೇಕು. ಜೊತೆಗೆ, ಹಿಮಾಲಯ ಸೂಕ್ಷ್ಮ ವಲಯಗಳಲ್ಲಿ ಅನಿಯಂತ್ರಿತ ರಸ್ತೆ ಅಗಲೀಕರಣ, ಸುರಂಗ ಮಾರ್ಗ ನಿರ್ಮಾಣ ಹಾಗೂ ನಗರೀಕರಣಕ್ಕೆ ತಕ್ಷಣವೇ ಕಡಿವಾಣ ಹಾಕಬೇಕಿದೆ.
ಹಿಮಾಲಯವು ಕೇವಲ ಮಂಜಿನ ಬೆಟ್ಟಗಳ ಸಮೂಹವಲ್ಲ; ಅದು ಭಾರತದ ಆರ್ಥಿಕ ಸ್ಥಿರತೆ, ಆಹಾರ ಭದ್ರತೆ ಮತ್ತು ಶಕ್ತಿ ಭದ್ರತೆಯ ತಾಣ. ಇಂದಿನ ಜಾಗತಿಕ ತಾಪಮಾನ ಏರಿಕೆಯ ಸವಾಲನ್ನು ಭಾರತವು ಕೇವಲ ಪರಿಸರ ಸಮಸ್ಯೆಯಾಗಿ ನೋಡದೆ, ರಾಷ್ಟ್ರೀಯ ಭದ್ರತೆ ಮತ್ತು ಆರ್ಥಿಕ ಸುಸ್ಥಿರತೆಯ ಕೋನದಿಂದ ನೋಡಬೇಕಾಗಿದೆ. ಸಿಸ್ಟಮಿಕ್ ವರದಿಯ ಎಚ್ಚರಿಕೆಯನ್ನು ನಿರ್ಲಕ್ಷಿಸಿದರೆ, ಮುಂಬರುವ ದಶಕಗಳಲ್ಲಿ ಭಾರತವು ಎದುರಿಸಲಿರುವ ಆರ್ಥಿಕ ಹಾಗೂ ಸಾಮಾಜಿಕ ನಷ್ಟವನ್ನು ಕಲ್ಪಿಸಿಕೊಳ್ಳುವುದಕ್ಕೂ ಸಾಧ್ಯವಿಲ್ಲ.
ಪತ್ರಕರ್ತೆ, 2019ರಿಂದ ಪತ್ರಿಕೋದ್ಯಮವೇ ಬದುಕು. ರಾಜಕೀಯ, ಬ್ಯುಜಿನೆಸ್‌ ಸುದ್ದಿಗಳಲ್ಲಿ ಆಸಕ್ತಿ.
