ಕರೂರು ದುರಂತಮಯ ಕಾಲ್ತುಳಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ, ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಮತ್ತು ಡಿಎಂಕೆ ಅಧ್ಯಕ್ಷ ಎಂ ಕೆ ಸ್ಟ್ಯಾಲಿನ್ ಅವರು ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಮುಖ್ಯಸ್ಥ, ನಟ ಸಿ. ಜೋಸೆಫ್ ವಿಜಯ್ ವಿರುದ್ಧ ಪ್ರಮುಖ ಆರೋಪಿಯಾಗಿ ಪ್ರಕರಣ ದಾಖಲಿಸದಂತೆ ತಡೆದು, ‘ಮಾನವೀಯ ಆಧಾರ’ದ ಮೇಲೆ ವಿನಾಯಿತಿ ನೀಡಿದ್ದರು ಎಂದು ಡಿಎಂಕೆ ನಾಯಕ ಹಾಗೂ ಮಾಜಿ ಕಾನೂನು ಸಚಿವ ಎಸ್. ರಘುಪತಿ ಶನಿವಾರ ಪ್ರತಿಪಾದಿಸಿದ್ದಾರೆ.
ಪುದುಕೊಟ್ಟೈನಲ್ಲಿ ಡಿಎಂಕೆ ಆಯೋಜಿಸಿದ್ದ ಪ್ರತಿಭಟನಾ ಸಭೆಯಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಎಸ್. ರಘುಪತಿ, ಕರೂರು ದುರಂತ ನಡೆದ ಸಮಯದಲ್ಲಿ ತಾವೇ ಖುದ್ದಾಗಿ ಎಂ.ಕೆ. ಸ್ಟ್ಯಾಲಿನ್ ಅವರಲ್ಲಿ ವಿಜಯ್ ಅವರನ್ನು ಮೊದಲ ಆರೋಪಿಯನ್ನಾಗಿ ಸೇರಿಸಲು ಒತ್ತಾಯಿಸಿದ್ದಾಗಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಕರೂರ್ ದುರಂತ: 41 ಜನರ ಸಾವಿನ ನಂತರ ಟಿವಿಕೆ ರ‍್ಯಾಲಿ ತಾತ್ಕಾಲಿಕ ಸ್ಥಗಿತ
ಆದರೆ, ವಿಜಯ್ ಆಗಷ್ಟೇ ಚಿತ್ರರಂಗದಿಂದ ರಾಜಕೀಯ ಪ್ರವೇಶಿಸಿದ ಹೊಸ ನಾಯಕ ಎಂಬ ಕಾರಣಕ್ಕೆ ಅವರ ಮೇಲೆ ತಕ್ಷಣವೇ ಕಠಿಣ ಕಾನೂನು ಕ್ರಮ ಕೈಗೊಳ್ಳದೆ, ಮಾನವೀಯ ಆಧಾರದ ಮೇಲೆ ಸ್ಟಾಲಿನ್ ಅವರನ್ನು ಈ ಪ್ರಕರಣದಿಂದ ಹೊರಗಿಡುವ ಉದಾರ ನಿಲುವು ತಳೆದಿದ್ದರು ಎಂದು ರಘುಪತಿ ವಿವರ ನೀಡಿದ್ದಾರೆ.
ಸಾರ್ವಜನಿಕ ಸಭೆಗೆ ವಿಜಯ್ ತಡವಾಗಿ ಆಗಮಿಸಿ, ಬಸ್ ಮೇಲೆ ಸಿನಿಮಾ ಶೈಲಿಯಲ್ಲಿ ಕುಣಿದು ಭಾಷಣ ಮಾಡಿದ್ದು ಜನಸಂದಣಿ ನಿಯಂತ್ರಣ ತಪ್ಪಲು ಮತ್ತು ಕಾಲ್ತುಳಿತಕ್ಕೆ ನೇರ ಕಾರಣವಾಯಿತು ಎಂದು ರಘುಪತಿ ಆರೋಪಿಸಿದ್ದಾರೆ.
ಇನ್ನು ಈ ಹೇಳಿಕೆಗೂ ಒಂದು ದಿನ ಮುಂಚಿತವಾಗಿ, ವಿಸಿಕೆ ಮುಖ್ಯಸ್ಥ ತೊಲ್. ತಿರುಮಾವಳವನ್ ಕೂಡ ಧರ್ಮಪುರಿಯಲ್ಲಿ ಮಾತನಾಡಿ, ಕರೂರು ಕಾಲ್ತುಳಿತಕ್ಕೆ ವಿಜಯ್ ಅವರೇ ಹೊಣೆಗಾರರಾಗಿದ್ದರೂ ಡಿಎಂಕೆ ಸರ್ಕಾರ ಅವರ ವಿರುದ್ಧ ಪ್ರಕರಣ ದಾಖಲಿಸದೆ ‘ಸೌಮ್ಯ ನಡೆ’ ಅನುಸರಿಸಿತ್ತು ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದರು.
ಕರೂರಿನಲ್ಲಿ ನಡೆದ ಈ ಭೀಕರ ಕಾಲ್ತುಳಿತದಲ್ಲಿ 41 ಜನರು ಪ್ರಾಣ ಕಳೆದುಕೊಂಡಿದ್ದರು. ಪ್ರಸ್ತುತ ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ ಈ ಪ್ರಕರಣವನ್ನು ಸಿಬಿಐ (CBI) ತನಿಖೆ ನಡೆಸುತ್ತಿದೆ. ರಾಜಕೀಯ ರಂಗದಲ್ಲಿ ಉಂಟಾಗಿರುವ ಇತ್ತೀಚಿನ ವಾಗ್ದಾಳಿಗಳ ನಡುವೆ ಡಿಎಂಕೆ ನಾಯಕರ ಈ ಹೇಳಿಕೆ ತಮಿಳುನಾಡು ರಾಜಕೀಯದಲ್ಲಿ ಹೊಸ ಕಾವು ಸೃಷ್ಟಿಸಿದೆ.
