ಲಖನೌದ ಅಲಿಗಂಜ್ ಪ್ರದೇಶದಲ್ಲಿ ನಿನ್ನೆ (ಜೂ.22) ಸಂಭವಿಸಿದ ಭೀಕರ ಅಗ್ನಿ ಅವಘಡದಲ್ಲಿ ಮೃತಪಟ್ಟವರ ಪೈಕಿ, ಮುಂದಿನ ನವೆಂಬರ್ನಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಡಬೇಕಿದ್ದ ಯುವ ಜೋಡಿ ಕೂಡ ಸೇರಿದ್ದಾರೆ. ನೀಲೇಶ್ ಕುಮಾರ್ (28) ಮತ್ತು ಅನಾಮಿಕಾ ಸಾಮಂತ (27) ಮೃತ ದುರ್ದೈವಿಗಳು.
ಮೂಲತಃ ಕೋಲ್ಕತ್ತಾದವರಾದ ಅನಾಮಿಕಾ ಮತ್ತು ಲಖನೌದ ನೀಲೇಶ್ ಕಳೆದ ಮೂರು ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಕಳೆದ ವಾರವಷ್ಟೇ ಅನಾಮಿಕಾ ಅವರ ಪೋಷಕರು ಕೋಲ್ಕತ್ತಾದಿಂದ ಲಖನೌಗೆ ಬಂದು ನೀಲೇಶ್ ಅವರ ಕುಟುಂಬದೊಂದಿಗೆ ಮದುವೆ ಮಾತುಕತೆ ನಡೆಸಿದ್ದರು. ನವೆಂಬರ್ನಲ್ಲಿ ಮದುವೆ ನಡೆಸಲು ಎರಡೂ ಕುಟುಂಬಗಳು ನಿರ್ಧರಿಸಿದ್ದವು. ಮದುವೆಯ ಸಿದ್ಧತೆಗಳಿಗಾಗಿ ಮುಂದಿನ ವಾರ ನೀಲೇಶ್ ಅವರ ಕುಟುಂಬ ಕೋಲ್ಕತ್ತಾಗೆ ತೆರಳಲು ಸಿದ್ಧತೆ ನಡೆಸಿತ್ತು.
ನೀಲೇಶ್ ಮತ್ತು ಅನಾಮಿಕಾ ಇಬ್ಬರೂ ಲಖನೌದ ಉಷಾ ಮೆಹ್ತಾ ಮಾರ್ಗದಲ್ಲಿರುವ ವಾಣಿಜ್ಯ ಕಟ್ಟಡದ ಎರಡನೇ ಮಹಡಿಯಲ್ಲಿದ್ದ ‘ಹೆಡ್ ಹಾಪರ್ ಸ್ಟುಡಿಯೋ’ದಲ್ಲಿ 3D ಆರ್ಟ್ ಮತ್ತು ಗೇಮ್ ಡೆವಲಪ್ಮೆಂಟ್ ವಿಭಾಗದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಅಗ್ನಿ ಅವಘಡದ ವೇಳೆ ಇಬ್ಬರೂ ಸ್ಟುಡಿಯೋದಲ್ಲೇ ಇದ್ದರು.
ಘಟನೆ ನಡೆದ ದಿನ ಮಾಧ್ಯಮ ವರದಿಗಳಲ್ಲಿ ಆ ಕಟ್ಟಡದಲ್ಲಿ ಕೋಚಿಂಗ್ ಸೆಂಟರ್ ಮತ್ತು ಲೈಬ್ರರಿ ಇದೆ ಎಂದು ಮಾತ್ರ ವರದಿಯಾಗಿತ್ತು. ಇದರಿಂದಾಗಿ ನೀಲೇಶ್ ಅವರ ಕುಟುಂಬಕ್ಕೆ ತಮ್ಮ ಮಗ ಕೆಲಸ ಮಾಡುತ್ತಿದ್ದ ಸ್ಟುಡಿಯೋ ಕೂಡ ಅದೇ ಕಟ್ಟಡದಲ್ಲಿದೆ ಎಂಬುದು ತಿಳಿದಿರಲಿಲ್ಲ. ಸಂಜೆ ಮರಣೋತ್ತರ ಪರೀಕ್ಷಾ ಕೇಂದ್ರದಿಂದ (Mortuary) ಬಂದ ಕರೆ, ನೀಲೇಶ್ ಅವರು ಉಸಿರುಗಟ್ಟಿ ಮೃತಪಟ್ಟಿದ್ದಾರೆ ಎಂದು ತಿಳಿಸಿ, ಇಡೀ ಕುಟುಂಬವನ್ನೇ ಸ್ತಬ್ಧಗೊಳಿಸಿತ್ತು.
ಇದನ್ನೂ ಓದಿ: ಲಕ್ನೋ ಭೀಕರ ಅಗ್ನಿ ದುರಂತ: ನಾಲ್ವರು ಅಧಿಕಾರಿಗಳ ಅಮಾನತು
ಅನಾಮಿಕಾ ಅವರ ಕುಟುಂಬ ಸದಸ್ಯರು ಲಖನೌಗೆ ಬರುವುದು ಕಷ್ಟವಾಗಿದ್ದರಿಂದ, ಜಿಲ್ಲಾಡಳಿತ ಮತ್ತು ಪೊಲೀಸ್ ಇಲಾಖೆಯ ಸಹಕಾರದೊಂದಿಗೆ ಅನಾಮಿಕಾ ಅವರ ಪಾರ್ಥಿವ ಶರೀರವನ್ನು ವಿಮಾನ ಅಥವಾ ವಿಶೇಷ ವ್ಯವಸ್ಥೆಯ ಮೂಲಕ ಕೋಲ್ಕತ್ತಾಗೆ ರವಾನಿಸಿ ಅಂತಿಮ ವಿಧಿವಿಧಾನಗಳನ್ನು ನೆರವೇರಿಸಲಾಗಿದೆ. ಇನ್ನೇನು ಹೊಸ ಜೀವನಕ್ಕೆ ಕಾಲಿಡುವ ಖುಷಿಯಲ್ಲಿದ್ದ ಜೋಡಿ ಹಾಗೂ ಅವರ ಕುಟುಂಬಗಳನ್ನು ಈ ಅಗ್ನಿ ದುರಂತ ಸುಟ್ಟು ಕರಕಲು ಮಾಡಿದೆ.
