ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಪ್ರಣೀತ್ ಮೋರ್ ಕಾಮೆಡಿ ಶೋನಲ್ಲಿ ನಡೆದ ‘370 ರೂ. ಬಿರಿಯಾನಿ’ ಎಂಬ ಹೇಳಿಕೆಯು ಸದ್ಯ ದೇಶಾದ್ಯಂತ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಈ ನಡುವೆ ಮಧುರ್ ವಿರ್ಲಿ ಎಂಬ ಸ್ಟ್ಯಾಂಡ್-ಅಪ್ ಕಾಮಿಡಿಯನ್‌ನ ಹಳೆಯ ವಿಡಿಯೋ ಒಂದು ವೈರಲ್ ಆಗಿದೆ. ಮಧುರ್ ವಿರ್ಲಿ ‘ರೇಪ್ ಜೋಕ್’ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದು, ಅತ್ಯಾಚಾರ ಹಾಸ್ಯವೇ? ಎಂದು ನೆಟ್ಟಿಗರು ವಿರ್ಲಿಯನ್ನು ಪ್ರಶ್ನಿಸಿದ್ದಾರೆ. ಸದ್ಯ ವಿರ್ಲಿ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯನ್ನೇ ನಿಷ್ಕ್ರಿಯಗೊಳಿಸಿದ್ದಾರೆ.
ಮನರಂಜನೆ ಹೆಸರಲ್ಲಿ ವಿಕೃತ ಹಾಸ್ಯ ಮಾಡುವುದು ಸದ್ಯ ಸ್ಟ್ಯಾಂಡ್-ಅಪ್ ಕಾಮಿಡಿಯನ್‌ಗಳ ಚಾಳಿಯಾಗಿದೆ. ಇಂತಹ ಸ್ಟ್ಯಾಂಡ್-ಅಪ್ ಕಾಮಿಡಿಯನ್‌ಗಳು ತಮ್ಮೊಳಗಿರುವ ಸ್ತ್ರೀದ್ವೇಷ, ಪಿತ್ರಪ್ರಭುತ್ವ ಮನಸ್ಥಿತಿ, ಅಸೂಕ್ಷ್ಮತೆಯನ್ನು ತಮ್ಮ ಕೀಳುಮಟ್ಟದ ಜೋಕ್‌ಗಳಿಂದ ಬಹಿರಂಗಪಡಿಸುತ್ತಿದ್ದಾರೆ. ಇದಕ್ಕೆ ಪ್ರಣೀತ್ ಮೋರ್, ಮಧುರ್ ವಿರ್ಲಿ ಉದಾಹರಣೆ.
ಇದನ್ನು ಓದಿದ್ದೀರಾ? 370 ರೂ. ಬಿರಿಯಾನಿ ಬದಲು ಏನೋ ಬಯಸಿದ್ದೆ: ಪ್ರಣೀತ್‌ಗೆ ಮಹಿಳಾ ಆಯೋಗದ ನೋಟಿಸ್
ಮಧುರ್ ವಿರ್ಲಿ ಹಳೆಯ ವಿಡಿಯೋವೊಂದರಲ್ಲಿ ಮಾಡಿರುವ ‘ರೇಪ್ ಜೋಕ್’ ಈಗ ವೈರಲ್ ಆಗುತ್ತಿದೆ. ಹಾಸ್ಯಕ್ಕೂ ಮಿತಿಗಳಿವೆ ಎಂದು ನೆಟ್ಟಿಗರು ತೀಕ್ಷ್ಣವಾಗಿ ಹೇಳಿದ್ದಾರೆ. ಸದ್ಯ ಈ ಸ್ಟ್ಯಾಂಡ್-ಅಪ್ ಕಾಮಿಡಿಯನ್‌ಗಳ ಕೆಟ್ಟ ಜೋಕ್‌ಗಳು ಮತ್ತು ಆ ಅಸೂಕ್ಷ್ಮತೆಯ ವಿಚಾರಗಳನ್ನೂ ಹಾಸ್ಯವಾಗಿ ಪರಿಗಣಿಸಿ ನಗುವ ಪ್ರೇಕ್ಷಕರ ಮನಸ್ಥಿತಿ ಬಗ್ಗೆ ತೀವ್ರ ಚರ್ಚೆ ನಡೆಯುತ್ತಿದೆ.
ವಿರ್ಲಿಯ ಹೆಸರು ಚರ್ಚೆಗೆ ಬರುವ ಮುನ್ನ ದೇಶಾದ್ಯಂತ ಹಲವು ಮಂದಿಯ ಆಕ್ರೋಶವನ್ನು ಎದುರಿಸಿದ್ದು ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಪ್ರಣೀತ್ ಮೋರ್ ಮತ್ತು ಗುರುಗ್ರಾಮದ 23 ವರ್ಷದ ವೆಬ್ ಡೆವಲಪರ್ ಹಿಮಾಂಶು ಜಾಂಗ್ರಾ. ಗುರುಗ್ರಾಮದಲ್ಲಿ ನಡೆದ ಪ್ರಣೀತ್ ಮೋರ್‌ನ ಲೈವ್ ಶೋನಲ್ಲಿ ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದ ಹಿಮಾಂಶು ಜಾಂಗ್ರಾ ತನ್ನ ಡೇಟಿಂಗ್ ಕತೆಯನ್ನು ಹಂಚಿಕೊಂಡಿದ್ದ. ಈ ವೇಳೆ ಯುವತಿಗೆ ತಾನು ಬಿರಿಯಾನಿ ಕೊಡಿಸಿದ್ದರಿಂದ ಅದನ್ನು ಆಕೆಯೊಂದಿಗೆ ಲೈಂಗಿಕ ಸುಖ ಪಡೆದು ವಸೂಲಿ ಮಾಡಬೇಕು ಎಂಬಂತೆ ಮಾತನಾಡಿದ್ದ.
“ಡೇಟಿಂಗ್ ಹೋದಾಗ ಯುವತಿಯೊಬ್ಬಳಿಗೆ ಚಿಕನ್ ಬಿರಿಯಾನಿ ಕೊಡಿಸಲು ನಾನು 370 ರೂಪಾಯಿ ಖರ್ಚು ಮಾಡಿದ್ದೆ. ಆಕೆ ಊಟದ ಬಳಿಕ ತನ್ನನ್ನು ಮನೆಗೆ ಬಿಡಲು ಹೇಳಿದಾಗ ‘ನಾನು 370 ರೂ. ಖರ್ಚು ಮಾಡಿದ್ದೇನೆ, ಆ ಹಣವನ್ನು ಹೇಗಾದರೂ ವಸೂಲಿ ಮಾಡಬೇಕಲ್ಲವೇ’ ಎಂದು ಅಂದುಕೊಂಡೆ” ಎಂದು ಹಿಮಾಂಶು ಹೇಳಿದ್ದ. ಅಂದರೆ 370 ರೂಪಾಯಿ ಬಿರಿಯಾನಿ ಕೊಡಿಸಿದ್ದಕ್ಕೆ ಆಕೆ ದೈಹಿಕವಾಗಿ ಸಹಕರಿಸಬಹುದು ಎಂದು ಹೇಳಿದ್ದ.
ಅಷ್ಟು ಮಾತ್ರವಲ್ಲದೆ ಆತ ಯುವತಿಯ ಒಪ್ಪಿಗೆಯಿಲ್ಲದೆ ಬಲವಂತವಾಗಿ ಚುಂಬಿಸಿದಾಗಿಯೂ ಹೇಳಿದ್ದ. ಈ ವೇಳೆ ಅಲ್ಲಿ ನೆರೆದಿದ್ದ ಪ್ರೇಕ್ಷಕರು ಮತ್ತು ಕಾಮಿಡಿಯನ್ ಪ್ರಣೀತ್ ಮೋರ್ ಆತನ ಈ ಕೃತ್ಯವನ್ನು ವಿರೋಧಿಸುವ ಬದಲು ಜೋರಾಗಿ ನಕ್ಕು, ಚಪ್ಪಾಳೆ ತಟ್ಟಿದ್ದರು. ಬಳಿಕ ಈ ವಿಡಿಯೋ ಕ್ಲಿಪ್ ಅನ್ನು ಸೋಶಿಯಲ್ ಮೀಡಿಯಾದಲ್ಲಿ ಅಪ್‌ಲೋಡ್ ಮಾಡಲಾಗಿತ್ತು. ಇದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು. ಜಾಂಗ್ರಾ ಮತ್ತು ಮೋರ್ ಇಬ್ಬರೂ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಗಳನ್ನು ನಿಷ್ಕ್ರಿಯಗೊಳಿಸಿದ್ದಾರೆ. ಅವರ ವಿರುದ್ಧ ಎಫ್ಐಆರ್‌ ಕೂಡ ದಾಖಲಾಗಿದೆ.
ಹಳೆಯ ಸ್ಟ್ಯಾಂಡ್-ಅಪ್ ಕ್ಲಿಪ್ ಮತ್ತೆ ವೈರಲ್
ಈ ಘಟನೆ ನಡುವೆ ಮಧುರ್ ವಿರ್ಲಿಯ ಹಳೆಯ ‘ರೇಪ್ ಜೋಕ್’ ವಿಡಿಯೋ ಈಗ ವೈರಲ್ ಆಗಿದೆ. ಅತ್ಯಾಚಾರ ಮತ್ತು ಕೊಲೆಯಂತಹ ಸೂಕ್ಷ್ಮ ಹಾಗೂ ಗಂಭೀರ ವಿಷಯವನ್ನು ವಿರ್ಲಿ ಹಾಸ್ಯವೆಂಬಂತೆ ಬಿಂಬಿಸಿದ್ದಾರೆ. ವಿರ್ಲಿಯ ರೇಪ್ ಜೋಕ್‌ಗೆ ಅಲ್ಲಿದ್ದ ಪ್ರೇಕ್ಷಕರು ನಗುತ್ತಾ ಚಪ್ಪಾಳೆ ತಟ್ಟಿರುವುದು ಆಶ್ಚರ್ಯ!
ಕ್ರೂರ ಅಪರಾಧ ಮತ್ತು ಮಹಿಳೆಯರಿಗೆ ಉಂಟಾಗುವ ಮಾನಸಿಕ ಆಘಾತವನ್ನು ತಮಾಷೆಯಾಗಿ ಬಳಸಿಕೊಂಡಿರುವುದಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ವಿರೋಧ ವ್ಯಕ್ತವಾಗಿದೆ. “ಇದು ಕಾಮಿಡಿ ಅಲ್ಲ, ವಿಕೃತಿ” ಎಂದು ಹಲವರು ಕಿಡಿಕಾರಿದ್ದಾರೆ.
“ಮಧುರ್ ವಿರ್ಲಿಯನ್ನು ಭೇಟಿ ಮಾಡಿ: ಅತ್ಯಾಚಾರ ಯಾವಾಗಿನಿಂದ ಜೋಕ್ ಆದವು? ಒಬ್ಬ ವ್ಯಕ್ತಿಗೆ ಉಂಟಾಗುವ ಮಾನಸಿಕ ಆಘಾತದ ಬಗ್ಗೆ ತಮಾಷೆ ಮಾಡದ ಹೊರತಾಗಿ ಇತರೆ ಜೋಕ್‌ಗಳಿಂದ ನೀವು ಜನರನ್ನು ನಗಿಸಲು ಸಾಧ್ಯವಾಗದಿದ್ದರೆ, ನೀವು ಹಾಸ್ಯಗಾರನೇ ಅಲ್ಲ. ನೋವು ಮತ್ತು ಸಂಕಟವನ್ನು ಅಗ್ಗದ ಹಾಸ್ಯಕ್ಕೆ ಬಳಸುವ ಬದಲು ಪ್ರಾಮಾಣಿಕ ಕೆಲಸವನ್ನು ಹುಡುಕಿ. ಇನ್ನೂ ಅಸಹ್ಯಕರ ಸಂಗತಿಯೆಂದರೆ, ಅಲ್ಲಿ ಕುಳಿತಿರುವ ಪ್ರೇಕ್ಷಕರೂ ಇದಕ್ಕೆ ನಗುತ್ತಿದ್ದಾರೆ. ಅದರಲ್ಲಿ ಕೆಲವು ಹುಡುಗಿಯರೂ ಇರಬಹುದು!” ಎಂದು ನೆಟ್ಟಿಗರೊಬ್ಬರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
“ಮಧುರ್ ವಿರ್ಲಿ ನಿಮಗೆ ನಾಚಿಕೆಯಾಗಬೇಕು! ಅತ್ಯಾಚಾರದ ಬಗ್ಗೆ ತಮಾಷೆ ಮಾಡುತ್ತೀರಾ? ಅಸಹ್ಯಕರವೆಂದರೆ ಪ್ರೇಕ್ಷಕರು ಚಪ್ಪಾಳೆ ತಟ್ಟುವುದು. ಮನುಷ್ಯರು ದಿನದಿಂದ ದಿನಕ್ಕೆ ತಾವು ಕೆಟ್ಟವರು ಎಂದು ಸಾಬೀತುಪಡಿಸುತ್ತಿದ್ದಾರೆ” ಎಂದು ಮತ್ತೋರ್ವ ನೆಟ್ಟಿಗರು ಕಾಮೆಂಟ್ ಮಾಡಿದ್ದಾರೆ.
