ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಪ್ರಣೀತ್ ಮೋರ್ ಕಾಮೆಡಿ ಶೋನಲ್ಲಿ ನಡೆದ ‘370 ರೂ. ಬಿರಿಯಾನಿ’ ಎಂಬ ಹೇಳಿಕೆಯು ಸದ್ಯ ದೇಶಾದ್ಯಂತ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಈ ಸಂಬಂಧ ಪ್ರಣೀತ್ ಮೋರ್‌ಗೆ ರಾಷ್ಟ್ರೀಯ ಮಹಿಳಾ ಆಯೋಗ (NCW) ನೋಟಿಸ್ ನೀಡಿದೆ. ಜತೆಗೆ ಮುಂಬೈನಲ್ಲಿ ಎಫ್‌ಐಆರ್ ಕೂಡ ದಾಖಲಾಗಿದೆ.
ಗುರುಗ್ರಾಮದಲ್ಲಿ ನಡೆದ ಪ್ರಣೀತ್ ಮೋರ್‌ನ ಲೈವ್ ಶೋನಲ್ಲಿ ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದ ವೆಬ್ ಡೆವಲಪರ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಹಿಮಾಂಶು ಜಂಗ್ರಾ ಎಂಬ ಯುವಕ ತನ್ನ ಡೇಟಿಂಗ್ ಕತೆಯನ್ನು ಹಂಚಿಕೊಂಡಿದ್ದ. ಈ ವೇಳೆ ಯುವತಿಗೆ ತಾನು ಬಿರಿಯಾನಿ ಕೊಡಿಸಿದ್ದರಿಂದ ಅದನ್ನು ಆಕೆಯೊಂದಿಗೆ ಲೈಂಗಿಕ ಸುಖ ಪಡೆದು ವಸೂಲಿ ಮಾಡಬೇಕು ಎಂಬಂತೆ ಮಾತನಾಡಿದ್ದ.
ಇದನ್ನು ಓದಿದ್ದೀರಾ? “ನಾಯಕರ ಕೋಣೆಗೆ ಹೋಗದೆ ಮಹಿಳೆಯರಿಗೆ ರಾಜಕೀಯ ಪ್ರವೇಶ ಅಸಾಧ್ಯ”: ಸಂಸದ ಪಪ್ಪು ಯಾದವ್‌ ಹೇಳಿಕೆಗೆ ಮಹಿಳಾ ಆಯೋಗ ನೋಟಿಸ್
“ಡೇಟಿಂಗ್ ಹೋದಾಗ ಯುವತಿಯೊಬ್ಬಳಿಗೆ ಚಿಕನ್ ಬಿರಿಯಾನಿ ಕೊಡಿಸಲು ನಾನು 370 ರೂಪಾಯಿ ಖರ್ಚು ಮಾಡಿದ್ದೆ. ಆಕೆ ಊಟದ ಬಳಿಕ ತನ್ನನ್ನು ಮನೆಗೆ ಬಿಡಲು ಹೇಳಿದಾಗ ‘ನಾನು 370 ರೂ. ಖರ್ಚು ಮಾಡಿದ್ದೇನೆ, ಆ ಹಣವನ್ನು ಹೇಗಾದರೂ ವಸೂಲಿ ಮಾಡಬೇಕಲ್ಲವೇ’ ಎಂದು ಅಂದುಕೊಂಡೆ” ಎಂದು ಹಿಮಾಂಶು ಹೇಳಿದ್ದ. ಅಂದರೆ 370 ರೂಪಾಯಿ ಬಿರಿಯಾನಿ ಕೊಡಿಸಿದ್ದಕ್ಕೆ ಆಕೆ ದೈಹಿಕವಾಗಿ ಸಹಕರಿಸಬಹುದು ಎಂದು ಹೇಳಿದ್ದ.
ಅಷ್ಟು ಮಾತ್ರವಲ್ಲದೆ ಆತ ಮಹಿಳೆಯ ಒಪ್ಪಿಗೆಯಿಲ್ಲದೆ ಬಲವಂತವಾಗಿ ಚುಂಬಿಸಿದಾಗಿಯೂ ಹೇಳಿದ್ದ. ಈ ವೇಳೆ ಅಲ್ಲಿ ನೆರೆದಿದ್ದ ಪ್ರೇಕ್ಷಕರು ಮತ್ತು ಕಾಮೆಡಿಯನ್ ಪ್ರಣೀತ್ ಮೋರ್ ಅದನ್ನು ತಡೆಯುವ ಬದಲು ಜೋರಾಗಿ ನಕ್ಕು, ಚಪ್ಪಾಳೆ ತಟ್ಟಿದ್ದರು. ಬಳಿಕ ಈ ವಿಡಿಯೋ ಕ್ಲಿಪ್ ಅನ್ನು ಸೋಶಿಯಲ್ ಮೀಡಿಯಾದಲ್ಲಿ ಅಪ್‌ಲೋಡ್ ಮಾಡಲಾಗಿತ್ತು. ಇದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಎಚ್ಚೆತ್ತ ರಾಷ್ಟ್ರೀಯ ಮಹಿಳಾ ಆಯೋಗ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿ ಸ್ವಯಂ ಪ್ರೇರಿತವಾಗಿ ಪ್ರಕರಣ ದಾಖಲಿಸಿಕೊಂಡಿದೆ. ಮಹಿಳೆಯರ ಘನತೆಗೆ ಧಕ್ಕೆ ತರುವ ಮತ್ತು ಲೈಂಗಿಕ ದೌರ್ಜನ್ಯವನ್ನು ತಮಾಷೆಯಾಗಿ ಬಿಂಬಿಸುವ ಇಂತಹ ಪ್ರವೃತ್ತಿಯನ್ನು ಆಯೋಗ ಖಂಡಿಸಿದೆ. ಕಾಮೆಡಿಯನ್ ಪ್ರಣೀತ್ ಮೋರ್ ಮತ್ತು ಹೇಳಿಕೆ ನೀಡಿದ ಹಿಮಾಂಶು ಜಂಗ್ರಾಗೆ ಜೂನ್ 22ರಂದು ಆಯೋಗದ ಮುಂದೆ ಹಾಜರಾಗಲು ಸಮನ್ಸ್ ಜಾರಿ ಮಾಡಿದೆ.
ಇನ್ನು ಹರಿಯಾಣ ಪೊಲೀಸ್ ಮಹಾನಿರ್ದೇಶಕರಿಗೆ (DGP) ಪತ್ರ ಬರೆದಿರುವ ಆಯೋಗದ ಅಧ್ಯಕ್ಷೆ ವಿಜಯಾ ರಾಹಟ್ಕರ್, ತಕ್ಷಣವೇ ಕಠಿಣ ಕ್ರಮ ಕೈಗೊಂಡು 7 ದಿನಗಳಲ್ಲಿ ವರದಿ ನೀಡುವಂತೆ ಆದೇಶಿಸಿದ್ದಾರೆ.
ಇನ್ನೊಂದೆಡೆ ಮಹಾರಾಷ್ಟ್ರ ಸೈಬರ್ ಪೊಲೀಸ್ ಇಲಾಖೆಯ ನೋಡಲ್ ಪೊಲೀಸ್ ಠಾಣೆಯಲ್ಲಿ ಪ್ರಣೀತ್ ಮೋರ್, ಹಿಮಾಂಶು ಜಂಗ್ರಾ ಹಾಗೂ ಮತ್ತೊಂದು ವಿವಾದಿತ ವಿಡಿಯೋದಲ್ಲಿದ್ದ ಡಾ. ಸೇಜಲ್ ಪವಾರ್ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗಿದೆ.
ವಿವಾದಾತ್ಮಕ ಹೇಳಿಕೆ ನೀಡಿದ ಹಿಮಾಂಶು ಜಂಗ್ರಾ ಕೆಲಸ ಮಾಡುತ್ತಿದ್ದ ಗುರುಗ್ರಾಮದ ‘ಸ್ಟಾರ್ವಿಕ್ ಡಿಸೈನ್’ ಕಂಪನಿಯು ಆತನನ್ನು ತಕ್ಷಣವೇ ಕೆಲಸದಿಂದ ವಜಾಗೊಳಿಸಿದೆ. ವಿವಾದ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದಂತೆ ಪ್ರಣೀತ್ ಮೋರ್ ಮತ್ತು ಹಿಮಾಂಶು ಇಬ್ಬರೂ ಸಾರ್ವಜನಿಕವಾಗಿ ಕ್ಷಮೆಯಾಚಿಸಿದ್ದಾರೆ. ಸದ್ಯ ಪ್ರಣೀತ್ ಮೋರ್ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯನ್ನು ನಿಷ್ಕ್ರಿಯಗೊಳಿಸಿದ್ದಾರೆ.
ಮುಂಬೈ ಪೊಲೀಸರು ಕೂಡ ತಮ್ಮ ಅಧಿಕೃತ ಖಾತೆಯಲ್ಲಿ ಈ ಬಗ್ಗೆ ಜಾಗೃತಿ ಪೋಸ್ಟ್ ಹಂಚಿಕೊಂಡಿದ್ದು, “370 ರೂಪಾಯಿಗೆ ಬಿರಿಯಾನಿ ಸಿಗುತ್ತದೆಯೇ ಹೊರತು ಮಹಿಳೆಯ ಒಪ್ಪಿಗೆಯಲ್ಲ” (#BiryaniIsNotConsent) ಎಂದು ಖಡಕ್ ಸಂದೇಶ ನೀಡಿದ್ದಾರೆ.
ಡಾ. ಸೇಜಲ್ ಪವಾರ್ ವಿರುದ್ಧವೂ ಆಕ್ರೋಶ
ಇದೇ ಕಾರ್ಯಕ್ರಮದಲ್ಲಿ ವೈದ್ಯಕೀಯ ವಿದ್ಯಾರ್ಥಿನಿ ಡಾ. ಸೇಜಲ್ ಪವಾರ್ ಅವರು ಮಾನವ ಶವಗಳ ಬಗ್ಗೆ ನೀಡಿದ್ದ ವಿವಾದಾತ್ಮಕ ಹೇಳಿಕೆ ತೀವ್ರ ವಿವಾದಕ್ಕೆ ಕಾರಣವಾಗಿದೆ. ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸೇಜಲ್ ಸಾರ್ವಜನಿಕವಾಗಿ ಕ್ಷಮೆಯಾಚಿಸಿದ್ದಾರೆ.
ಮುಂಬೈನ ಕೆಇಎಂ ಆಸ್ಪತ್ರೆಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿರುವ ಡಾ. ಸೇಜಲ್ ಪವಾರ್ ಈ ಕಾರ್ಯಕ್ರಮದಲ್ಲಿ ಮಾತನಾಡುತ್ತಾ ವೈದ್ಯಕೀಯ ಶಿಕ್ಷಣಕ್ಕಾಗಿ ದಾನ ಪಡೆದ ಪುರುಷರ ಶವಗಳ ಖಾಸಗಿ ಅಂಗಗಳ ಗಾತ್ರದ ಬಗ್ಗೆ ತಾವು ಮತ್ತು ತಮ್ಮ ಸಹೋದ್ಯೋಗಿಗಳು ಹಾಸ್ಯ ಮಾಡುವುದಾಗಿ, ಇತರ ದೇಹಗಳ ಗುಪ್ತಾಂಗದ ಜತೆ ಹೋಲಿಕೆ ಮಾಡುವುದಾಗಿ ಹೇಳಿಕೆ ನೀಡಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು.
“ಮಹಿಳೆಯರ ಬಗ್ಗೆ ಅವಹೇಳನಕಾರಿ ಅಥವಾ ಅವರನ್ನು ವಸ್ತುಗಳಂತೆ ನೋಡುವುದು ತಪ್ಪು ಆಗಿರುವಾಗ ಗಂಡಸರ ದೇಹ, ಖಾಸಗಿತನವನ್ನು ಅವಮಾನಿಸುವುದು ಕೂಡ ದೊಡ್ಡ ತಪ್ಪಲ್ಲವೇ” ಎಂದು ನೆಟ್ಟಿಗರು ಪ್ರಶ್ನಿಸಿದ್ದಾರೆ. ಸೇಜಲ್ ವಿರುದ್ಧವೂ ಎಫ್‌ಐಆರ್ ದಾಖಲಾಗಿದೆ.
