ವಾಣಿಜ್ಯ ನಗರಿ ಮುಂಬೈನಲ್ಲಿ ಬೆಚ್ಚಿಬೀಳಿಸುವ ಘಟನೆಯೊಂದು ನಡೆದಿದೆ. ಮನೆಯ ಕೆಟ್ಟ ದೃಷ್ಟಿ ತೆಗೆಯುವುದಾಗಿ ಹಾಗೂ ಪತಿಯ ಕಾಯಿಲೆ ವಾಸಿಮಾಡುವುದಾಗಿ ನಂಬಿಸಿ, ಲಿಂಗತ್ವ ಅಲ್ಪಸಂಖ್ಯಾತನ ವೇಷದಲ್ಲಿ ಮನೆಗೆ ನುಗ್ಗಿದ ವಂಚಕನೊಬ್ಬ ಗಗನಸಖಿಯ ಮೇಲೆ ಅತ್ಯಾಚಾರವೆಸಗಿದ್ದಾನೆ.
ಘಟನೆಗೆ ಸಂಬಂಧಿಸಿದಂತೆ 28 ವರ್ಷದ ಯುವಕನನ್ನು ಪೋವೈ (Powai) ಠಾಣಾ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿಯನ್ನು ಅನಿಲ್ ಶೇಷರಾವ್ ಶಿಂಧೆ ಎಂದು ಗುರುತಿಸಲಾಗಿದೆ.
ಆಗಸ್ಟ್ 18ರಂದು ಈ ಕರಾಳ ಕೃತ್ಯ ನಡೆದಿದೆ. ಆರೋಪಿ ಅನಿಲ್ ಶಿಂಧೆ ಸೀರೆಯುಟ್ಟು, ಅಪ್ಪಟ ಲಿಂಗತ್ವ ಅಲ್ಪಸಂಖ್ಯಾತನ ವೇಷ ಧರಿಸಿ ಸಂತ್ರಸ್ತೆಯ ಮನೆಬಾಗಿಲಿಗೆ ಬಂದಿದ್ದ. ಮಹಿಳೆಯ ಪತಿಗೆ ಅನಾರೋಗ್ಯವಿರುವ ವಿಚಾರವನ್ನು ಮೊದಲೇ ಅರಿತಿದ್ದ ಆತ, ‘ನಿಮ್ಮ ಮನೆಗೆ ಕೆಟ್ಟ ದೃಷ್ಟಿ ಬಿದ್ದಿದೆ. ಪತಿಯ ಕಾಯಿಲೆ ವಾಸಿಯಾಗಬೇಕೆಂದರೆ ದೃಷ್ಟಿ ತೆಗೆಸಬೇಕು’ ಎಂದು ನಂಬಿಸಿದ್ದಾನೆ.
ಆತನ ಮಾತುಗಳನ್ನು ನಂಬಿದ ಗಗನಸಖಿ ಆತನನ್ನು ಮನೆಗೆ ಸೇರಿಸಿದ್ದಾರೆ. ದೃಷ್ಟಿ ತೆಗೆಯುವ ನೆಪದಲ್ಲಿ ಆಕೆಯನ್ನು ಸಮ್ಮೋಹನಗೊಳಿಸಿದಂತೆ (Hypnotise) ನಾಟಕವಾಡಿದ ಆತ, ನೇರವಾಗಿ ಮಲಗುವ ಕೋಣೆಗೆ (ಬೆಡ್‌ರೂಮ್) ತೆರಳಿದ್ದಾನೆ. ಅಲ್ಲಿ ಆಕೆಗೆ ದೈಹಿಕ ಹಲ್ಲೆ ನಡೆಸುವ ಹಾಗೂ ಜೀವ ಬೆದರಿಕೆಯೊಡ್ಡಿ, ಬಲವಂತವಾಗಿ ಅತ್ಯಾಚಾರವೆಸಗಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಘಟನೆಯಿಂದ ತೀವ್ರ ಆಘಾತಕ್ಕೊಳಗಾದ ಸಂತ್ರಸ್ತೆ ತಕ್ಷಣವೇ ಪೋವೈ ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದ್ದಾರೆ. ಪ್ರಕರಣದ ಗಾಂಭೀರ್ಯತೆಯನ್ನು ಅರಿತ ಪೊಲೀಸರು ತ್ವರಿತಗತಿಯಲ್ಲಿ ಕಾರ್ಯಾಚರಣೆ ಆರಂಭಿಸಿದರು. ಆ ಪ್ರದೇಶದ ಸುತ್ತಮುತ್ತಲಿನ ಸಿಸಿಟಿವಿ ಕ್ಯಾಮೆರಾಗಳನ್ನು ಪರಿಶೀಲಿಸಿದಾಗ, ಆರೋಪಿ ಅನಿಲ್ ಕೃತ್ಯ ಎಸಗಿದ ಬಳಿಕ ಆಟೋರಿಕ್ಷಾ ಹತ್ತಿ ಪರಾರಿಯಾಗುತ್ತಿರುವುದು ಸೆರೆಯಾಗಿತ್ತು.
ಆಟೋದ ಜಾಡು ಹಿಡಿದು ಹೊರಟ ಪೊಲೀಸರಿಗೆ, ಆತ ಥಾಣೆ ಜಿಲ್ಲೆಯ ಖಾರೆಗಾಂವ್ (Kharegaon) ಕೊಳೆಗೇರಿ ಪ್ರದೇಶದಲ್ಲಿ ಅಡಗಿ ಕುಳಿತಿರುವುದು ಖಚಿತವಾಗಿದೆ. ಕೃತ್ಯ ನಡೆದ ಕೆಲವೇ ಗಂಟೆಗಳಲ್ಲಿ ಪೊಲೀಸರು ಆತನನ್ನು ಹೆಡೆಮುರಿ ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ.
ವಿಚಾರಣೆ ವೇಳೆ ಆರೋಪಿ ಅನಿಲ್ ಶಿಂಧೆಯ ಕರಾಳ ಮುಖವಾಡ ಕಳಚಿದೆ. ಈತ ಕೇವಲ ನಕಲಿ ಲಿಗತ್ವ ಅಲ್ಪಸಂಖ್ಯಾತ ಮಾತ್ರವಲ್ಲ, ಈ ಹಿಂದೆಯೂ ಭಿಕ್ಷುಕನಂತೆ ವೇಷ ಬದಲಿಸಿ ಅಮಾಯಕ ಜನರಿಗೆ ವಂಚಿಸುತ್ತಿದ್ದ ಎಂಬ ಆಘಾತಕಾರಿ ವಿಚಾರ ಪೊಲೀಸ್ ತನಿಖೆಯಿಂದ ಬಯಲಾಗಿದೆ. ಜನರ ನಂಬಿಕೆ ಹಾಗೂ ದೌರ್ಬಲ್ಯಗಳನ್ನೇ ಬಂಡವಾಳವಾಗಿಸಿಕೊಂಡು ಈತ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗುತ್ತಿದ್ದನು.
ಈ ಘಟನೆಯ ಹಿನ್ನೆಲೆಯಲ್ಲಿ ಮುಂಬೈ ಪೊಲೀಸರು ಸಾರ್ವಜನಿಕರಿಗೆ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದ್ದಾರೆ. “ಮಾಟ-ಮಂತ್ರ, ದೃಷ್ಟಿ ತೆಗೆಯುವವರ ಬಗ್ಗೆ ಸಾರ್ವಜನಿಕರು ಎಚ್ಚರದಿಂದಿರಬೇಕು. ಯಾವುದೇ ಕಾರಣಕ್ಕೂ ಅಪರಿಚಿತ ವ್ಯಕ್ತಿಗಳನ್ನು, ಅವರು ಎಷ್ಟೇ ಪರಿಚಿತರಂತೆ ಅಥವಾ ಯಾವುದೇ ವೇಷದಲ್ಲಿ ಬಂದರೂ ಮನೆಗೆ ಸೇರಿಸಬಾರದು” ಎಂದು ಮನವಿ ಮಾಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.
.
