ದೆಹಲಿ ವಿಧಾನಸಭೆಯ ಮುಂಗಾರು ಅಧಿವೇಶನದ ಕೊನೆಯ ದಿನವಾದ ಮಂಗಳವಾರ, ದೆಹಲಿ ಸರ್ಕಾರದ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯಲ್ಲಿ ಬೃಹತ್ “ಅಕ್ಕಿ ಹಗರಣ” ನಡೆದಿದೆ ಎಂದು ಆರೋಪಿಸಿ ಆಮ್ ಆದ್ಮಿ ಪಾರ್ಟಿ (ಎಎಪಿ) ಶಾಸಕರು ಭಾರಿ ಪ್ರತಿಭಟನೆ ನಡೆಸಿದರು. ಸದನದ ಕಲಾಪಕ್ಕೆ ಅಡ್ಡಿಪಡಿಸಿದ ಹಿನ್ನೆಲೆಯಲ್ಲಿ ಸ್ಪೀಕರ್ ವಿಜೇಂದರ್ ಗುಪ್ತಾ ಅವರ ಆದೇಶದಂತೆ ಎಎಪಿಯ 8 ಶಾಸಕರನ್ನು ಮಾರ್ಷಲ್ಗಳ ಮೂಲಕ ಹೊರಹಾಕಲಾಯಿತು.
ಅಧಿವೇಶನ ಆರಂಭಕ್ಕೂ ಮುನ್ನ, ಎಎಪಿ ಶಾಸಕರು ವಿಧಾನಸಭೆ ಆವರಣದಲ್ಲಿ ವಿರೋಧ ಪಕ್ಷದ ನಾಯಕಿ ಅತಿಶಿ ಅವರ ಕಚೇರಿಯ ಮುಂದೆ ದೊಡ್ಡ ಅಕ್ಕಿ ಚೀಲಗಳನ್ನು ಇಟ್ಟುಕೊಂಡು ಕುಳಿತು ಪ್ರತಿಭಟಿಸಿದರು. “ಬಡವರ ಅಕ್ಕಿ ಎಲ್ಲಿ ಹೋಯಿತು?” (ಗರೀಬ್ ಕಾ ಚಾವಲ್ ಕಹಾ ಗಯಾ?) ಎಂದು ಘೋಷಣೆಗಳನ್ನು ಕೂಗಿದರು. ಮಧ್ಯಾಹ್ನದ ಉಪಾಹಾರದ ನಂತರ ಕಲಾಪ ಪುನರಾರಂಭಗೊಳ್ಳುತ್ತಿದ್ದಂತೆ, ಶಾಸಕರು ಪ್ಲೇಕಾರ್ಡ್ ಹಿಡಿದು ಸದನದ ಭಾವಿಕಿಳಿದು ಆಹಾರ ಸಚಿವ ಮಂಜಿಂದರ್ ಸಿಂಗ್ ಸಿರ್ಸಾ ಅವರ ರಾಜೀನಾಮೆಗೆ ಪಟ್ಟು ಹಿಡಿದರು.
ಇದನ್ನೂ ಓದಿ: ಸದನ ಆರಂಭಕ್ಕೆ ಮುನ್ನವೇ ರದ್ದಾದ ರೇಷನ್ ಕಾರ್ಡ್ ವಾಪಸ್ ನೀಡಿ: ಸರ್ಕಾರಕ್ಕೆ ಆರ್ ಅಶೋಕ್ ಎಚ್ಚರಿಕೆ
ಎಎಪಿ ನಾಯಕರಾದ ಸೌರಭ್ ಭಾರದ್ವಾಜ್ ಮತ್ತು ಸಂಜೀವ್ ಝಾ ಅವರ ಆರೋಪದಂತೆ, ದೆಹಲಿಯ ಬಡವರು ಹಾಗೂ ವಲಸಿಗರಿಗೆ ವಿತರಿಸಲು ಭಾರತೀಯ ಆಹಾರ ನಿಗಮದಿಂದ (FCI) ರಿಯಾಯಿತಿ ದರದಲ್ಲಿ ಪಡೆಯಬೇಕಿದ್ದ ಅಕ್ಕಿಯನ್ನು ಹರ್ಯಾಣದ ಖಾಸಗಿ ಕಂಪನಿಯೊಂದಕ್ಕೆ ಅಕ್ರಮವಾಗಿ ಕಾಳಸಂತೆಯಲ್ಲಿ ಮಾರಾಟ ಮಾಡಲಾಗಿದೆ. ಪ್ರತಿ ವಾರ 31,000 ಮೆಟ್ರಿಕ್ ಟನ್ ಅಕ್ಕಿಯನ್ನು ಡೈವರ್ಟ್ ಮಾಡುವ ಮೂಲಕ 3 ವರ್ಷಗಳಲ್ಲಿ ಸುಮಾರು ₹22,000 ಕೋಟಿ ಮೌಲ್ಯದ ಭ್ರಷ್ಟಾಚಾರ ನಡೆಸಲು ಸಂಚು ರೂಪಿಸಲಾಗಿತ್ತು ಎಂದು ಎಎಪಿ ಆರೋಪಿಸಿದೆ.
ಸದನದ ಮುನ್ನೆಡೆಗೆ ನಿರಂತರ ಅಡ್ಡಿಪಡಿಸಿದ ಕಾರಣ ಸ್ಪೀಕರ್ ವಿಜೇಂದರ್ ಗುಪ್ತಾ ಅವರು ಮಾರ್ಷಲ್ಗಳಿಗೆ ಶಾಸಕರನ್ನು ಹೊರಹಾಕಲು ಸೂಚಿಸಿದರು.
ಹೊರಹಾಕಲ್ಪಟ್ಟ ಶಾಸಕರು ಯಾರು?
- ಸಂಜೀವ್ ಝಾ
- ಜರ್ನೈಲ್ ಸಿಂಗ್
- ಕುಲದೀಪ್ ಕುಮಾರ್
- ಸೋಮ್ ದತ್
- ಅಜಯ್ ದತ್
- ವೀರೇಂದ್ರ ಕಡ್ಯಾನ್
- ಸುರೇಂದ್ರ ಕುಮಾರ್
- ಚೌಧರಿ ಜುಬೇರ್ ಅಹಮದ್
ಆರೋಪಗಳನ್ನು ಸಂಪೂರ್ಣವಾಗಿ ನಿರಾಕರಿಸಿದ ಸಚಿವ ಮಂಜಿಂದರ್ ಸಿಂಗ್ ಸಿರ್ಸಾ, “ದೆಹಲಿ ಸರ್ಕಾರ ಯಾವುದೇ ಅಕ್ಕಿಯನ್ನು ಖರೀದಿಸಿಯೂ ಇಲ್ಲ, ಮಾರಾಟವನ್ನೂ ಮಾಡಿಲ್ಲ” ಎಂದು ಹೇಳಿಕೊಂಡಿದ್ದಾರೆ.
