ಶಿವಸೇನೆ (ಯುಬಿಟಿ) ವಿಭಜನೆಯಾದಂತೆ ನಮ್ಮ ಪಕ್ಷದಲ್ಲಿ ವಿಭಜನೆಯಾಗಲ್ಲ. ನಮ್ಲಕಲ್ಲಿ ಎಲ್ಲರೂ ಒಗ್ಗಟ್ಟಾಗಿದ್ದಾರೆ, ನಿಷ್ಠೆಯಿಂದ ಇದ್ದಾರೆ ಎಂದು ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ (ಶರದ್ಚಂದ್ರ ಪವಾರ್) ಮುಖ್ಯಸ್ಥ ಶರದ್ ಪವಾರ್ ಗುರುವಾರ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಏಕನಾಥ್ ಶಿಂದೆ ಬಂಡಾಯವೆದ್ದ ಬಳಿಕ 2022ರಲ್ಲಿ ಶಿವಸೇನೆ ವಿಭಜನೆಯಾಗಿ ಶಿವಸೇನೆ (ಯುಬಿಟಿ) ಮತ್ತು ಶಿವಸೇನೆ (ಶಿಂದೆ) ಎಂಬ ಎರಡು ರಾಜಕೀಯ ಪಕ್ಷಗಳಾಗಿವೆ. ಉದ್ಧವ್ ಠಾಕ್ರೆ ಬಣದಲ್ಲಿ ಬಿರುಕು ಉಂಟಾಗಿ ಆರು ಸಂಸದರು ಶಿಂದೆ ಬಣಕ್ಕೆ ಸೇರಿದ್ದಾರೆ. ಈ ನಡುವೆ 2023ರಲ್ಲಿ ಎನ್ಸಿಪಿ (ಎಸ್ಪಿ) ಮತ್ತು ಎನ್ಸಿಪಿ ಅಜಿತ್ ಪವಾರ್ ಬಣವಾಗಿ ವಿಭಜನೆಯಾದ ಎನ್ಸಿಪಿಯ ಶರದ್ ಪವಾರ್ ಬಣ ವಿಭಜನೆಯಾಗುವ ಬಗ್ಗೆ ವದಂತಿಗಳು ಹರಿದಾಡುತ್ತಿವೆ.
ಇದನ್ನೂ ಓದಿ: ಏಕನಾಥ್ ಶಿಂಧೆ ಪಾಳಯ ಸೇರಿದ 6 ಶಿವಸೇನೆ (ಯುಬಿಟಿ) ಸಂಸದರು
ಈ ಬಗ್ಗೆ ಸುದ್ದಿಗಾರರೊಂದಿಗೆ ಮಾತನಾಡಿದ ಶರದ್ ಪವಾರ್, “ಶಿವಸೇನೆ ಯುಬಿಟಿ ಸಂಸದರು ಬೇರ್ಪಟ್ಟಿದ್ದಾರೆ. ಆದರೆ ನಮ್ಮ ಯಾವುದೇ ಸಂಸದರು ಬೇರ್ಪಡುವುದಿಲ್ಲ” ಎಂದು ಹೇಳುವ ಮೂಲಕ ಎನ್ಸಿಪಿ (ಎಸ್ಪಿ) ಸಂಸದರು ಮತ್ತು ಶಾಸಕರು ಎನ್ಸಿಪಿಗೆ ಸೇರಲಿದ್ದಾರೆ ಎಂಬ ಊಹಾಪೋಹಗಳಿಗೆ ತೆರೆ ಎಳೆಯುವ ಯತ್ನ ಮಾಡಿದ್ದಾರೆ.
ಈ ಹಿಂದೆ ಉದ್ಧವ್ ಠಾಕ್ರೆ ಬಣದ ಸಂಸದರಾದ ಸಂಜಯ್ ಹರಿಭಾವು ಜಾಧವ್, ಸಂಜಯ್ ದಿನಾ ಪಾಟೀಲ್, ಸಂಜಯ್ ಉತ್ತಮರಾವ್ ದೇಶಮುಖ್, ಭೌಸಾಹೇಬ್ ರಾಜಾರಾಮ್ ವಾಕ್ಚೌರೆ, ಓಂಪ್ರಕಾಶ್ ಭೂಪಾಲಸಿಂಗ್ ನಿಂಬಾಳ್ಕರ್ ಮತ್ತು ನಾಗೇಶ್ ಬಾಪುರಾವ್ ಪಾಟೀಲ್ ಅಶ್ತಿಕರ್ ಇತ್ತೀಚೆಗೆ ಶಿಂದೆ ಬಣ ಸೇರಿದ್ದಾರೆ. ಈ ಬೆಳವಣಿಗೆ ಬೆನ್ನಲ್ಲೇ ಶಿವಸೇನೆ (ಯುಬಿಟಿ) ಸಂಸದ ಅರವಿಂದ್ ಸಾವಂತ್ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರನ್ನು ಭೇಟಿ ಮಾಡಿ ಯಾವುದೇ ನಿರ್ಧಾರ ತೆಗೆದುಕೊಳ್ಳುವ ಮೊದಲು ತಮ್ಮ ಮಾತು ಕೇಳುವಂತೆ ಒತ್ತಾಯಿಸಿದ್ದಾರೆ.
ಸಂಸದ ಅನಿಲ್ ದೇಸಾಯಿ ಅವರೊಂದಿಗೆ ಸ್ಪೀಕರ್ ಅವರನ್ನು ಭೇಟಿಯಾದ ಸಾವಂತ್ ಸಂಸದೀಯ ಪಕ್ಷದ ಸಭೆಯ ನಂತರ ಸ್ಪೀಕರ್ಗೆ ಪತ್ರವನ್ನೂ ಬರೆದಿದ್ದಾರೆ. “ಉದ್ಧವ್ ಠಾಕ್ರೆ ನೇತೃತ್ವದ ಪಕ್ಷದ ನಮ್ಮ ಆರು ಶಿವಸೇನೆ ಸಂಸದರು ಪಕ್ಷವನ್ನು ತೊರೆದು ಬೇರೆ ಪಕ್ಷಕ್ಕೆ ಸೇರಿದ್ದಾರೆಂದು ನಿಮಗೆ ತಿಳಿದಿದೆ. ಅನಿಲ್ ದೇಸಾಯಿ ಮತ್ತು ನಾನು ಕಳೆದ ವಾರ ಲೋಕಸಭಾ ಸ್ಪೀಕರ್ ಅವರನ್ನು ಭೇಟಿ ಮಾಡಿ ಈ ವಿಷಯದ ಬಗ್ಗೆ ವಿನಂತಿಯನ್ನು ಸಲ್ಲಿಸಿದ್ದೇವೆ. ಈ ವಿಚಾರದಲ್ಲಿ ಸ್ಪೀಕರ್ ಸಂವಿಧಾನವನ್ನು ರಕ್ಷಿಸುತ್ತಾರೆ ಎಂಬುದು ನಮ್ಮ ನಿರೀಕ್ಷೆ” ಎಂದು ಹೇಳಿದ್ದಾರೆ.
