ಬಿಕ್ಕಟ್ಟಿನ ಸಂದರ್ಭದಲ್ಲಿ ಜೀವನಾವಶ್ಯಕ ವಸ್ತುಗಳ ಕೊರತೆ ಮತ್ತು ಆರ್ಥಿಕ ಸಂಕಷ್ಟದಿಂದಾಗಿ ಕಳ್ಳತನದ ಪ್ರಕರಣಗಳು ಹೆಚ್ಚಾಗುವುದು ಸಾಮಾನ್ಯವಾಗುತ್ತಿದೆ. ಸದ್ಯ ದೇಶದಲ್ಲಿ ತೈಲ, ಇಂಧನ ಬಿಕ್ಕಟ್ಟು ಕಾಡುತ್ತಿರುವಾಗ ಕಳ್ಳತನ ಪ್ರಕರಣವೂ ಅಧಿಕವಾಗುತ್ತಿದೆ. ವಿತರಣಾ ಟೆಂಪೋದಿಂದ ಐದು ತುಂಬಿದ ಸಿಲಿಂಡರ್ಗಳು ಸೇರಿದಂತೆ ಇಪ್ಪತ್ತೇಳು ಎಲ್ಪಿಜಿ ಸಿಲಿಂಡರ್ಗಳನ್ನು ಕಳವು ಮಾಡಿರುವ ಘಟನೆ ಮುಂಬೈನಲ್ಲಿ ನಡೆದಿದೆ. ಸದ್ಯ ಪ್ರಕರಣದ ತನಿಖೆಯನ್ನು ಪೊಲೀಸರು ಆರಂಭಿಸಿದ್ದಾರೆ.
ಇರಾನ್ ಮೇಲೆ ಅಮೆರಿಕ, ಇಸ್ರೇಲ್ ದಾಳಿ ನಡೆಸಿದ ಬಳಿಕ ದಾಳಿ ಪ್ರತಿದಾಳಿ ನಡೆಯುತ್ತಲೇ ಇದೆ. ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷದಿಂದಾಗಿ ಅನಿಲ ಪೂರೈಕೆಯಲ್ಲಿ ವ್ಯತ್ಯಯವಾಗಿದೆ. ಯುದ್ಧದಿಂದಾಗಿ ಇಂಧನ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಬಹುದು ಎಂಬ ಭೀತಿ ಹೆಚ್ಚಾಗುತ್ತಿದೆ. ಕೆಲವೆಡೆ ಕಪ್ಪು ಮಾರುಕಟ್ಟೆಯಲ್ಲಿ ದುಪ್ಪಟ್ಟು ಬೆಲೆಗೆ ಸಿಲಿಂಡರ್ಗಳ ಮಾರಾಟ ನಡೆಯುತ್ತಿದೆ. ಈ ನಡುವೆ ಅಲ್ಲಲ್ಲಿ ಸಿಲಿಂಡರ್ಗಳ ಕಳ್ಳತನವೂ ನಡೆಯುತ್ತಿದೆ.
ಇದನ್ನು ಓದಿದ್ದೀರಾ? ಮಧ್ಯಪ್ರದೇಶ | ಮನೆಗೆ ನುಗ್ಗಿ ಚಿನ್ನ, ಬೆಳ್ಳಿ ಜತೆ ಎಲ್ಪಿಜಿ ಸಿಲಿಂಡರ್ ಕಳವು!
ಮುಂಬೈನಲ್ಲಿಯೂ ಇದೇ ರೀತಿ ಕಳ್ಳತನ ಸಂಭವಿಸಿದೆ. ಮಾರ್ಚ್ 25ರಂದು ತನ್ನ ಮನೆಯ ಸಮೀಪವಿರುವ ಕಾಕಾ ಕೆನಿ ಚೌಕ್ನಲ್ಲಿ ಎಲ್ಪಿಜಿ ಸಿಲಿಂಡರ್ಗಳನ್ನು ತುಂಬಿದ ತನ್ನ ಟೆಂಪೋವನ್ನು ನಿಲ್ಲಿಸಿದ್ದಾಗಿ ಎಲ್ಪಿಜಿ ಸಿಲಿಂಡರ್ ಸರಬರಾಜು ಮಾಡುವ ನಂದಕುಮಾರ್ ರಾಮರಾಜ್ ಸೋನಿ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.
ಮಾರ್ಚ್ 26ರಂದು ನೋಡಿದಾಗ ಟೆಂಪೋ ಬಾಗಿಲಿನ ಗಾಜು ಒಡೆದು ಹಿಂಭಾಗದ ಬೀಗ ಮುರಿದಿರುವುದು ಕಂಡುಬಂದಿದೆ. ಐದು ತುಂಬಿದ ಮತ್ತು 22 ಖಾಲಿಯಾಗಿರುವ ಎಲ್ಲ 27 ಅಡುಗೆ ಅನಿಲ ಸಿಲಿಂಡರ್ಗಳನ್ನು ವಾಹನದಿಂದ ಕಳವು ಮಾಡಲಾಗಿದೆ ಎಂದು ಸೋನಿ ನೀಡಿದ ದೂರಿನ ಆಧಾರದಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ.
ಈ ಬಗ್ಗೆ ಮಾಧ್ಯಮಕ್ಕೆ ಮಾಹಿತಿ ನೀಡಿರುವ ಅಧಿಕಾರಿಗಳು ಈ ಕಳ್ಳತನದ ಹಿಂದಿರುವವರನ್ನು ಪತ್ತೆ ಹಚ್ಚಲು ತಂಡಗಳನ್ನು ರಚಿಸಲಾಗಿದೆ. ಪ್ರದೇಶದ ಸಿಸಿಟಿವಿ ದೃಶ್ಯಾವಳಿಯಲ್ಲಿ ಹಲವು ಶಂಕಿತರು ಕಂಡುಬಂದಿದ್ದಾರೆ. ಅವರ ಗುರುತು ಪತ್ತೆ ಹಚ್ಚುವ ಪ್ರಯತ್ನ ನಡೆಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
ಹೆಚ್ಚುತ್ತಿರುವ ಸಿಲಿಂಡರ್ ಕಳ್ಳತನ
ಇತ್ತೀಚೆಗೆ ಬೆಂಗಳೂರಿನ ಗೋವಿಂದಪುರದ ನೆಲಮಹಡಿಯ ಮನೆಯೊಂದರಿಂದ ಸಿಲಿಂಡರ್ ಕಳ್ಳತನವಾಗುತ್ತಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಇನ್ನು ಬೇಗೂರಿನ ಆರ್ಸಿ ಲೇಔಟ್ನ ವಿಶ್ವಪ್ರಿಯ ಅಪಾರ್ಟ್ಮೆಂಟ್ ಆವರಣದಲ್ಲಿದ್ದ ಎರಡು ಸಿಲಿಂಡರ್ಗಳನ್ನು ಕಳ್ಳರು ಹೊತ್ತೊಯ್ದಿದ್ದಾರೆ. ಶ್ರೀರಾಮಪುರದಲ್ಲಿ ಗ್ರಾಹಕರಿಗೆ ವಿತರಿಸಲು ತಂದಿದ್ದ 3 ಸಿಲಿಂಡರ್ಗಳು ಕಳ್ಳತನವಾಗಿವೆ ಎಂದು ವರದಿಯಾಗಿದೆ.
ಇದನ್ನು ಓದಿದ್ದೀರಾ? ಮೋದಿ ಸರ್ಕಾರಕ್ಕೆ ದಿಕ್ಕು ದೆಸೆಯಿಲ್ಲ, ರಣನೀತಿಯೂ ಇಲ್ಲ: ಹಣದುಬ್ಬರದ ಬಗ್ಗೆ ರಾಹುಲ್ ಎಚ್ಚರಿಕೆ
ಇನ್ನು ರಾಮನಗರದ ಬಿಡದಿ ಸಮೀಪದ ಬನ್ನಿಕುಪ್ಪೆಯಲ್ಲಿ ವಾಹನವೊಂದರಲ್ಲಿ ಇರಿಸಲಾಗಿದ್ದ 8 ಸಿಲಿಂಡರ್ಗಳನ್ನು ಕದ್ದಿದ್ದ ಇಬ್ಬರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಮಾರ್ಚ್ 13ರಂದು ಕೇರಳದ ತಿರುವನಂತಪುರಂನಲ್ಲಿ ಹೋಟೆಲ್ ಒಂದರ ಕಿಟಕಿ ಒಡೆದು ಒಳನುಗ್ಗಿದ ಕಳ್ಳರು ವಾಣಿಜ್ಯ ಸಿಲಿಂಡರ್ ಕದ್ದಿದ್ದಾರೆ.
ಕೋವಿಡ್ ಸಂದರ್ಭದಲ್ಲಿಯೂ ಇದೇ ರೀತಿ ಕಳ್ಳತನ ಪ್ರಕರಣಗಳು ಹೆಚ್ಚಳವಾಗಿದ್ದವು. ಜನರು ಮನೆಯಲ್ಲೇ ಉಳಿಯಬೇಕಾದ ನಿಯಮ ಇದ್ದ ಕಾರಣ ಮನೆಗಳಲ್ಲಿ ನಡೆಯುವ ಕಳ್ಳತನವು ಜಾಗತಿಕವಾಗಿ ಕಡಿಮೆಯಾದವು. ಆದರೆ ಅಂಗಡಿ, ಮುಗ್ಗಟ್ಟುಗಳಲ್ಲಿ ಕಳ್ಳತನ ಅಧಿಕವಾದವು. ಲಾಕ್ಡೌನ್ ಸಮಯದಲ್ಲಿ ಅಂಗಡಿ, ಕಚೇರಿ ಮೊದಲಾದವು ದೀರ್ಘಕಾಲ ಮುಚ್ಚಿದ್ದವು. ಹೀಗಿರುವಾಗ ನಿರ್ಜನ ಪ್ರದೇಶಗಳನ್ನೇ ಗುರಿಯಾಗಿಸಿಕೊಂಡು ನಡೆದ ಕಳ್ಳತನ ಪ್ರಕರಣಗಳಲ್ಲಿ ಸುಮಾರು ಶೇಕಡ 37ರಷ್ಟು ಏರಿಕೆ ಕಂಡು ಬಂದಿದ್ದವು. ಕೆಲಸ ಕಳೆದುಕೊಂಡವರು ಮತ್ತು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದವರು ಜೀವನೋಪಾಯಕ್ಕಾಗಿ ಸಣ್ಣಪುಟ್ಟ ಕಳ್ಳತನಗಳಲ್ಲಿ ತೊಡಗಿದ ಪ್ರಕರಣಗಳು ವರದಿಯಾದವು. ಹೆಚ್ಚಾಗಿ ಆಹಾರ ಪದಾರ್ಥಗಳ ಕಳ್ಳತನ ಕಂಡುಬಂದಿತ್ತು.
