ಇನ್ನು ಮುಂದೆ ಕೋಟ್ಯಂತರ WhatsApp ಬಳಕೆದಾರರು ತಮ್ಮ ವೈಯಕ್ತಿಕ ಫೋನ್ ನಂಬರ್‌ನ್ನು ಇತರರೊಂದಿಗೆ ಹಂಚಿಕೊಳ್ಳದೆಯೂ ಚಾಟ್ ಮಾಡುವ ಸೌಲಭ್ಯವನ್ನು ಪಡೆಯಲಿದ್ದಾರೆ. ಈ ಮಹತ್ವದ ಅಪ್‌ಡೇಟ್ ಬಗ್ಗೆ ಮೆಟಾ ಒಡೆತನದ ವಾಟ್ಸಾಪ್ ಸೋಮವಾರ ಅಧಿಕೃತವಾಗಿ ಘೋಷಿಸಿದೆ.
ಬಳಕೆದಾರರ ಫೋನ್ ಸಂಖ್ಯೆಯ ಗೌಪ್ಯತೆಯನ್ನು ರಕ್ಷಿಸುವ ಉದ್ದೇಶದಿಂದ ಈ ಹೊಸ ವೈಶಿಷ್ಟ್ಯವನ್ನು ತರಲಾಗುತ್ತಿದೆ. ಇನ್ನು ಮುಂದೆ ಬಳಕೆದಾರರು ತಮ್ಮದೇ ಆದ ವಿಶಿಷ್ಟವಾದ ‘ಯೂಸರ್ ನೇಮ್’ (Unique Username) ಅನ್ನು ಆಯ್ಕೆ ಮಾಡಿಕೊಳ್ಳಬಹುದು. ಈ ಯೂಸರ್ ನೇಮ್ ಅನ್ನು ಹಂಚಿಕೊಳ್ಳುವ ಮೂಲಕ ಇತರರೊಂದಿಗೆ ಸಂವಹನ ನಡೆಸಬಹುದು.
ಈ ಹೊಸ ಅಪ್‌ಡೇಟ್‌ನಿಂದಾಗಿ, ನೀವು ದೊಡ್ಡ ಗ್ರೂಪ್‌ಗಳಿಗೆ ಸೇರುವಾಗ ಅಥವಾ ಹೊಸ ವ್ಯಕ್ತಿಗಳು ಅಥವಾ ಸಂಸ್ಥೆಗಳೊಂದಿಗೆ ಮೊದಲ ಬಾರಿಗೆ ಮೆಸೇಜ್ ಮಾಡುವಾಗ ನಿಮ್ಮ ಫೋನ್ ಸಂಖ್ಯೆ ಆಟೋಮ್ಯಾಟಿಕ್ ಆಗಿ ಇತರರಿಗೆ ಕಾಣುವುದಿಲ್ಲ. ಇದರಿಂದ ಬಳಕೆದಾರರ ವೈಯಕ್ತಿಕ ಫೋನ್ ಸಂಖ್ಯೆ ಹೆಚ್ಚು ಸುರಕ್ಷಿತವಾಗಿರುತ್ತದೆ.
ಮೆಟಾ ಕಂಪನಿಯು ಸ್ಪಷ್ಟಪಡಿಸಿರುವಂತೆ, ವಾಟ್ಸಾಪ್‌ನಲ್ಲಿ ಯಾವುದೇ ‘ಡೈರೆಕ್ಟರಿ’ ಅಥವಾ ಸರ್ಚ್ ಆಯ್ಕೆ ಇರುವುದಿಲ್ಲ. ಯಾರಾದರೂ ನಿಮ್ಮನ್ನು ಸಂಪರ್ಕಿಸಬೇಕೆಂದರೆ, ಅವರು ನಿಮ್ಮ ನಿಖರವಾದ ಯೂಸರ್ ನೇಮ್ ಅನ್ನು ತಿಳಿದಿರಲೇಬೇಕು. ಪ್ರಪಂಚದಾದ್ಯಂತ ಮೂರು ಬಿಲಿಯನ್‌ಗೂ ಹೆಚ್ಚು ಬಳಕೆದಾರರಿರುವುದರಿಂದ, ಎಲ್ಲರಿಗೂ ತಮ್ಮ ಮೊದಲ ಆಯ್ಕೆಯ ಹೆಸರು ಸಿಗುವುದು ಕಷ್ಟವಾಗಬಹುದು. ಹೀಗಾಗಿ, ಮುಂದಿನ ಕೆಲವು ತಿಂಗಳುಗಳಲ್ಲಿ ಈ ಸೌಲಭ್ಯವನ್ನು ಹಂತ ಹಂತವಾಗಿ ಜಾರಿಗೆ ತರಲಾಗುವುದು ಎಂದು ಕಂಪನಿ ತಿಳಿಸಿದೆ. ಆಯಾ ದೇಶಗಳಲ್ಲಿ ಈ ಆಯ್ಕೆ ಲಭ್ಯವಾದಾಗ ಬಳಕೆದಾರರಿಗೆ ಸೂಚನೆ ನೀಡಲಾಗುವುದು ಎಂದು ಮೆಟಾ ತಿಳಿಸಿದೆ.
ಇದನ್ನೂ ಓದಿ: ಪ್ರಜಾಸತ್ತೆಯ ಮೇಲೆ ಧರ್ಮಸತ್ತೆಯ ಹಿಡಿತ: ಅಕಾಲ್ ತಖ್ತ್ ಮುಂದೆ ತಲೆಬಾಗಿದ ಪಂಜಾಬ್ ಸರ್ಕಾರ
ಈ ಹೊಸ ಸೌಲಭ್ಯದಲ್ಲಿ ಕ್ರಿಯೇಟರ್‌ಗಳು, ಸಣ್ಣ ಉದ್ಯಮಿಗಳು ಮತ್ತು ವಿವಿಧ ಸಂಸ್ಥೆಗಳಿಗೆ ಹೆಚ್ಚಿನ ಲಾಭವಾಗಲಿದೆ. ಅವರು ಈಗಾಗಲೇ ಫೇಸ್‌ಬುಕ್ ಅಥವಾ ಇನ್‌ಸ್ಟಾಗ್ರಾಮ್‌ನಲ್ಲಿ ಬಳಸುತ್ತಿರುವ ತಮ್ಮ ಯೂಸರ್ ನೇಮ್‌ಗಳನ್ನೇ ವಾಟ್ಸಾಪ್‌ಗೂ ಪಡೆಯಲು ಅವಕಾಶ ನೀಡಲಾಗುವುದು ಎಂದು ಮೆಟಾ ಮಾಹಿತಿ ನೀಡಿದೆ.
