ಯಾವಾಗಲೂ ಹಿಂಸಾಚಾರದ ವಿರುದ್ಧ ಮಾತನಾಡುವ ಮತ್ತು ರಾಷ್ಟ್ರಕ್ಕೆ ಕೊಡುಗೆ ನೀಡಿ 30 ಪ್ರಶಸ್ತಿಗಳನ್ನು ಪಡೆದಿರುವ ತಮ್ಮನ್ನು ಈಗ ಅಪರಾಧಿ ಎಂದು ಬಿಂಬಿಸಲಾಗುತ್ತಿದೆ ಎಂದು ಲಡಾಖ್ ಹೋರಾಟಗಾರ, ಪರಿಸರವಾದಿ ಸೋನಮ್ ವಾಂಗ್ಚುಕ್ ಅವರು ಸುಪ್ರೀಂ ಕೋರ್ಟ್‌ಗೆ ತಮ್ಮ ವಕೀಲರ ಮೂಲಕ ತಿಳಿಸಿದ್ದಾರೆ.
ಲಡಾಖ್‌ಗೆ ರಾಜ್ಯ ಸ್ಥಾನಮಾನ ನೀಡಬೇಕು ಮತ್ತು ಸಂವಿಧಾನದ ಆರನೇ ಅಡಿಯಲ್ಲಿ ಲಡಾಖ್ ಅನ್ನು ಸೇರಿಸಬೇಕು ಎಂದು ಒತ್ತಾಯಿಸಿ ಸೋನಮ್ ವಾಂಗ್ಚುಕ್ ಹಲವು ಬಾರಿ ಪ್ರತಿಭಟನೆ ನಡೆಸಿದ್ದಾರೆ, ಉಪವಾಸ ಸತ್ಯಾಗ್ರಹ ನಡೆಸಿದ್ದಾರೆ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಸೋನಮ್ ಉಪವಾಸ ನಡೆಸುತ್ತಿದ್ದ ಶಹೀದ್‌ ಪಾರ್ಕ್‌ನ ಹೊರಭಾಗದಲ್ಲಿ ಹಿಂಸಾಚಾರ ನಡೆದಿದ್ದು, ನಾಲ್ವರು ಗುಂಡೇಟಿಗೆ ಬಲಿಯಾಗಿದ್ದಾರೆ. ಇದಾದ ಬಳಿಕ ಹಿಂಸಾಚಾರಕ್ಕೆ ಸೋನಮ್ ಭಾಷಣವೇ ಕಾರಣ ಎಂದು ಆರೋಪಿಸಿ ಕಠಿಣ ರಾಷ್ಟ್ರೀಯ ಭದ್ರತಾ ಕಾಯ್ದೆಯಡಿ (ಎನ್‌ಎಸ್‌ಎ) ಅಡಿಯಲ್ಲಿ ಬಂಧಿಸಲಾಗಿದೆ.
ಇದನ್ನು ಓದಿದ್ದೀರಾ? ಸೋನಮ್ ವಾಂಗ್ಚುಕ್ ಜೈಲು ಸೇರಿ 100 ದಿನ: ಲಡಾಖ್ ಜನರಿಗಾಗಿ ಧ್ವನಿಯೆತ್ತಿ ಮೋದಿ ಶತ್ರುವಾದರೆ?
ಇದಾದ ಬಳಿಕ ಸೋನಮ್ ಪತ್ನಿ, ಶಿಕ್ಷಕಿ ಗೀತಾಂಜಲಿ ಆಂಗ್ಮೋ ಈ ಬಂಧನವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಆಂಗ್ಮೋ ಪರವಾಗಿ ಹಾಜರಾದ ಹಿರಿಯ ವಕೀಲ ಕಪಿಲ್ ಸಿಬಲ್, ವಾಂಗ್ಚುಕ್ ಬಂಧನವನ್ನು ಸಮರ್ಥಿಸಲು ಪ್ರಾಸಿಕ್ಯೂಷನ್ ಬಳಸುತ್ತಿರುವ ವೀಡಿಯೊಗಳನ್ನು ಪ್ರತಿವಾದಿಗಳಿಗೆ ಒದಗಿಸಲಾಗಿಲ್ಲ ಎಂದು ಹೇಳಿದರು.
“ಬಂಧನದ ಎಲ್ಲಾ ಆಧಾರಗಳನ್ನು ಒದಗಿಸದಿದ್ದರೆ, ಅದು ಬಂಧನದ ಕ್ರಮವನ್ನು ಉಲ್ಲಂಘಿಸುತ್ತದೆ ಎಂದು ಕಾನೂನು ಹೇಳುತ್ತದೆ. ಸಂವಿಧಾನದ 22 ನೇ ವಿಧಿಯು ಎಲ್ಲಾ ಭಾರತೀಯರನ್ನು ಈ ರೀತಿಯ ಬಂಧನದಿಂದ ರಕ್ಷಿಸುತ್ತದೆ. ಬಂಧನಕ್ಕೆ ತಡೆ ನೀಡಲು ಅವಕಾಶವಿಲ್ಲದ ಕಾನೂನಿನಡಿಯಲ್ಲಿ ಬಂಧನ ಮಾಡಿದಾಗ ಅಧಿಕಾರಿಯು ಸಾಧ್ಯವಾದಷ್ಟು ಬೇಗ ಯಾವ ಆಧಾರದಲ್ಲಿ ಬಂಧಿಸಲಾಗಿದೆ ಎಂದು ಆ ವ್ಯಕ್ತಿಗೆ ತಿಳಿಸಬೇಕು. ಬಂಧನ ಆದೇಶ ವಿರುದ್ಧ ವಾದಿಸಲು ಆರಂಭಿಕ ಅವಕಾಶವನ್ನು ನೀಡಬೇಕು ಎಂದು ಸಂವಿಧಾನದ ವಿಧಿ 22 (5) ಹೇಳುತ್ತದೆ” ಎಂದು ಕಪಿಲ್ ಸಿಬಲ್ ವಿವರಿಸಿದ್ದಾರೆ.
“ದಯವಿಟ್ಟು ಬಂಧನ ಆದೇಶವನ್ನು ನೋಡಿ. ನನ್ನ ಬಂಧನದ ವೇಳೆ ಸಾರ್ವಜನಿಕ ಸುವ್ಯವಸ್ಥೆಯ ಮೇಲೆ ಪರಿಣಾಮ ಬೀರುವ ಕಾರಣ ನೀಡಲಾಗಿದೆ. ನನ್ನನ್ನು ಬಂಧಿಸದಿದ್ದರೆ, ಅದು ಸಾರ್ವಜನಿಕ ಸುವ್ಯವಸ್ಥೆ, ನಿರ್ವಹಣೆಗೆ ಅಡ್ಡಿಯಾಗುತ್ತದೆ ಮತ್ತು ಭದ್ರತೆಗೆ ಬೆದರಿಕೆಯಾಗುತ್ತದೆ ಎಂದು ವಾದಿಸಲಾಗಿದೆ. ಆದರೆ ನನ್ನ ಚಟುವಟಿಕೆಗಳನ್ನು ಮುಂದುವರಿಸದಂತೆ ತಡೆಯುವುದು ಇದರ ಉದ್ದೇಶ. ನನ್ನನ್ನು ಸೆಪ್ಟೆಂಬರ್ 26ರಂದು ಬಂಧಿಸಲಾಗಿದೆ. ಸೆಪ್ಟೆಂಬರ್ 10ರಂದು ನಾನು ಉಪವಾಸ ಸತ್ಯಾಗ್ರಹ ನಡೆಸಿದೆ. ನನ್ನ ಉಪವಾಸ ಸತ್ಯಾಗ್ರಹದ 15ನೇ ದಿನದಂದು, ಹಿಂಸಾಚಾರದ ಘಟನೆಗಳು ನಡೆದವು. ಅದರಿಂದ ನಾನೂ ತುಂಬಾ ತೊಂದರೆಗೀಡಾದೆ. ನಾನು 24 ರಂದು ನನ್ನ ಉಪವಾಸ ಸತ್ಯಾಗ್ರಹವನ್ನು ಮುರಿದು ಹಿಂಸಾಚಾರವನ್ನು ನಿಲ್ಲಿಸಬೇಕೆಂದು ಭಾಷಣ ಮಾಡಿದ್ದೇನೆ” ಎಂದು ಸಿಬಲ್ ವಾಂಗ್ಚುಕ್ ಪರವಾಗಿ ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ಲಡಾಖ್ ಗ್ರೌಂಡ್ ರಿಪೋರ್ಟ್ ಸರಣಿ-2 | ‘ಥ್ರೀ ಇಡಿಯಟ್ಸ್’ ಸಿನಿಮಾದ ಸ್ಪೂರ್ತಿ ಸೋನಮ್ ವಾಂಗ್ಚುಕ್ ಮೇಲೆ ಕೇಂದ್ರದ ಕೆಂಗಣ್ಣೇಕೆ?
“ನಾನು ಈ ಹಿಂಸಾಚಾರವನ್ನು ಒಪ್ಪಲು ಸಾಧ್ಯವಿಲ್ಲ. ನಾವು ಈ ಹಿಂಸಾಚಾರವನ್ನು ನಿಲ್ಲಿಸಬೇಕು ಎಂದು ನಾನು ಹೇಳಿದೆ. ಈ ಹಿಂಸಾಚಾರವನ್ನು ನಿಲ್ಲಿಸುವಂತೆ ನಾನು ನಿಮಗೆ ಮನವಿ ಮಾಡುತ್ತಿದ್ದೇನೆ. ವಿಡಿಯೋವನ್ನು ನೀವು ನೋಡಬಹುದು. ಚೌರಿ ಚೌರಾ ಘಟನೆಯ ನಂತರ ಹಿಂಸಾಚಾರ ನಡೆದಾಗ ಗಾಂಧೀಜಿಯವರು ಇದೇ ರೀತಿ ಉಪವಾಸ ಮುರಿದಿದ್ದರು ಎಂದು ನೀವು ನೆನಪಿಸಿಕೊಳ್ಳಬಹುದು. ನಾನು ಅಪರಾಧಿ ಎಂದು ತೋರಿಸಲು ಸತ್ಯವನ್ನು ತಿರುಚಲಾಗುತ್ತಿದೆ” ಎಂದು ದೂರಿದರು.
“ವಾಸ್ತವವಾಗಿ, ನನ್ನ ಭಾಷಣವು ನಾನು ಹಿಂಸಾಚಾರವನ್ನು ವಿರೋಧಿಸುತ್ತೇನೆ ಎಂದು ಹೇಳುತ್ತದೆ. ನನ್ನನ್ನು ಬಂಧಿಸದಿದ್ದರೆ, ಹಿಂಸಾಚಾರ ಮುಂದುವರಿಯುತ್ತದೆ ಎಂದು ಭಾವಿಸಲಾಗಿದೆ. ಆದರೆ ಉದ್ದೇಶ ಬೇರೆಯೇ ಆಗಿದೆ” ಎಂದು ಸಿಬಲ್ ಅವರು ಸೋನಮ್ ಪರವಾಗಿ ಹೇಳಿದ್ದು, ವಿಡಿಯೋವನ್ನು ನ್ಯಾಯಾಲಯದಲ್ಲಿ ಕೇಳಿಸಲಾಗಿದೆ.
“ಮುಖ್ಯ ವಿಷಯವೆಂದರೆ ಅವರು ನಾಲ್ಕು ವೀಡಿಯೊಗಳನ್ನು ಉಲ್ಲೇಖಿಸಿದ್ದಾರೆ. ಆದರೆ 24ರಂದು ಮಾಡಿದ ಭಾಷಣದ ವೀಡಿಯೊ ಅವರಿಗೂ ಲಭ್ಯವಿತ್ತು. ಅವರಿಗೆ ಅದರ ಬಗ್ಗೆ ತಿಳಿದಿತ್ತು. ಬಂಧನ ನಿರ್ಧಾರಕ್ಕೆ ಬರುವ ಮೊದಲು ಎಲ್ಲಾ ಸಂಗತಿಗಳನ್ನು ಪರಿಶೀಲಿಸಲು ವೀಡಿಯೊವನ್ನು ಹಸ್ತಾಂತರಿಸುವುದು ಅವರ ಕರ್ತವ್ಯವಲ್ಲವೇ” ಎಂದು ಸಿಬಲ್ ವಾದಿಸಿದ್ದಾರೆ. ಇನ್ನು ಪ್ರಕರಣದ ವಿಚಾರಣೆ ಸೋಮವಾರ ನಡೆಯಲಿದೆ.
