ಬಿಜೆಪಿ ಮುಖಂಡ, ಧಾರವಾಡ ಜಿಲ್ಲಾ ಪಂಚಾಯತ್ ಸದಸ್ಯ ಯೋಗೀಶ್ ಗೌಡ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿರುವ ಶಾಸಕ ವಿನಯ್ ಕುಲಕರ್ಣಿ ಅವರ ಜಾಮೀನು ಅರ್ಜಿಯನ್ನು ನ್ಯಾಯಾಲಯ ವಜಾಗೊಳಿಸಿದೆ. ವಿಜಯ್ ಕುಲಕರ್ಣಿ ಅವರ ಜೈಲುವಾಸ ಮುಂದುವರೆದಿದೆ.
2016ರ ಜೂನ್‌ 15ರಂದು ಯೋಗೀಶ್ ಗೌಡ ಹತ್ಯೆಯಾಗಿತ್ತು. ಪ್ರಕರಣದ ತನಿಖೆ ನಡೆಸಿದ್ದ ಸಿಬಿಐ, ಕಾಂಗ್ರೆಸ್ ಶಾಸಕ ವಿನಯ್ ಕುಲಕರ್ಣಿ ಅವರನ್ನು ಆರೋಪಿಯನ್ನಾಗಿ ಸೇರಿಸಿ, ಬಂಧಿಸಿತ್ತು. ಬಳಿಕ, ವಿನಯ್ ಕುಲಕರ್ಣಿ ಜಾಮೀನು ಪಡೆದು ಹೊರ ಬಂದಿದ್ದರು. 2023ರ ವಿಧಾನಸಭಾ ಚುನಾವಣೆಯಲ್ಲಿ ಧಾರವಾಡ ಪ್ರವೇಶದ ನಿರ್ಬಂಧ ನಡುವೆಯೂ ಧಾರವಾಡದಿಂದ ಸ್ಪರ್ಧಿಸಿ, ಗೆದ್ದಿದ್ದರು.
ಆದರೆ, ವಿನಯ್ ಕುಲಕರ್ಣಿ ಅವರ ಜಾಮೀನನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿದ್ದರಿಂದ, 2025ರ ಜೂನ್‌ 13ರಂದು ಕಾಂಗ್ರೆಸ್ ಶಾಸಕ ಮತ್ತೆ ಜೈಲು ಸೇರಬೇಕಾಯಿತು. ಬಳಿಕ, ಜಾಮೀನು ಕೋರಿ ಮತ್ತೆ ಅರ್ಜಿ ಸಲ್ಲಿಸಿದ್ದರು.
ಅವರ ಅರ್ಜಿಯ ವಿಚಾರಣೆ ನಡೆಸಿರುವ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ, ಅವರ ಅರ್ಜಿಯನ್ನು ತಿರಸ್ಕರಿಸಿದೆ. ಯೋಗೇಶ್ ಗೌಡ ಹತ್ಯೆ ಪ್ರಕರಣದ 15ನೇ ಆರೋಪಿಯಾಗಿರುವ ಶಾಸಕ ವಿನಯ್ ಕುಲಕರ್ಣಿ ಅವರು ಸಾಕ್ಷಿಗಳ ಮೇಲೆ ಒತ್ತಡ ಹಾಕಿದ್ದಾರೆ ಎಂಬ ಆರೋಪದ ಕಾರಣಕ್ಕಾಗಿ ಅವರ ಜಾಮೀನು ಅರ್ಜಿ ತಿರಸ್ಕೃತಗೊಂಡಿದೆ ಎಂದು ವರದಿಯಾಗಿದೆ.
ಜಾಮೀನು ಪಡೆದು ಹೊರಬಂದರೆ, ಈ ಬಾರಿ ಸಂಪುಟ ಪುನರ್‌ರಚನೆ ವೇಳೆ ತಮಗೂ ಮಂತ್ರಿಗಿರಿ ದೊರೆಯುತ್ತದೆ ಎಂದು ವಿನಯ್ ಎದುರು ನೋಡುತ್ತಿದ್ದರು. ಆದರೆ, ಜಾಮೀನು ಅರ್ಜಿಯ ವಜಾದಿಂದಾಗಿ, ಕಾಂಗ್ರೆಸ್ ಶಾಸಕ ಜೈಲಿನಲ್ಲಿಯೇ ಇರಬೇಕಾಗಿದ್ದು, ಮಂತ್ರಿಯಾಗುವ ಬಯಕೆ ಕನಸಾಗಿಯೇ ಉಳಿಯಲಿದೆ.
