ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಈ ಬಾರಿ ಇರಾನಿನ ಆಧುನಿಕ ಕವಿ ಹಮೀದ್ ಸಬ್ಜುವಾರಿ ಅವರ ‘ಅಲೆಗಳು ಸಮುದ್ರವನ್ನು ಜೀವಂತವಾಗಿಡುತ್ತವ‘ ಕವಿತೆಯನ್ನು ನಿಮ್ಮ ಮುಂದಿಟ್ಟಿದ್ದಾರೆ ಹಿರಿಯ ಅನುವಾದಕಿ ಸಿ ಎಚ್‌ ಭಾಗ್ಯ
ಅಲೆಗಳು ಸಮುದ್ರವನ್ನು ಜೀವಂತವಾಗಿಡುತ್ತವೆ
ದಡದ ಮೇಲೆ ನಿರುಮ್ಮಳವಾಗಿ ಕುಳಿತಿರುವವರಿಗೆ ತಿಳಿದಿರಬೇಕು
ಈ ಸಮುದ್ರವನ್ನು ಪಳಗಿಸುವುದು ಶಾಂತಗೊಳಿಸುವುದು ಅಸಾಧ್ಯ ಎಂದು
ಅವರು ಇದನ್ನು ಶಾಂತಗೊಳಿಸಲು ಯತ್ನಿಸದಿರಲಿ
ಏಕೆಂದರೆ,
ಸಮುದ್ರವು ಶಾಂತಿ, ಧ್ಯಾನಕ್ಕೆಂದೂ ತವಕಿಸದು
ಸಮುದ್ರ ಸಮುದ್ರವೇ ಆಗಿರುವವರೆಗೆ ಪ್ರಕ್ಷುಬ್ಧ ಅಶಾಂತ
ಭೋರ್ಗರೆವ ಅಲೆಗಳು ಸುಂಟರಗಾಳಿ
ಇದರ ತುಂಬಾ ತುಂಬಿದೆ
ಈ ಬೇಗುದಿಯ ಸಮುದ್ರವು
ಹಳ್ಳಕೊಳ್ಳದ ಭಾಷೆಯಲ್ಲಿ ಮಾತಾಡಬೇಕೆಂದು ಬಯಸಬೇಡ.
ನಾವು ಕಡಲ ಮೀನುಗಳು
ಕಡಲ ಮೀನುಗಳಿಗೆ ತಳಮಳಿಸುವ ಅಲೆಗಳೇ ಹಾಸಿಗೆ
ಇದೇ ಅವುಗಳ ಹಾಡ
ಅಲೆಗಳು ಸಮುದ್ರವನ್ನು ಜೀವಂತವಾಗಿಡುತ್ತವೆ
ನಾವಾದರೋ ಕಡಲ ಮೀನುಗಳ
ಕಡಲ ಮೀನುಗಳು ಸಮುದ್ರದಾಳದ ಮಬ್ಬಿನಲ್ಲಿ ಬೇಟೆಯಾಡುತ್ತವೆ.
ಸಮುದ್ರವನ್ನೆದುರಿಸುವ ಧೀರನಿಗೆ
ಶಾಂತಿ ಸಮಾಧಾನಕ್ಕೆ ಹಾತೊರೆಯುವುದಕ್ಕಿಂತ
ಸಾವು ರುಚಿ
ಈ ಖುಷಿ ರೋಮಾಂಚನವು
ಸಮುದ್ರ ಇರುವವರೆಗೂ ಇದ್ದೇ ಇರುವುದು
ದಡದಮೇಲೆ ಶಾಂತವಾಗಿ ಕುಳಿತಿರುವವರಿದನ್ನು ತಿಳಿಯಬೇಕು
ಅವರು ಸಮುದ್ರದ ಜೊತೆ ಒಪ್ಪಂದ, ರಾಜಿಯನು ನಿರೀಕ್ಷಿಸಲೂ ಬಾರದು
ಅಲೆಗಳಿಗೂ ದಡಕ್ಕೂ ಒಪ್ಪಂದ
ಆಗದ ಮಾತು
