ಭಾರಿ ಕುತೂಹಲ ಕೆರಳಿಸಿದ್ದ ಮೋದಿಯವರ ‘ಸ್ನೂಪ್‌ಗೇಟ್’ ಮತ್ತು ‘ಖಾಸಗಿ ಸಿಡಿ’ ಪ್ರಕರಣದ ಅಂತ್ಯವು ಹಲವು ರಾಜಕೀಯ ಅನುಮಾನಗಳಿಗೆ ಎಡೆಮಾಡಿಕೊಟ್ಟಿತು. ಅಧಿಕೃತ ನ್ಯಾಯಾಲಯದ ದಾಖಲೆಗಳ ಪ್ರಕಾರ, ಪ್ರದೀಪ್ ಶರ್ಮಾ ಅವರ ಪರ ವಕೀಲರು ದಿಢೀರನೆ ಮೋದಿಯವರ ಮೇಲಿದ್ದ ‘ವೈಯಕ್ತಿಕ ಆರೋಪಗಳನ್ನು’ ಹಿಂಪಡೆದರು. ಹೀಗೆ ಅರ್ಜಿದಾರರೇ ಸ್ವತಃ ಆರೋಪಗಳಿಂದ ಹಿಂದೆ ಸರಿದಿದ್ದರಿಂದ, ಸುಪ್ರೀಂ ಕೋರ್ಟ್ 2014ರಲ್ಲಿ ತನಿಖೆಯ ಅರ್ಜಿಯನ್ನು ವಜಾಗೊಳಿಸಿತು. ನ್ಯಾಯಾಲಯದ ಕಡತಗಳಲ್ಲಿ ಇದು ಕೇವಲ ಅರ್ಜಿದಾರರ ಹಿಂದೇಟಿನಿಂದ ವಜಾಗೊಂಡ ಪ್ರಕರಣವಾಗಿ ದಾಖಲಾದರೂ, ಅಧಿಕಾರದ ಪ್ರಭಾವದ ಮುಂದೆ ನೈಜ ಸಂಗತಿಗಳು ಎಂದಿಗೂ ಹೊರಬರಲಿಲ್ಲ ಎಂಬ ಅನುಮಾನಗಳು ಮಾತ್ರ ಇಂದಿಗೂ ಹಾಗೆಯೇ ಉಳಿದುಕೊಂಡಿವೆ.
2013-14ರ ಅವಧಿಯಲ್ಲಿ ಇಡೀ ದೇಶದ ರಾಜಕಾರಣದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದ ಮತ್ತು ‘ಸ್ನೂಪ್‌ಗೇಟ್’ ಎಂದೇ ಕುಖ್ಯಾತಿ ಪಡೆದಿದ್ದ ಪ್ರಕರಣದಲ್ಲಿ, ಅಂದಿನ ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿ ಅವರ ‘ಖಾಸಗಿ ಸಿಡಿ’ಯೊಂದು ಸುಪ್ರೀಂ ಕೋರ್ಟ್‌ಗೆ ಸಲ್ಲಿಕೆಯಾಗಿತ್ತೆ? ಎಂಬ ಪ್ರಶ್ನೆ ಆಗಾಗ್ಗೆ ರಾಜಕೀಯ ವಲಯದಲ್ಲಿ ಚರ್ಚೆಯಾಗುತ್ತಿರುತ್ತದೆ. ಅಮಾನತುಗೊಂಡಿದ್ದ ಗುಜರಾತ್‌ನ ಹಿರಿಯ ಐಎಎಸ್ ಅಧಿಕಾರಿ ಪ್ರದೀಪ್ ಶರ್ಮಾ, ಪ್ರಸ್ತುತ ಬಿಜೆಪಿ ನಾಯಕರಾಗಿರುವ ಅಂದಿನ ಎಎಪಿ ಶಾಸಕ ಕಪಿಲ್ ಮಿಶ್ರಾ, ಪ್ರಮುಖ ಚಿಂತಕಿ ಮಧು ಕಿಶ್ವರ್ ಹಾಗೂ ಸುಬ್ರಮಣಿಯನ್ ಸ್ವಾಮಿ ಅವರಂತಹ ಗಣ್ಯರ ಹೇಳಿಕೆಗಳು ಮತ್ತು ಸುಪ್ರೀಂ ಕೋರ್ಟ್‌ಗೆ ಸಲ್ಲಿಕೆಯಾದ ಅಧಿಕೃತ ಅಫಿಡವಿಟ್‌ಗಳ ಆಧಾರದ ಮೇಲೆ ಈ ಪ್ರಕರಣದ ನೈಜ ಸಂಗತಿಗಳನ್ನು ಇಲ್ಲಿ ಎಳೆಎಳೆಯಾಗಿ ವಿಶ್ಲೇಷಿಸಲಾಗಿದೆ.
ಪ್ರದೀಪ್ ಶರ್ಮಾ ಅವರ ಸ್ಫೋಟಕ ಅಫಿಡವಿಟ್
2013ರ ನವೆಂಬರ್‌ನಲ್ಲಿ, ಅಮಾನತುಗೊಂಡಿದ್ದ ಐಎಎಸ್ ಅಧಿಕಾರಿ ಪ್ರದೀಪ್ ಶರ್ಮಾ ಸುಪ್ರೀಂ ಕೋರ್ಟ್‌ಗೆ ಹೊಸದಾಗಿ ಅರ್ಜಿಯೊಂದನ್ನು ಸಲ್ಲಿಸಿದ್ದರು. 2004ರಲ್ಲಿ 27 ವರ್ಷದ ಯುವ ವಾಸ್ತುಶಿಲ್ಪಿಯನ್ನು (ಲೇಡಿ ಆರ್ಕಿಟೆಕ್ಟ್) ತಾವೇ ಖುದ್ದಾಗಿ ನರೇಂದ್ರ ಮೋದಿಯವರಿಗೆ ಪರಿಚಯಿಸಿದ್ದಾಗಿ ಶರ್ಮಾ ತಮ್ಮ ಅಫಿಡವಿಟ್‌ನಲ್ಲಿ ಉಲ್ಲೇಖಿಸಿದ್ದರು. ಶರ್ಮಾ ಅವರ ಗಂಭೀರ ಆರೋಪದ ಪ್ರಕಾರ, ಆ ಯುವತಿ ಮತ್ತು ಮೋದಿಯವರ ನಡುವೆ ‘ಆಪ್ತತೆ’ ಇತ್ತು. ಆಕೆಯ ಮತ್ತು ಓರ್ವ ಪುರುಷನ ಆಕ್ಷೇಪಾರ್ಹ ದೃಶ್ಯಗಳಿರುವ ವಿಡಿಯೊ ಕಾಂಪ್ಯಾಕ್ಟ್ ಡಿಸ್ಕ್ (VCD) ಒಂದು ತಮ್ಮ ಬಳಿ ಇದೆ ಎಂದು ಮೋದಿ ತಪ್ಪಾಗಿ ಭಾವಿಸಿದ್ದರು. ಈ ಸಿಡಿ (VCD) ಹೊರಬಂದರೆ ಎಚ್ಚರಿಕೆಯಿಂದ ಕಟ್ಟಿಕೊಂಡಿರುವ ತಮ್ಮ ವರ್ಚಸ್ಸಿಗೆ ಮತ್ತು ರಾಜಕೀಯ ಭವಿಷ್ಯಕ್ಕೆ ಧಕ್ಕೆಯಾಗಲಿದೆ ಎಂಬ ಭೀತಿಯಿಂದಲೇ ಮೋದಿಯವರು ತಮ್ಮ ವಿರುದ್ಧ 2010 ರಿಂದ 2012ರ ನಡುವೆ ಸುಳ್ಳು ಪ್ರಕರಣಗಳನ್ನು ದಾಖಲಿಸಿ ಜೈಲಿಗೆ ಕಳುಹಿಸುವ ಮೂಲಕ ಸೇಡು ತೀರಿಸಿಕೊಂಡರು ಎಂದು ಶರ್ಮಾ ಆರೋಪಿಸಿದ್ದರು.
ಕಪಿಲ್ ಮಿಶ್ರಾ ಅವರ ನೇರ ವಾಗ್ದಾಳಿ
ದೆಹಲಿ ವಿಧಾನಸಭೆಯಲ್ಲಿ 2016ರಲ್ಲಿ ಈ ವಿಚಾರವಾಗಿ ಮಾತನಾಡಿದ್ದ ಕಪಿಲ್ ಮಿಶ್ರಾ ಅವರು ಅಕ್ಷರಶಃ ಗುಡುಗಿದ್ದರು. “ಹಿರಿಯ ಐಎಎಸ್ ಅಧಿಕಾರಿಯೊಬ್ಬರು ಹಿಂದೂಸ್ತಾನದ ಸುಪ್ರೀಂ ಕೋರ್ಟ್‌ನಲ್ಲಿ ಅಫಿಡವಿಟ್ ಸಲ್ಲಿಸಿದ್ದು, ಅದರಲ್ಲಿ ಮೋದಿ ಮತ್ತು ಅಮಿತ್ ಶಾ ಅವರ ಕರಾಳ ಸತ್ಯವಿದೆ. ಎಎಪಿ ನಾಯಕ ಸಂದೀಪ್ ಕುಮಾರ್ ಅವರ ಸಿಡಿ ಹೊರಬಂದಾಗ ಅರವಿಂದ್ ಕೇಜ್ರಿವಾಲ್ ಅವರು ಕೇವಲ 15 ನಿಮಿಷಗಳಲ್ಲಿ ನಿರ್ದಾಕ್ಷಿಣ್ಯ ಕ್ರಮ ಕೈಗೊಂಡರು. ಆದರೆ, ಸುಪ್ರೀಂ ಕೋರ್ಟ್‌ನಲ್ಲಿರುವ 15 ನಿಮಿಷಗಳ ಮೋದಿ ಮತ್ತು ಅಮಿತ್ ಶಾ ಅವರ ರೆಕಾರ್ಡಿಂಗ್ ಮತ್ತು ಅಫಿಡವಿಟ್ ಬಗ್ಗೆ ಕಠಿಣ ನಿರ್ಧಾರ ತೆಗೆದುಕೊಳ್ಳುವ ಧೈರ್ಯ ಬಿಜೆಪಿಗೆ ಇದೆಯೇ?” ಎಂದು ಸವಾಲು ಹಾಕಿದ್ದರು. ಈ ಮೂಲಕ ಮೋದಿ ಸಿಡಿ ವಿಚಾರವನ್ನು ಅವರು ಸದನದ ಅಧಿಕೃತ ದಾಖಲೆಗೆ ತರುವ ಪ್ರಯತ್ನ ಮಾಡಿದ್ದರು.
ಇದನ್ನು ಓದಿದ್ದೀರಾ? ‘ದಲಿತ್ ಸುಬ್ಬಯ್ಯ’ ಎಂಬ ಪ್ರತಿರೋಧದ ಕಥನ ಎತ್ತುವ ಪ್ರಶ್ನೆಗಳು
ಟೆಲಿಗ್ರಾಫ್ ಕಾಯ್ದೆ ಉಲ್ಲಂಘನೆ
ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಲಾದ ದಾಖಲೆಗಳ ಪ್ರಕಾರ, ಯುವ ವಾಸ್ತುಶಿಲ್ಪಿಯ ಮೇಲೆ ಗುಜರಾತ್ ಸರ್ಕಾರದ ಇಂಟೆಲಿಜೆನ್ಸ್ ಬ್ಯೂರೋ ಮತ್ತು ಎಟಿಎಸ್ ತೀವ್ರ ನಿಗಾ ಇರಿಸಿತ್ತು. ಅಂದಿನ ಗುಜರಾತ್ ಗೃಹ ಸಚಿವ ಅಮಿತ್ ಶಾ ಮತ್ತು ಪೊಲೀಸ್ ಅಧಿಕಾರಿ ಜಿ.ಎಲ್. ಸಿಂಘಾಲ್ ನಡುವಿನ ಫೋನ್ ಸಂಭಾಷಣೆಗಳ ಟೇಪ್‌ಗಳು ಮಾಧ್ಯಮಗಳಲ್ಲಿ ಬಿಡುಗಡೆಯಾಗಿದ್ದವು. ಈ ಸಂಭಾಷಣೆಗಳಲ್ಲಿ ‘ಸಾಹೇಬ್’ ಅವರ ಆದೇಶದ ಮೇರೆಗೆ ಯುವತಿಯ ಪ್ರತಿಯೊಂದು ಚಲನವಲನಗಳ ಮೇಲೆ ಕಣ್ಗಾವಲು ಇರಿಸಲಾಗಿತ್ತು ಎಂಬುದು ಬಹಿರಂಗವಾಗಿತ್ತು. ಇದು ವೈಯಕ್ತಿಕ ಗೌಪ್ಯತೆಯ ಹಕ್ಕು ಮತ್ತು ಭಾರತೀಯ ಟೆಲಿಗ್ರಾಫ್ ಕಾಯ್ದೆ-1885ರ ಸ್ಪಷ್ಟ ಉಲ್ಲಂಘನೆ ಎಂದು ಶರ್ಮಾ ಪರ ವಕೀಲರು ಸುಪ್ರೀಂ ಕೋರ್ಟ್‌ನಲ್ಲಿ ಬಲವಾಗಿ ವಾದಿಸಿದ್ದರು.
ಮಧು ಕಿಶ್ವರ್, ಸುಬ್ರಮಣಿಯನ್ ಸ್ವಾಮಿ ಅವರ ನಿಲುವುಗಳು
ಈ ವಿವಾದವು ಬೇರೆಯದೇ ಆಯಾಮವನ್ನು ಪಡೆದುಕೊಂಡಿದ್ದು ಚಿಂತಕಿ ಮಧು ಕಿಶ್ವರ್ ಅವರ ಹೇಳಿಕೆಗಳಿಂದ. ಯುವತಿಯ ಮೇಲೆ ಕಣ್ಗಾವಲು ಇರಿಸಿದ್ದು ಮೋದಿಯವರ ಸೂಚನೆಯ ಮೇರೆಗಲ್ಲ, ಬದಲಾಗಿ ಆ ಯುವತಿಯ ತಂದೆಯೇ ತಮ್ಮ ಮಗಳನ್ನು ಪ್ರದೀಪ್ ಶರ್ಮಾ ಅವರ ಕಿರುಕುಳದಿಂದ ರಕ್ಷಿಸಲು ಸರ್ಕಾರದಿಂದ ಪೊಲೀಸ್ ಭದ್ರತೆ ಕೋರಿದ್ದರು ಎಂದು ಮಧು ಮಧು ಕಿಶ್ವರ್ ಟಿವಿ ಚರ್ಚೆಗಳಲ್ಲಿ ಮತ್ತು ಟ್ವಿಟರ್‌ನಲ್ಲಿ ಪ್ರಬಲವಾಗಿ ವಾದಿಸಿದ್ದರು. ಇದರಿಂದ ತಮ್ಮ ತೇಜೋವಧೆಯಾಗಿದೆ ಎಂದು ಆರೋಪಿಸಿ ಪ್ರದೀಪ್ ಶರ್ಮಾ ಅವರು ಮಧು ಮಧು ಕಿಶ್ವರ್ ವಿರುದ್ಧ ಕ್ರಿಮಿನಲ್ ಮಾನನಷ್ಟ ಮೊಕದ್ದಮೆಯನ್ನು ದಾಖಲಿಸಿದ್ದರು. ಅಹಮದಾಬಾದ್ ನ್ಯಾಯಾಲಯ ಅದನ್ನು ವಿಚಾರಣೆಗೆ ಅಂಗೀಕರಿಸಿತ್ತು ಕೂಡ. ಇನ್ನು ಬಿಜೆಪಿ ನಾಯಕ ಸುಬ್ರಮಣಿಯನ್ ಸ್ವಾಮಿ ಅವರಂತಹ ಮುಖಂಡರು ಇಂತಹ ಸೂಕ್ಷ್ಮ ರಾಜಕೀಯ ವಿವಾದಗಳ ಬಗ್ಗೆ ತಮ್ಮದೇ ಆದ ವಿಶಿಷ್ಟ ಶೈಲಿಯಲ್ಲಿ ಪ್ರತಿಕ್ರಿಯಿಸುತ್ತಾ ಬಂದಿದ್ದು, ರಾಜಕೀಯ ವಲಯದಲ್ಲಿ ಇದು ಬಿಸಿಬಿಸಿ ಚರ್ಚೆಯ ವಿಷಯವಾಗಿತ್ತು.
ಭಾರಿ ಕುತೂಹಲ ಕೆರಳಿಸಿದ್ದ ಈ ಕಾನೂನು ಹೋರಾಟದಲ್ಲಿ ಪ್ರದೀಪ್ ಶರ್ಮಾ ಅವರಿಗೆ ಕೊನೆಗೂ ಹಿನ್ನಡೆಯಾಯಿತು. ಆಗಸ್ಟ್ 13, 2014 ರಂದು ಸುಪ್ರೀಂ ಕೋರ್ಟ್ ನೀಡಿದ ತೀರ್ಪಿನಲ್ಲಿ, ಸಿಬಿಐ ತನಿಖೆಗೆ ಕೋರಿದ್ದ ಶರ್ಮಾ ಅವರ ಅರ್ಜಿಯನ್ನು ಸ್ಪಷ್ಟವಾಗಿ ವಜಾಗೊಳಿಸಿತು. ಗಮನಾರ್ಹ ಸಂಗತಿಯೆಂದರೆ, ಶರ್ಮಾ ಅವರ ಪರ ಹಿರಿಯ ವಕೀಲರಾಗಿದ್ದ ಕಾಲಿನ್ ಗೊನ್ಸಾಲ್ವಿಸ್ ಅವರು ನ್ಯಾಯಾಲಯದ ಕಲಾಪದ ವೇಳೆ ಸ್ವತಃ ಹೇಳಿಕೆ ನೀಡಿ, “ಮುಖ್ಯಮಂತ್ರಿಯವರ (ಮೋದಿ) ವಿರುದ್ಧ ಯಾವುದೇ ವೈಯಕ್ತಿಕ ಅನುಚಿತ ವರ್ತನೆಯ ಆರೋಪಗಳನ್ನು ಮಾಡುವ ಕನಿಷ್ಠ ಉದ್ದೇಶವೂ ನಮಗಿಲ್ಲ” ಎಂದು ತಿಳಿಸಿದ್ದರು. ಇದರ ಅನ್ವಯ ಅಫಿಡವಿಟ್‌ನಲ್ಲಿದ್ದ ಆಕ್ಷೇಪಾರ್ಹ ಭಾಗಗಳನ್ನು ಅಧಿಕೃತವಾಗಿ ಹಿಂಪಡೆಯಲಾಗಿತ್ತು
ಮುಚ್ಚಿಹೋದ ಸತ್ಯ ಮತ್ತು ಉಳಿದುಕೊಂಡ ಅನುಮಾನಗಳು
ಭಾರಿ ಕುತೂಹಲ ಕೆರಳಿಸಿದ್ದ ಈ ‘ಸ್ನೂಪ್‌ಗೇಟ್’ ಮತ್ತು ‘ಖಾಸಗಿ ಸಿಡಿ’ ಪ್ರಕರಣದ ಅಂತ್ಯವು ಹಲವು ರಾಜಕೀಯ ಅನುಮಾನಗಳಿಗೆ ಎಡೆಮಾಡಿಕೊಟ್ಟಿತು. ಅಧಿಕೃತ ನ್ಯಾಯಾಲಯದ ದಾಖಲೆಗಳ ಪ್ರಕಾರ, ಪ್ರದೀಪ್ ಶರ್ಮಾ ಅವರ ಪರ ವಕೀಲರು ದಿಢೀರನೆ ಮೋದಿಯವರ ಮೇಲಿದ್ದ ‘ವೈಯಕ್ತಿಕ ಆರೋಪಗಳನ್ನು’ ಹಿಂಪಡೆದರು. ಹೀಗೆ ಅರ್ಜಿದಾರರೇ ಸ್ವತಃ ಆರೋಪಗಳಿಂದ ಹಿಂದೆ ಸರಿದಿದ್ದರಿಂದ, ಸುಪ್ರೀಂ ಕೋರ್ಟ್ 2014ರಲ್ಲಿ ತನಿಖೆಯ ಅರ್ಜಿಯನ್ನು ವಜಾಗೊಳಿಸಿತು.
ಆದರೆ, ಅಧಿಕಾರದ ಬಲವಂತ, ತನಿಖಾ ಸಂಸ್ಥೆಗಳ ಮೂಲಕ ಹಾಕಲಾದ ಒತ್ತಡ ಹಾಗೂ ಆಮಿಷಗಳಿಂದಾಗಿಯೇ ಈ ಪ್ರಕರಣದಲ್ಲಿ ಸತ್ಯವನ್ನು ವ್ಯವಸ್ಥಿತವಾಗಿ ಮುಚ್ಚಿಹಾಕಲಾಯಿತು ಮತ್ತು ಅರ್ಜಿದಾರರು ನ್ಯಾಯಾಲಯದಲ್ಲಿ ಆರೋಪಗಳನ್ನು ಹಿಂಪಡೆಯುವಂತೆ ಮಾಡಲಾಯಿತು ಎಂಬ ಬಲವಾದ ಆರೋಪಗಳು ವಿರೋಧ ಪಕ್ಷಗಳಿಂದ ಕೇಳಿಬಂದವು. ನ್ಯಾಯಾಲಯದ ಕಡತಗಳಲ್ಲಿ ಇದು ಕೇವಲ ಅರ್ಜಿದಾರರ ಹಿಂದೇಟಿನಿಂದ ವಜಾಗೊಂಡ ಪ್ರಕರಣವಾಗಿ ದಾಖಲಾದರೂ, ಅಧಿಕಾರದ ಪ್ರಭಾವದ ಮುಂದೆ ನೈಜ ಸಂಗತಿಗಳು ಎಂದಿಗೂ ಹೊರಬರಲಿಲ್ಲ ಎಂಬ ಅನುಮಾನಗಳು ಮಾತ್ರ ಇಂದಿಗೂ ಹಾಗೆಯೇ ಉಳಿದುಕೊಂಡಿವೆ.
