ಉತ್ತರ ಅಮೆರಿಕ ಖಂಡದಲ್ಲಿ ಆರಂಭವಾಗಿರುವ 2026ರ ಫಿಫಾ ವಿಶ್ವಕಪ್ ಫುಟ್ಬಾಲ್ ಟೂರ್ನಿಯು ಈ ಬಾರಿ ಹಲವು ವಿಶೇಷತೆಗಳಿಗೆ ಸಾಕ್ಷಿಯಾಗಲಿದೆ. ದಾಖಲೆಯ 48 ತಂಡಗಳು ಮತ್ತು ಬರೋಬ್ಬರಿ 1,248 ಆಟಗಾರರು ಈ ಮಹಾಸಮರದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಕ್ರೀಡಾಭಿಮಾನಿಗಳ ಕುತೂಹಲ ತಣಿಸುವ ನಿಟ್ಟಿನಲ್ಲಿ, ಪಂದ್ಯಾವಳಿಯ ಪ್ರಮುಖ ಅಂಕಿ-ಅಂಶಗಳು ಮತ್ತು ವಾಸ್ತವಿಕ ಮಾಹಿತಿಗಳ ವಿವರ ಇಲ್ಲಿದೆ.
ಅತಿ ಹಿರಿಯ ಹಾಗೂ ಕಿರಿಯ ಆಟಗಾರರು
ಈ ಬಾರಿಯ ಫುಟ್ಬಾಲ್ ಹಬ್ಬವು ಅಮೆರಿಕ, ಕೆನಡಾ ಮತ್ತು ಮೆಕ್ಸಿಕೊ ದೇಶಗಳಾದ್ಯಂತ ನಡೆಯಲಿದ್ದು, ಒಟ್ಟು 16 ಆತಿಥೇಯ ನಗರಗಳನ್ನು ಆಯ್ಕೆ ಮಾಡಲಾಗಿದೆ. ಈ ಪೈಕಿ ಅತಿ ಹೆಚ್ಚು, ಅಂದರೆ 11 ನಗರಗಳು ಅಮೆರಿಕದಲ್ಲಿವೆ. ಸ್ಕಾಟ್ಲೆಂಡ್ ತಂಡದ 43 ವರ್ಷದ ಕ್ರೇಗ್ ಗಾರ್ಡನ್ ಅವರು ಈ ಬಾರಿಯ ವಿಶ್ವಕಪ್‌ನಲ್ಲಿ ಕಣಕ್ಕಿಳಿಯುತ್ತಿರುವ ಅತಿ ಹಿರಿಯ ಆಟಗಾರರಾಗಿದ್ದಾರೆ. ಅಷ್ಟೇ ಅಲ್ಲದೆ, ಇವರು ವಿಶ್ವಕಪ್ ಇತಿಹಾಸದಲ್ಲೇ ಆಡುತ್ತಿರುವ ಎರಡನೇ ಅತಿ ಹಿರಿಯ ಫುಟ್‌ಬಾಲಿಗ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಲಿದ್ದಾರೆ. ಇವರೊಂದಿಗೆ ಪೋರ್ಚುಗಲ್‌ನ ದಂತಕಥೆ 41 ವರ್ಷದ ಕ್ರಿಸ್ಟಿಯಾನೊ ರೊನಾಲ್ಡೊ ತಮ್ಮ ವೃತ್ತಿಜೀವನದ 6ನೇ ವಿಶ್ವಕಪ್ ಆಡುತ್ತಿದ್ದಾರೆ. 40 ವರ್ಷದ ಲುಕಾ ಮೊಡ್ರಿಕ್ (ಕ್ರೊಯೇಷಿಯಾ) ಮತ್ತು ಗಿಲ್ಲೆರ್ಮೊ ಓಚೋವಾ (ಮೆಕ್ಸಿಕೊ) ಕೂಡ 40ರ ಹರೆಯದ ಪ್ರಮುಖ ಆಟಗಾರರಾಗಿದ್ದಾರೆ.
ಮತ್ತೊಂದೆಡೆ, ಮೆಕ್ಸಿಕೊ ತಂಡದ 17 ವರ್ಷದ ಗಿಲ್ಬರ್ಟೊ ಮೊರಾ ಅವರು ಈ ಟೂರ್ನಿಯ ಅತಿ ಕಿರಿಯ ಆಟಗಾರ ಎನಿಸಿಕೊಂಡಿದ್ದಾರೆ. ಮೆಕ್ಸಿಕೊ ತಂಡವನ್ನು ಪ್ರತಿನಿಧಿಸುತ್ತಿರುವ ಅತಿ ಕಿರಿಯ ಆಟಗಾರ ಎಂಬ ದಾಖಲೆ ಇವರದ್ದಾದರೂ, ವಿಶ್ವಕಪ್ ಇತಿಹಾಸದ ಅತಿ ಕಿರಿಯ ಆಟಗಾರ ಎಂಬ ಒಟ್ಟಾರೆ ದಾಖಲೆ ಇನ್ನೂ 1982ರಲ್ಲಿ ಆಡಿದ ನಾರ್ದರ್ನ್ ಐರ್ಲೆಂಡ್‌ನ ನಾರ್ಮನ್ ವೈಟ್‌ಸೈಡ್ ಹೆಸರಿನಲ್ಲೇ ಇದೆ.
ಅತಿ ಹೆಚ್ಚು ಬಾರಿ ದಾಖಲಾದ ಫಲಿತಾಂಶ
ಫುಟ್‌ಬಾಲ್‌ನಲ್ಲಿ ಸಾಮಾನ್ಯವಾಗಿ ಕಡಿಮೆ ಗೋಲುಗಳು ದಾಖಲಾಗುತ್ತವೆ ಎಂಬುದನ್ನು ವಿಶ್ವಕಪ್ ಇತಿಹಾಸವೇ ಸಾಬೀತುಪಡಿಸಿದೆ. ಈವರೆಗೆ ನಡೆದಿರುವ ಪಂದ್ಯಗಳ ಪೈಕಿ ಒಟ್ಟು 182 ಪಂದ್ಯಗಳು (ಅಂದರೆ ಶೇ. 20ರಷ್ಟು) ‘1-0’ ಗೋಲುಗಳ ಅಂತರದಲ್ಲಿ ಅಂತ್ಯಗೊಂಡಿದ್ದು, ಇದು ಅತ್ಯಂತ ಸಾಮಾನ್ಯ ಫಲಿತಾಂಶವಾಗಿದೆ. ತದನಂತರ ‘2-1’ ಅಂತರದ ಫಲಿತಾಂಶ ಅತಿ ಹೆಚ್ಚು ಬಾರಿ ಬಂದಿದೆ. ಇನ್ನು 1982ರ ವಿಶ್ವಕಪ್‌ನ ಉದ್ಘಾಟನಾ ಹಂತದ ಪಂದ್ಯದಲ್ಲಿ ಎಲ್ ಸಾಲ್ವಡಾರ್ ವಿರುದ್ಧ ಹಂಗೇರಿ 10-1 ಗೋಲುಗಳ ಅಂತರದಿಂದ ಜಯ ಸಾಧಿಸಿದ್ದು ಒಂದು ಪಂದ್ಯದಲ್ಲಿ ದಾಖಲಾದ ಅತಿ ಹೆಚ್ಚು ಗೋಲುಗಳ ಅಪರೂಪದ ದಾಖಲೆಯಾಗಿದೆ.
ಇದನ್ನು ಓದಿದ್ದೀರಾ? ಮೆಸ್ಸಿ-ರೊನಾಲ್ಡೊ ದಂತಕತೆಗಳ ಕಡೆಯ ಮೋಡಿ: ಜಾಗತಿಕ ಫುಟ್ಬಾಲ್ ಜಾತ್ರೆಗೆ ಜಗತ್ತು ಸಜ್ಜು
ಅತಿ ಹೆಚ್ಚು ‘ರೆಡ್ ಕಾರ್ಡ್’ ಪಡೆದವರು
ಮೈದಾನದಲ್ಲಿ ಗಂಭೀರ ತಪ್ಪು ಮಾಡಿದರೆ ಆಟಗಾರನಿಗೆ ‘ರೆಡ್ ಕಾರ್ಡ್’ ನೀಡಿ ಹೊರಕಳುಹಿಸಲಾಗುತ್ತದೆ. 1930ರಿಂದ ಈವರೆಗೆ ಬ್ರೆಜಿಲ್ ತಂಡ 9 ಪಂದ್ಯಗಳಲ್ಲಿ ಒಟ್ಟು 11 ರೆಡ್ ಕಾರ್ಡ್‌ಗಳನ್ನು ಪಡೆದಿದ್ದು, ಇದು ತಂಡವೊಂದು ಪಡೆದ ಅತಿ ಹೆಚ್ಚು ರೆಡ್ ಕಾರ್ಡ್‌ಗಳಾಗಿವೆ (ಬ್ರೆಜಿಲ್ ಕೊನೆಯದಾಗಿ 2010ರಲ್ಲಿ ರೆಡ್ ಕಾರ್ಡ್ ಪಡೆದಿತ್ತು). ಆಟಗಾರರ ಪೈಕಿ ಕ್ಯಾಮರೂನ್‌ನ ರಿಗೊಬರ್ಟ್ ಸಾಂಗ್ ಮತ್ತು ಫ್ರಾನ್ಸ್‌ನ ಜಿನೆಡಿನ್ ಜಿಡಾನೆ ಮಾತ್ರ ವಿಶ್ವಕಪ್ ಇತಿಹಾಸದಲ್ಲಿ ತಲಾ ಎರಡು ಬಾರಿ ರೆಡ್ ಕಾರ್ಡ್ ಪಡೆದಿದ್ದಾರೆ. 2006ರ ಫೈನಲ್‌ನಲ್ಲಿ ಜಿಡಾನೆ ಅವರು ಇಟಲಿ ಆಟಗಾರನ ಎದೆಗೆ ತಲೆಯಿಂದ ಗುದ್ದಿ ರೆಡ್ ಕಾರ್ಡ್ ಪಡೆದದ್ದು ವಿಶ್ವಕಪ್ ಇತಿಹಾಸದ ಕರಾಳ ಘಟನೆಗಳಲ್ಲಿ ಒಂದಾಗಿದೆ.
ಕ್ಲಬ್‌ವೊಂದರ ಅತಿ ಹೆಚ್ಚು ಪ್ರತಿನಿಧ್ಯ
ಇಂಗ್ಲಿಷ್ ಪ್ರೀಮಿಯರ್ ಲೀಗ್‌ನ (EPL) ಪ್ರಸಿದ್ಧ ‘ಮ್ಯಾಂಚೆಸ್ಟರ್ ಸಿಟಿ’ ಕ್ಲಬ್‌ನ ಬರೋಬ್ಬರಿ 19 ಆಟಗಾರರು ಈ ವಿಶ್ವಕಪ್‌ನಲ್ಲಿ ವಿವಿಧ ದೇಶಗಳನ್ನು ಪ್ರತಿನಿಧಿಸುತ್ತಿದ್ದಾರೆ. ಈ ಆಟಗಾರರು 3 ಖಂಡಗಳ 12 ವಿವಿಧ ರಾಷ್ಟ್ರೀಯ ತಂಡಗಳ ಪರ (ಉದಾಹರಣೆಗೆ; ಬೆಲ್ಜಿಯಂ, ಇಂಗ್ಲೆಂಡ್, ಫ್ರಾನ್ಸ್, ಸ್ಪೇನ್, ಪೋರ್ಚುಗಲ್ ಇತ್ಯಾದಿ) ಕಣಕ್ಕಿಳಿಯುತ್ತಿರುವುದು ಈ ಬಾರಿಯ ವಿಶೇಷತೆಯಾಗಿದೆ.
ಅಮೆರಿಕ ತಂಡದ ವಿಶ್ವಕಪ್ ಇತಿಹಾಸ
ಅಮೆರಿಕ ತಂಡವು ಇದುವರೆಗೆ 12 ಬಾರಿ ಫಿಫಾ ವಿಶ್ವಕಪ್‌ನಲ್ಲಿ ಸ್ಪರ್ಧಿಸಿದೆ. 1930ರಲ್ಲಿ ನಡೆದ ಮೊದಲ ವಿಶ್ವಕಪ್‌ನಲ್ಲಿ 13 ತಂಡಗಳ ಪೈಕಿ 3ನೇ ಸ್ಥಾನ ಪಡೆದದ್ದು ಅದರ ಅತ್ಯುತ್ತಮ ಸಾಧನೆಯಾಗಿದೆ. ಇತ್ತೀಚಿನ ವರ್ಷಗಳ ಸಾಧನೆಯನ್ನು ಗಮನಿಸಿದರೆ, 2002ರಲ್ಲಿ ಕ್ವಾರ್ಟರ್-ಫೈನಲ್ ಪ್ರವೇಶಿಸಿ 8ನೇ ಸ್ಥಾನ ಪಡೆದಿದ್ದು ಮೈಲಿಗಲ್ಲಾಗಿದೆ. ಕಳೆದ 2022ರ ವಿಶ್ವಕಪ್‌ನಲ್ಲಿ ಅಮೆರಿಕ ತಂಡ 14ನೇ ಸ್ಥಾನ ಪಡೆದಿತ್ತು.
