- ಭೋಜನ ವಿರಾಮದ ವೇಳೆಗೆ ಆಸ್ಟ್ರೇಲಿಯಾ 422/7
- ಭಾರತದ ವಿರುದ್ಧ 9ನೇ ಶತಕ ದಾಖಲಿಸಿದ ಸ್ಟೀವ್ ಸ್ಮಿತ್
ಲಂಡನ್‌ನ ದಿ ಓವಲ್‌ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ ಪಂದ್ಯ ಎರಡನೇ ದಿನ ಆಸ್ಟ್ರೇಲಿಯಾದ ದಿಗ್ಗಜ ಬ್ಯಾಟರ್‌ ಸ್ಟೀವ್ ಸ್ಮಿತ್ ಶತಕ ಪೂರ್ತಿಗೊಳಿಸಿದ್ದಾರೆ.
95 ರನ್‌ಗಳಿಂದ ಗುರುವಾರ ಬ್ಯಾಟಿಂಗ್‌ ಆರಂಭಿಸಿದ್ದ ಸ್ಮಿತ್, ಸಿರಾಜ್‌ ಎಸೆದ ದಿನದಾಟದ ಮೊದಲ ಓವರ್‌ನಲ್ಲೇ ಸತತ ಎರಡು ಬೌಂಡರಿಗಳನ್ನು ಬಾರಿಸುವ ಮೂಲಕ ಮೂರಂಕಿಯ ಮೊತ್ತವನ್ನು ತಲುಪಿದರು.
ವೃತ್ತಿ ಜೀವನದ 97ನೇ ಟೆಸ್ಟ್ ಪಂದ್ಯದಲ್ಲಿ 31ನೇ ಶತಕ ದಾಖಲಿಸಿದ 35 ವರ್ಷದ ಸ್ಮಿತ್, ಆ ಮೂಲಕ ಜೋ ರೂಟ್ ಅವರ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಭಾರತದ ವಿರುದ್ಧ ಸ್ಮಿತ್ ದಾಖಲಿಸಿದ 9ನೇ ಶತಕ ಇದಾಗಿದೆ.
ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತದ ವಿರುದ್ಧ ಅತಿ ಹೆಚ್ಚು ಶತಕದ (9) ದಾಖಲೆ ಇಂಗ್ಲೆಂಡ್‌ನ ಬ್ಯಾಟರ್‌ ಜೋ ರೂಟ್ ಹೆಸರಿನಲ್ಲಿದೆ. ಇದೀಗ ಸ್ಟೀವ್ ಸ್ಮಿತ್ ರೂಟ್ ದಾಖಲೆಯನ್ನು ಸರಿಗಟ್ಟಿದ್ದಾರೆ.
ಆಸ್ಟ್ರೇಲಿಯಾ ಪರ ಅತಿ ಹೆಚ್ಚು ಟೆಸ್ಟ್ ಶತಕ ಸಿಡಿಸಿದ ಆಟಗಾರರ ಪಟ್ಟಿಯಲ್ಲಿಸ್ಟೀವ್‌ ಸ್ಮಿತ್ ಮೂರನೇ ಸ್ಥಾನಕ್ಕೇರಿದ್ದಾರೆ. ರಿಕಿ ಪಾಂಟಿಂಗ್ (41 ಶತಕ) ಸ್ಟೀವ್ ವಾ (32 ಕ್ರಮವಾಗಿ ಮೊದಲೆರಡು ಸ್ಥಾನಗಳಿದ್ದಾರೆ.
229 ಎಸೆತಗಳಲ್ಲಿ ಶತಕ ತಲುಪಿದ ಸ್ಮಿತ್, 121 ರನ್‌ಗಳಿಸಿದ್ದ ವೇಳೆ ಶಾರ್ದೂಲ್‌ ಠಾಕೂರ್‌ ಬೌಲಿಂಗ್‌ನಲ್ಲಿ ಕ್ಲೀನ್‌ ಬೌಲ್ಡ್‌ ಆಗುವ ಮೂಲಕ ನಿರ್ಗಮಿಸಿದರು.
ಭೋಜನ ವಿರಾಮದ ವೇಳೆಗೆ ಆಸ್ಟ್ರೇಲಿಯಾ 422/7
3 ವಿಕೆಟ್ ನಷ್ಟದಲ್ಲಿ 327 ರನ್ ಗಳಿಂದ ಎರಡನೇ ದಿನದಾಟ ಆರಂಭಿಸಿದ್ದ ಆಸ್ಟ್ರೇಲಿಯಾ ತಂಡ, ಗುರುವಾರ ಭೊಜನ ವಿರಾಮದ ವೇಳೆಗೆ 7 ವಿಕೆಟ್ ನಷ್ಟದಲ್ಲಿ 422 ರನ್‌ಗಳಿಸಿದೆ. ಮೊದಲ ದಿನ 146ರನ್ ಗಳಿಸಿ ಅಜೇಯರಾಗುಳಿದಿದ್ದ ಟ್ರಾವಿಸ್‌ ಹೆಡ್‌, 163 ರನ್‌ಗಳಿಸಿದ್ದ ವೇಳೆ ಸಿರಾಜ್‌ ಬೌಲಿಂಗ್‌ನಲ್ಲಿ ಕೀಪರ್‌ ಭರತ್‌ಗೆ ಕ್ಯಾಚಿತ್ತು ವಾಪಾಸ್ಸಾದರು.
22 ರನ್‌ಗಳಿಸಿರುವ ವಿಕೆಟ್ ಕೀಪರ್‌ ಅಲೆಕ್ಸ್‌ ಕ್ಯಾರಿ ಮತ್ತು 2 ರನ್‌ಗಳೊಂದಿಗೆ ಕ್ಯಾಪ್ಟನ್‌ ಕಮ್ಮಿನ್ಸ್‌ ಕ್ರೀಸ್‌ನಲ್ಲಿದ್ದಾರೆ.
